“Ang Espada ni Jehova ug ni Gideon!”

ANG mga kaaway ingon ka daghan sa mga dulon, nga nakapaumaw sa tabunok nga kaumahan. Kini nahitabo sa dihang ang mga maghuhukom maoy nagmando sa Israel, ug ang mga Israelinhon nawad-an nag paglaom. Sulod sa pito ka tuig, sa dihang mogitib na ang mga pinugas, ang mga Midianhon, Amalekanhon, ug mga taga-Sidlakan mangabot sakay sa mga kamelyo aron sa pagpanulis sa nasod. Ang mga panon sa kahayopan sa mga tulisan nagkatag sa pagpangita ug mga sibsibanan, nga naghurot sa tanang pananom. Apan ang katawhan sa Israel wala ganiy asno ni torong baka ni karnero. Pintas kaayo ang pagmando sa mga Midianhon nga gitagoan na lang sa nag-ilaid sa kakabos nga mga Israelinhon ang ilang mga abot didto sa kabukiran, mga langob, ug sa mga dapit nga lisod adtoon.

Nganong ingon niana ang kahimtang? Ang apostatang Israel nag-alagad sa bakak nga mga diyos. Tungod niana, gitugyan sila ni Jehova ngadto sa mga tigdaogdaog. Sa dihang wala na makaantos ang mga anak sa Israel, nagpakitabang sila kang Jehova. Mamati kaha siya? Unsay atong makat-onan sa nasinatian sa Israel?—Maghuhukom 6:1-6.

Mapanagan-on nga Mag-uuma o Usa nga “Maisog ug Gamhanan”?

Ang mga mag-uumang Israelinhon sagad maggiok ug trigo pinaagi sa baka ug balsa diha sa bantaaw, hanginon nga lugar aron mapadpad ang tahop ug mabulag kini gikan sa lugas samtang magpalid. Apan ang pagpalid dali rang mamatikdan tungod kay anaa man ang mga tulisan nga determinadong modaot sa yuta. Nga wala makita sa mga Midianhon, si Gideon naggiok ug trigo diha sa pug-anag bino—lagmit usa ka dako, inaptan nga pasong nga sinilsil gikan sa bato. (Maghuhukom 6:11) Didto mahimong lubkon ang lugas nga tinagidyot lang. Ubos sa maong mga kahimtang, gigamit ni Gideon kon unsay mabatonan.

Handurawa lang ang katingala ni Gideon sa dihang mipakita kaniya ang manulonda ni Jehova ug miingon: “Si Jehova nagauban kanimo, ikaw nga maisog ug gamhanan.” (Maghuhukom 6:12) Kay tinagotago nga naggiok ug lugas diha sa pug-anag bino, wala gayod hunahunaa ni Gideon nga siya maisog. Apan, kadtong mga pulonga nagpaila nga ang Diyos masaligon nga si Gideon mahimong maisogong lider sa Israel. Bisan pa niana, siya kinahanglang kombinsido sa iyang kaugalingon.

Sa dihang gisugo siya ni Jehova sa ‘pagluwas sa Israel gikan sa kamot sa Midian,’ si Gideon mapaubsanong miingon: “Tabi, Jehova. Pinaagi sa unsa nga ako magluwas sa Israel? Tan-awa! Ang akong usa ka libo mao ang kinagamyan sa Manases, ug ako ang kinagamyan sa balay sa akong amahan.” Ang mapanagan-on nga si Gideon nangayog ilhanan nga ang Diyos magauban kaniya sa dihang iyang pukanon ang Midian, ug si Jehova andam sa paghatag sa makataronganong pasalig nga gipangayo ni Gideon. Busa si Gideon mihatag ug halad nga pagkaon ngadto sa iyang bisita nga manulonda, ug ang kalayo migula gikan sa usa ka bato, nga nag-ut-ot sa halad. Human mapakalma ni Jehova ang kahadlok ni Gideon, si Gideon nagtukod ug halaran nianang lugara.—Maghuhukom 6:12-24.

“Pahimoa si Baal ug Legal nga Depensa”

Ang kinadak-ang problema sa Israel dili ang pagdaogdaog sa mga Midianhon. Kini mao ang pagkaulipon sa pagsimba kang Baal. Si Jehova “usa ka Diyos nga abughoan,” ug walay makaalagad kaniya sa dalawatong paagi samtang nagsimba sa ubang mga diyos. (Exodo 34:14) Busa, gisugo ni Jehova si Gideon nga lumpagon ang halaran sa iyang amahan alang kang Baal ug putlon ang sagradong haligi. Kay nahadlok sa reaksiyon unya sa iyang amahan ug sa ubang mga tawo kon himoon niya kini sa adlawan pa, gihimo kini ni Gideon sa gabii, sa tabang sa napulo ka alagad.

