Maayong Balita Alang sa Katawhan sa Tanang Kanasoran

“Kamo mahimong akong mga saksi . . . hangtod sa kinalay-ang dapit sa yuta.”—BUHAT 1:8.

1. Ingong mga magtutudlo sa Bibliya, unsay atong hatagan ug pagtagad, ug ngano?

 ANG batid nga mga magtutudlo maghatag ug pagtagad dili lamang sa kon unsay ilang itudlo sa ilang mga estudyante kondili usab kon sa unsang paagi nila itudlo kini. Ingong mga magtutudlo sa kamatuoran sa Bibliya, mao usab kanay atong buhaton. Atong hatagan ug pagtagad ang mensahe nga atong isangyaw ug ang mga pamaagi nga atong gamiton sa pagsangyaw niana. Ang atong mensahe, ang maayong balita sa Gingharian sa Diyos, wala mausab, apan ipasibo nato ang atong mga pamaagi. Ngano man? Aron masangyawan ang daghang tawo kutob sa mahimo.

2. Sa dihang ipasibo nato ang atong mga pamaagi sa pagsangyaw, kinsay atong gisundog?

² Pinaagi sa pagpasibo sa atong mga pamaagi sa pagsangyaw, atong gisundog ang gibuhat sa karaang mga alagad sa Diyos. Tagda, pananglitan, si apostol Pablo. Siya miingon: “Ngadto sa mga Hudiyo ako nahimong ingon sa usa ka Hudiyo . . . Ngadto nilang walay balaod ako nahimong ingon sa walay balaod . . . Ngadto sa mga maluya ako nahimong maluya, aron makabig ko ang mga maluya. Ako nahimong tanang butang ngadto sa tanang matang sa katawhan, aron maluwas ko sa bisan unsa mang paagi ang pipila.” (1 Corinto 9:19-23) Ang mapasiboong pamaagi ni Pablo epektibo gayod. Kita usab magmaepektibo kon sa kamahunahunaon ipasibo nato ang atong mga presentasyon sa mga tawo nga atong kaestorya.

Ngadto sa “mga Kinatumyan sa Yuta”

3. (a) Unsang hagit ang atong giatubang sa atong buluhatong pagsangyaw? (b) Sa unsang paagi ang mga pulong diha sa Isaias 45:22 natuman karon?

³ Usa ka dakong hagit nga giatubang niadtong nagsangyaw sa maayong balita mao ang gidak-on sa teritoryo—ang “tibuok gipuy-ang yuta.” (Mateo 24:14) Sa miaging siglo, daghang alagad ni Jehova ang naghago sa pag-adto sa bag-ong mga kayutaan aron isangyaw ang maayong balita. Unsay resulta? Makapahingangha nga pag-uswag sa tibuok kalibotan. Sa sinugdanan sa ika-20ng siglo,  ang pagsangyaw gitaho diha sa pipila lamang ka kayutaan, apan sa pagkakaron ang mga Saksi ni Jehova aktibo na diha sa 235 ka kayutaan! Tinuod nga ang maayong balita sa Gingharian ginamantala na bisan ngadto sa “mga kinatumyan sa yuta.”—Isaias 45:22.

4, 5. (a) Kinsay dako ug natabang sa pagpakaylap sa maayong balita? (b) Unsay gisulti sa pipila ka sangang buhatan bahin niadtong gikan sa laing nasod nga nag-alagad sa teritoryo sa sanga?

