“Padayong Pamatud-i Kon Unsa Kamo sa Inyong Kaugalingon”

“Padayong sulayi kon kamo anaa ba sa pagtuo, padayong pamatud-i kon unsa kamo sa inyong kaugalingon.”—2 CORINTO 13:5.

1, 2. (a) Sa unsang paagi ang pagduhaduha labot sa atong mga pagtuo makaapektar kanato? (b) Unsang situwasyon sa unang-siglong Corinto ang lagmit maoy hinungdan nga ang uban wala na makaseguro sa dalan nga pagalaktan?

 ANG usa ka tawo nga nagbiyahe latas sa banika nakaabot sa nagsanga nga dalan. Kay wala makaseguro kon unsang dalana ang iyang subayon aron makaabot sa iyang adtoan, nangutana siya sa mga tawong nanglabay apan lainlain ang ilang tubag. Kay naglibog, wala siya makapadayon sa iyang panaw. Ang pagduhaduha labot sa atong mga pagtuo adunay susamang epekto kanato. Ang maong pagduhaduha makabalda sa atong katakos sa paghimog mga desisyon, nga dili na kita makaseguro sa dalan nga atong pagalaktan.

² Usa ka situwasyon ang mitungha nga may ingon nianang epekto sa pipila ka tawo sa Kristohanong kongregasyon sa unang-siglong Corinto, sa Gresya. Ang “maayong-laki nga mga apostoles” nagkuwestiyon sa awtoridad ni apostol Pablo, nga nag-ingon: “Ang iyang mga sulat mabug-at ug kusganon, apan sa personal siya maluya ug ang iyang pagsulti talamayon.” (2 Corinto 10:7-12; 11:5, 6) Ang maong panglantaw lagmit maoy hinungdan nga ang uban diha sa kongregasyon sa Corinto wala na makaseguro sa ilang paglakaw.

3, 4. Nganong ang tambag ni Pablo sa mga taga-Corinto makapainteres gayod kanato?

³ Gitukod ni Pablo ang kongregasyon sa Corinto sa iyang pagduaw didto sa 50 K.P. Nagpabilin siya sa Corinto ug “usa ka tuig ug unom ka bulan, nga nanudlo sa ilang taliwala sa pulong sa Diyos.” Sa pagkatinuod, “daghan sa mga taga-Corinto nga nakadungog nanagpanuo ug nagpabawtismo.” (Buhat 18:5-11) Si Pablo interesado kaayo sa espirituwal nga kaayohan sa iyang mga isigkamagtutuo sa Corinto. Dugang pa, ang mga taga-Corinto misulat kang Pablo nga nangayog tambag bahin sa pipila ka butang. (1 Corinto 7:1) Busa gihatagan niya sila ug maayo kaayong tambag.

⁴ “Padayong sulayi kon kamo anaa ba sa pagtuo,” misulat si Pablo, “padayong pamatud-i kon unsa kamo sa inyong kaugalingon.” (2 Corinto 13:5) Ang pagpadapat niining tambaga manalipod unta niadtong mga igsoon sa Corinto batok sa pagduhaduha labot sa dalan nga ilang pagalaktan. Manalipod usab kana kanato karon. Nan, sa unsang paagi masunod nato ang tambag ni Pablo? Sa unsang paagi masulayan nato kon kita anaa ba sa pagtuo? Ug unsay nalangkit sa pagpamatuod kon unsa kita sa atong kaugalingon?

“Padayong Sulayi kon Kamo Anaa ba sa Pagtuo”

5, 6. Unsay atong sukdanan sa pagsulay kon kita anaa ba sa pagtuo, ug nganong mao kana ang hingpit nga sukdanan?

⁵ Sa usa ka pagsulay, kasagaran ang usa ka tawo o butang pagasulayan, ug adunay basehanan o sukdanan nga diha niana ipasukad ang maong pagsulay. Niining kahimtanga, ang pagasulayan dili ang pagtuo—ang hugpong sa mga pagtulon-an nga atong gidawat. Kita ingong mga indibiduwal mao ang pagasulayan. Aron mahimo ang pagsulay, kita adunay hingpit nga sukdanan. Usa ka awit nga gisulat sa salmista nga si David nag-ingon: “Ang balaod ni Jehova hingpit, nga nagapahiuli sa kalag. Ang pahinumdom ni Jehova kasaligan, nga nagahimo nga maalamon sa walay kasinatian. Ang mga sugo ni Jehova matul-id, nga makapalipay sa kasingkasing; ang kasugoan ni Jehova hinlo, nga nagapadan-ag sa mga mata.” (Salmo 19:7, 8) Ang Bibliya naundan sa hingpit nga  mga balaod ug matul-id nga mga sugo ni Jehova, sa iyang kasaligan nga mga pahinumdom ug hinlo nga mga sugo. Ang mensahe niana mao ang hingpit nga sukdanan sa pagsulay sa atong kaugalingon.

