Kinabubut-on Nilang Gitanyag ang Ilang Kaugalingon

“ANG imong katawhan magatanyag sa ilang kaugalingon nga kinabubut-on.” (Salmo 110:3) Kanang mga pulonga ilabinang makahuloganon alang sa 46 ka estudyante sa ika-118 nga klase sa Watchtower Bible School of Gilead. Unsay ilang gihimo aron makatungha niining maong tunghaan, nga nagbansay ug umaabot nga mga misyonaryo aron matagan-an ang espirituwal nga mga panginahanglan sa mga tawo sa langyawng mga nasod? Si Mike ug Stacie, nga nagtungha sa ika-118 nga klase, misaysay: “Ang among simple nga paagi sa kinabuhi nakatabang kanamo nga dili malinga sa daghang butang ug sa pagpunting sa among pagtagad diha sa espirituwal nga mga butang. Determinado kami nga unahon ang among espirituwal nga mga tumong bisan pag nagmalamboon ang among negosyo.” Sama ni Mike ug Stacie, ang ubang mga estudyante niining maong klase kinabubut-ong nagtanyag sa ilang kaugalingon ug nag-alagad na karon ingong mga magwawali sa Gingharian sa upat ka kontinente.

Sa Sabado, Marso 12, 2005, ang 6,843 nga mitambong malipayong naminaw sa programa sa graduwasyon. Si Theodore Jaracz, membro sa Nagamandong Lawas sa mga Saksi ni Jehova, mao ang nag-alagad ingong tsirman. Human sa mainitong pag-abiabi sa mga dinapit, nga gikan sa 28 ka nasod, iyang gipunting ang pagtagad sa bili sa edukasyon sa Bibliya. Gikutlo niya ang gisulti ni William Lyon Phelps, usa ka Amerikanong magtutudlo, nga nag-ingon: “Ang matag usa nga adunay mabug-osong kahibalo sa Bibliya matawag gayod nga edukado.” Bisan tuod mapuslanon ang sekular nga edukasyon, ang edukasyon sa Bibliya mas bililhon. Motabang kini sa mga tawo sa pagkuhag kahibalo sa Diyos, nga motultol sa kinabuhing walay kataposan. (Juan 17:3) Gidayeg ni Brader Jaracz ang mga graduwado tungod kay andam sila nga mohimog dugang pa sa tibuok-kalibotang programa sa pagtudlo sa Bibliya nga ginahimo diha sa kapin sa 98,000 ka kongregasyon sa mga Saksi ni Jehova sa tibuok kalibotan.

Nunot-sa-Panahon nga Pagdasig Alang sa mga Graduwado

Human sa pangbukas nga pakigpulong sa tsirman, si William Samuelson naghisgot sa ulohan nga “Kon sa Unsang Paagi Ka Mahisama sa Malamboon nga Kahoyng Olibo sa Balay sa Diyos,” nga gibase sa Salmo 52:8. Gisaysay niya nga ang kahoyng olibo masambingayong gigamit sa Bibliya ingong simbolo sa pagkamabungahon, katahom, ug dignidad. (Jeremias 11:16) Gipakasama sa mamumulong ang mga estudyante ngadto sa mga kahoyng olibo, nga miingon: “Kamo pagalantawon ni Jehova ingong matahom ug may dignidad samtang matinumanon ninyong ginahimo ang buluhatong pagwali sa Gingharian diha sa inyong misyonaryong mga asaynment.” Maingon nga ang kahoyng olibo nanginahanglag layog-abot nga mga gamot aron magpabiling buhi panahon sa hulaw, kinahanglang palig-onon sa mga  estudyante ang ilang espirituwal nga mga gamot aron makaagwanta sa pagkawalay-pagtagad, pagsupak, o ubang mga pagsulay nga lagmit nilang maagoman sa ilang pag-alagad diha sa langyawng mga dapit.—Mateo 13:21; Colosas 2:6, 7.