⁴ Unsay hinungdan sa maong pag-uswag? Daghan ang hinungdan. Ang mga misyonaryo nga gibansay sa Watchtower Bible School of Gilead ug, ning bag-o pa, ang kapin sa 20,000 ka graduwado sa Tunghaan sa Pagbansay sa Ministeryo dakog gikatabang. Mao man usab ang daghang Saksi nga sa kaugalingon nilang gasto mibalhin ngadto sa kayutaan diin mas dako ang panginahanglan ug mga magmamantala sa Gingharian. Ang maong nagsakripisyo-sa-kaugalingon nga mga Kristohanon—mga lalaki ug babaye, bata ug tigulang, tagsaanon ug minyo—dakog natabang sa pagsangyaw sa mensahe sa Gingharian sa tibuok yuta. (Salmo 110:3; Roma 10:18) Gipabilhan gayod sila. Matikdi kon unsay gisulat sa pipila ka sangang buhatan bahin niadtong gikan sa laing nasod nga nag-alagad diin mas dako ang panginahanglan diha sa teritoryo sa sanga.

⁵ “Kining minahal nga mga Saksi nanguna sa pagsangyaw diha sa hilit nga mga dapit, nakatabang sa pagtukod ug bag-ong mga kongregasyon, ug nakatampo sa espirituwal nga pag-uswag sa lokal nga mga igsoon.” (Ecuador) “Kon mamauli ang gatosan ka langyaw nga nag-alagad dinhi, maapektohan ang kalig-on sa mga kongregasyon. Usa ka panalangin nga makauban namo sila.” (Dominican Republic) “Sa kadaghanan sa among kongregasyon, mas daghan ang mga sister, usahay moabot ug 70 porsiyento. (Salmo 68:11) Kadaghanan kanila bag-o pa lang sa kamatuoran, apan ang dalagang payunir nga mga sister nga gikan sa ubang mga nasod nagtagana ug bililhong tabang pinaagi sa pagbansay nianang mga bag-ohan. Kining mga sister nga gikan sa laing nasod  usa gayod ka gasa alang kanamo!” (Usa ka nasod sa Sidlakang Uropa) Nahunahuna na ba nimo sukad nga moalagad sa laing nasod? a—Buhat 16:9, 10.

“Napulo ka Tawo Gikan sa Tanang Pinulongan”

6. Sa unsang paagi ang Zacarias 8:23 nagpunting sa hagit sa pagsangyaw ngadto sa mga tawo nga lainlain ug pinulongan?

⁶ Ang laing dakong hagit mao ang nagkadaiya kaayong mga pinulongan nga gisulti dinhi sa yuta. Ang Pulong sa Diyos nagtagna: “Mahitabo unya niadtong mga adlawa nga napulo ka tawo gikan sa tanang pinulongan sa mga nasod mokupot, oo, sila gayod mokupot sa sidsid sa tawo nga usa ka Hudiyo, nga magaingon: ‘Mouban kami kaninyo, kay kami nakadungog nga ang Diyos nagauban kaninyo.’” (Zacarias 8:23) Sa modernong katumanan niining tagnaa, ang napulo ka tawo naghawas sa dakong panon, nga gitagna sa Pinadayag 7:9. Apan, matikdi nga sumala sa tagna ni Zacarias, ang “napulo ka tawo” maggikan dili lamang sa tanang nasod kondili usab “gikan sa tanang pinulongan sa mga nasod.” Nakita ba nato ang katumanan niining hinungdanong detalye sa tagna? Oo, nakita gayod.

7. Unsang estadistika ang nagpakita nga ang mga tawo “gikan sa tanang pinulongan” nasangyawan na sa maayong balita?

⁷ Tagda ang pipila ka estadistika. Singkuwenta ka tuig kanhi ang atong literatura gipatik diha sa 90 ka pinulongan. Karon, ang maong gidaghanon mitubo ngadto sa kapin sa 400. “Ang matinumanon ug maalamong ulipon” naghimo sa tanan kutob sa maarangan sa pagtagana ug literatura bisan alang sa pipila kansang pinulongan gisulti lamang sa pipila ka tawo. (Mateo 24:45) Pananglitan, ang literatura sa Bibliya mabatonan na karon sa Greenlandiko (gisulti sa 47,000 ka tawo), sa Palauan (gisulti sa 15,000), ug sa Yapese (gisulti sa duolan sa 7,000 ka tawo).

