Mga Batan-on, Dayega Ninyo si Jehova!

“Dayega ninyo si Jehova gikan sa yuta, . . . kamong mga batan-ong lalaki ug kamong mga ulay usab.”—SALMO 148:7, 12.

1, 2. (a) Daghang bata ug mga batan-on ang nahibalo sa unsang matang sa mga pagdili? (b) Nganong ang mga batan-on dili angayng mayugot sa mga pagdili nga gipatuman sa ilang mga ginikanan?

 ANG mga bata ug mga batan-on subsob nga nahibalo gayod kon unsay wala pa itugot kanila. Daghan kanila ang makasulti dayon nimo kon unsang edara sila tugotan sa pagtabok sa karsada nga mag-inusara o hangtod unsang orasa sila magpulaw o kon kanus-a sila makadrayb ug awto. Usahay, ang usa ka batan-on mobati tingali nga daghan kaayong hangyo nga gikahinaman niyang matuman ang tubagon gihapon ug, “Paghulat lang kon hohamtong ka na.”

² Kamong mga batan-on nahibalo nga gibati sa inyong mga ginikanan nga maalamon ang paghimo sa maong mga pagdili, tingali aron sa pagpanalipod kaninyo. Seguradong nahibalo usab kamo nga si Jehova malipay kon motuman kamo sa inyong mga ginikanan. (Colosas 3:20) Apan, gibati ba ninyo sukad nga daw naghulat pa lang kamo nga mosugod ang inyong kinabuhi? Ang tanan bang hinungdanong mga butang gidili hangtod nga hohamtong na kamo? Dili gayod! Adunay  buluhaton nga ginahimo karon nga mas hinungdanon kay sa bisan unsang ubang pribilehiyo nga inyo tingaling gipaabot. Tugotan ba kamong mga batan-on sa pag-apil niining buluhatona? Dili lang kay tugotan kamo kondili gidapit pa gayod kamo sa Labing Hataas nga Diyos mismo sa pagbuhat niana!

3. Si Jehova nagdapit sa mga batan-on sa pagbaton sa unsang pribilehiyo, ug unsang mga pangutana ang atong tagdon karon?

³ Unsang buluhatona ang atong gihisgotan? Matikdi ang mga pulong sa atong temang teksto niining artikuloha: “Dayega ninyo si Jehova gikan sa yuta, . . . kamong mga batan-ong lalaki ug kamong mga ulay usab, kamong mga tigulang nga lalaki uban sa mga batang lalaki.” (Salmo 148:7, 12) Gisulti diha ang inyong dakong pribilehiyo: Makadayeg kamo kang Jehova. Ingong batan-on, malipay ka ba nga makigbahin nianang buluhatona? Daghan ang malipay nga makigbahin niana. Aron masabtan kon nganong angay kang malipay, tagdon nato ang tulo ka pangutana. Una, nganong angay nimong dayegon si Jehova? Ikaduha, sa unsang paagi makadayeg ka kaniya sa epektibong paagi? Ikatulo, kanus-a angayng magsugod sa pagdayeg kang Jehova?

Nganong Dayegon si Jehova?

4, 5. (a) Sumala sa ika-148 nga Salmo, anaa kita sa unsang kahibulongang situwasyon? (b) Sa unsang paagi ang mga linalang nga dili makasulti ni makapangatarongan makadayeg gihapon kang Jehova?

⁴ Ang usa ka hinungdanong rason sa pagdayeg kang Jehova mao nga siya mao ang Maglalalang. Ang ika-148 nga Salmo motabang kanato sa pagsentro sa atong pagtagad niining kamatuorana. Handurawa lang: Kon nagkaduol ka sa usa ka dakong grupo sa mga tawo nga dungang nanganta sa usa ka mananoy, makapatandog nga awit, unsay imong bation? Komosta kon ang mga liriko sa maong awit maoy mga pulong nga imong nahibaloan nga tinuod, nagpahayag ug mga hunahuna nga imong nahibaloan nga hinungdanon, makalilipay, ug makapadasig? Gusto ba nimong makat-onan ang mga pulong nianang awita ug moduyog sa pagkanta? Kadaghanan kanato mohimo niana. Aw, ang ika-148 nga Salmo nagpakita nga ikaw anaa sa susamang situwasyon apan sa mas kahibulongang paagi. Kanang maong salmo naghubit sa usa ka dakong panon sa katawhan, ang tanan nagkahiusa sa pagdayeg kang Jehova. Apan, samtang imong basahon ang maong salmo imong mamatikdan ang usa ka talagsaong butang. Unsa man kana?

