Naihap ni Jehova “ang Mismong mga Buhok sa Inyong Ulo”
Naihap ni Jehova “ang Mismong mga Buhok sa Inyong Ulo”
“Walay usa [ka goryon] ang mahulog sa yuta nga dili mahibaloan sa inyong Amahan. Apan ang mismong mga buhok sa inyong ulo naihap ang tanan.”—MATEO 10:29, 30.
1, 2. (a) Nganong mibati man si Job nga gitalikdan siya sa Diyos? (b) Ang gipamulong ba ni Job nagpasabot nga siya misupak kang Jehova? Ipatin-aw.
“AKO nagatawag kanimo, Oh Diyos, apan ikaw wala gayod motubag kanako; ug sa dihang ako miampo, ikaw wala mamati. Ikaw mabangis kanako; ikaw nagalutos kanako uban sa tibuok nimong kusog.” Ang tawo nga nagsulti nianang mga pulonga nag-antos sa tumang kaguol, ug dili kana ikatingala! Siya nawad-an sa iyang panginabuhi, usa ka kalit nga katalagman ang mihunos sa kinabuhi sa iyang mga anak, ug karon gihampak siya sa usa ka makapaluyang sakit. Ang ngalan sa maong tawo mao si Job, ug ang iyang makapaguol kaayo nga kasinatian gisulat diha sa Bibliya alang sa atong kaayohan.—Job 30:20, 21, Today’s English Version.
2 Ang gipamulong ni Job morag nagpakita nga misupak siya sa Diyos, apan dili kana maoy kahimtang. Si Job nagsulti lamang sa kaguol nga iyang gibati. (Job 6:2, 3) Wala siya mahibalo nga si Satanas mao ang hinungdan sa iyang mga pagsulay, busa nasayop siya sa paghinapos nga gibiyaan siya sa Diyos. Sa usa ka higayon, miingon gani si Job kang Jehova: “Ngano man nga gitago mo ang imong nawong ug giisip ako ingon nga imong kaaway?” a—Job 13:24.
3. Sa dihang mahitabo ang mga kalisdanan, unsay lagmit nga mosantop sa atong hunahuna?
3 Karon, daghan sa katawhan ni Jehova ang nag-antos ug way-hunong nga mga kalisdanan tungod sa mga gubat, politikanhon ug katilingbanon nga mga kagubot, kinaiyanhong mga katalagman, pagkatigulang, sakit, grabeng kakabos, ug mga pagdili sa gobyerno. Lagmit ikaw usab nag-antos sa usa ka matang sa pagsulay. Usahay, maghunahuna ka tingali nga gitago ni Jehova ang iyang nawong gikan kanimo. Nahibalo ka gayod sa giingon sa Juan 3:16: “Gihigugma pag-ayo sa Diyos ang kalibotan nga gihatag niya ang iyang bugtong nga Anak.” Bisan pa niana, sa dihang ikaw mag-antos ug wala kay makitang kahupayan, maghunahuna ka tingali: ‘Nahigugma ba gayod ang Diyos kanako? Namatikdan ba niya kon unsay akong ginaantos? May kahingawa ba siya kanako ingong indibiduwal?’
4. Unsang situwasyon ang kinahanglang antoson ni Pablo, ug sa unsang mga paagi ang maong situwasyon makaapektar kanato?
4 Tagda ang nahitabo kang apostol Pablo. “Gihatagan akog tunok sa unod, usa ka manulonda ni Satanas, sa pagsagpa kanako sa kanunay,” siya misulat, nga midugang: “Sa tulo ka higayon ako nangaliyupo sa Ginoo nga unta kini mobiya kanako.” Nadungog ni Jehova ang iyang mga pangaliyupo. Bisan pa niana, iyang gipaila kang Pablo nga siya dili mangilabot pinaagi sa pagsulbad niana sa milagrosong paagi. Hinunoa, si Pablo kinahanglang mosalig sa gahom sa Diyos aron matabangan siya sa pagsagubang sa iyang “tunok sa unod.” b (2 Corinto 12:7-9) Sama kang Pablo, ikaw tingali nag-antos sa usa ka pagsulay. Tingali maghunahuna ka, ‘Ang kamatuoran ba nga si Jehova morag walay gihimo labot sa akong pagsulay nagpasabot nga siya wala mahibalo sa akong situwasyon o nga siya walay kahingawa kanako?’ Ang tubag maoy dili gayod! Ang dulot nga kahingawa ni Jehova sa matag usa sa iyang matinumanong mga alagad gipasiugda diha sa giingon ni Jesus sa iyang mga apostoles wala madugay human niya pilia sila. Tan-awon nato kon sa unsang paagi ang iyang gisulti makadasig kanato karon.
“Ayaw Kamo Kahadlok”—Ngano?
5, 6. (a) