‘Pagdalag Maayong Balita sa Butang nga Mas Maayo’

“Pagkatahom ibabaw sa kabukiran sa mga tiil sa usa . . . nga nagdalag maayong balita sa butang nga mas maayo.”—ISAIAS 52:7.

1, 2. (a) Unsang makalilisang nga mga butang ang nagakahitabo adlaw-adlaw? (b) Unsay reaksiyon sa daghang tawo labot sa pagkadungog kanunay ug daotang balita?

 SA PAGKAKARON ang mga tawo sa tibuok kalibotan mibati nga sila nalumsan na sa daotang balita. Patingogon nila ang radyo ug makadungog sila ug makahahadlok nga mga balita bahin sa makamatayng mga sakit nga naghulga sa tawo. Motan-aw silag balita diha sa telebisyon ug makita nila ang dili-makalimtang mga hulagway sa gikuraw nga mga bata nga nangayog tabang. Mopunit silag mantalaan ug mabasa nila ang bahin sa mga pagpamomba nga nakagun-ob sa mga tinukod ug nakapatay ug daghang inosenteng mga tawo.

² Oo, ang makalilisang nga mga butang nagakahitabo kada adlaw. Ang talan-awon niining kalibotana nagkausab gayod ug nagkagrabe. (1 Corinto 7:31) Usa ka magasing-balita sa Kasadpang Uropa nag-ingon nga usahay morag ang tibuok kalibotan “hapit nang malaglag sa bug-os.” Bantog ra nga nagkadaghan ang mga tawong magul-anon! Usa ka tawo nga gikutlo diha sa surbi bahin sa balita sa telebisyon sa Tinipong Bansa sa walay duhaduha nagpahayag sa gibati sa milyonmilyong tawo sa dihang siya miingon: ‘Inigkahuman nakog tan-aw ug balita, maguol kaayo ko. Pulos lang daotang balita. Sobra na kaayo.’

Balita nga Kinahanglang Madungog sa Tanan

3. (a) Unsang maayong balita ang gimantala sa Bibliya? (b) Nganong gipabilhan nimo ang maayong balita bahin sa Gingharian?

³ Niining dulom kaayo nga kalibotan, duna bay makaplagan nga mas maayong balita? Oo, aduna! Makapahupay ang pagkahibalo nga ang Bibliya nagmantala ug maayong balita. Kini mao ang balita nga ang sakit, gutom, krimen, gubat, ug tanang matang sa pagdaogdaog pagataposon sa Gingharian sa Diyos. (Salmo 46:9; 72:12) Dili ba kana balita nga kinahanglang madunggan sa tanan? Mao gayod kanay hunahuna sa mga Saksi ni Jehova. Busa, ilado sila bisan asa tungod sa ilang padayong pagpaningkamot sa pagpaambit sa maayong balita sa Gingharian sa Diyos ngadto sa mga tawo sa tanang kanasoran.—Mateo 24:14.

4. Unsang mga bahina sa atong ministeryo ang atong hisgotan niining artikuloha ug sa sunod nga artikulo?

⁴ Apan, unsay atong mahimo aron ang atong pagsangyaw niining maayong balita kanunayng makapatagbaw ug mapuslanon—bisan diha sa mga teritoryo nga diyutay ra ang mosanong? (Lucas 8:15) Sa walay duhaduha makatabang ang usa ka mubo nga pagsubli sa tulo ka hinungdanong mga bahin sa atong buluhatong pagsangyaw. Atong masusi ang (1) atong mga motibo, o kon nganong kita mosangyaw; (2) atong mensahe, o kon unsay atong isangyaw; ug (3) atong mga pamaagi, o kon sa unsang paagi kita mosangyaw. Pinaagi sa paghupot sa atong mga motibo nga putli, sa atong mensahe nga klaro, ug sa atong mga pamaagi nga epektibo, lainlaing matang sa mga tawo ang atong mahatagan ug kahigayonan sa pagpamati sa labing maayong balita—ang maayong balita sa Gingharian sa Diyos. a

 Kon Nganong Makig-ambit Kita sa Pagsangyaw sa Maayong Balita

5. (a) Sa panguna, unsay nagpalihok kanato sa pagpakig-ambit diha sa ministeryo? (b) Nganong ikaingon nga ang atong pagkamasinugtanon sa sugo sa Bibliya nga mosangyaw maoy pagpadayag sa atong gugma sa Diyos?