⁵ Daghan sa mga magdadayeg nga gihubit sa Salmo 148 dili makasulti ni makapangatarongan. Pananglitan, atong mabasa nga ang adlaw, bulan, kabituonan, niyebe, hangin, kabukiran, ug kabungtoran nanagdayeg kang Jehova. Sa unsang paagi kining walay-kinabuhi nga mga linalang makahimo niana? (Mga bersikulo 3, 8, 9) Aw, sa samang paagi nga ang kakahoyan, mga linalang sa dagat, ug mga mananap nanagdayeg kang Jehova. (Mga bersikulo 7, 9, 10) Nakasud-ong ka na ba sukad sa usa ka matahom nga pagsalop sa adlaw o sa takdol nga bulan nga nagtadlas sa bituonong kalangitan o nahimuot pag-ayo sa mga mananap nga nanagdula o nahingangha sa usa ka maanindot nga talan-awon? Nan imong “nadungog” ang awit sa pagdayeg nga nagagikan sa kalalangan. Ang tanang butang nga gibuhat ni Jehova nagpahinumdom kanato nga siya mao ang labing gamhanan nga Maglalalang, nga walay lain sa tibuok uniberso nga gamhanan kaayo, maalamon kaayo, o mahigugmaon kaayo sama kaniya.—Roma 1:20; Pinadayag 4:11.

6, 7. (a) Ang ika-148 nga Salmo naghubit sa unsang intelihenteng mga linalang nga nanagdayeg kang Jehova? (b) Nganong matukmod man kita sa pagdayeg kang Jehova? Iilustrar.

⁶ Ang ika-148 nga Salmo naghubit usab sa intelihenteng mga linalang nga nanagdayeg kang Jehova. Sa bersikulo 2, atong masayran nga ang langitnong “panon” ni Jehova nga mao ang mga manulonda, nanagdayeg sa Diyos. Sa bersikulo 11, ang gamhanan ug impluwensiyado nga mga tawo, sama sa mga hari ug mga maghuhukom, gidapit sa pagduyog sa pagdayeg. Kon ang gamhanang mga manulonda malipay sa pagdayeg kang Jehova, angay bang moingon ang usa lamang ka tawo nga siya importante kaayo nga dili siya angayng modayeg kang Jehova? Dayon, sa mga bersikulo 12 ug 13, kamong mga batan-on gidapit sa pagduyog ug pagdayeg usab kang Jehova. Natukmod ba kamo sa pagbuhat niana?

⁷ Tagda ang usa ka ilustrasyon. Kon duna kay suod nga higala nga may talagsaong katakos—tingali sa natad sa esport, arte, o sa musika—mosulti ka ba bahin kaniya ngadto sa imong pamilya ug sa ubang mga higala? Siyempre. Buweno, ang  pagkakat-on bahin sa tanan nga nahimo ni Jehova mahimong adunay susamang epekto kanato. Pananglitan, ang Salmo 19:1, 2 nag-ingon nga ang bituonong kalangitan magtukmod sa usa sa ‘pagpahayag ug mga pulong.’ Sa atong bahin, sa dihang atong hunahunaon ang katingalahang mga butang nga nahimo ni Jehova, dili nato kapugngan nga mosulti ngadto sa uban bahin sa atong Diyos.

8, 9. Tungod sa unsang mga rason nga buot ni Jehova nga dayegon nato siya?

⁸ Ang laing hinungdanong rason sa pagdayeg kang Jehova mao nga gusto niyang buhaton nato kana. Ngano man? Tungod ba kay nagkinahanglan siyag pagdayeg gikan sa mga tawo? Dili. Usahay kitang mga tawo magkinahanglan tingali ug pagdayeg, apan si Jehova mas labaw kay kanato. (Isaias 55:8) Wala siyay pagduhaduha bahin sa iyang kaugalingon o sa iyang mga hiyas. (Isaias 45:5) Bisan pa niana, buot niyang dayegon nato siya ug malipay siya kon buhaton nato kana. Ngano man? Tagda ang duha ka rason. Una, nahibalo siya nga kinahanglang dayegon nato siya. Gidisenyo niya kita nga adunay espirituwal nga panginahanglan, usa ka panginahanglan nga mosimba. (Mateo 5:3) Ang pagtan-aw kanato nga nagtagbaw nianang maong panginahanglan makapalipay kang Jehova, sama ra nga ang inyong mga ginikanan malipay nga magtan-aw kaninyo nga nagkaon sa mga pagkaon nga ilang nahibaloan nga makaayo kaninyo.—Juan 4:34.

