Mga Pangutana Gikan sa mga Magbabasa

Ang pulong “tingali” sa Sofonias 2:3 nagpasabot ba nga ang mga alagad sa Diyos dili seguradong makadawat ug kinabuhing walay kataposan?

Ang maong teksto nag-ingon: “Pangitaa ninyo si Jehova, kamong tanang maaghop sa yuta, nga nagbuhat sa Iyang hudisyal nga hukom. Pangitaa ang pagkamatarong, pangitaa ang pagkamaaghop. Tingali kamo pagatagoan sa adlaw sa kasuko ni Jehova.” Nganong nag-ingon man kining bersikuloha ug “tingali”?

Aron masabtan nato kon unsay himoon ni Jehova sa mga matinumanon kaniya panahon sa Armagedon, maayong hinumdoman kon unsay gitudlo sa Bibliya nga buhaton sa Diyos niadtong nangamatay una pa ang maong panahon sa paghukom. Ang uban pagabanhawon ngadto sa imortal nga kinabuhi ingong espiritung mga linalang sa langit, samtang ang uban pagabanhawon sa yuta nga may paglaom nga mabuhing walay kataposan sa Paraiso. (Juan 5:28, 29; 1 Corinto 15:53, 54) Kon si Jehova mahinumdom ug magaganti sa mga maunongon kaniya nga nangamatay una pa ang Armagedon, seguradong buhaton usab niya kana sa iyang mga alagad nga buhi pa sa adlaw sa iyang kasuko.

Makapadasig usab ang inspiradong pulong ni apostol Pedro. Siya misulat: “[Ang Diyos] nagluwas kang Noe, nga usa ka magwawali sa pagkamatarong, uban sa pito pa sa dihang siya nagpadala ug lunop sa usa ka kalibotan sa dili-diyosnong katawhan; ug pinaagi sa paghimong abo sa mga siyudad sa Sodoma ug sa Gomora siya naghukom kanila, . . . ug siya nagluwas sa matarong nga si Lot . . . Si Jehova mahibalo kon unsaon pagluwas sa katawhan nga may diyosnong pagkamahinalaron gikan sa pagsulay, apan nagtagana sa dili-matarong nga katawhan alang sa adlaw sa paghukom aron pagalaglagon.” (2 Pedro 2:5-9) Bisan tuod gilaglag ni Jehova ang mga daotan sa karaang panahon, iyang giluwas si Noe ug Lot, kinsa matinumanong nag-alagad kaniya. Pagaluwason usab ni Jehova ang mga tawong may diyosnong debosyon sa dihang laglagon niya ang mga daotan sa Armagedon. “Usa ka dakong panon” sa matarong nga mga tawo ang makalabang buhi.—Pinadayag 7:9, 14.

Busa, lagmit nga ang pulong “tingali” wala gamita sa Sofonias 2:3 tungod sa bisan unsa mang pagduhaduha bahin sa katakos sa Diyos sa pagluwas niadtong iyang giuyonan. Hinunoa, ang usa ka tawo posible lamang nga pagatagoan sa adlaw sa kasuko ni Jehova kon siya mangita sa pagkamatarong ug pagkamaaghop. Ang kaluwasan sa usa ka tawo nagdepende sa iyang padayong pagpangita sa pagkamaaghop ug pagkamatarong.—Sofonias 2:3.

[Hulagway sa panid 31]

“Si Jehova mahibalo kon unsaon pagluwas sa katawhan nga may diyosnong pagkamahinalaron gikan sa pagsulay”