⁶ Mahitungod nianang inspirado-sa-Diyos nga mensahe, si apostol Pablo miingon: “Ang pulong sa Diyos buhi ug gamhanan ug mahait pa kay sa espada nga duhay-sulab ug modulot bisan hangtod sa pagbahin sa kalag ug sa espiritu, ug sa mga lutahan ug sa ilang uyok, ug makatugkad sa mga hunahuna ug mga tuyo sa kasingkasing.” (Hebreohanon 4:12) Oo, ang pulong sa Diyos makasulay sa atong kasingkasing—kon unsa gayod kita sa kailadman. Sa unsang paagi mapadapat nato kining mahait ug gamhanan nga mensahe? Klarong gisulti sa salmista kon unsay nalangkit niini. Siya miawit: “Malipayon ang tawo . . . [kansang] kalipay anaa sa balaod ni Jehova, ug sa iyang balaod siya nagabasa sa hinayng tingog sa adlaw ug gabii.” (Salmo 1:1, 2) Ang “balaod ni Jehova” makita diha sa sinulat nga Pulong sa Diyos, ang Bibliya. Kinahanglang malipay kita sa pagbasa sa Pulong ni Jehova. Sa pagkatinuod, kinahanglang maggahin kita ug panahon sa pagbasa niana sa hinayng tingog, o sa pagpalandong niana. Samtang gibuhat nato kini, kinahanglang tugotan nato nga masulayan ang atong kaugalingon—ang mga sulayanan—sa nasulat diha niana.

7. Unsa ang pangunang paagi sa pagsulay kon kita anaa ba sa pagtuo?

⁷ Nan, ang pangunang paagi sa pagsulay kon kita anaa ba sa pagtuo mao ang pagbasa ug pagpamalandong sa Pulong sa Diyos ug pagsusi kon sa unsang paagi ang atong panggawi nahiuyon sa atong nakat-onan. Malipay kita nga daghan ang makatabang kanato sa pagsabot sa Pulong sa Diyos.

8. Sa unsang paagi ang mga publikasyon sa “matinumanon ug maalamong ulipon” motabang kanato sa pagsulay kon kita anaa ba sa pagtuo?

⁸ Si Jehova nagtagana ug mga pagtulon-an ug mga instruksiyon pinaagi sa mga publikasyon sa “matinumanon ug maalamong ulipon,” nga nagpatin-aw sa Kasulatan. (Mateo 24:45) Pananglitan, konsideraha ang kahon nga nag-ulohang “Mga Pangutana nga Palandongon” diha sa kataposan sa kadaghanang kapitulo sa librong Pakigsuod Kang Jehova. a Maayo gayod nga mga kahigayonan sa pagpalandong ang gitagana niining bahina sa libro! Daghang ulohan nga gihisgotan sa atong mga magasing Ang Bantayanang Torre ug Pagmata! ang makatabang usab kanato sa pagsulay kon kita anaa ba sa pagtuo. Mahitungod sa mga artikulo nga naghisgot sa basahon sa Proverbio diha sa di pa dugayng mga gula sa Ang Bantayanang Torre, usa ka Kristohanong babaye ang miingon: “Akong nakaplagan nga kining mga artikuloha praktikal kaayo. Kini nakatabang kanako sa pagsusi kon ang akong sinultihan, panggawi, ug tinamdan nakaabot ba sa matarong nga mga sukdanan ni Jehova.”

9, 10. Unsang mga tagana ni Jehova ang motabang kanato sa padayong pagsulay kon kita anaa ba sa pagtuo?

