“Malipayon Kadtong Mahunahunaon sa Ilang Espirituwal nga Panginahanglan”

INIGMATA sa mga langgam mabuntag, kasagaran motuwit-tuwit sila sa makadiyot ug dayon manglupad sa pagpangitag pagkaon. Magabii, mamauli sila sa ilang batoganan, motuwit-tuwit na usab, ug mangatulog. Adunay mga panahon nga sila magpasanay, mangitlog, ug magpadako sa ilang mga kuyabog. Ingon usab niana ang ginahimo sa ubang mga mananap.

Kita nga mga tawo lahi. Tinuod, kita mokaon, matulog, ug mosanay, apan kadaghanan kanato dili kontento niining mga butanga lamang. Kita gustong masayod kon nganong naglungtad kita. Kita gustong mahibalo sa katuyoan sa atong kinabuhi. Kita buot usab makabaton ug paglaom sa umaabot. Kining mas halalom nga mga panginahanglan nagpaila sa usa ka hiyas nga iya lang sa tawo—ang espirituwalidad, o ang panginahanglan ug katakos sa pagtuki sa espirituwal nga mga butang.

Gibuhat Sumala sa Larawan sa Diyos

Ang Bibliya nagpatin-aw sa hinungdan sa kinaiyanhong panginahanglan sa tawo ug espirituwalidad, nga nag-ingon: “Gilalang sa Diyos ang tawo sumala sa iyang larawan, sa larawan sa Diyos iyang gilalang siya; lalaki ug babaye iyang gilalang sila.” (Genesis 1:27) Ang atong pagkagama sumala sa “larawan sa Diyos” nagpasabot nga bisan pag namansahan kita sa sala ug pagkadili-hingpit, kita adunay katakos sa pagbanaag sa partikular nga mga hiyas sa Diyos. (Roma 5:12) Pananglitan, kita may katakos nga magmamugnaon. Kita usab adunay kaalam, pagbati sa hustisya, ug katakos sa pagpakitag nagsakripisyo-sa-kaugalingong gugma sa usag usa. Dugang pa, kita makapamalandong sa nangagi ug makaplano alang sa umaabot.—Proverbio 4:7; Ecclesiastes 3:1, 11; Miqueas 6:8; Juan 13:34; 1 Juan 4:8.

Ang atong espirituwal nga katakos ilabinang gipadayag diha sa atong kinaiyanhong tinguha sa pagsimba sa Diyos. Gawas kon atong tagan-an sa hustong paagi ang atong panginahanglan nga makabaton ug maayong relasyon sa atong Maglalalang, kita dili makakaplag ug tinuod ug malungtaron nga kalipay. “Malipayon kadtong mahunahunaon sa  ilang espirituwal nga panginahanglan,” si Jesus nag-ingon. (Mateo 5:3) Apan, kinahanglang mag-amping kita sa pagtagana niana nga panginahanglan pinaagig espirituwal nga kamatuoran—mga kamatuoran bahin sa Diyos, sa iyang mga sukdanan, ug sa iyang katuyoan alang sa katawhan. Asa nato makaplagan ang espirituwal nga kamatuoran? Diha sa Bibliya.

“Ang Imong Pulong Maoy Kamatuoran”

Si apostol Pablo misulat: “Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagpanul-id sa mga butang.” (2 Timoteo 3:16) Ang mga pulong ni Pablo nahiuyon sa mga pulong ni Jesus, kinsa miingon sa Diyos diha sa pag-ampo: “Ang imong pulong maoy kamatuoran.” Karong panahona, atong nailhan ang maong Pulong ingong ang Balaang Bibliya, ug maalamon nga atong susihon kon ang atong pagtuo ug sukdanan nahiuyon ba niana.—Juan 17:17.

Pinaagi sa pagtandi sa atong pagtuo nianang sa Pulong sa Diyos, atong ginasundog ang mga tawo sa karaang Berea, kinsa gustong mapamatud-an nga ang mga pagtulon-an ni Pablo nahiuyon sa Kasulatan. Imbes sawayon ang mga taga-Berea, gidayeg sila ni Lucas tungod sa ilang tinamdan. Ilang “gidawat ang pulong uban ang tumang kaikag sa hunahuna,” siya misulat, “nga sa adlaw-adlaw maampingong nagasusi sa Kasulatan kon tinuod ba kining mga butanga.” (Buhat 17:11) Tungod sa daghang nagkasumpaki nga relihiyoso ug moral nga mga pagtulon-an karon, hinungdanon nga atong sundogon ang panig-ingnan sa hamilig-hunahuna nga mga taga-Berea.

Ang laing paagi sa pag-ila sa espirituwal nga kamatuoran mao ang pagpaniid kon sa unsang paagi kini nakaimpluwensiya sa kinabuhi sa mga tawo. (Mateo 7:17) Pananglitan, ang pagkinabuhi nga nahiuyon sa kamatuoran sa Bibliya mohimo sa usa nga maayong bana, maayong amahan, maayong asawa, o maayong inahan, sa ingon naghatag ug dugang kalipay sa pamilya ug nagpauswag sa tinuod nga katagbawan. “Malipayon kadtong nagapatalinghog sa pulong sa Diyos ug nagasunod niini,” si Jesus miingon.—Lucas 11:28.