⁵ Hisgotan nato ang unang bahin—ang atong mga motibo. Nganong isangyaw man nato ang maayong balita? Sa samang rason nga misangyaw si Jesus. Siya miingon: “Gihigugma ko ang Amahan.” (Juan 14:31; Salmo 40:8) Sa panguna, kita gipalihok sa atong gugma alang sa Diyos. (Mateo 22:37, 38) Gipakita sa Bibliya nga adunay kalambigitan ang gugma alang sa Diyos ug ang ministeryo, kay kini nag-ingon: “Kini ang kahulogan sa paghigugma sa Diyos, nga atong bantayan ang iyang mga sugo.” (1 Juan 5:3; Juan 14:21) Ang mga sugo ba sa Diyos naglakip sa sugo nga ‘manglakaw ug maghimog mga tinun-an’? (Mateo 28:19) Oo. Tinuod, kanang mga pulonga gisulti ni Jesus, apan kana naggikan kang Jehova. Sa unsang paagi? Si Jesus misaysay: “Ako walay ginahimo sa akong kaugalingong pagbuot; apan sumala sa gitudlo kanako sa Amahan gisulti ko kining mga butanga.” (Juan 8:28; Mateo 17:5) Busa, pinaagi sa pagtuman sa sugo nga mosangyaw, atong gipakita kang Jehova nga kita nahigugma kaniya.

6. Sa unsang mga paagi nga ang gugma alang sa Diyos magpalihok kanato sa pagsangyaw?

⁶ Lain pa, ang gugma alang kang Jehova magpalihok kanato sa pagsangyaw tungod kay gusto natong sumpoon ang mga bakak nga gipakaylap ni Satanas batok kaniya. (2 Corinto 4:4) Gikuwestiyon ni Satanas ang pagkamatarong sa pagmando sa Diyos. (Genesis 3:1-5) Ingong mga Saksi ni Jehova, gusto natong makigbahin sa pagyagyag sa mga pasipala ni Satanas ug sa pagbalaan sa ngalan sa Diyos atubangan sa mga tawo. (Isaias 43:10-12) Dugang pa, kita makigbahin sa ministeryo tungod kay kita nakahibalo sa mga hiyas ug mga dalan ni Jehova. Kita mibati nga suod kaniya ug gusto gayod nato nga sultian ang uban bahin sa atong Diyos. Gani, ang pagkamaayo ni Jehova ug ang iyang matarong nga mga dalan makahatag kanato ug dakong kalipay nga dili kita makahunong sa pagsulti bahin kaniya. (Salmo 145:7-12) Natukmod kita sa pagdayeg kaniya ug pagsulti bahin sa iyang “mga kahamili” ngadto niadtong mamati niana.—1 Pedro 2:9; Isaias 43:21.

7. Gawas sa gugma alang sa Diyos, tungod sa unsang laing hinungdanong rason nga kita makigbahin sa buluhatong pagsangyaw?

⁷ Dunay laing hinungdanong rason sa pagpadayon sa pagpakigbahin diha sa ministeryo: Gusto gayod natong makahatag ug kahupayan sa mga tawo nga nalumsan sa nagpungasi nga daotang balita ug niadtong nag-antos tungod sa lainlaing mga hinungdan. Niining buluhatona, maningkamot kita sa pagsundog kang Jesus. Pananglitan, tan-awa kon unsay gihubit diha sa Marcos kapitulo 6.

