Trabaho—Panalangin o Tunglo?
Trabaho—Panalangin o Tunglo?
“Wala nay laing mas maayo alang sa tawo kay sa . . . makapahimulos ug maayo sa iyang kahago.”—Ecclesiastes 2:24.
“KAPOY kaayo inigkagabii human sa trabaho.” Sa usa ka surbi dili pa dugay, 1 sa 3 ka empleyado miingon nga mao gayod kanay ilang bation kanunay. Dili kini ikatingala diha sa usa ka kahimtang diin ang mga tawo nag-antos sa kapit-os; magtrabaho sila ug mas daghang oras ug magdalag daghang trabaho sa balay—apan ang ilang mga amo panagsa rang mopahayag ug apresasyon.
Tungod sa dinaghan nga paggamag mga produkto, daghang trabahante mibati nga nahisama na lang silag mga piyesa sa mga ruyda diha sa dako kaayo, walay pagbati nga mga makina sa negosyo. Ang kaikag ug pagkamamugnaon kasagarang masugpo. Siyempre, kini adunay epekto sa tinamdan sa mga tawo bahin sa trabaho. Makapaluya kini sa motibasyon sa usa sa paghatag ug personal nga interes sa iyang trabaho. Kini makawala sa gana sa pagtinguha nga mahimong hanas sa trabaho. Tungod niini siya dili na layhan sa trabaho mismo ug tingali maglagot na siya niini.
Pagsusi sa Atong Tinamdan
Tinuod, dili nato kanunayng mausab ang atong mga kahimtang. Apan, mouyon ka ba nga mahimo natong mapasibo ang atong tinamdan? Kon nakita nimo nga medyo natakdan ka na sa negatibong mga tinamdan bahin sa trabaho, makatabang kon imong tagdon ang panglantaw ug mga prinsipyo sa Diyos bahin niini. (Ecclesiastes 5:18) Daghan ang nakaamgo nga ang pagtimbangtimbang niini nakahatag kanila ug igong kalipay ug pagkakontento sa ilang trabaho.
Ang Diyos mao ang Kinalabwan sa Pagkakugihan. Ang Diyos kugihan. Tingali wala nato siya hunahunaa nianang paagiha, apan mao kanay iyang unang pagpailaila sa iyang kaugalingon diha sa Bibliya. Ang Genesis nagsugod pinaagi sa asoy sa paglalang ni Jehova sa langit ug yuta. (Genesis 1:1) Hunahunaa ang nagkadaiyang papel sa Diyos sa dihang siya nagsugod sa paglalang—tigdisenyo, tig-organisar, inhenyero, pintor, eksperto sa pagpilig materyales, tig-ugmad ug proyekto, kemista, biologo, zoologo, tigprograma, eksperto sa mga pinulongan, sa paghisgot lang ug pipila.—Proverbio 8:12, 22-31.
Unsay kalidad sa trabaho sa Diyos? Ang rekord sa Bibliya nag-ingon nga kini “maayo,” “maayo kaayo.” (Genesis 1:4, 31) Sa pagkatinuod, ang kalalangan “nagpahayag sa himaya sa Diyos,” ug kita usab angayng modayeg kaniya!—Salmo 19:1; 148:1.
Apan, ang buluhaton sa Diyos wala matapos sa dihang nalalang na ang mga langit ug yuta ug ang unang magtiayon. Ang Anak ni Jehova, si Jesu-Kristo, miingon: “Ang akong Amahan nagpadayon sa pagbuhat hangtod karon.” (Juan 5:17) Oo, si Jehova nagpadayon sa pagbuhat pinaagi sa pagtagana alang sa iyang mga linalang, pagsustenir kanila, ug pagluwas sa iyang matinumanong mga magsisimba. (Nehemias 9:6; Salmo 36:6; 145:15, 16) Mogamit pa gani siya ug mga tawo, nga “mga isigkamagbubuhat sa Diyos,” sa pagtabang kaniya aron mahimo ang pipila ka buluhaton.—1 Corinto 3:9.
