Ang Nagkasumpaki nga Panglantaw Bahin sa Trabaho

“Magtrabaho—magtrabaho! Dili gayod matupngan ang kalipay nga mahibalo nga kita aduna gihapoy trabaho.”—Katherine Mansfield, awtor (1888-1923).

IKAW ba adunay mithianong panglantaw sa trabaho sama sa gipahayag sa mga pulong sa itaas? Unsay imong kaugalingong panglantaw sa trabaho? Gibati ba nimo nga ang trabaho maoy usa ka buluhaton nga kinahanglang antoson kada adlaw una pa makapahayahay sa hinapos sa semana? O basin ganahan kaayo ka sa imong trabaho mao nga gikabuangan na nimo kini?

Alang sa kadaghanang tawo, ang kinadak-ang bahin sa ilang panahon gigugol sa trabaho. Tingali ang trabaho maoy magdiktar kon asa kita mopuyo o kon unsay atong estilo sa kinabuhi. Gikan sa pagkahingkod hangtod sa pagretiro, nakita sa daghang tawo nga ang trabaho maoy kasagarang nagkontrolar sa ilang kinabuhi. Ang pipila kanato mobatig dakong personal nga katagbawan sa atong trabaho. Ang uban mosukod sa kahinungdanon sa ilang trabaho segun sa kita o kadungganan, samtang giisip sa uban ang trabaho ingong pagpalabay lang sa oras o pag-usik lang sa panahon.

Adunay mga tawong nagtrabaho aron mabuhi ug may mga tawong nagkinabuhi alang sa trabaho; ang uban nangamatay tungod sa ilang trabaho. Pananglitan, sumala sa bag-ong taho sa Hiniusang Kanasoran, mas daghan ang nag-antos sa kasakit ug nangamatay tungod sa trabaho “kay sa nangamatay sa mga gubat o pag-abuso sa droga ug alkoholikong ilimnon kon tiponon.” Nagkomento bahin niana, ang mantalaang The Guardian sa London nagtaho: “Kapin sa duha ka milyong tawo ang mangamatay kada tuig tungod sa mga aksidente o sakit nga ipahinabo sa trabaho . . . Ang pagkaladlad sa abog, mga kemikal, kabanha ug radyasyon nagpahinabog kanser, sakit sa kasingkasing ug estrok.” Ang pagpatrabaho sa mga bata ug ang pinugos nga trabaho maoy duha lang sa mangil-ad apan tinuod nga kahimtang sa pagpanarbaho karon.

Dugang pa niana, ang sikologong si Steven Berglas naghisgot bahin sa “sobrang paghago sa lawas.” Iyang gihubit ang usa ka kugihang trabahante nga nakaabot na sa tayuktok sa iyang karera apan mibati ug “sugmat-sugmat nga kabalaka, kagul-anan, kawalay-paglaom o depresyon tungod sa pagtuo nga siya natanggong sa usa ka trabaho, o karera, nga dili na niya kaikyasan ni makahatag kaniyag katagbawan.”

Pagkakugihan Kontra Pagkagumon sa Trabaho

Sa usa ka kalibotan diin daghan ang naghago sa daghang oras, hinungdanong mailhan ang kalainan sa kugihang mga trabahante ug sa nagumon nga mga trabahante. Daghang tawo nga nagumon sa trabaho nag-isip sa trabahoan ingong dapit sa kasegurohan diha sa usa ka peligroso, dili-matag-an nga kalibotan; ang mga kugihan nag-isip sa  trabaho ingong hinungdanon ug usahay makapatagbaw nga obligasyon. Gitugotan sa mga tawong nagumon sa trabaho nga matabonan niini ang tanang ubang mga bahin sa kinabuhi; ang mga kugihan nahibalo kon kanus-a mohunong sa pagtrabaho, mobalhin sa ilang pagtagad, ug mosaulog sa ilang anibersaryo sa kasal imbes magtrabaho. Ang mga tawong nagumon sa trabaho mobatig katagbawan ug kalagsik sa sobrang pagtrabaho; ang mga kugihan dili mobati niana.

Ang modernong katilingban maoy nakaingon kon nganong dili mailhan ang kalainan tali niining duha tungod kay gihimo nilang madanihon ang sobrang pagtrabaho. Tungod sa pagbaton ug mga cell phone ug kaamgid nga mga kagamitan, lisod nga mahibaloan kon ang usa anaa ba sa trabahoan o anaa sa balay. Kon ang bisan unsang lugar himoong trabahoan ug ang bisan unsang oras himoong panahon sa trabaho, ang uban maghinobra sa pagtrabaho hangtod sa punto nga mautas sila.

Unsay reaksiyon sa pipila ka tawo bahin niining dili-maayong tinamdan? Namatikdan sa mga sosyologo nga nadala na sa mga tawong nasobrahan sa pagtrabaho ug mibatig grabeng kapit-os ang pagkadiyosnon ug pagkarelihiyoso diha sa ilang trabahoan ug propesyon. Ang San Francisco Examiner nagtaho nga “nauso na karon sa mga tawo ang pagkadiyosnon diha sa trabahoan.”

Mahitungod sa Silicon Valley, ang sentro sa moderno kaayong teknolohiya sa Tinipong Bansa, usa ka bag-ong taho nag-ingon: “Nakita sa mga ehekutibo nga nagkadaghan ang bakanteng mga luna sa parkinganan diha sa trabahoan tungod sa padayong pagtaktak sa mga trabahante, samtang kulang ang mga parkinganan sa mga dapit nga dunay gihimong mga pagtuon sa Bibliya magabii.” Kon unsa man ugaling ang ipasabot niana, daghang tawo sa tibuok kalibotan ang nakaamgo nga ang Bibliya dunay maayong epekto sa ilang panglantaw bahin sa trabaho, nga miresulta ug mas timbang nga panglantaw sa kinabuhi.

Sa unsang paagi makatabang kanato ang Bibliya sa pagbaton ug timbang nga panglantaw bahin sa trabaho? Aduna bay Kasulatanhong mga prinsipyo nga makatabang kanato aron magmalamposon sa pag-atubang sa mga problema diha sa modernong trabahoan? Tubagon sa sunod nga artikulo kining mga pangutanaha.