8. Unsay gipakita sa asoy sa Marcos kapitulo 6 bahin sa pagbati ni Jesus sa katawhan?

⁸ Ang mga apostoles namauli gikan sa usa ka kampanya sa pagsangyaw ug miasoy kang Jesus sa tanan nilang nahimo ug gipanudlo. Namatikdan ni Jesus nga ang mga tinun-an gikapoy na, ug giagda niya sila nga mouban kaniya ug ‘mopahulay sa makadiyot.’ Busa nanakay sila sa sakayan ug mipadulong sa usa ka mingaw nga lugar. Ang mga tawo misunod kanila, nga nagdagan ubay sa baybayon, ug sa wala madugay nakaapas kanila. Unsay gibuhat ni Jesus? “Iyang nakita ang usa ka dakong panon sa katawhan,” nag-ingon ang rekord, “apan siya giabot ug kaluoy kanila, tungod kay sila nahisama sa mga karnero nga walay magbalantay. Ug siya misugod sa pagtudlo kanila ug daghang butang.”  (Marcos 6:31-34) Ang kaluoy nagtukmod kang Jesus sa pagpadayon sa pagpaambit sa maayong balita bisan pa sa iyang kakapoy. Klaro nga may empatiya gayod si Jesus niining mga tawhana. Naluoy siya kanila.

9. Unsay atong makat-onan sa asoy sa Marcos kapitulo 6 mahitungod sa hustong motibo sa pagsangyaw?

⁹ Unsay atong makat-onan niining maong asoy? Ingong mga Kristohanon, gibati nato ang obligasyon nga isangyaw ang maayong balita ug maghimog mga tinun-an. Atong giila ang atong responsibilidad sa pagpahayag sa maayong balita, tungod kay kabubut-on sa Diyos nga “ang tanang matang sa mga tawo mangaluwas unta.” (1 Timoteo 2:4) Apan, gihimo nato ang atong ministeryo dili lamang tungod kay ato kining obligasyon kondili tungod usab sa atong kaluoy. Kon maluoy kita sa mga tawo sama sa gibati ni Jesus, ang atong kasingkasing magtukmod kanato sa paghimo sa atong maarangan sa pagpadayon sa pagpaambit sa maayong balita ngadto kanila. (Mateo 22:39) Ang pagbaton nianang maayong mga motibo sa pagpakig-ambit diha sa ministeryo magtukmod kanato sa pagsangyaw sa maayong balita nga walay hunong.

Atong Mensahe—Ang Maayong Balita sa Gingharian sa Diyos

10, 11. (a) Sa unsang paagi gihubit ni Isaias ang mensahe nga atong gisangyaw? (b) Sa unsang paagi si Jesus nagdala ug maayong balita sa butang nga mas maayo, ug sa unsang paagi ang mga alagad sa Diyos sa modernong mga panahon nagsundog sa panig-ingnan ni Jesus?

¹⁰ Komosta ang ikaduhang bahin sa atong ministeryo—ang atong mensahe? Unsay atong isangyaw? Ang manalagnang si Isaias naghatag niining maanindot nga paghubit sa mensahe nga atong gimantala: “Pagkatahom ibabaw sa kabukiran sa mga tiil sa usa nga nagdalag maayong balita, ang usa nga nagmantalag pakigdait, ang usa nga nagdalag maayong balita sa butang nga mas maayo, ang usa nga nagmantalag kaluwasan, ang usa nga nag-ingon ngadto sa Zion: ‘Ang imong Diyos nahimong hari!’”—Isaias 52:7.

¹¹ Ang hinungdanong mga pulong nianang maong teksto, “ang imong Diyos nahimong hari,” magpahinumdom kanato sa mensahe nga angay natong imantala, nga mao ang maayong balita sa Gingharian sa Diyos. (Marcos 13:10) Matikdi usab nga kining bersikuloha nagpadayag sa pagkapositibo sa atong mensahe. Si Isaias migamit sa mga termino sama sa “kaluwasan,” “maayong balita,” “pakigdait,” ug “butang nga mas maayo.” Daghang siglo human kang Isaias, sa unang siglo K.P., gituman ni Jesu-Kristo kining tagnaa sa talagsaong paagi pinaagi sa paghatag ug masibotong panig-ingnan sa pagmantala sa maayong balita sa usa ka butang nga mas maayo—ang pag-anhi sa Gingharian sa Diyos. (Lucas 4:43) Sa modernong mga panahon, ilabina sukad sa 1919, ang mga Saksi ni Jehova nagsundog sa panig-ingnan ni Jesus pinaagi sa masibotong pagmantala sa maayong balita sa natukod na nga Gingharian sa Diyos ug sa mga panalangin nga pagadad-on niini.