⁹ Makadawat usab kita ug dagayang pagtultol ug pagdasig diha sa mga tigom sa kongregasyon, asembliya, ug mga kombensiyon. Nalakip kini sa espirituwal nga mga tagana sa Diyos niadtong mahitungod kanila si Isaias nagtagna: “Mahitabo sa kaulahiang bahin sa mga adlaw nga ang bukid sa balay ni Jehova lig-ong matukod ibabaw sa tumoy sa kabukiran, ug kini igatuboy gayod ibabaw sa kabungtoran; ug nganha niini ang tanang kanasoran magaganayan. Ug daghang katawhan ang moadto gayod ug moingon: ‘Umari kamo, ug manungas kita ngadto sa bukid ni Jehova, . . . ug siya magatudlo kanato bahin sa iyang mga dalan, ug kita magalakaw sa iyang mga alagianan.’” (Isaias 2:2, 3) Usa gayod ka panalangin nga makabaton sa maong instruksiyon bahin sa mga dalan ni Jehova.

¹⁰ Dili usab angayng kalimtan ang tambag gikan niadtong adunay espirituwal nga mga kuwalipikasyon, lakip na ang Kristohanong mga ansiyano. Mahitungod kanila, ang Bibliya nag-ingon: “Mga igsoon, bisan pag ang usa ka tawo makahimog sayop nga lakang sa dili pa niya himatngonan kini, kamo nga may espirituwal nga mga katakos paningkamoti nga ipasibo pag-usab ang maong tawo diha sa espiritu sa kalumo, samtang ang matag usa kaninyo magbantay sa iyang kaugalingon, basin unya ug kamo usab matental.” (Galacia 6:1) Mapasalamaton gayod kita niining maong tagana alang sa pagpasibo kanato!

11. Unsay gikinahanglan sa pagsulay kon kita anaa ba sa pagtuo?

 ¹¹ Ang atong mga publikasyon, Kristohanong mga tigom ug tinudlong mga lalaki maoy maayo kaayong mga tagana gikan kang Jehova. Apan, ang pagsulay kon kita anaa ba sa pagtuo nagkinahanglan ug pagsusi sa kaugalingon. Busa sa dihang kita magbasa sa atong mga publikasyon o mamati sa tambag sa Kasulatan, kinahanglang pangutan-on nato ang atong kaugalingon: ‘Naghubit ba kini kanako? Gibuhat ba nako kini? Ako ba nagsunod sa hugpong sa Kristohanong mga pagtulon-an?’ Ang atong tinamdan ngadto sa impormasyon nga atong madawat pinaagi niining maong mga tagana mag-impluwensiya usab sa atong espirituwal nga kahimtang. “Ang tawong pisikal dili magadawat sa mga butang nga iya sa espiritu sa Diyos, kay kini kabuangan man alang kaniya,” nag-ingon ang Bibliya. “Hinunoa, ang tawong espirituwal nagausisa gayod sa tanang butang.” (1 Corinto 2:14, 15) Dili ba kita angayng maningkamot sa paghupot ug positibo, espirituwal nga panglantaw sa atong mabasa diha sa atong mga libro, magasin, ug ubang mga publikasyon ug sa atong madungog diha sa atong mga tigom ug gikan sa mga ansiyano?

“Padayong Pamatud-i kon Unsa Kamo sa Inyong Kaugalingon”

12. Unsay nalangkit sa pagpamatuod kon unsa kita sa atong kaugalingon?

¹² Ang pagpamatuod kon unsa kita sa atong kaugalingon naglangkit ug pagsusi sa kaugalingon. Oo, anaa tingali kita sa kamatuoran, apan sa unsang gilapdon kita nagkinabuhi nga kaharmonya sa kamatuoran? Ang pagpamatuod kon unsa kita naglangkit ug paghatag ug pamatuod sa pagkahamtong ug sa tinuod nga apresasyon alang sa espirituwal nga mga tagana.

13. Sumala sa Hebreohanon 5:14, unsay magsilbing pamatuod sa atong pagkahamtong?

¹³ Unsang pamatuod sa Kristohanong pagkahamtong ang atong sutaon sa atong kaugalingon? Si apostol Pablo misulat: “Ang gahing pagkaon maoy alang sa mga tawong hamtong, alang kanila nga pinaagi sa paggamit nakabansay sa ilang mga gahom sa pagsabot aron sa pag-ila sa maayo ug sa daotan.” (Hebreohanon 5:14) Kita maghatag ug pamatuod sa pagkahamtong pinaagi sa pagbansay sa atong mga gahom sa pagsabot. Maingon nga ang pipila ka kaunoran sa lawas sa usa ka atleta kinahanglang bansayon pinaagi sa pagsigeg gamit niana sa dili pa siya mahimong hawod sa iyang esport, ang atong mga gahom sa pagsabot kinahanglang mabansay pinaagi sa paggamit niana sa pagpadapat sa mga prinsipyo sa Bibliya.