“Usa ka Dakong Pultahan” nga Motultol Ngadto sa Bag-ong mga Kahigayonan

8, 9. Unsang kaugmaran ang nagbukas ug “usa ka dakong pultahan” alang kanato, ug sa unsang paagi ang libolibong Saksi misanong?

⁸ Apan, karon dili na tingali kinahanglan nga moadto kita sa laing nasod aron ipaambit ang maayong balita sa mga tawo sa tanang pinulongan. Sa di pa dugayng katuigan, ang pag-abot sa milyonmilyong lalin ug mga kagiw diha sa dato nga mga nasod nagpatungha ug daghang komunidad sa mga lalin nga nagsulti ug daghang pinulongan. Pananglitan, sa Paris, Pransiya, mga 100 ka pinulongan ang ginasulti. Sa Toronto, Canada, ang gidaghanon maoy 125; ug sa London, Inglaterra, kapin sa 300 ka langyawng pinulongan ang ginasulti! Kining mga tawhana nga gikan sa ubang kayutaan nga sakop sa daghang teritoryo sa kongregasyon nagbukas ug “usa ka dakong pultahan” nga motultol sa bag-ong mga kahigayonan sa pagpaambit sa maayong balita ngadto sa katawhan sa tanang kanasoran.—1 Corinto 16:9.

⁹ Libolibo ka Saksi ang midawat sa maong hagit pinaagi sa pagtuon ug laing pinulongan. Alang sa kadaghanan kanila, lisod kana; apan ang panglimbasog dagayang gibalosan ug kalipay nga  bation tungod sa pagtabang sa mga lalin ug mga kagiw sa pagkat-on sa kamatuoran nga makaplagan diha sa Pulong sa Diyos. Sa di pa dugayng tuig, duolan sa 40 porsiyento niadtong nabawtismohan sa distritong mga kombensiyon diha sa usa ka nasod sa Kasadpang Uropa naggikan sa laing nasod.

10. Sa unsang paagi gigamit nimo ang pulyetong Good News for People of All Nations? (Tan-awa ang kahon nga “Mga Bahin sa Pulyetong Good News for People of All Nations,” diha sa panid 26.)

¹⁰ Tinuod, kadaghanan kanato wala sa kahimtang nga mokat-on ug langyawng pinulongan. Bisan pa niana, makapakigbahin kita sa pagtabang sa mga lalin pinaagi sa paggamit sa bag-ong giluwatan nga pulyeto nga Good News for People of All Nations, b nga adunay makapadani nga mensahe sa Bibliya diha sa daghang pinulongan. (Juan 4:37) Gigamit ba nimo kining maong pulyeto diha sa ministeryo?

Sa Dihang Dili Mosanong ang mga Tawo

11. Unsay laing hagit nga giatubang diha sa pipila ka teritoryo?

¹¹ Samtang magkadako ang impluwensiya ni Satanas sa yuta, laing hagit ang subsob nga atubangon—diyutay lamang ang mosanong diha sa pipila ka teritoryo. Siyempre, kining situwasyona dili makapatingala kanato, tungod kay gitagna ni Jesus nga molungtad ang maong kahimtang. Nagsulti bahin sa atong adlaw, siya miingon: “Mobugnaw ang gugma sa kadaghanan.” (Mateo 24:12) Sa pagkatinuod, nagkadaghang tawo ang dili na motuo sa Diyos ug motahod sa Bibliya. (2 Pedro 3:3,4) Busa, sa pipila ka dapit sa kalibotan, diyutay na lang ang nahimong bag-ong mga tinun-an ni Kristo. Apan, wala kana magpasabot nga walay kapuslanan ang mga paghago sa atong minahal nga Kristohanong mga igsoon nga matinumanong nagsangyaw sa mga teritoryo nga walay mosanong. (Hebreohanon 6:10) Ngano man? Tagda ang mosunod.