Ang trabaho usa ka panalangin. Dili ba miingon ang Bibliya nga ang trabaho usa ka tunglo? Ang Genesis 3:17-19 morag nagpasabot nga tungod sa pagrebelde ni Adan ug Eva, gisilotan sila sa Diyos pinaagi sa pagpatrabaho kanila. Sa dihang gihukman kining unang mga tawo, ang Diyos miingon kang Adan: “Sa singot sa imong nawong ikaw magakaon sa tinapay hangtod nga ikaw mobalik sa yuta.” Kadto ba maoy bug-os nga pagtunglo sa trabaho?
Dili. Hinunoa, tungod sa pagkadili-matinumanon ni Adan ug Eva, ang pagpakaylap sa Edenikong Paraiso wala mahitabo niadtong panahona. Ang yuta gitunglo sa Diyos. Kinahanglang magpasingot ug maghago aron ang tawo makakuhag pagkaon gikan sa yuta.—Roma 8:20, 21.
Imbes ihubit ang trabaho ingong tunglo, gipakita sa Bibliya nga kini maoy usa ka panalangin nga angayng pabilhan. Sumala sa nahisgotan na, ang Diyos kugihan. Kay gilalang ang mga tawo sumala sa iyang dagway, gihatagan ni Jehova ang mga tawo ug katakos ug awtoridad sa pagdumala sa iyang yutan-ong mga linalang. (Genesis 1:26, 28; 2:15) Ang maong buluhaton gihatag una pa gisulti sa Diyos ang mga pulong nga natala sa Genesis 3:19. Kon tunglo ug daotan pa ang trabaho, wala gayod unta kana idasig ni Jehova sa mga tawo. Si Noe ug ang iyang pamilya daghag trabaho una pa ug sa nahuman na ang Lunop. Sa panahon sa mga Kristohanon, ang mga tinun-an ni Jesus giawhag usab sa pagtrabaho.—1 Tesalonica 4:11.
Bisan pa niana, kitang tanan nasayod nga malisod ang pagtrabaho karong panahona. Ang kapit-os, kapeligrohan, kalaay, kahigawad, pag-indigay, panglimbong, ug inhustisya maoy pipila lang sa “mga sampinit ug mga kudyapa” nga nalangkit karon niini. Apan ang trabaho mismo dili usa ka tunglo. Sa Ecclesiastes 3:13, gihubit sa Bibliya ang trabaho ug ang bunga niini ingong gasa gikan sa Diyos.—Tan-awa ang kahong “Pagsagubang sa Kapit-os nga Nalangkit sa Trabaho.”
Imong mahimaya ang Diyos pinaagi sa imong trabaho. Ang kalidad ug pagkaekselente kanunayng gidayeg diha sa trabahoan. Ang kalidad maoy usa sa hinungdanong mga bahin sa Biblikanhong panglantaw sa trabaho. Ekselente ang trabaho sa Diyos. Gihatagan niya kita ug mga kahanas ug abilidad, ug buot niya nga gamiton nato ang atong mga katakos sa maayong Exodo 31:1-11) Kini nagpakita nga ang Diyos interesado kaayo sa katuyoan, pagkapulido, disenyo, ug ubang mga detalye sa ilang trabaho.
katuyoan. Pananglitan, panahon sa pagtukod sa tabernakulo sa karaang Israel, ang mga tawo sama kang Bezalel ug Oholiab gihatagan ni Jehova ug kaalam, pagsabot, ug kahibalo, aron ilang mahimong artistiko ug mapuslanon ang espesipikong mga trabaho. (Kini adunay dakong epekto sa atong pagsabot bahin sa personal nga mga katakos ug mga batasan sa pagtrabaho. Motabang kini kanato sa pag-isip niini, sa usa ka diwa, ingong mga gasa gikan sa Diyos nga dili angayng ibalewala. Sa ingon, ang mga Kristohanon gitambagan sa paghimo sa ilang trabaho nga morag ang Diyos mismo maoy nagasusi sa ilang pagtrabaho: “Bisan unsay inyong ginabuhat, buhata kini nga tibuok-kalag ingon nga alang kang Jehova, ug dili alang sa mga tawo.” (Colosas 3:23) Ang mga alagad sa Diyos gisugo nga magkugi sa pagtrabaho, nga sa ingon naghimo sa Kristohanong mensahe nga mas makapadani sa mga kauban sa trabaho ug sa uban.—Tan-awa ang kahong “Pagpadapat sa mga Prinsipyo sa Bibliya Diha sa Trabahoan.”