Ang mga pulong ni Jesus makapahinumdom kanato sa gisulti sa iyang langitnong Amahan ngadto sa karaang mga Israelinhon: “Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan. Oh kon ikaw mamati lamang unta gayod sa akong mga sugo! Niana ang imong kalinaw mahimong sama gayod sa usa ka suba, ug ang imong pagkamatarong sama sa mga balod sa dagat.” (Isaias 48:17, 18) Ang tanang nahigugma sa pagkamaayo ug pagkamatarong matandog gayod nianang mahigugmaong pagdapit!

Ang Uban Gustong ‘Magpagitik sa Ilang mga Dalunggan’

Ang Diyos kinasingkasing nga nagdapit sa mga Israelinhon tungod kay napahisalaag sila sa relihiyosong mga kabakakan. (Salmo 106:35-40) Kita usab kinahanglang magbantay batok sa mga kabakakan. Mahitungod sa nag-angkong mga Kristohanon, si Pablo misulat: “Aduna unyay yugto sa panahon nga sila dili makaantos sa makapahimsog nga pagtulon-an, hinunoa, sumala sa ilang kaugalingong mga tinguha, sila magtigom ug mga magtutudlo alang sa ilang kaugalingon aron gitikon ang ilang mga dalunggan; ug ilang ilingiw ang ilang mga dalunggan gikan sa kamatuoran.”—2 Timoteo 4:3, 4.

Ang mga lider sa relihiyon naggitik sa dalunggan sa mga tawo pinaagi sa pagkonsentir sa mga buhat nga magtagbaw sa sayop nga mga tinguha, sama  sa pagpakigsekso sa dili kapikas, homoseksuwalidad, ug paghuboghubog. Ang Bibliya klarong nag-ingon nga kadtong mouyon nianang mga butanga ug kadtong nagabuhat niana “dili makapanunod sa gingharian sa Diyos.”—1 Corinto 6:9, 10; Roma 1:24-32.

Sa walay duhaduha, nagkinahanglan ug kaisog ang pagsunod sa mga sukdanan sa Bibliya ilabina kon pasipalahan ka, apan mahimo nimo kini. Daghang indibiduwal taliwala sa mga Saksi ni Jehova ang kaniadto mga adik, palahubog, makihilawason, bugoy, kawatan, ug mga bakakon. Bisan pa niana, kinasingkasing nilang gipadapat ang Pulong sa Diyos ug gibag-o ang ilang kinabuhi sa tabang sa balaang espiritu aron ‘makalakaw nga takos kang Jehova.’ (Colosas 1:9, 10; 1 Corinto 6:11) Kay nakigdait na sa Diyos, sila nakabaton usab ug kalinaw sa hunahuna ug tinuod nga paglaom sa umaabot, sama sa atong makita unya.

Ang Paglaom sa Gingharian

Ang paglaom diha sa Bibliya bahin sa walay kataposang kalinaw alang sa masinugtanong mga tawo matuman na unya pinaagi sa Gingharian sa Diyos. “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta,” matod ni Jesus diha sa iyang sulondang pag-ampo. (Mateo 6:10) Oo, ang Gingharian lamang sa Diyos maoy seguradong makapahinabo sa kabubut-on sa Diyos dinhi sa yuta. Ngano? Tungod kay ang langitnong Gingharian—usa ka gobyerno nga gamhan ni Jesu-Kristo—mao ang instrumento sa Diyos sa pagpasundayag sa Iyang takos nga pagkasoberano sa yuta.—Salmo 2:7-12; Daniel 7:13, 14.

Ingong Hari sa langitnong Gingharian, hatagag kagawasan ni Jesu-Kristo ang masinugtanong mga tawo gikan sa tanang matang sa pagkaulipon, lakip na sa tuman ka hugot nga pagkapot sa sala ni Adan ug ang resulta niini nga sakit ug kamatayon. Matod sa Pinadayag 21:3, 4: “Tan-awa! Ang tolda sa Diyos anaa uban sa mga tawo . . . Ug iyang [Jehova nga Diyos] pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.”

Ang walay-kataposang kalinaw motunhay sa tibuok yuta. Nganong makaseguro kita niana? Ang rason gipadayag diha sa Isaias 11:9, nga nag-ingon: “Dili sila [ang mga sakop sa Gingharian] magadaot ni magagun-ob sa tibuok nakong bukid nga balaan; tungod kay ang yuta mapuno sa kahibalo kang Jehova ingon sa katubigan nga nagtabon sa dagat mismo.”  Oo, ang tanang tawo sa yuta aduna na unyay tukmang kahibalo bahin sa Diyos ug magmasinugtanon na kaniya. Nakapalipay ba kanimo kanang maong paglaom? Kon mao, karon na ang panahon sa pagsugod pagkuha niining hamiling “kahibalo kang Jehova.”