⁹ Ikaduha, si Jehova nahibalo nga ang ubang mga tawo kinahanglang makadungog kanato nga nagdayeg kaniya. Si apostol Pablo misulat niining mga pulonga ngadto sa batan-ong si Timoteo: “Tagda kanunay ang imong kaugalingon ug ang imong pagpanudlo. Magpabilin niining mga butanga, kay sa pagbuhat niini pagaluwason mo ang imong kaugalingon ug kadtong mamati kanimo.” (1 Timoteo 4:16) Oo, sa dihang tudloan nimo ang uban bahin kang Jehova nga Diyos, nga magdayeg kaniya, sila makaila usab kang Jehova. Ang maong kahibalo mahimong motultol sa ilang walay-kataposang kaluwasan!—Juan 17:3.

10. Nganong matukmod kita sa pagdayeg sa atong Diyos?

¹⁰ Aduna pay laing rason nga dayegon si Jehova. Hinumdomi ang ilustrasyon bahin sa imong higala nga adunay talagsaong katakos. Kon makadungog ka nga ang uban mosultig bakak bahin kaniya, nga magpasipala sa iyang maayong ngalan, dili ba mas determinado ka pa nga dayegon siya? Aw, si Jehova kaylap nga gipasipalahan niining kalibotana. (Juan 8:44; Pinadayag 12:9) Busa kadtong nahigugma kaniya matukmod sa pagsulti sa kamatuoran bahin kaniya, nga magtul-id sa sayop nga impormasyon. Gusto ba usab nimong ipahayag ang imong gugma ug apresasyon kang Jehova ug ipakita nga buot nimong mahimo siyang imong Magmamando inay ang iyang pangunang kaaway, si Satanas? Mahimo nimo kanang tanan pinaagi sa pagdayeg kang Jehova. Nan, ang sunod nga pangutana mao, kon sa unsang paagi makadayeg ka kaniya.

Kon sa Unsang Paagi ang Pipila ka mga Bata ug mga Batan-on Nanagdayeg Kang Jehova

11. Unsang mga panig-ingnan sa Bibliya ang nagpakita nga ang mga bata ug mga batan-on mahimong epektibo kaayo sa pagdayeg kang Jehova?

¹¹ Ang Bibliya nagpakita nga ang mga bata ug mga batan-on subsob nga epektibo kaayo sa pagdayeg kang Jehova. Pananglitan, dihay Israelinhong dalagita nga nabihag sa mga Siryanhon. Maisogon siyang nagpamatuod ngadto sa iyang agalong babaye bahin sa manalagna ni Jehova nga si Eliseo. Ang iyang gisulti misangpot sa paghimog usa ka milagro, ug usa ka puwersadong pamatuod ang nahatag. (2 Hari 5:1-17) Si Jesus nagpamatuod usab  nga maisogon samtang bata pa. Sa tanang hitabo sa iyang pagkabatan-on nga mahimong isulat diha sa Kasulatan, si Jehova mipili ug usa, ang higayon sa dihang ang 12-anyos nga si Jesus maisogong nangutana sa relihiyosong mga magtutudlo didto sa templo sa Jerusalem ug tungod niana sila natingala sa iyang pagsabot sa mga dalan ni Jehova.—Lucas 2:46-49.

12, 13. (a) Unsay gibuhat ni Jesus sa templo pipila ka adlaw una siya mamatay, ug unsay epekto niana sa mga tawo nga atua didto? (b) Unsay gibati ni Jesus bahin sa pagdayeg nga gisulti sa mga batang lalaki?