Si John E. Barr, usa sa tulo ka membro sa Nagamandong Lawas nga adunay bahin sa programa, naghisgot sa tema nga “Kamo ang Asin sa Yuta.” (Mateo 5:13) Siya miingon nga sama nga ang literal nga asin makapreserbar sa pagkaon, ang buluhatong pagsangyaw sa Gingharian sa Diyos nga ginahimo sa mga misyonaryo makatipig sa kinabuhi niadtong maminaw niana, nga manalipod kanila batok sa moral ug espirituwal nga kadaot. Dayon sa malumo nga paagi, giawhag ni Brader Barr ang mga graduwado sa ‘pagpakigdait’ sa uban. (Marcos 9:50) “Ugmara ang bunga sa espiritu, ug paningkamoti nga ang inyong paggawi ug sinultihan kanunayng malumo ug may konsiderasyon,” pahimangno pa sa mamulong.

“Pabilin sa Sakayan Diha sa Lalom nga Katubigan” mao ang tema nga gihisgotan ni Wallace Liverance, usa sa mga instruktor sa Gilead. Maingon nga ang sakayan diha sa lalom nga katubigan makalawig sa hustong direksiyon, ang pagsabot sa “lawom nga mga butang sa Diyos”—mga kamatuoran bahin sa katuyoan sa Diyos ug kon sa unsang paagi kini matuman—makatabang sa usa nga mouswag sa espirituwal. (1 Corinto 2:10) Ang pagpabilin lamang diha sa mabawng espirituwal nga katubigan pinaagi sa pagkakontento na lang sa “paninugdang mga butang sa sagradong mga pahayag sa Diyos” makasumpo sa atong pag-uswag ug basin magpahinabo pa ganig “pagkalunod labot sa [atong] pagtuo.” (Hebreohanon 5:12, 13; 1 Timoteo 1:19) “Pasagdi nga ang ‘pagkalawom sa bahandi ug sa kaalam ug sa kahibalo sa Diyos’ motabang kaninyo sa pagpadayon diha sa inyong misyonaryong mga asaynment,” hinapos ni Brader Liverance.—Roma 11:33.

Si Mark Noumair, laing instruktor sa Gilead, naghisgot sa ulohan nga “Magkinabuhi Ka ba Sumala sa Imong Panulondon?” Sa kapin nag 60 ka tuig, ang Watchtower Bible School of Gilead nakabaton ug kredibilidad ug maayong reputasyon tungod sa mga graduwado niini nga nahimong ‘tapok sa maayong mga saksi.’ (Genesis 31:48) Kining panulondon sa Gilead napasa ngadto sa mga estudyante sa ika-118 nga klase. Gidasig ni Brader Noumair ang mga estudyante sa pagsundog sa karaang mga Tekoahanon sa panahon ni Nehemias ug sa pakigkooperar nga mapainubsanon sa lokal nga kongregasyon ug kaubang mga misyonaryo. Gipahimangnoan sila sa paglikay sa garbosong tinamdan sa “mga halangdon” nga gihisgotan ni Nehemias ug sa pagkaandam hinuon nga mobuhat sa hilom nga dili maninguha nga mahimong inila.—Nehemias 3:5.

Matulon-anong mga Kasinatian ug mga Interbiyo

Ang sunod nga bahin sa programa nag-ulohang “Ang Pulong sa Diyos Padayong Mikaylap.” (Buhat 6:7) Ubos sa pagdumala sa instruktor sa Gilead nga si Lawrence Bowen, gipasundayag sa mga estudyante ang ilang mga kasinatian sa pagsangyaw sa kanataran samtang nagtungha. Gipakita sa mga kasinatian nga ang mga estudyante madasigong nagwali sa Pulong sa Diyos ug si Jehova dagayang nagpanalangin sa ilang mga paningkamot.