Mamati Ka ba sa Mensahe sa Gingharian?

Pinaagi sa Gingharian, wagtangon sa Diyos ang tanang buhat ni Satanas ug tudloan ang katawhan sa Iyang matarong nga mga dalan. Busa, dili ikatingala nga ang Gingharian mao ang labing hinungdanong mensahe diha sa pagtulon-an ni Jesus. “Kinahanglan nga . . . ipahayag ko ang maayong balita sa gingharian sa Diyos,” matod niya, “tungod kay alang niini gipadala ako.” (Lucas 4:43) Gisugo ni Kristo ang iyang mga tinun-an sa pagpaambit sa maong mensahe ngadto sa uban. (Mateo 28:19, 20) “Kining maayong balita sa gingharian,” siya mitagna, “igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mateo 24:14) Haduol na kaayo ang maong kataposan. Busa, hinungdanon kaayo nga ang matinud-anog-kasingkasing nga mga tawo mamati niining nagaluwas-kinabuhi nga maayong balita!

Si Albert, nga gihisgotan sa unang artikulo, nakadungog sa mensahe sa Gingharian sa dihang ang iyang asawa ug anak nga lalaki nagsugod sa pagtuon sa Bibliya uban sa mga Saksi ni Jehova. Sa primero, nagduhaduha si Albert. Gihangyo pa gani niya ang pari sa ilang lugar sa pagduaw sa iyang asawa ug anak aron iyagyag ang kabakakan sa mga Saksi. Apan ang pari dili gustong manghilabot. Busa nakahukom si Albert sa pagpamati sa panaghisgot sa Bibliya aron pangitaan kini ug sayop. Human lang sa usa ka panagtuon, siya nakigbahin na niini, nga maikagon sa pagkat-on ug dugang. Iyang gisaysay sa ulahi kon nganong nausab ang iyang tinamdan. “Mao kini ang dugay na nakong gipangita,” matod niya.

Sa kataposan, si Albert nagsugod sa pagtagana sa iyang espirituwal nga panginahanglan, ug wala gayod siya magbasol. Ang kamatuoran sa Bibliya nakahatag kaniya sa dugay na kaayo niyang gipangita—ang kasulbaran sa inhustisya ug korapsiyon nga kaylap sa katilingban ug ang paglaom sa umaabot. Ang kamatuoran sa Bibliya nakahatag kaniya ug kalinaw sa hunahuna. Natagan-an ba ang imong espirituwal nga panginahanglan? Nganong dili ka mogahin ug pipila ka gutlo sa pagbasa sa mga pangutana nga makita diha sa kahon sa panid 6? Kon gusto ka ug dugang impormasyon, ang mga Saksi ni Jehova malipay sa pagtabang kanimo.

[Kahon/Mga hulagway sa panid 6]

NATAGAN-AN BA ANG IMONG ESPIRITUWAL NGA PANGINAHANGLAN?

Natagbaw ka ba sa espirituwal nga pagkaon nga imong ginadawat? Gidapit ka namo sa pagbasa sa mosunod nga mga pangutana ug markahi ang mga pangutana nga mahatagan nimo ug hustong tubag.

□ Kinsa ang Diyos, ug unsay iyang ngalan?

□ Kinsa si Jesu-Kristo? Nganong kinahanglan man siyang mamatay? Sa unsang paagi makabenepisyo kanimo ang iyang kamatayon?

□ Aduna bay Yawa? Kon aduna, asa man siya gikan?

□ Unsay mahitabo kanato sa dihang kita mamatay?

□ Unsay katuyoan sa Diyos alang sa yuta ug sa katawhan?

□ Unsa ang Gingharian sa Diyos?

□ Unsa ang mga sukdanan sa Diyos alang sa moralidad?

□ Diha sa pamilya, unsa ang gihatag sa Diyos nga mga papel alang sa bana ug asawa? Unsa ang pipila ka mga prinsipyo sa Bibliya nga makapalambo sa kalipay sa pamilya?

Kon dili ka segurado sa mga tubag sa bisan hain niining mga pangutanaha, mahimo kang mohangyo ug kopya sa brosyur nga Unsay Gikinahanglan sa Diyos Kanato? Kini nga brosyur, nga gipatik sa mga Saksi ni Jehova sa duolan 300 ka pinulongan, naghisgot ug 16 ka pangunang mga topiko sa Bibliya ug naghatag ug Kasulatanhong tubag sa tanang pangutana nga makita sa ibabaw.

[Mga hulagway sa panid 4]

Dili sama sa mga mananap, ang mga tawo adunay espirituwal nga panginahanglan

[Hulagway sa panid 5]

“Sila magtigom ug mga magtutudlo alang sa ilang kaugalingon aron gitikon ang ilang mga dalunggan.”—2 Timoteo 4:3

[Hulagway sa panid 7]

Ang walay-kataposang kalinaw molungtad pinaagi sa Mesiyanikong Gingharian sa Diyos