Mga Pangutana Gikan sa mga Magbabasa

Ang Deuteronomio 14:21 mabasa: “Dili kamo magakaon sa bisan unsang lawas nga daan nang patay.” Mosumpaki ba kana sa Levitico 11:40, nga mabasa: “Siya nga magakaon ug bisan unsa sa patayng lawas niini maglaba sa iyang mga besti, ug siya mahimong mahugaw hangtod sa pagkagabii”?

Kining duha ka bersikulo wala magkasumpaki. Ang unang teksto maoy pagsubli sa balaod sa pagdili batok sa pagkaon ug hayop nga nakaplagang patay, tingali gipatay ug ihalas nga mga mananap. (Exodo 22:31; Levitico 22:8) Ang ikaduhang teksto nagpatin-aw kon unsay angayng buhaton sa usa ka Israelinhon kon siya nakalapas sa maong pagdili, nga lagmit dili tinuyo.

Ang kamatuoran nga adunay butang nga gidili sa Balaod wala magpasabot nga kanunayng gituman ang maong pagdili. Pananglitan, may mga balaod batok sa pagpangawat, pagbuno, pagsaksig bakak, ug uban pa. Sa samang higayon, ang paglapas sa mga balaod nga gihatag sa Diyos may mga silot. Ang maong mga silot nagpatuman sa mga balaod ug nagpakita nga kana seryoso.

Ang tawo nga molapas sa pagdili batok sa pagkaon sa unod sa usa ka hayop nga nakaplagang patay na mahimong mahugaw sa panan-aw ni Jehova ug kinahanglang mahinloan sumala sa tukmang proseso sa paghinlo. Kon mapakyas siya sa paghinlo sa tukmang paagi sa iyang kaugalingon, siya “manubag sa iyang kasaypanan.”—Levitico 17:15, 16.