Husto ang panagana ni Gideon, kay sa dihang nahibaloan nga siya maoy naglumpag sa halaran ug nagputol sa sagradong haligi, ang lokal nga  mga magsisimba ni Baal gustong mopatay kaniya. Apan, tungod sa dili-malalis nga pangatarongan, ang amahan ni Gideon nga si Joas, nangatarongan sa mga tawo nga kon si Baal usa pa ka Diyos, iya untang gipanalipdan ang iyang kaugalingon. Tungod niana, gitawag dayon ni Joas ang iyang anak nga Jerubaal, nga nagkahulogang “Pahimoa si Baal ug Legal nga Depensa Batok Kaniya.”—Maghuhukom 6:25-32, potnot sa New World Translation—With References.

Ang Diyos magapanalangin gayod sa iyang mga alagad tungod sa ilang lig-ong pagbarog dapig sa matuod nga pagsimba. Sa dihang ang mga Midianhon ug ang ilang mga kaalyado misulong pag-usab sa teritoryo sa mga Israelinhon, “ang espiritu ni Jehova milimin kang Gideon.” (Maghuhukom 6:34) Ilalom sa impluwensiya sa espiritu o aktibong puwersa sa Diyos, si Gideon nagtigom ug mga kasundalohan gikan sa mga tribo sa Manases, Aser, Zabulon, ug Neptali.—Maghuhukom 6:35.

Pagpangandam Alang sa Pagpakiggubat

Bisan tuod niadtong tungora si Gideon aduna nay 32,000 ka sundalo, nangayo siya sa Diyos ug timailhan. Kon ang balhibo sa karnero diha sa giokanan mabasa sa yamog samtang ang yuta magpabiling uga, kini magpaila nga luwason sa Diyos ang Israel pinaagi kaniya. Gihimo ni Jehova kining milagroha, ug si Gideon nangita ug nakadawat ug dugang pamatuod sa dihang gibali ang timailhan—basa ang yuta ug uga ang balhibo sa karnero. Sobra ba ka mapanagan-on si Gideon? Dayag nga dili, tungod kay gihatag ni Jehova ang iyang gihangyo nga pasalig. (Maghuhukom 6:36-40) Dili na kita makadahom ug ingon nianang mga milagroha karon. Apan, kita makadawat sa giya ug pasalig ni Jehova gikan sa iyang Pulong.

Karon ang Diyos miingon nga daghan ra kaayo ang mga sundalo ni Gideon. Kon modaog sila batok sa ilang mga kaaway pinaagi nianang daghang kasundalohan, basin manghambog ang mga Israelinhon nga sila ray nakaluwas sa ilang kaugalingon. Apan kinahanglang si Jehova maoy makadawat sa dungog sa umaabot nga kadaogan. Ang sulbad? Gisugo si Gideon nga himoon ang giingon sa Balaod ni Moises nga awhagon ang mga nangahadlok sa pagsibog. Niana, 22,000 sa iyang mga sundalo ang misibog, mao nga 10,000 na lang ang nahibilin.—Deuteronomio 20:8; Maghuhukom 7:2, 3.

Gikan sa panglantaw sa Diyos, daghan pa gihapon kaayo ang mga sundalo. Giingnan si Gideon nga paadtoon sila sa katubigan. Ang Hudiyong historyano nga si Josephus nag-ingon nga gisugo sa Diyos si Gideon sa pagpamartsa sa iyang mga sundalo paingon sa suba ilalom sa naglagiting nga kainit sa adlaw. Bisag unsa pay kahimtang, gibantayan ni Gideon kon sa unsang paagi nanginom ang mga sundalo. Tulo ka gatos lamang ang nagkalos sa tubig pinaagi sa usa niya ka kamot ug nagtilap gikan niana samtang nagbantay sa posibleng pag-atake sa kaaway. Ang maisog nga 300 lamang ka sundalo ang mouban kang Gideon. (Maghuhukom 7:4-8) Hunahunaa ang imong kaugalingon nga anaa sa ilang kahimtang. Sanglit ang inyong mga kaaway 135,000 man ka Midianhon, makaingon ka gayod nga ang inyong kadaogan mahitabo lamang pinaagi sa gahom ni Jehova, dili sa inyong kaugalingon!

Giawhag sa Diyos si Gideon nga magdala ug usa ka alagad ug maniid sa kampo sa mga Midianhon. Samtang didto sila, nadunggan ni Gideon ang usa ka lalaki nga nag-asoy sa iyang damgo ngadto sa iyang kauban nga sa walay pagpanuko naghubad niini nga ang Diyos magtugyan gayod sa Midian  ngadto sa kamot ni Gideon. Mao gayod kana ang pagdasig nga kinahanglang madunggan ni Gideon. Segurado na siya nga ihatag ni Jehova kaniya ug sa iyang 300 ka sundalo ang kadaogan batok sa mga Midianhon.—Maghuhukom 7:9-15.

Estratehiya sa Gubat

Ang 300 ka sundalo gibahin sa tulo ka grupo nga 100 sa kada grupo. Ang matag usa adunay budyong ug tadyaw nga walay sulod. Usa ka sulo ang gisulod sa tadyaw. Ang unang gimando ni Gideon mao kini: ‘Tan-awa ako, ug buhata ninyo ang sama sa akong pagabuhaton. Sa dihang huypon nako ang budyong, huypon usab ninyo ang inyong mga budyong ug kamo mosinggit “Ang espada ni Jehova ug ni Gideon!”’—Maghuhukom 7:16-18, 20.