14, 15. Nganong angay kitang magkugi sa pagtuon sa mas laglom nga mga butang sa Pulong sa Diyos?

¹⁴ Apan, sa dili pa nato mabansay ang atong mga gahom sa pagsabot, kinahanglang mabatonan nato ang kahibalo. Aron mabatonan kini, hinungdanon ang makugihong personal nga pagtuon. Sa dihang kita regular nga mohimog personal nga pagtuon—ilabina sa mas laglom nga mga butang sa Pulong sa Diyos—ang atong mga gahom sa pagsabot mapauswag. Latas sa katuigan, daghang laglom nga mga ulohan ang gihisgotan diha sa Ang Bantayanang Torre. Sa unsang paagi kita mosanong sa dihang makabasa kita ug mga artikulo nga naghisgot ug laglom nga mga kamatuoran? Mokiling ba kita sa paglikay niana tungod lang kay kini adunay “pipila ka butang nga lisod sabton”? (2 Pedro 3:16) Sa kasukwahi, maningkamot kita pag-ayo sa pagsabot kon unsay gihisgotan.—Efeso 3:18.

¹⁵ Komosta kon malisdan kita sa paghimog personal nga pagtuon? Kinahanglang maningkamot  kita nga maugmad ang gana sa pagtuon. b (1 Pedro 2:2) Ang pag-uswag ngadto sa pagkahamtong nagkinahanglan nga atong makat-onan ang pagkuhag sustansiya gikan sa gahi nga pagkaon, ang laglom nga mga kamatuoran sa Pulong sa Diyos. Kay kon dili kana buhaton, limitado lang ang atong mga gahom sa pagsabot. Apan, ang paghatag ug pamatuod sa pagkahamtong naglangkit ug labaw pa kay sa pagbaton ug mga gahom sa pagsabot. Sa adlaw-adlaw nga kinabuhi kinahanglang ipadapat nato ang kahibalo nga atong nabatonan pinaagi sa makugihong personal nga pagtuon.

16, 17. Unsang tambag ang gihatag ni disipulong Santiago bahin sa pagkahimong “mga magtutuman sa pulong”?

¹⁶ Ang pamatuod kon unsa kita sa atong kaugalingon makita usab diha sa atong pagpasundayag ug apresasyon sa kamatuoran—ang atong mga buhat sa pagtuo. Ang disipulong si Santiago migamit ug puwersadong ilustrasyon sa paghubit niining bahina sa pagsusi sa kaugalingon nga nag-ingon: “Mahimong mga magtutuman sa pulong, ug dili tigpaminaw lamang, nga limbongan ang inyong kaugalingon pinaagi sa bakak nga pangatarongan. Kay kon ang usa tigpaminaw lamang sa pulong, ug dili usa ka magtutuman, siya sama sa usa ka tawo nga nagtan-aw sa iyang kinaiyanhong nawong diha sa salamin. Kay siya motan-aw sa iyang kaugalingon, ug siya molakaw ug dihadiha malimot kon unsang matanga siya nga tawo. Apan siya nga magasud-ong pag-ayo sa hingpit nga balaod nga iya sa kagawasan ug magpadayon diha niana, kini nga tawo, tungod kay siya dili usa ka malimtanong tigpaminaw, kondili usa ka magtutuman sa buluhaton, malipayon siya sa iyang pagbuhat niini.”—Santiago 1:22-25.

¹⁷ Si Santiago nag-ingon: ‘Tan-aw sa salamin sa pulong sa Diyos, ug susiha ang imong kaugalingon. Padayon sa pagbuhat niini, ug susiha ang imong kaugalingon sumala sa imong nakaplagan diha sa pulong sa Diyos. Unya, ayawg kalimti dayon ang imong nakita. Himoa ang gikinahanglang mga pagtul-id.’ Ang pagsunod niining maong tambag malisod usahay.