Giinterbiyo ni Richard Ashe ang mga membro sa pamilyang Bethel nga nagtaganag serbisyo sa mga estudyante. Gipatin-aw nila kon sa unsang paagi gisuportahan sa pamilyang Bethel ang mga estudyante sa Gilead aron makabenepisyo sila pag-ayo sa ilang pagtungha. Dayon, giinterbiyo ni Geoffrey Jackson ang pipila ka miaging mga graduwado sa Gilead. Giasoy nila ang daghang kahigayonan nga nabatonan sa mga misyonaryo sa pagdayeg ug pagpasidungog kang Jehova. Ang usa miingon: “Ang mga tawo makamatikod sa tanang butang nga himoon nimo ingong misyonaryo. Sila mamati, maniid, ug mahinumdom.” Busa, ang mga estudyante gidasig nga magmahunahunaon sa pagpakita kanunay ug maayong panig-ingnan. Segurado nga mapuslan nila kining maayong tambag sa umaabot nga mga panahon.

Si Stephen Lett, membro sa Nagamandong Lawas, naghatag sa kataposang pakigpulong, nga nag-ulohang “Lakaw Ingong mga Tigdala sa ‘Buhing Tubig.’” (Juan 7:38) Miingon siya nga sa miaging lima ka bulan, ang mga estudyante nakabenepisyog dako pinaagi sa pag-inom ug daghang tubig gikan sa Pulong sa Diyos sa kamatuoran. Apan unsay buhaton sa bag-ong mga misyonaryo sa kahibalo nga ilang nabatonan? Giawhag ni Brader Lett ang mga graduwado sa pagpaambit niining espirituwal nga tubig sa madagayaong paagi  aron mabatonan sa uban ang ‘usa ka tuboran sa tubig diha sa ilang kaugalingon nga magabugwak aron mohatag ug kinabuhing walay kataposan.’ (Juan 4:14) Ang mamumulong midugang: “Ayawg kalimot sa paghatag kang Jehova, ‘ang tuboran sa buhing tubig,’ sa pasidungog ug himaya nga angay kaniya. Magmapailobon sa pagtudlo niadtong mibiya na sa gihampak-ug-hulaw nga Dakong Babilonya.” (Jeremias 2:13) Gitapos ni Brader Lett ang iyang pakigpulong pinaagi sa pagdasig sa mga graduwado sa pagsundog nga masiboton sa espiritu ug sa pangasaw-onon ug sa padayong pag-ingon: “‘Umari ka!’ Ug si bisan kinsa nga giuhaw paaria; si bisan kinsa nga may tinguha paimna sa tubig sa kinabuhi nga walay bayad.”—Pinadayag 22:17.

Gitapos ni Brader Jaracz ang programa pinaagig pagbasa sa mga pangomosta nga nadawat gikan sa lainlaing nasod. Human niini, gibasa sa usa ka estudyante sa migraduwar nga klase ang ilang sulat sa pasalamat.

Andam ka ba sa pagtanyag sa imong kaugalingon sa pag-alagad sa dapit nga mas dako ang panginahanglan? Kon mao, nan pangagpasa ang espirituwal nga mga tumong, sama sa gihimo niining migraduwar nga mga estudyante. Tagamtama ang kalipay ug katagbawan nga bation sa dihang ang usa malipayon ug kinabubut-on nga nagtanyag sa iyang kaugalingon sa pag-alagad sa Diyos—ingong usa man ka misyonaryo sa langyawng nasod o usa ka ministro sa kaugalingong dapit.

[Kahon sa panid 13]

ESTADISTIKA SA KLASE

Gidaghanon sa mga nasod nga gihawasan: 8

Gidaghanon sa mga nasod nga gipadalhan: 19

Gidaghanon sa mga estudyante: 46

Aberids nga edad: 33.0

Aberids nga katuigan sa kamatuoran: 16.5

Aberids nga katuigan sa bug-os-panahong ministeryo: 12.9

[Hulagway sa panid 15]

Ika-118 nga Migraduwar nga Klase sa Watchtower Bible School of Gilead

Sa listahan sa ubos, ang mga laray ginumerohan gikan sa atubangan ngadto sa likod, ug ang mga ngalan gilista gikan sa wala ngadto sa tuo sa matag laray.

(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.