“Gilutos Tungod sa Iyang Pagtuo”
“Gilutos Tungod sa Iyang Pagtuo”
ANG lungsod sa Cernobbio sa amihanang Italya nagtukod ug handomanan diha sa lokal nga parke agig paghinumdom sa mga biktima sa paglapas sa tawhanong katungod. Usa sa mga plake nga gidispley gipahinungod kang Narciso Riet. Natawo sa Alemanya apan Italyano ug kagikan, si Riet nahimong usa sa mga Saksi ni Jehova sa katuigang 1930. Panahon sa pagmando ni Hitler, ang mga Saksi ni Jehova gilutos tungod kay gisunod nila ang matuod nga Diyos, si Jehova, inay si Hitler.
Sa dihang nadiskobrehan sa Gestapo nga si Riet nalangkit sa pagpayuhot sa mga kopya sa Ang Bantayanang Torre ngadto sa mga kampong konsentrasyon, siya mikalagiw ngadto sa Cernobbio. Didto, gihangyo siya sa paghubad sa Ang Bantayanang Torre ngadto sa pinulongang Italyano ug sa pag-apod-apod niini ngadto sa iyang mga isigkamagtutuo nga nagpuyo sa duol. Ang iyang masibotong kalihokan nadiskobrehan. Gironda sa usa ka opisyal sa SS ug sa iyang mga sundalo ang balay ni Riet, giaresto siya, ug gikuha ang ebidensiya sa “krimen”—duha ka Bibliya ug pipila ka mga sulat! Si Riet gidestiyero sa Alemanya, gibalhog sa kampong konsentrasyon sa Dachau, ug gipatay sa hapit nang matapos ang Gubat sa Kalibotan II. Siya “gilutos tungod sa iyang pagtuo,” nag-ingon ang plake sa Cernobbio.
Ang pagtuo ni Narciso Riet ug sa daghan pang ubang mga Saksi nga gilutos sa Nazi nagdasig sa mga Kristohanon karon sa pagpabiling matinumanon kang Jehova, ang bugtong Persona sa uniberso nga takos sa ilang pagsimba. (Pinadayag 4:11) Si Jesus miingon: “Malipayon kadtong ginalutos tungod sa pagkamatarong.” Pagahinumdoman ug pagagantihan gayod sa Diyos ang ilang mga binuhatan.—Mateo 5:10; Hebreohanon 6:10.