Ang Pagpangitag Kalinaw sa Hunahuna

SI Albert adunay malipayong kaminyoon ug duha ka makalingaw nga mga anak. Apan mibati siya nga adunay kulang sa iyang kinabuhi. Sa panahon nga nagkalisod siya sa pagpangitag trabaho, miapil siya sa politika ug siya nahimong dumadapig sa ideya sa sosyalismo. Nahimo pa gani siya nga aktibong membro sa lokal nga partido sa Komunista.

Apan wala madugay, si Albert nahigawad sa Komunismo. Mihunong siya sa pagpakiglangkit sa politika ug iyang gideboto ang iyang bug-os nga panahon diha sa iyang pamilya. Iyang gipaneguro nga sila makabaton ug malipayong kinabuhi. Bisan pa niana, haw-ang gihapon ang gibati ni Albert; wala gihapon siyay kalinaw sa hunahuna.

Ang kasinatian ni Albert dili talagsaon. Aron makakaplag ug makahuloganong katuyoan sa kinabuhi, gisulayan sa minilyon ang nagkadaiyang mga ideolohiya, pilosopiya, ug mga relihiyon. Sa mga nasod sa Kasadpan, ang kalihokan sa mga hippie sa katuigang 1960 maoy pagsupak sa naandang moral ug katilingbanong mga prinsipyo. Ang mga batan-on ilabinang nangitag kalipay ug kahulogan sa kinabuhi pinaagi sa paggamit ug makadaot-sa-hunahuna nga mga droga ug pagsagop sa mga pilosopiya sa mga guru ug espirituwal nga mga lider sa maong grupo. Bisan pa niana, ang kalihokan sa mga hippie wala makahatag ug tinuod nga kalipay. Hinunoa, nakapatungha kini ug mga tawong adik sa droga ug mga batan-ong mahilayon, nga nakapakusog sa pagkahitumpawak sa katilingban ngadto sa kalibog may kalabotan sa moral.

Sulod sa daghang siglo, daghan ang nangitag kalipay pinaagi sa bahandi, gahom, o edukasyon. Ang maong mga pagpangagpas sa ngadtongadto  misangpot ug kahigawad. “Bisag ang usa ka tawo adunay kadagaya,” si Jesus miingon, “ang iyang kinabuhi wala magagikan sa mga butang nga iyang gipanag-iya.” (Lucas 12:15) Hinunoa, ang pagtinguha nga masapian kasagarang mohatag ug kaguol. Ang Bibliya nag-ingon: “Sila nga determinadong madato mangahulog sa tentasyon ug sa lit-ag ug sa daghang binuang ug makadaot nga mga tinguha, nga nagbanlod sa mga tawo sa kalaglagan ug sa kadaotan. Kay ang gugma sa salapi maoy gamot sa tanang matang sa makadaot nga mga butang, ug tungod sa pagpangab-ot niini nga gugma ang pipila . . . nagtusaktusak sa ilang kaugalingon sa daghang kasakitan.”—1 Timoteo 6:9, 10.

Nan, sa unsang paagi makaplagan ang kalinaw sa hunahuna ug katuyoan sa kinabuhi? Pinaagi ba sa pag-eksperimento, samag pagpana sa usa ka idlas nga ig-onon diha sa kangitngit? Dili gayod. Sumala sa ato unyang mabasa sa sunod nga artikulo, ang solusyon mao ang pagtagana sa hinungdanon kaayong panginahanglan nga iya lang sa tawo.

[Hulagway sa panid 3]

Ang pagpangagpas ba ug bahandi, gahom, o edukasyon makatabang kanimo sa pagkakaplag ug kalinaw sa hunahuna?