12. Unsay epekto sa maayong balita sa Gingharian niadtong modawat niana?

¹² Unsay epekto sa balita sa Gingharian ngadto sa mosanong niini? Karon, sama sa adlaw ni Jesus, ang maayong balita naghatag ug paglaom ug kahupayan. (Roma 12:12; 15:4) Kini naghatag ug paglaom sa mga tawong matinud-anon ug kasingkasing  tungod kay ilang nakat-onan nga dunay lig-ong mga rason sa pagtuo nga adunay mas maayong panahon sa umaabot. (Mateo 6:9, 10; 2 Pedro 3:13) Ang maong paglaom makatabang gayod sa mga tawong mahinadlokon sa Diyos sa paghupot ug positibong panglantaw. Ang salmista nag-ingon nga sila “dili mahadlok bisan sa daotang balita.”—Salmo 112:1, 7.

Usa ka Mensahe nga ‘Magbugkos sa mga Gun-ob ug Kasingkasing’

13. Sa unsang paagi ang manalagnang si Isaias naghubit sa mga panalangin nga modangat dihadiha niadtong modawat sa maayong balita?

¹³ Dugang pa, ang maayong balita nga atong isangyaw makahatag ug dihadihang kahupayan ug mga panalangin niadtong mamati niana. Sa unsang paagi? Ang pipila sa mga panalangin gipakita ni manalagnang Isaias sa dihang siya mitagna: “Ang espiritu sa Soberanong Ginoong Jehova ania kanako, tungod kay si Jehova nagdihog kanako sa pagsulti sa maayong balita ngadto sa mga maaghop. Siya nagpadala kanako aron sa pagbugkos sa mga may gun-ob nga kasingkasing, sa pagmantala ug kagawasan niadtong mga gidalang binihag ug sa pagpabuka pag-ayo sa mga mata bisan sa mga binilanggo; sa pagmantala sa tuig sa maayong kabubut-on sa bahin ni Jehova ug sa adlaw sa panimalos sa bahin sa atong Diyos; sa paghupay sa tanang nagbangotan.”—Isaias 61:1, 2; Lucas 4:16-21.

14. (a) Unsay gipaila sa ekspresyong ‘pagbugkos sa mga gun-ob ug kasingkasing’ bahin sa mensahe sa Gingharian? (b) Sa unsang paagi masumbalik-silaw nato ang kahingawa ni Jehova alang sa mga gun-ob ug kasingkasing?

¹⁴ Sumala sa maong tagna, pinaagi sa pagsangyaw sa maayong balita, si Jesus ‘magbugkos sa mga gun-ob ug kasingkasing.’ Makahuloganon gayod nga ilustrasyon ang gigamit ni Isaias! Sumala sa usa ka diksiyonaryo sa Bibliya, ang Hebreohanong pulong nga gihubad ug ‘pagbugkos’ “subsob nga gigamit labot sa ‘pagbugkos’ ug bendahe, ug busa sa pagtambal ug pagpaalim sa samad.” Ang usa ka mahingawaong nars mahimong magbugkos ug bendahe, o baga nga gasa sa usa ka parte sa lawas nga nasamad aron kini mahupayan. Sa samang paagi, sa dihang magsangyaw sa mensahe sa Gingharian, ang mahingawaong mga magmamantala magdasig sa tanang tawo nga mosanong kinsa nag-antos sa usa ka paagi. Ug pinaagi sa pagtabang niadtong nanginahanglan, ilang gisumbalik-silaw ang kahingawa ni Jehova. (Ezequiel 34:15, 16) Ang salmista miingon bahin sa Diyos: “Siya nagaayo sa mga may gun-ob nga kasingkasing, ug nagabugkos sa ilang masakit nga mga bahin.”—Salmo 147:3.

Kon sa Unsang Paagi ang Mensahe sa Gingharian Makaimpluwensiya

15, 16. Unsang tinuod-kinabuhi nga mga pananglitan ang nag-ilustrar kon sa unsang paagi ang mensahe sa Gingharian nagdasig ug nagpalig-on niadtong nanginahanglan?