¹² Sa dihang hamtong na siya, gidasig usab ni Jesus ang mga bata sa pagdayeg kang Jehova. Pananglitan, pipila ka adlaw una pa siya mamatay, si Jesus migugol ug panahon didto sa templo sa Jerusalem. Gibuhat niya ang “kahibulongang mga butang” didto, matod pa sa Bibliya. Giabog niya kadtong naghimo nianang sagradong dapit nga usa ka dapit sa mga kawatan. Giayo usab niya ang mga buta ug bakol. Ang tanan nga atua didto, ilabina ang relihiyosong mga lider, angay untang matukmod sa pagdayeg kang Jehova ug sa iyang Anak, ang Mesiyas. Apan, ikasubo nga daghan niadtong mga adlawa ang wala molitok ug mga pagdayeg. Nahibalo sila nga si Jesus gipadala sa Diyos, apan nahadlok sila sa relihiyosong mga lider. Apan, usa ka grupo ang misulti nga maisogon. Nahibalo ba kamo kon kinsa sila? Ang Bibliya nag-ingon: ‘Sa dihang nakita sa pangulong mga saserdote ug sa mga eskriba ang kahibulongang mga butang nga gibuhat ni Jesus ug ang mga batang lalaki nga nagsinggit diha sa templo ug nag-ingon: “Luwasa, kami nagaampo, ang Anak ni David!” sila nangasuko ug miingon kang Jesus: “Nadungog ba nimo ang ilang ginaingon?”’—Mateo 21:15, 16; Juan 12:42.

¹³ Ang maong mga saserdote nagdahom nga pahilomon ni Jesus ang mga bata nga nanagdayeg kaniya. Gipahilom ba niya sila? Wala gayod! Gitubag ni Jesus ang mga saserdote: “Oo. Wala ba gayod kamo makabasa niini, ‘Gikan sa baba sa mga bata ug sa mga masuso ikaw nagtaganag pagdayeg’?” Klaro nga si Jesus ug ang iyang Amahan nalipay sa pagdayeg nga gihimo sa mga batang lalaki. Gihimo sa maong mga bata ang angay untang himoon sa tanang hamtong. Sa ilang linghod nga mga hunahuna, klaro kaayo kadto. Ilang nakita kining tawhana nga naghimo ug kahibulongang mga butang, nagsulti uban ang kaisog ug pagtuo, ug nagpakita ug mainitong gugma alang sa Diyos ug sa iyang katawhan. Tinuod ang iyang giingon nga siya ang gisaad nga “Anak ni David,” ang Mesiyas. Kay gipanalanginan tungod sa ilang pagtuo, ang mga bata nakapribilehiyo gani sa pagtuman sa tagna.—Salmo 8:2.

14. Sa unsang paagi ang mga katakos nga nabatonan sa mga bata ug mga batan-on magsangkap kanila sa pagdayeg sa Diyos?

¹⁴ Unsay atong makat-onan gikan sa maong mga panig-ingnan? Atong makat-onan nga ang mga bata ug mga batan-on mahimo diayng epektibo nga mga magdadayeg ni Jehova. Subsob nga aduna silay katakos nga makasabot sa kamatuoran sa klaro ug simple nga paagi, nga magpahayag sa ilang pagtuo uban ang katim-os ug kasibot. Nabatonan usab nila ang katakos nga gihisgotan diha sa Proverbio 20:29: “Ang katahom sa batan-ong mga lalaki mao ang ilang kusog.” Oo, kamong mga bata ug mga batan-on adunay kusog ug enerhiya nga magamit gayod ninyo sa pagdayeg kang Jehova. Sa unsang paagi espesipiko ninyong magamit ang maong mga katakos sa epektibong paagi?

Sa Unsang Paagi Madayeg Ninyo si Jehova?

15. Aron epektibong madayeg si Jehova, unsang motibo ang gikinahanglan?

¹⁵ Ang epektibo nga pagdayeg magsugod diha sa kasingkasing. Dili ninyo epektibong madayeg si Jehova  kon gibuhat ninyo kana tungod kay gusto sa uban nga buhaton ninyo kana. Hinumdomi, ang kinadak-an sa tanang sugo mao kini: “Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.” (Mateo 22:37) Nasinati ba ninyo si Jehova pinaagi sa inyong pagtuon sa iyang Pulong? Ang angayng resulta sa pagtuon niana mao ang paghigugma kang Jehova. Ang kinaiyanhong paagi sa pagpahayag sa maong gugma maoy pinaagi sa pagdayeg kaniya. Sa dihang ang inyong motibo mahimong klaro ug lig-on, andam na kamong modayeg kang Jehova nga madasigon.

16, 17. Unsay papel sa panggawi maylabot sa pagdayeg kang Jehova. Iilustrar.

