Pagdayeg Kang Jehova Diha sa Tunghaan

SA TIBUOK kalibotan, ang batan-ong mga Saksi ni Jehova nakakaplag ug mga paagi sa pagdayeg sa Diyos diha sa tunghaan—pinaagi sa ilang sinultihan ug panggawi. Matikdi ang pipila ka eksperyensiya nga nagpakita sa kadasig niining mga batan-ona.

Usa ka batan-ong Saksi sa Gresya ang naasayn sa paghimog sinulat bahin sa polusyon sa hangin dinhi sa yuta. Human masusi ang Watch Tower Publications Index, nakakaplag siyag mapuslanong impormasyon diha sa magasin nga Pagmata!, nga nagtala niini ingong iyang reperensiya diha sa kataposang bahin sa iyang sinulat. Giingnan siya sa iyang magtutudlo nga kadto maoy usa sa kinanindotang mga sinulat nga iyang nabasa sukad. Sa ulahi, gigamit sa magtutudlo ang maong impormasyon diha sa usa ka seminar, ug maayo ang mga resulta. Busa, ang batan-ong sister mihukom sa pagtanyag ug dugang mga isyu sa Pagmata! ngadto sa iyang magtutudlo lakip ang usa nga may serye sa mga artikulo nga “Mga Magtutudlo—Mag-unsa na Lang Kita Kon Wala Sila?” Sa ulahi, gidayeg sa magtutudlo ang magasin nga Pagmata! atubangan sa klase, ug ang ubang mga estudyante misugod pagpangayo ug mga kopya. Ang sister kinahanglang magdala ug mga kopya sa magasin sa tunghaan aron mabasa nila ang ubang mga isyu.

Sa Benin, Aprika, usa ka tin-edyer nga Kristohanon nag-atubang ug talagsaong matang sa pagpit-os. Sumala sa naandan, ang mga ginikanan sa ubay-ubayng mga estudyante sa iyang tunghaan nagkausa sa pagsuhol ug mga magtutudlo aron tabangan ang ilang mga anak sa pagtuon sa lisod nga mga leksiyon ug makapasar sa mga pasulit. Apan, gieskedyul sa mga magtutudlo nga ipahigayon ang pagtudlo kada Sabado sa buntag. Ang batan-ong Saksi wala mouyon niini: “Ang tibuok kongregasyon magkausa sa pagsangyaw kada Sabado sa buntag. Kini ang labing malipayong panahon sa semana alang kanako, ug dili nako kini ibaylo sa bisan unsa!” Ang iyang amahan, nga usa ka nag-inusarang ginikanan ug usa usab ka Saksi, miuyon kaniya ug misulay pagkombinsir sa usa ka grupo sa mga ginikanan ug mga magtutudlo sa pag-usab sa eskedyul. Apan, silang tanan midumili. Ang dalagita mihukom nga dili na lang siya magsuhol ug magtutudlo. Hinunoa, siya nakigbahin sa buluhatong pagsangyaw uban sa iyang kongregasyon. Gibiaybiay siya sa iyang mga klasmet, nga nag-awhag kaniya sa paghunong sa pagsangyaw ug sa pagbiya usab sa iyang Diyos. Segurado gayod sila nga dili siya makapasar sa mga pasulit. Apan, ang resulta mao nga ang grupo sa mga estudyante nga nagsuhol ug magtutudlo wala makapasar, samtang ang atong batan-ong igsoon nakapasar. Siyempre, wala na nila siya biaybiaya. Karon, ang mga estudyante moingon kaniya, “Padayona ang pag-alagad sa imong Diyos.”

Sa Republika sa Czech, usa ka 12-anyos nga dalagita kinahanglang mangandam ug binaba nga taho bahin sa usa ka libro. Giawhag siya sa iyang inahan sa pagtaho sa libro nga Ang Labing Bantogang Tawo nga Nabuhi Sukad. Gisugdan niya ang iyang taho pinaagi sa mga pangutanang: “Unsay hunahuna ninyo? Kinsa kaha ang labing bantogang tawo nga nabuhi sukad?” Gipatin-aw niya kon kinsa si Jesus, kon unsay iyang kinabuhi sa yuta, ug kon unsay iyang mga gitudlo. Dayon iyang gihisgotan ang kapitulo nga “Usa ka Leksiyon sa Pagpasaylo.” Ang iyang magtutudlo miingon, “Kini ang kinamaayohang pagtaho nga akong nadungog gikan kanimo!” ug mapasalamaton niyang gidawat ang usa ka kopya sa libro. Ang uban niyang mga isigkaestudyante gusto usab nga makadawat ug kopya sa libro. Pagkasunod adlaw, ang dalagita nalipay sa pag-apod-apod ug 18 ka libro.

Kining maong mga batan-on nakakaplag ug dakong kalipay sa pagdayeg kang Jehova diha sa tunghaan. Angay nga sundogon natong tanan ang ilang kadasig.