¹⁵ Daghang tinuod-kinabuhi nga mga pananglitan ang nag-ilustrar kon sa unsang paagi ang mensahe sa Gingharian nagdasig ug nagpalig-on niadtong gun-ob ug kasingkasing. Tagda si Oreanna, usa ka tigulang nga babaye sa Amerika del Sur, nga gusto nang mamatay. Usa ka Saksi ni Jehova ang misugod pagduaw kang Oreanna ug pagbasa kaniya sa Bibliya ug sa publikasyong Akong Basahon sa mga Estorya sa Bibliya. b Sa sinugdan, ang magul-anong babaye namati sa pagbasa samtang naghigda sa katre nga gipiyong ang mga mata, nga matag karon ug unya manghupaw. Apan, sa wala madugay misugod siya sa pagpaningkamot nga molingkod sa iyang katre panahon sa pagbasa. Sa ulahi, naglingkod na siya sa usa ka lingkoranan sa sala, nga naghulat sa pag-abot sa nagtudlo kaniya ug Bibliya. Dayon, ang babaye misugod pagtambong sa Kristohanong mga tigom didto sa Kingdom Hall. Kay nadasig sa iyang nakat-onan sa maong mga tigom, misugod siya sa pagtanyag ug literatura sa Bibliya ngadto mga tawo nga moagi sa iyang balay. Unya, sa edad nga 93 anyos, si Oreanna nabawtismohan ingong usa sa mga Saksi ni Jehova. Ang mensahe sa Gingharian nagbag-o sa iyang tinguha nga mabuhi.—Proverbio 15:30; 16:24.

¹⁶ Ang mensahe sa Gingharian naghatag ug hinungdanong pagdasig bisan niadtong nahibalo nga hapit nang matapos ang ilang kinabuhi tungod sa sakit. Tagda ingong pananglitan si Maria nga taga-Kasadpang Uropa. Nag-antos siya sa usa ka makamatayng sakit ug nawad-an nag paglaom. Magul-anon kaayo siya sa dihang giduaw siya sa mga Saksi ni Jehova. Apan, sa dihang nakakat-on siya bahin sa mga katuyoan sa Diyos, ang iyang kinabuhi aduna na usay direksiyon. Siya nabawtismohan ug nahimong aktibo kaayo sa buluhatong pagsangyaw. Sa kataposang duha ka tuig  sa iyang kinabuhi, makita sa iyang mga mata ang paglaom ug kalipay. Si Maria namatay nga adunay lig-ong paglaom sa pagkabanhaw.—Roma 8:38, 39.

17. (a) Sa unsang paagi ang mensahe sa Gingharian nakaimpluwensiya sa kinabuhi niadtong modawat niana? (b) Sa unsang mga paagi nga imong naeksperyensiyahan mismo nga si Jehova “nagabangon sa tanan nga naumod”?

¹⁷ Ang maong mga taho nagpamatuod sa impluwensiya sa mensahe sa Gingharian diha sa kinabuhi sa mga tawo nga nangandoy sa mga kamatuoran sa Bibliya. Ang mga tawo nga nagbangotan tungod sa kamatayon sa usa ka minahal makabaton na usab ug kalig-on sa dihang makakat-on sila bahin sa paglaom sa pagkabanhaw. (1 Tesalonica 4:13) Ang mga tawo nga nag-ilaid sa kakabos ug nanglimbasog nga mapakaon ang ilang pamilya makabaton pag-usab ug dignidad ug kaisog sa dihang ilang masayran nga dili gayod sila biyaan ni Jehova kon sila magmaunongon kaniya. (Salmo 37:28) Uban sa tabang ni Jehova, daghan nga nalumsan sa kaguol inanayng nakabaton ug kalig-on nga gikinahanglan aron makasagubang ug sa pipila ka kahimtang nakabuntog pa gani sa ilang kaguol. (Salmo 40:1, 2) Sa pagkatinuod, pinaagi sa gahom nga gitagana sa iyang Pulong, si Jehova sa pagkakaron “nagabangon sa tanan nga naumod.” (Salmo 145:14) Pinaagi sa pagpaniid kon sa unsang paagi ang maayong balita sa Gingharian naghatag ug kahupayan sa mga gun-ob ug kasingkasing diha sa atong teritoryo ug sa Kristohanong kongregasyon, kita kanunayng mapahinumdoman nga atong nabatonan ang labing maayong balita karon!—Salmo 51:17.