¹⁶ Karon, bisan sa dili pa ninyo hunahunaon kon unsay inyong isulti, hunahunaa kon sa unsang paagi kamo mogawi. Kon nabatasan na sa maong Israelinhong dalagita sa adlaw ni Eliseo ang pagkabastos, pagkadili-matinahoron, o pagkadili-matinud-anon, sa inyong hunahuna mamati kaha ang iyang Siryanhong mga magbibihag sa iyang gisulti bahin sa manalagna ni Jehova? Lagmit dili. Sa samang paagi, ang mga tawo mas lagmit nga mamati kaninyo kon ilang makita nga kamo matinahoron, matinud-anon, ug buotan. (Roma 2:21) Tagda ang usa ka pananglitan.

¹⁷ Usa ka 11-anyos nga dalagita sa Portugal ang gipugos diha sa eskuylahan sa pagsaulog ug mga selebrasyon nga supak sa iyang nabansay-sa-Bibliya nga tanlag. Matinahoron niyang gipatin-aw sa iyang maestra kon nganong modumili gayod siya, apan gibugalbugalan siya sa magtutudlo. Sa paglabay sa panahon, sublisubli siyang gipakaulawan sa magtutudlo, nga nagbiaybiay sa iyang relihiyon. Apan, ang dalagita nagmatinahoron gihapon. Daghang tuig sa ulahi, kanang batan-ong sister nag-alagad na ingong regular payunir, usa ka bug-os-panahong ministro. Sa usa ka kombensiyon, nagtan-aw siya sa mga tawo nga gibawtismohan ug nailhan niya ang usa kanila. Ang iya kadtong kanhing magtutudlo! Human sa paghalogay ug paghinilakay, giingnan sa maestra ang batan-ong sister nga wala gayod niya makalimti ang pagkamatinahoron sa sister. Giduaw siya ug Saksi, ug gihisgotan sa maestra ang panggawi sa iyang kanhing estudyante. Tungod niini, nasugdan ang usa ka pagtuon sa Bibliya ug kining babayhana midawat sa kamatuoran sa Bibliya. Oo, ang inyong panggawi mahimong usa ka puwersado kaayong paagi sa pagdayeg kang Jehova!

18. Unsay mahimong buhaton sa usa ka batan-on kon magpanuko siya sa pagsugod sa pagpakig-estorya bahin sa Bibliya ug kang Jehova nga Diyos?

¹⁸ Malisdan ka ba usahay sa pagsugod sa pagpakig-estorya diha sa eskuylahan mahitungod sa imong pagtuo? Dili kay ikaw ra ang nalisdan. Apan, mahikay nimo ang kahimtang diin ang uban mangutana kanimo bahin sa imong pagtuo. Pananglitan, kon legal ug gitugot ang pagbuhat niini, nganong dili magdala ug binase-sa-Bibliya nga mga publikasyon ug basahon kana sa tingpaniudto o sa ubang yugto diin gitugot ang paghimo niana? Ang imong mga isigkaestudyante mangutana tingali kanimo kon unsay imong ginabasa. Pinaagi sa pagtubag kanila ug pagsulti kanila kon unsay imong nakita nga makaiikag bahin sa maong artikulo o libro nga imong gibasa, dili nimo mamatikdan nga nag-estoryahay na diay kamo. Ayawg kalimot sa pagsukna ug mga pangutana, nga sayron kon unsay gituohan sa imong mga isigkaestudyante. Pamati nga matinahoron, nga ipaambit ang imong nakat-onan gikan sa Bibliya. Ingon sa gipakita sa mga eksperyensiya sa panid 29, daghang batan-on ang nagdayeg sa Diyos diha sa eskuylahan. Kini nakahatag kanila ug dakong kalipay ug nakatabang sa daghan nga makaila kang Jehova.

19. Sa unsang paagi ang mga batan-on mahimong mas epektibo diha sa balay-balay nga ministeryo?

¹⁹ Ang balay-balay nga ministeryo maoy epektibo kaayong paagi sa pagdayeg kang Jehova. Kon wala ka pa makigbahin niini, nganong dili kana  himoong tumong? Kon nakigbahin ka na, aduna pa bay laing mga tumong nga mahimo nimong kab-oton? Pananglitan, imbes mosulti sa halos samang butang diha sa matag pultahan, pangitag mga paagi nga mouswag, nga mangayog sugyot gikan sa imong mga ginikanan ug sa ubang eksperyensiyadong mga igsoon. Kat-oni kon sa unsang paagi mas magamit ang Bibliya, kon unsaon paghimog epektibong mga pagbalikduaw, ug kon unsaon pagsugod ug panagtuon sa Bibliya. (1 Timoteo 4:15) Kon mas subsob nimong gidayeg si Jehova nianang mga paagiha, mahimo kang mas epektibo, ug mas malipay ka diha sa imong ministeryo.