12. Unsa ang duha ka tumong sa atong buluhatong pagsangyaw?

¹² Ang Ebanghelyo ni Mateo nagpasiugda sa duha ka pangunang mga tumong sa atong mga kalihokan sa pagsangyaw. Ang usa mao nga kita ‘maghimog mga tinun-an sa katawhan sa tanang kanasoran.’ (Mateo 28:19) Ang lain mao nga ang mensahe sa Gingharian magsilbing ‘pamatuod.’ (Mateo 24:14) Hinungdanon kanang duha ka tumong, apan ang ikaduha adunay linaing kahulogan. Ngano?

13, 14. (a) Unsa ang usa ka talagsaong bahin sa ilhanan sa presensiya ni Kristo? (b) Unsay angay natong hinumdoman, ilabina sa dihang magsangyaw sa teritoryo diin diyutay ra ang mosanong?

¹³ Gitala sa magsusulat sa Bibliya nga si Mateo nga ang mga apostoles nangutana kang Jesus: “Unsa man unya ang ilhanan sa imong presensiya ug sa kataposan sa sistema sa mga butang?” (Mateo 24:3) Sa pagtubag, si Jesus miingon nga ang usa ka talagsaong bahin sa maong ilhanan mao ang tibuok-yuta nga buluhatong pagsangyaw. Naghisgot ba siya mahitungod sa paghimog mga tinun-an? Wala. Siya miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran.” (Mateo 24:14) Sa ingon gipakita ni Jesus nga ang buluhaton nga pagsangyaw sa gingharian maoy hinungdanong bahin sa maong ilhanan.

¹⁴ Busa, samtang isangyaw nato ang maayong balita sa Gingharian, atong hinumdoman nga bisan pag kita dili kanunayng molampos sa paghimog mga tinun-an, kita molampos sa paghatag  ug ‘pamatuod.’ Bisan unsa pay sanong sa mga tawo, sila nahibalo kon unsay atong ginabuhat, ug busa kita nakigbahin sa katumanan sa tagna ni Jesus. (Isaias 52:7; Pinadayag 14:6, 7) Si Jordy, usa ka batan-ong Saksi sa Kasadpang Uropa, miingon: “Nalipay gayod ako sa pagkahibalo nga ako gihimong kasangkapan ni Jehova sa pagpakigbahin sa katumanan sa Mateo 24:14.” (2 Corinto 2:15-17) Sa walay duhaduha mao usab kanay imong gibati.

Sa Dihang Supakon ang Atong Mensahe

15. (a) Bahin sa unsa nga gipasidan-an ni Jesus ang iyang mga sumusunod? (b) Unsay nakapaarang kanato sa pagsangyaw bisan pa sa pagsupak?

¹⁵ Ang pagsupak maoy laing hagit sa pagsangyaw sa maayong balita sa Gingharian. Gipasidan-an ni Jesus ang iyang mga sumusunod: “Kamo pagadumtan sa tanang kanasoran tungod sa akong ngalan.” (Mateo 24:9) Sama sa unang mga Kristohanon, ang mga sumusunod ni Jesus karon gidumtan, gisupak, ug gilutos. (Buhat 5:17, 18, 40; 2 Timoteo 3:12; Pinadayag 12:12, 17) Sa pipila ka nasod, sila gidili karon sa gobyerno. Bisan pa niana, agig pagsugot sa Diyos, ang matuod nga mga Kristohanon sa maong mga nasod nagpadayon sa pagsangyaw sa maayong balita sa Gingharian. (Amos 3:8; Buhat 5:29; 1 Pedro 2:21) Unsay nakapaarang kanila, maingon man sa ubang mga Saksi sa tibuok kalibotan, sa pagbuhat niana? Gipalig-on sila ni Jehova pinaagi sa iyang balaang espiritu.—Zacarias 4:6; Efeso 3:16; 2 Timoteo 4:17.