Tungod niana, maayong pangutan-on nato ang atong kaugalingon kon unsay kalidad sa atong trabaho ug kon unsa kita ka kugihan. Malipay kaha ang Diyos sa atong trinabahoan? Kita ba bug-os natagbaw sa atong paagi sa pagbuhat sa buluhaton nga gihatag kanato? Kon wala, puwede pa nato kining mapauswag.—Proverbio 10:4; 22:29.
Himoang balanse ang trabaho ug ang espirituwalidad. Bisan tuod dalayegon ang pagkakugihan, aduna pay laing butang nga hinungdanon aron mabati ang katagbawan diha sa trabaho ug kinabuhi. Kini mao ang espirituwalidad. Si Haring Solomon, kinsa nagkugi sa pagtrabaho ug nakatagamtam sa tanang bahandi ug kaharuhay nga mabatonan diha sa kinabuhi, mihinapos: “Kahadloki ang matuod nga Diyos ug tumana ang iyang mga sugo. Kay kini mao ang tibuok nga obligasyon sa tawo.”—Ecclesiastes 12:13.
Tin-aw nga kinahanglang tagdon nato ang kabubut-on sa Diyos bisag unsa pay atong buhaton. Kita ba naglihok uyon sa iyang kabubut-on, o basin kita naglihok batok niana? Kita ba naningkamot sa pagpahimuot sa Diyos, o naningkamot lang kita sa pagpahimuot sa atong kaugalingon? Kon dili nato himoon ang kabubut-on sa Diyos, sa ngadtongadto antoson nato ang kasakit sa kawalay-paglaom, kamingaw, ug kahaw-ang.
Juan 4:34; 5:36) Ug hinumdomi nga ang Diyos, nga Kinalabwan sa Pagkakugihan, nagdapit kanato aron mahimong iyang mga “isigkamagbubuhat.”—1 Corinto 3:9.
Si Steven Berglas nagsugyot sa mga ehekutibo nga gikapoy sa pisikal ug emosyonal sa ‘pagpangitag mapuslanong buluhaton nga ilang gikaikagan pag-ayo ug himoon kini nga bahin sa ilang kinabuhi.’ Wala nay lain pang mas mapuslanong buluhaton kay sa pag-alagad sa Usa nga maoy naghatag kanato ug mga katakos ug abilidad aron makahimog makahuloganong buluhaton. Ang paghimog buluhaton nga makapalipay sa atong Maglalalang mohatag kanatog katagbawan. Alang kang Jesus, ang buluhaton nga gihatag ni Jehova kaniya maoy mapuslanon, makapatagbaw, ug makapalagsik samag pagkaon. (Ang pagsimba sa Diyos ug pag-uswag sa espirituwal nagsangkap kanato aron mahimong makapatagbaw ang atong buluhaton ug responsibilidad. Sanglit ang trabahoan sagad nga puno sa tensiyon, panagbingkil, ug kalisdanan, ang atong nakagamot-pag-ayong pagtuo ug espirituwalidad makahatag sa gikinahanglan kaayong kusog samtang kita naningkamot nga mahimong mas maayong mga empleyado o mga amo. Sa laing bahin, ang nagakahitabo karon niining dili-diyosnong kalibotan makapaalinggat kanato kon unsang bahina sa atong pagtuo ang kinahanglan pang pauswagon.—1 Corinto 16:13, 14.
Sa Dihang ang Trabaho Mahimo na nga Usa ka Panalangin
Kadtong nagkugi pag-ayo karon sa pag-alagad sa Diyos makalaom sa panahon sa dihang ipasig-uli na niya ang Paraiso ug ang tibuok yuta matugob na sa mapuslanong buluhaton. Si Isaias, nga usa ka manalagna ni Jehova, nagtagna bahin sa kinabuhi unya nianang panahona: “Sila gayod magtukod ug mga balay ug magpuyo niini; ug sila gayod magtanom ug kaparasan ug magkaon sa ilang mga bunga. Dili sila magtukod ug lain ang magpuyo; dili sila magtanom ug lain ang magkaon. . . . Gamiton sa bug-os sa akong mga pinili ang buhat sa ilang mga kamot.”—Isaias 65:21-23.