Ang 300 ka manggugubat nga Israelinhon miyuhot paingon sa daplin sa kampo sa mga kaaway. Mga alas diyes na kadto sa gabii ug mao pay pagrelibo sa mga guwardiya. Morag mao na kini ang eksaktong higayon sa pag-atake, kay dangtan unag pipila ka minuto una pa makapasibo sa kangitngit ang mga mata sa bag-ong mga guwardiya.

Hilabihan ang kalisang karon sa mga Midianhon! Sa kalit lang, nabuak ang kahilom sa pagpusgay sa 300 ka tadyaw, sa paglanog sa 300 ka budyong, ug sa pagsinggit sa 300 ka sundalo. Kay nakuratan, ilabina sa singgit nga “Ang espada ni Jehova ug ni Gideon!,” ang mga Midianhon naninggit usab sa kalisang, nga nakapasamot sa kabanha. Sa kaguliyang, dili gayod nila mailhan kon kinsay kaaway. Ang 300 nagpabiling nagbarog diha sa tagsatagsa nila ka puwesto samtang gipahinabo sa Diyos nga magpinatyanay ang ilang mga kaaway. Giparot ang kampo, walay gipaikyas, ug ang pagtibawas sa nahibilin sa mga kaaway naglakip sa hago nga paggukod kanila aron permanenteng mahanaw ang hulga sa mga Midianhon. Natapos ra gayod ang taas ug malupigon nga pagkontrolar.—Maghuhukom 7:19-25; 8:10-12, 28.

Bisan human sa maong kadaogan, makasaranganon gihapon si Gideon. Sa dihang ang mga taga-Epraim, kinsa dayag nga nahiubos kay wala tawga alang sa pagpakiggubat, nakiglalis kaniya, siya mitubag sa malumong paagi. Ang iyang malumong tubag nakahupay sa ilang kasuko ug nakapakalma sa ilang espiritu.—Maghuhukom 8:1-3; Proverbio 15:1.

Kay mitunhay na karon ang kalinaw, giawhag sa mga Israelinhon si Gideon nga mahimo nilang hari. Makapahaylo gayod kana! Apan gisalikway kadto ni Gideon. Wala niya hikalimti kon kinsay nagmadaogon batok sa Midian. “Ako dili maghari kaninyo, ni ang akong anak nga lalaki maghari kaninyo,” miingon siya. “Si Jehova mao ang maghari kaninyo.”—Maghuhukom 8:23.

Ugaling lang, tungod kay dili-hingpit, si Gideon dili kanunayng nakahimo ug maayong pagpanghukom. Tungod sa wala isulti nga rason, siya naghimog usa ka epod ginamit ang mga inagaw sa gubat ug nagbutang niana sa iyang siyudad. Ang rekord nag-ingon nga ang tibuok Israel misugod sa ‘pagpakighilawas’ uban sa maong epod. Ilang gisimba kini, ug kini nahimong lit-ag bisan ngadto kang Gideon ug sa iyang panimalay. Bisan pa niana, siya wala mahimong bug-os nga tigsimba ug diyosdiyos, tungod kay ang Kasulatan nag-isip kaniya ingong usa ka lalaki nga may pagtuo kang Jehova.—Maghuhukom 8:27; Hebreohanon 11:32-34.

Mga Leksiyon Alang Kanato

Ang sugilanon ni Gideon naghatag ug mga leksiyon bahin sa pasidaan ug pagdasig. Kini nagpasidaan kanato nga kon kuhaon ni Jehova ang iyang espiritu ug panalangin gikan kanato tungod sa atong pagkamalinapason, ang atong espirituwal nga kahimtang mahisama nianang nag-ilaid sa kakabos nga mga molupyo sa yuta nga gidaot sa mga dulon. Kita nagkinabuhi sa makuyaw nga mga panahon ug dili gayod nato kalimtan nga ang panalangin ni Jehova “ang makapadato, ug dili niya kana dugangan ug kasakit.” (Proverbio 10:22) Matagamtam nato ang panalangin sa Diyos tungod kay kita ‘nag-alagad kaniya uban ang bug-os nga kasingkasing ug uban ang malipayon nga kalag.’ Kay kon dili, iya kitang isalikway.—1 Cronicas 28:9.

Makakuha kitag pagdasig gikan sa asoy bahin kang Gideon, tungod kay kini nagpamatuod nga si Jehova makaluwas sa iyang katawhan gikan sa bisan unsang kapeligrohan, nga maggamit bisan niadtong daw mahuyang o walay mahimo. Ang kamatuoran nga napildi ni Gideon ug sa iyang 300 ka sundalo ang 135,000 ka Midianhon nagpamatuod sa walay-kinutobang gahom sa Diyos. Kita mahimong makaagom ug grabeng kasakitan ug morag wala nay kalaomang makalingkawas pa tungod sa kadaghan sa atong mga kaaway. Apan, ang asoy sa Bibliya bahin kang Gideon nagdasig kanato sa pagsalig kang Jehova, kinsa magapanalangin ug magaluwas sa tanang magpasundayag ug pagtuo Kaniya.