Ang Bibliya Makatabang Kanimo sa Pagkaplag ug Kalipay

BISAN tuod kini dili usa ka medikal nga basahon, ang Bibliya adunay gisulti bahin sa epekto sa positibo o negatibong emosyon diha sa mental ug pisikal nga kahimsog sa usa ka tawo. “Ang kasingkasing nga malipayon maayo nga tambal,” nag-ingon ang Bibliya, “apan ang masulub-on nga espiritu makapauga sa kabukogan.” Dugang pa, atong mabasa: “Naluya ka ba sa adlaw sa kasakit? Ang imong kusog diyutay ra.” (Proverbio 17:22; 24:10) Kon kita mawad-ag kadasig, ang atong kusog matiti, nga makapaluya ug makapahuyang kanato ug dili na kita gusto nga magbag-o o mangayog tabang.

Ang kawalay-kadasig makadaot usab sa espirituwalidad sa usa ka tawo. Ang mga tawong mibati nga walay pulos sagad mobati nga dili gayod sila makatagamtam ug maayong relasyon sa Diyos ug sa ingon uyonan niya. Si Simone, nga gihisgotan sa miaging artikulo, nagduhaduha kon siya ba maoy “matang sa tawo nga uyonan sa Diyos.” Apan, kon susihon nato ang Pulong sa Diyos, ang Bibliya, makita nato nga ang Diyos may pag-uyon niadtong naningkamot sa pagpahimuot kaniya.

Ang Diyos Nagatagad Gayod

Ang Bibliya nagtug-an kanato nga “si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.” Dili tamayon sa Diyos ang “usa ka kasingkasing nga gun-ob ug dugmok,” apan misaad siya sa ‘pagbuhi pag-usab sa espiritu sa mga mapainubsanon ug pagbuhi pag-usab sa kasingkasing sa mga nangahugno.’—Salmo 34:18; 51:17; Isaias 57:15.

Usa ka higayon niana, nakita sa Anak sa Diyos, si Jesus, nga kinahanglan niyang ipatin-aw ngadto sa iyang mga tinun-an nga ang Diyos makamatikod sa maayong mga hiyas sa Iyang mga alagad. Pinaagig usa ka ilustrasyon, siya miingon nga mahibaloan sa Diyos sa dihang ang usa ka goryon  mahulog sa yuta—usa ka butang nga isipon sa kadaghanang tawo nga dili hinungdanon. Gipasiugda usab niya nga ang Diyos nasayod sa kinagamyang detalye bahin sa mga tawo, bisan sa gidaghanon sa mga buhok sa ilang ulo. Gitapos ni Jesus ang iyang ilustrasyon pinaagi sa pag-ingon: “Busa ayaw kamo kahadlok: kamo labaw pag bili kay sa daghang goryon.” (Mateo 10:29-31) a Gipakita ni Jesus nga bisan unsa pay pagbati sa mga tawo sa ilang kaugalingon, ang mga tawong may pagtuo bililhon gayod sa panan-aw sa Diyos. Gani, si apostol Pedro nagpahinumdom kanato nga “ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.”—Buhat 10:34, 35.

Hupti ang Balanseng Panghunahuna

Ang Pulong sa Diyos nag-awhag kanato sa pagbaton ug balanseng panghunahuna sa atong kaugalingon. Si apostol Pablo misulat ubos sa pagdasig: “Pinaagi sa dili-takos nga kalulot nga gihatag kanako ako magasulti sa tanan dinha sa inyong taliwala nga dili maghunahuna ug labaw bahin sa iyang kaugalingon kay sa angay nga hunahunaon; kondili maghunahuna sa paagi nga makabaton sa maayong panghunahuna, ang matag usa sumala sa gihatag sa Diyos kaniya nga sukod sa pagtuo.”—Roma 12:3.