16. Sa unsang paagi gipakita ni Jesus ang kalambigitan tali sa buluhatong pagsangyaw ug sa espiritu sa Diyos?

¹⁶ Gipasiugda ni Jesus ang kalambigitan tali sa espiritu sa Diyos ug sa buluhatong pagsangyaw sa dihang giingnan niya ang iyang mga sumusunod: “Kamo magadawat ug gahom sa dihang ang balaang espiritu mokunsad kaninyo, ug kamo mahimong akong mga saksi . . . hangtod sa kinalay-ang dapit sa yuta.” (Buhat 1:8; Pinadayag 22:17) Hinungdanon ang pagkasunodsunod sa panghitabo niining tekstoha. Una, ang mga tinun-an nakadawat sa balaang espiritu, ug dayon ilang gibuhat ang tibuok-yuta nga buluhatong pagsangyaw. Pinaagi lamang sa tabang sa espiritu sa Diyos nga sila makabaton ug kusog sa paglahutay sa paghatag ug ‘pamatuod ngadto sa tanang kanasoran.’ (Mateo 24:13, 14; Isaias 61:1, 2) Busa, haom nga gitawag ni Jesus ang balaang espiritu ingong “magtatabang.” (Juan 15:26) Siya miingon nga ang espiritu sa Diyos magtudlo ug maggiya sa iyang mga tinun-an.—Juan 14:16, 26; 16:13.

17. Sa dihang kita mag-atubang ug grabeng pagsupak, sa unsang paagi ang balaang espiritu motabang kanato?

¹⁷ Sa unsang mga paagi ang espiritu sa Diyos motabang kanato karon sa dihang kita mag-atubang ug grabeng pagsupak sa pagsangyaw sa maayong balita? Ang espiritu sa Diyos magpalig-on kanato, ug kini makigbatok niadtong naglutos kanato. Sa pag-ilustrar niini, tagda ang usa ka hitabo sa kinabuhi ni Haring Saul.

 Nakigbatok ang Espiritu sa Diyos

18. (a) Unsang dili maayong kausaban ang nahitabo kang Saul? (b) Unsang mga paagi ang gigamit ni Saul sa paglutos kang David?

¹⁸ Si Saul maayo ug sinugdanan ingong unang hari sa Israel, apan sa ulahi siya nagmasinupakon kang Jehova. (1 Samuel 10:1, 24; 11:14, 15; 15:17-23) Tungod niini, ang espiritu sa Diyos wala na magpaluyo sa hari. Si Saul nasuko pag-ayo kang David, kinsa gidihogan ingong sunod nga hari ug nianang tungora gipaluyohan sa espiritu sa Diyos. (1 Samuel 16:1, 13, 14) Si David morag dali rang atakehon. Kon buot hunahunaon, alpa lamang ang gikuptan ni David, samtang si Saul naggunit ug bangkaw. Busa usa ka adlaw niana samtang si David nagtugtog ug alpa, “gilabay ni Saul ang bangkaw ug miingon: ‘Ipaod ko si David sa bungbong!’ apan nakalikay si David gikan sa iyang atubangan, sa duha ka higayon.” (1 Samuel 18:10, 11) Human niana, namati si Saul sa iyang anak nga si Jonatan, ang higala ni David, ug nanumpa: “Ingon nga si Jehova buhi, [si David] dili pagapatyon.” Apan unya, si Saul ‘nagtinguha na usab nga ipaod si David sa bungbong pinaagi sa bangkaw.’ Apan, si David ‘nakalikay gikan sa atubangan ni Saul, mao nga iyang naigo ang bungbong sa iyang bangkaw.’ Si David mikalagiw, apan si Saul migukod kaniya. Nianang makuyaw nga panahon, ang espiritu sa Diyos nakigbatok na kang Saul. Sa unsang paagi?—1 Samuel 19:6, 10.