18. Nganong ang pagsunod sa tambag ni Santiago malisod usahay?

¹⁸ Tagda, pananglitan, ang kinahanglanon nga makigbahin sa buluhatong pagsangyaw sa Gingharian. “Pinaagi sa kasingkasing ang usa nagapasundayag ug pagtuo alang sa pagkamatarong,” misulat si Pablo, “apan pinaagi sa baba ang usa nagahimog pagpahayag sa dayag alang sa kaluwasan.” (Roma 10:10) Ang pagpahayag sa dayag alang sa kaluwasan pinaagi sa atong baba nagkinahanglan ug ubay-ubayng mga pagpasibo. Kadaghanan kanato dili sayonan sa pagpakigbahin sa buluhatong pagsangyaw. Ang pagkamasiboton ug paghimo sa maong buluhaton nga panguna sa atong kinabuhi nagkinahanglan ug dugang pa gani nga mga kausaban ug mga sakripisyo. (Mateo 6:33) Apan sa dihang kita mahimong mga magtutuman niining hinatag-sa-Diyos nga buluhaton, kita malipay tungod kay kini makahatag ug kadayeganan kang Jehova. Nan, kita ba masiboton nga mga magmamantala sa Gingharian?

19. Unsay angayng ilakip sa atong mga buhat sa pagtuo?

¹⁹ Unsa ka masangkaron ang atong mga buhat sa pagtuo? Si Pablo miingon: “Ang mga butang nga inyong nakat-onan ingon man nadawat ug  nadungog ug nakita maylabot kanako, buhata kini; ug ang Diyos sa kalinaw magauban kaninyo.” (Filipos 4:9) Atong gipamatud-an kon unsa kita pinaagi sa atong pagpadapat sa atong nakat-onan, nadawat, nadungog, ug nakita—ang bug-os nga dalan sa Kristohanong pagpahinungod ug pagkatinun-an. “Mao kini ang dalan. Lakaw kamo niini,” nagsugo si Jehova pinaagi kang manalagnang Isaias.—Isaias 30:21.

20. Unsang matanga sa mga tawo ang dakong panalangin sa kongregasyon?

²⁰ Ang mga lalaki ug babaye nga makugihong nagtuon sa Pulong sa Diyos, masibotong nagasangyaw sa maayong balita, walay ikasaway sa ilang integridad, ug maunongong nagpaluyo sa Gingharian maoy dakong panalangin sa kongregasyon. Ang ilang presensiya makadugang sa kalig-on sa kongregasyon nga ilang gipakig-ubanan. Sila dakog ikatabang, ilabina kay daghan kaayong bag-ohan ang angayng atimanon. Kon atong sundon ang tambag ni Pablo nga ‘padayong sulayan kon kita anaa ba sa pagtuo ug padayong pamatud-an kon unsa kita sa atong kaugalingon,’ kita usab mahimong maayong mga impluwensiya sa uban.

Magakalipay sa Pagbuhat sa Kabubut-on sa Diyos

21, 22. Sa unsang paagi kita magakalipay sa pagbuhat sa kabubut-on sa Diyos?

²¹ “Sa pagbuhat sa imong kabubut-on, Oh Diyos ko, ako nagakalipay,” miawit si Haring David sa karaang Israel, “ug ang imong balaod ania sa akong kahiladman nga mga bahin.” (Salmo 40:8) Si David nalipay sa pagbuhat sa kabubut-on sa Diyos. Ngano? Tungod kay ang balaod ni Jehova anaa sa kasingkasing ni David. Si David wala magduhaduha sa dalan nga iyang pagalaktan.

²² Sa dihang ang balaod sa Diyos anaa sa atong kahiladman nga mga bahin, kita dili magduhaduha sa dalan nga atong pagalaktan. Kita magakalipay sa pagbuhat sa kabubut-on sa Diyos. Nan, ‘manglimbasog kita pag-ayo’ samtang kita mag-alagad kang Jehova nga kinasingkasing.—Lucas 13:24.

[Mga footnote]

Nahinumdom Ka Ba?

• Sa unsang paagi masulayan nato kon kita anaa ba sa pagtuo?

• Unsay nalangkit sa pagpamatuod kon unsa kita sa atong kaugalingon?

• Unsang pamatuod ang atong ikahatag labot sa Kristohanong pagkahamtong?

• Sa unsang paagi ang atong mga buhat sa pagtuo motabang kanato sa pagsusi kon unsa kita?

[Mga Pangutana sa Pagtuon]

[Hulagway sa panid 23]

Nahibalo ka ba sa pangunang paagi sa pagsulay kon ikaw anaa ba sa pagtuo?

[Hulagway sa panid 24]

Kita maghatag ug pamatuod sa atong Kristohanong pagkahamtong pinaagi sa pagbansay sa atong mga gahom sa pagsabot

[Mga hulagway sa panid 25]

Atong gipamatud-an kon unsa kita pinaagi sa pagkahimong ‘dili makalimot nga mga tigpaminaw, kondili mga magtutuman sa pulong’