Siyempre, dili nato gustong lantawon ang atong kaugalingon nga taas kaayo nga kita mahimo na hinuong garboso; ni gusto natong lantawon ang atong kaugalingon nga ubos kaayo nga bation natong kita walay pulos. Hinunoa, ang atong tumong mao ang pagbaton ug kasarangang panglantaw sa atong kaugalingon, nga nahibalo sa atong maayong mga hiyas maingon man sa atong mga limitasyon. Mao kiniy giingon sa usa ka Kristohanong babaye bahin niini: “Dili ako daotan nga tawo; ni sobra ako ka buotan. Aduna akoy tilinguhaon ug dili-tilinguhaon nga mga hiyas, ug ingon man usab niana ang uban.”

Siyempre, dili sayon ang pagbaton nianang balanseng panghunahuna. Basin dakong paningkamot ang gikinahanglan aron mawala ang sobra ka negatibo nga panglantaw nato sa atong kaugalingon nga lagmit natong naugmad sulod sa daghang katuigan. Bisan pa niana, uban sa tabang sa Diyos, mahimo natong bag-ohon ang atong personalidad ug ang atong panglantaw sa kinabuhi. Sa pagkatinuod, mao kanay giawhag sa Pulong sa Diyos nga atong buhaton. Atong mabasa: ‘Hukasa ninyo ang daan nga pagkatawo nga nahiuyon sa kanhi ninyong paagi sa panggawi ug nadunot sumala sa iyang malimbongong mga tinguha; ug magbag-o kamo diha sa puwersa nga nagpalihok sa inyong kaisipan, ug magsul-ob sa bag-ong pagkatawo nga gilalang sumala sa kabubut-on sa Diyos sa matuod nga pagkamatarong ug pagkamaunongon.’—Efeso 4:22-24.

Pinaagi sa pagpaningkamot sa pagbag-o sa “puwersa nga nagpalihok sa atong kaisipan,” sa ato pa, ang nagpatigbabawng hilig sa atong kaisipan, mahimo natong bag-ohon ang atong personalidad gikan sa usa nga sobra ka negatibo ngadto sa usa nga positibo. Si Lena, nga gihisgotan sa miaging artikulo, nakaamgo nga dili gayod mausab ang iyang negatibong pagbati bahin sa iyang kaugalingon kon dili niya wad-on ang panghunahuna nga wala gayoy mahigugma o makatabang kaniya. Unsang praktikal nga tambag  nga makaplagan diha sa Bibliya ang nakatabang kang Lena, Simone, ug sa uban pa sa paghimo nianang maong kausaban?

Mga Prinsipyo sa Bibliya nga Magpauswag sa Imong Kalipay

“Itugyan ang imong palas-anon kang Jehova, ug siya magasapnay kanimo.” (Salmo 55:22) Ang pag-ampo ang ilabinang makatabang kanato sa pagkaplag ug tinuod nga kalipay. Si Simone miingon: “Sa dihang mawad-an akog kadasig, moampo ako kang Jehova ug mangayog tabang. Sa tanang situwasyon, ako iyang gipalig-on ug gigiyahan.” Sa dihang ang salmista nag-awhag kanato sa pagtugyan sa atong palas-anon kang Jehova, siya sa pagkatinuod nagpahinumdom kanato nga si Jehova wala lang magtagad kanato kondili naglantaw usab kanato ingong mga indibiduwal nga takos sa iyang tabang ug pagpaluyo. Sa gabii sa Paskuwa 33 K.P., ang mga tinun-an ni Jesus naguol pag-ayo tungod sa giingon ni Jesus maylabot sa iyang umaabot nga pagbiya. Si Jesus nag-awhag kanila sa pag-ampo ngadto sa Amahan, ug dayon siya midugang: “Pangayo ug kamo makadawat, aron ang inyong kalipay mabug-os.”—Juan 16:23, 24.