19. Sa unsang paagi ang espiritu sa Diyos nanalipod kang David?

¹⁹ Si David mikalagiw ngadto kang manalagnang Samuel, apan gipadala ni Saul ang iyang mga tawo aron sa pagdakop kang David. Apan, pag-abot nila sa gitagoan ni David “ang espiritu sa Diyos midangat sa mga mensahero ni Saul, ug sila milihok usab nga sama sa mga manalagna.” Nahupong gayod sila sa espiritu sa Diyos nga nakalimtan na nila sa bug-os ang katuyoan sa ilang misyon. Duha pa ka higayon nga si Saul nagpadala ug mga tawo aron sa pagdakop kang David, ug nahitabo gihapon ang maong butang. Sa kataposan, si Haring Saul mismo ang miadto kang David, apan si Saul wala usab makapakigbisog sa espiritu  sa Diyos. Gani, tungod sa balaang espiritu siya wala makalihok “sa tibuok adlaw ug sa tibuok gabii”—nga naghatag kang David ug igong panahon sa pagkalagiw.—1 Samuel 19:20-24.

20. Unsang leksiyon ang atong makat-onan gikan sa asoy bahin sa paglutos ni Saul kang David?

²⁰ Kining asoy bahin kang Saul ug David adunay makapalig-ong leksiyon: Ang mga maglulutos sa mga alagad sa Diyos dili molampos sa dihang makigbatok ang espiritu sa Diyos kanila. (Salmo 46:11; 125:2) Katuyoan ni Jehova nga si David mahimong hari ibabaw sa Israel. Walay makausab niana. Alang sa atong adlaw, gitino ni Jehova nga ang “maayong balita sa gingharian igawali.” Walay makasanta niana.—Buhat 5:40, 42.

21. (a) Sa unsang paagi milihok ang ubang mga magsusupak karon? (b) Sa unsa kita masaligon?

²¹ Ang ubang relihiyoso ug politikanhon nga mga lider naggamit ug mga bakak ug bisan kapintasan aron sa pagbabag kanato. Apan, maingon nga gipanalipdan ni Jehova si David sa espirituwal nga paagi, panalipdan usab Niya ang Iyang katawhan karon. (Malaquias 3:6) Busa, sama kang David, kita masaligong moingon: “Sa Diyos ako nagasalig. Dili ako mahadlok. Unsay arang mahimo sa yutan-ong tawo kanako?” (Salmo 56:11; 121:1-8; Roma 8:31) Uban sa tabang ni Jehova, hinaot nga kita magpadayon sa pagsagubang sa tanang hagit samtang gituman nato ang hinatag-sa-Diyos nga sugo sa pagsangyaw sa maayong balita sa Gingharian ngadto sa mga tawo sa tanang kanasoran.

[Mga footnote]

Makahinumdom Ka Ba?

• Nganong ipasibo man nato ang atong mga pamaagi sa pagsangyaw?

• Unsang “dakong pultahan” nga motultol sa bag-ong mga kahigayonan ang nabuksan?

• Unsay mapalampos sa atong buluhatong pagsangyaw, bisan diha sa mga teritoryo nga diyutay ra ang mosanong?

• Nganong walay magsusupak nga makapahunong sa pagsangyaw sa maayong balita sa Gingharian?

[Mga Pangutana sa Pagtuon]

[Kahon sa panid 22]

Usa ka Dakong Katagbawan

“Malipayon ug nalingaw sa ilang hiniusang pag-alagad kang Jehova.” Naghubit kana sa pamilya nga mibalhin gikan sa Espanya ngadto sa Bolivia. Usa ka anak nga lalaki sa maong pamilya ang miadto didto aron sa pagtabang sa usa ka isolated group. Nakadayeg kaayo ang iyang mga ginikanan sa iyang dayag nga kalipay nga sa wala madugay ang tibuok pamilya—nga naglakip sa iyang upat ka igsoong lalaki gikan sa 14 ngadto sa 25 anyos ang edad—nag-alagad na didto. Tulo sa mga lalaki nagpayunir na karon, ug ang usa nga maoy nag-una didto di pa dugayng mitambong sa Tunghaan sa Pagbansay sa Ministeryo.