Ang trabaho mahimo na nga usa ka dakong panalangin nianang panahona! Pinaagi sa pagtuon kon unsay kabubut-on sa Diyos alang kanimo ug sa paglihok uyon niana, hinaot nga usa ka sa panalanginan ni Jehova ug kanunayng ‘magpahimulos ug maayo sa tanan nimong kahago.’—Ecclesiastes 3:13.
[Blurb sa panid 8]
Ang Diyos mao ang Kinalabwan sa Pagkakugihan: Genesis 1:1, 4, 31; Juan 5:17
[Blurb sa panid 8]
Ang trabaho usa ka panalangin:
Genesis 1:28; 2:15; 1 Tesalonica 4:11
[Blurb sa panid 8]
Imong mahimaya ang Diyos pinaagi sa imong trabaho: Exodo 31:1-11; Colosas 3:23
[Blurb sa panid 8]
Himoang balanse ang trabaho ug ang espirituwalidad: Ecclesiastes 12:13; 1 Corinto 3:9
[Kahon/Hulagway sa panid 6]
PAGSAGUBANG SA KAPIT-OS NGA NALANGKIT SA TRABAHO
Giklasipikar sa mga propesyonal sa medisina ang kapit-os sa trabaho ingong peligroso. Kini mahimong hinungdan sa mga ulser ug depresyon ug moresulta pa ug paghikog. Ang mga Hapon dunay termino alang niini—karoshi, “pagkamatay tungod sa sobrang pagtrabaho.”
Nagkadaiya ang mga hinungdan sa kapit-os sa trabaho. Apil niini ang pagkausab sa oras o kahimtang sa trabaho, mga problema tungod sa mga tigdumala, pagkausab sa mga responsibilidad o matang sa trabaho, pagretiro, ug pagpalagpot. Agig reaksiyon sa maong kapit-os, ang uban maningkamot sa paglikay niana pinaagi sa pagbalhin ug trabaho o pag-usab sa ilang palibot. Ang uban misulay pagsanta sa maong kapit-os, apan ilang nakita nga madayag kini diha sa ubang bahin sa kinabuhi, kasagaran diha sa pamilya. Ang ubang tawo mag-antos pa gani sa emosyonal nga paagi, nga moresultag depresyon ug kawalay-paglaom.
Ang mga Kristohanon nasangkapan ug maayo sa pagsagubang sa kapit-os nga nalangkit sa trabaho. Ang Bibliya adunay daghang hinungdanong mga prinsipyo nga makatabang kanato sa pagsagubang sa malisod nga mga panahon, nga adunay maayong epekto sa atong espirituwal ug emosyonal nga kahimtang. Pananglitan, si Jesus miingon: “Ayaw gayod kamo kabalaka bahin sa sunod nga adlaw, kay ang sunod nga adlaw adunay iyang kaugalingong mga kabalaka. Igo na sa matag adlaw ang iyang kaugalingong pagkadaotan.” Ang gidasig dinhi mao ang paghatag ug pagtagad sa presente nga mga suliran, dili sa mga suliran ugma. Sa ingon malikayan nato nga mapadako ang atong mga problema nga makapasamot hinuon sa tensiyon.—Mateo 6:25-34.
Hinungdanon nga ang mga Kristohanon mosalig sa kusog sa Diyos, dili sa kaugalingong kusog. Sa dihang mobati kita nga daw dili na kita makaagwanta, ang Diyos mohatag kanato ug kalinaw ug kalipay sa atong kasingkasing ug mohatag kanato ug kaalam sa pagsagubang sa bisan unsang kalisdanan. “Magpadayon sa pagbaton ug gahom diha sa Ginoo ug diha sa pagkagamhanan sa iyang kusog,” misulat si apostol Pablo.—Efeso 6:10; Filipos 4:7.