“Adunay labaw nga kalipay sa paghatag kay sa pagdawat.” (Buhat 20:35) Ingon sa gitudlo ni Jesus, ang pagkamanggihatagon maoy usa ka paagi sa pagkaplag ug tinuod nga kalipay. Kon ipadapat nato kining kamatuorana sa Bibliya, kita mahimong mahunahunaon sa mga panginahanglan sa uban inay kay maghunahuna lang sa atong kaugalingong mga pagbati sa kawalay-pulos. Sa dihang motabang kita sa uban ug makita nato ang ilang pagpabili niana, mobati kitag katagbawan. Kombinsido si Lena nga ang regular nga pagpaambit sa maayong balita sa Bibliya uban sa iyang mga silingan nakatabang kaniya sa duha ka paagi. “Una, nakahatag kini kanako sa kalipay ug katagbawan nga gihisgotan ni Jesus,” matod niya. “Ikaduha, daghang tawo ang maayog pagsanong, nga nakatabang kanako nga magmalipayon.” Kon kita matinabangon sa uban, maeksperyensiyahan nato nga tinuod ang giingon sa Proverbio 11:25: “Ang dagayang nagabisibis sa uban dagaya usab nga pagabisibisan.”

“Ang tanang adlaw sa sinakit maoy daotan; apan ang malipayon ug kasingkasing may kombira sa kanunay.” (Proverbio 15:15) Kitang tanan makapili kon unsaon nato paglantaw ang atong kaugalingon ug ang atong mga kahimtang. Anaa ra kanato kon magmanegatibo kita sa tanang butang ug magmagul-anon, o kaha magmapositibo sa atong panghunahuna, nga may “malipayong kasingkasing,” ug magmangayaon nga daw kita anaa sa usa ka kombira. Si Simone miingon: “Naningkamot ako nga magmapositibo kutob sa mahimo. Nagmapuliki ako sa personal nga pagtuon ug sa ministeryo, ug nagmalahutayon ako sa pag-ampo. Nakig-uban usab ako sa mga tawong positibog panglantaw, ug naningkamot ako sa pagtabang sa uban.” Ang ingon niana nga tinamdan sa kasingkasing mosangpot sa tinuod nga kalipay, sama gayod sa giawhag kanato sa Bibliya: “Pagmaya diha kang Jehova ug paglipay, kamong mga matarong; ug panghugyaw nga malipayon, kamong tanan nga matul-id sa kasingkasing.”—Salmo 32:11.

“Ang tinuod nga higala mahigugma sa tanang panahon, ug maoy usa ka igsoon nga natawo alang sa panahon sa kasakit.” (Proverbio 17:17) Ang pagsulti sa atong  mga pagbati ngadto sa usa ka hinigugma o sa usa ka kasaligan nga magtatambag makatabang kanato sa pagkontrolar sa atong negatibong mga pagbati ug sa pagbuntog niana una pa kita malumsan niana. Ang pagpakigsulti sa uban makatabang kanato sa paglantaw sa mga butang sa balanse ug positibo nga paagi. “Nakatabang ug dako kanako ang pagsulti sa akong gibati ngadto sa uban,” matod ni Simone. “Kinahanglang isulti nimo sa uban ang imong gibati. Sagad nga igo na ang basta pagpahungaw sa imong pagbati ngadto sa uban.” Kon himoon nimo kana, maeksperyensiyahan nimo nga tinuod ang giingon sa proverbio: “Ang pagkamabalak-on diha sa kasingkasing sa usa ka tawo maoy magpatikuko niini, apan ang maayong pulong mao ang makapalipay niini.”—Proverbio 12:25.

Kon Unsay Imong Mahimo

Nahisgotan nato ang pipila lang sa daghang mapuslanon ug praktikal nga mga prinsipyo sa Bibliya nga makatabang kanato sa pagbuntog sa negatibong mga pagbati ug sa pagkaplag ug tinuod nga kalipay. Kon ikaw usa niadtong nakigbisog sa mga pagbati sa kawalay-pulos, gidasig ka namo sa pagsusi pag-ayo sa Pulong sa Diyos, ang Bibliya. Kat-oni ang pagbaton ug realistiko ug balanse nga pagtamod sa imong kaugalingon ug sa imong relasyon sa Diyos. Nanghinaot gayod kami nga pinaagi sa giya sa Pulong sa Diyos, ikaw makakaplag ug tinuod nga kalipay sa tanan nimong himoon.

[Footnote]

[Hulagway sa panid 7]

Ang pagkinabuhi sumala sa mga prinsipyo sa Bibliya magpauswag sa imong kalipay