“Ang Akong Pangamuyo sa Diyos Alang Kanila”

18. Sa unsang paagi naapektahan si Pablo sa pagsalikway sa mga Hudiyo sa maayong balita, ug ngano?

¹⁸ Bisan tuod ang atong mensahe naundan sa labing maayong balita, daghan ang nagsalikway niana. Sa unsang paagi kini makaapektar kanato? Sa samang paagi nga nag-apektar kini kang apostol Pablo. Subsob siyang mosangyaw ngadto sa mga Hudiyo, apan kadaghanan kanila nagsalikway sa mensahe sa kaluwasan. Ang ilang pagdumili nakaapektar pag-ayo kang Pablo. Siya miangkon: “Ako adunay dakong kaguol ug walay-hunong nga kasakit sa akong kasingkasing.” (Roma 9:2) Si Pablo naluoy sa mga Hudiyo nga iyang gisangyawan. Nasubo siya nga ilang gisalikway ang maayong balita.

19. (a) Nganong masabtan nga kita tingali mahigawad usahay? (b) Unsay nakatabang kang Pablo sa pagpadayon sa iyang buluhatong pagsangyaw?

¹⁹ Kita usab mosangyaw sa maayong balita tungod sa atong kaluoy. Busa, masabtan nga kita tingali mahigawad sa dihang daghang tawo ang mosalikway sa mensahe sa Gingharian. Ang maong reaksiyon nagpakita nga kita adunay tinuod nga kahingawa alang sa espirituwal nga kaayohan niadtong atong gisangyawan. Apan, angay natong hinumdoman ang panig-ingnan ni apostol Pablo. Unsay nakatabang kaniya sa pagpadayon sa iyang buluhatong pagsangyaw? Bisan tuod naguol siya pag-ayo tungod sa pagdumili sa mga Hudiyo sa pagdawat sa maayong balita, si Pablo wala maghunahuna  nga ang tanang Hudiyo dili na matabangan. Naglaom siya nga aduna gihapoy pipila nga modawat kang Kristo. Busa, mahitungod sa iyang gibati ngadto sa tagsatagsa ka Hudiyo, si Pablo misulat: “Ang maayong kabubut-on sa akong kasingkasing ug ang akong pangamuyo sa Diyos alang kanila maoy, sa pagkatinuod, alang sa ilang kaluwasan.”—Roma 10:1.

20, 21. (a) Mahitungod sa atong ministeryo, sa unsang paagi masundog nato ang panig-ingnan ni Pablo? (b) Unsang bahin sa atong ministeryo ang hisgotan sa sunod nga artikulo?

²⁰ Matikdi ang duha ka butang nga gipasiugda ni Pablo. Maoy tinguha sa iyang kasingkasing nga ang pipila ka tawo maluwas, ug siya nangamuyo sa Diyos bahin niana. Karon, atong gisundog ang panig-ingnan ni Pablo. Gihuptan nato ang kinasingkasing nga tinguha sa pagpangita niadtong sa husto nakiling ngadto sa maayong balita. Padayon kitang moampo kang Jehova nga atong makaplagan ang maong mga tawo aron matabangan nato sila sa pagsubay sa dalan nga motultol sa ilang kaluwasan.—Proverbio 11:30; Ezequiel 33:11; Juan 6:44.

²¹ Apan, aron masangyawan sa mensahe sa Gingharian ang daghang tawo kutob sa mahimo, kinahanglang hatagan natog pagtagad dili lamang kon nganong kita mosangyaw ug kon unsay atong isangyaw kondili usab kon sa unsang paagi kita mosangyaw. Hisgotan kining ulohana sa sunod nga artikulo.

[Mga footnote]

Unsay Imong Nakat-onan?

• Tungod sa unsang mga rason nga kita makigbahin sa ministeryo?

• Unsa ang pangunang mensahe nga atong isangyaw?

• Unsang mga panalangin ang maeksperyensiyahan niadtong modawat sa mensahe sa Gingharian?

• Unsay motabang kanato sa pagpadayon diha sa atong ministeryo?

[Mga Pangutana sa Pagtuon]

[Mga hulagway sa panid 18]

Ang mensahe sa Gingharian naghatag ug kalig-on sa mga gun-ob ug kasingkasing

[Mga hulagway sa panid 20]

Ang pag-ampo motabang kanato sa paglahutay diha sa atong ministeryo