“Daghan ang lisod nga mga situwasyon,” miingon si Angelica nga nag-edad ug 30 anyos nga taga-Canada, kinsa nag-alagad sa Sidlakang Uropa, “apan nakabaton ako ug katagbawan sa pagtabang sa mga tawo diha sa ministeryo. Natandog usab ako sa daghang pahayag sa pagpasalamat gikan sa lokal nga mga Saksi nga subsob magpasalamat kanako tungod sa pag-adto didto ug pagtabang kanila.”

“Daghan kaayong kostumbre nga kinahanglang maanaran namo,” miingon ang duha ka managsoong babaye nga nag-edad ug duolan sa 30 anyos nga taga-Tinipong Bansa, kinsa nag-alagad sa Dominican Republic. “Apan, milahutay kami sa among asaynment, ug pito sa among mga ginatun-an sa Bibliya nagtambongan na sa mga tigom.” Kining duha ka sister nakatabang sa pag-organisar sa usa ka grupo sa mga magmamantala sa Gingharian diha sa usa ka lungsod nga walay kongregasyon.

Si Laura, usa ka sister nga duolan na sa 30 anyos, nag-alagad sa laing nasod sulod na sa kapin sa upat ka tuig. Siya miingon: “Gituyo nako nga himoong simple ang akong kinabuhi. Nakatabang kini sa mga magmamantala sa pagkasabot nga ang pagkinabuhi nga makasaranganon nagdepende kanimo ug sa maayong panghukom, dili gumikan sa kakabos. Ang pagtabang sa uban, ilabina sa mga batan-on, maoy tuboran sa akong kalipay nga makahulip sa tinuod nga mga kalisdanan sa pag-alagad sa langyawng nasod. Dili nako ibaylo ang akong pag-alagad dinhi sa bisan unsang laing paagi sa pagkinabuhi, ug magpabilin ako dinhi taman sa itugot ni Jehova.”

[Kahon/Hulagway sa panid 26]

Mga Bahin sa Pulyetong Good News for People of All Nations

Ang pulyetong Good News for People of All Nations adunay usa ka panid nga mensahe nga gipresentar diha sa mga 92 ka pinulongan. Ang mensahe gisulat sa unang persona. Busa sa dihang basahon sa tagbalay ang mensahe, morag nakigsulti ka kaniya.

Ang sulod nga bahin sa hapin adunay mapa sa kalibotan. Gamita kining maong mapa aron makighigala sa tagbalay. Tingali ikatudlo nimo ang nasod diin ikaw nagpuyo ug ipaila kaniya nga gusto nimong mahibaloan kon taga-diin siya. Nianang paagiha, mahibaloan nimo kon unsay iyang gihunahuna ug motungha ang mahigalaon ug relaks nga kahimtang.

Ang pasiuna sa pulyeto naglista ug ubay-ubayng mga lakang nga angay natong himoon aron epektibong makatabang niadtong nagsulti sa pinulongan nga wala nato masabti. Palihog basaha pag-ayo kining maong mga lakang ug ipadapat gayod kana.

Dili lang ang mga pinulongan ra ang nalista diha sa kaundan kondili ang katumbas usab nga mga simbolo sa pinulongan. Kining bahina motabang kanimo sa pag-ila sa mga simbolo sa pinulongan nga gipatik diha sa atong mga tract ug sa ubang mga publikasyon sa lainlaing mga pinulongan.

[Hulagway]

Gigamit ba nimo kining pulyetoha diha sa ministeryo?

[Mga hulagway sa panid 23]

Ang atong mga publikasyon sa Bibliya mabatonan na karon sa kapin sa 400 ka pinulongan

GHANA

LAPLAND (SWEDEN)

PILIPINAS

[Mga hulagway sa panid 24, 25]

Makaalagad ka ba diin dunay mas dakong panginahanglan sa mga magmamantala sa Gingharian?

ECUADOR

DOMINICAN REPUBLIC