Kanus-a Kamo Angayng Magsugod sa Pagdayeg Kang Jehova?

20. Nganong dili angayng mobati ang mga batan-on nga sila bata pa kaayo nga modayeg kang Jehova?

²⁰ Sa tulo ka pangutana niining maong panaghisgot, ang tubag niining kataposan mao ang kinayanohan. Matikdi ang laktod nga tubag sa Bibliya: “Hinumdomi, karon, ang imong Dakong Maglalalang sa mga adlaw sa imong pagkabatan-on.” (Ecclesiastes 12:1) Oo, karon na ang panahon sa pagsugod sa pagdayeg kang Jehova. Dali rang moingon: “Bata pa kaayo ko nga modayeg kang Jehova. Wala pa koy kasinatian. Unya na lag mohamtong na ko.” Dili kay ikaw ray mibati ug ingon niana. Pananglitan, ang batan-ong si Jeremias miingon kang Jehova: “Intawon, Oh Soberanong Ginoong Jehova! Ania, ako gayod dili mahibalo nga mosulti, kay ako usa ka bata lamang.” Gipasaligan siya ni Jehova nga dili siya angayng mahadlok. (Jeremias 1:6, 7) Wala usab kitay angayng kahadlokan sa dihang kita modayeg kang Jehova. Walay kadaot nga modangat kanato nga dili ayohon ni Jehova sa bug-os.—Salmo 118:6.

21, 22. Nganong ang batan-ong mga magdadayeg kang Jehova gipakasama sa mga yamog, ug nganong makapadasig ang maong pagtandi?

²¹ Nan, giawhag namo kamong mga batan-on: Ayaw kamo pagpanuko sa pagdayeg kang Jehova! Karon nga bata pa kamo mao ang kinamaayohang panahon sa pagduyog sa labing hinungdanong buluhaton nga ginahimo sa yuta karon. Kon buhaton ninyo kana, kamo mahimong bahin sa usa ka maanindot kaayo nga grupo—ang unibersohanong pamilya niadtong nanagdayeg kang Jehova. Si Jehova malipay nga malakip ka niining pamilyaha. Matikdi kining inspiradong mga pulong nga gisulti sa salmista kang Jehova: “Ang imong katawhan magatanyag sa ilang kaugalingon nga kinabubut-on sa adlaw sa imong puwersa militar. Sa kahalangdon sa pagkabalaan, gikan sa tagoangkan sa kaadlawon, ikaw adunay pundok sa mga batan-on nga sama gayod sa mga yamog.”—Salmo 110:3.

²² Ang mga yamog nga mogilak inigsubang sa adlaw nindot tan-awon, dili ba? Kini makaparepresko, naggilakgilak, ug dili maihap tungod sa kadaghan. Mao kanay panglantaw ni Jehova kaninyong mga batan-on nga matinumanong nanagdayeg kaniya niining makuyaw nga mga panahon. Klaro nga ang inyong pagpili nga modayeg kang Jehova makapalipay sa iyang kasingkasing. (Proverbio 27:11) Nan, kamong mga batan-on, dayega ninyo si Jehova!

Unsaon Nimo Pagtubag?

• Unsa ang pipila ka hinungdanong rason sa pagdayeg kang Jehova?

• Unsang mga panig-ingnan sa Bibliya ang nagpakita nga ang mga bata ug mga batan-on mahimong epektibo kaayo sa pagdayeg kang Jehova?

• Sa unsang paagi ang mga bata ug mga batan-on makadayeg kang Jehova karon?

• Kanus-a nga ang mga bata ug mga batan-on angayng mosugod sa pagdayeg kang Jehova, ug ngano?

[Mga Pangutana sa Pagtuon]

[Mga hulagway sa panid 25]

Kon ang imong higala adunay talagsaong katakos, dili ba nimo kini isulti sa uban?

[Hulagway sa panid 27]

Ang imong mga isigkaestudyante mahimong mainteres sa imong tinuohan

[Hulagway sa panid 28]

Kon buot nimong mouswag sa imong ministeryo, pangayog sugyot gikan sa mas eksperyensiyadong mga Saksi