Sa kataposan, bisan ang mapit-osong mga kahimtang makapatungha ug maayong mga resulta. Ang mga pagsulay mopalihok kanato sa pagdangop kang Jehova, sa pagduol kaniya ug pagsalig kaniya. Makatukmod usab kini kanato sa pagpadayon sa pag-ugmad sa Kristohanong personalidad ug sa katakos sa paglahutay ilalom sa kapit-os. Si Pablo nagtambag kanato: “Magsadya kita samtang anaa sa kasakitan, kay kita nahibalo nga ang kasakitan magpatungha ug paglahutay; ang paglahutay, sa baylo, ug usa ka inuyonang kahimtang; ang inuyonang kahimtang, sa baylo, ug paglaom.”—Roma 5:3, 4.
Busa, bisan ang kapit-os mahimong pangpalig-on aron motubo sa espirituwal imbes mahimong hinungdan sa kawalay-paglaom ug kaguol.
[Kahon/Hulagway sa panid 7]
Pagpadapat Sa Mga Prinsipyo Sa Bibliya Diha Sa Trabahoan
Ang tinamdan ug panggawi sa usa ka Kristohanon diha sa trabahoan makahimo sa mensahe sa Bibliya nga makapadani sa iyang mga kauban sa trabaho ug sa uban pa. Sa iyang sulat kang Tito, gitambagan ni apostol Pablo kadtong samag mga empleyado ug kahimtang nga “magpasakop sa ilang mga [superbisor] diha sa tanang butang, ug magpahimuot kanila, nga dili magtubagtubag, dili mangawkaw, hinunoa magpakita sa bug-os nga pagkamaunongon, aron sila makadayandayan sa pagtulon-an sa atong Manluluwas, ang Diyos, sa tanang butang.”—Tito 2:9, 10.
Pananglitan, tagda ang gisulat sa usa ka negosyante ngadto sa tibuok-kalibotang hedkuwarter sa mga Saksi ni Jehova: “Nagsulat ako aron mangayog permiso sa pagkuhag mga Saksi ni Jehova aron himoong akong mga empleyado. Gusto nako silang kuhaon nga akong mga trabahante tungod kay nakaseguro ko nga sila matinud-anon, sinsero, ug kasaligan, ug dili sila manikas sa ilang amo. Sa mga Saksi ni Jehova ra gayod ako mosalig. Palihog tabangi ako.”
Si Kyle maoy usa ka Kristohanon nga nagtrabaho ingong tigdawat ug bisita diha sa usa ka pribadong tunghaan. Tungod sa dili pagsinabtanay, gibalikas siya sa iyang kauban sa trabaho atubangan sa pipila ka estudyante. “Nag-amping ko nga dili mapakaulawan ang ngalan ni Jehova,” nahinumdom si Kyle. Sulod sa lima ka adlaw, namalandong si Kyle kon sa unsang paagi niya ikapadapat ang mga prinsipyo sa Bibliya. Ang usa makaplagan diha sa Roma 12:18: “Kon mahimo, kutob sa inyong maarangan, makigdinaitay sa tanang tawo.” Iyang gipadad-an ug e-mail ang iyang kauban sa trabaho ug nangayog pasaylo tungod sa ilang dili-pagsinabtanay. Gidapit ni Kyle ang iyang kauban sa trabaho nga mag-estorya sila human sa trabaho aron masulbad ang problema. Sa nasulbad na nila ang problema, ang kauban ni Kyle nalukmay ug iyang giapresyar ang pagkamaalamon sa paagi ni Kyle sa pagpakig-estorya kaniya. Iyang giingnan si Kyle, “Tungod tingali kini sa imong relihiyon” ug gihalog niya ug hugot si Kyle sa dihang nanamilit na sila sa usag usa. Ang konklusyon ni Kyle? “Dili gayod kita masayop kon atong ipadapat ang mga prinsipyo sa Bibliya.”
[Hulagway sa panid 4, 5]
Daghang trabahante mibati nga nahisama na lang silag mga piyesa sa mga ruyda diha sa dako kaayo, walay pagbati nga mga makina sa negosyo
[Credit Line]
Japan Information Center, Consulate General of Japan in NY
[Picture Credit Line sa panid 8]
Globe: NASA photo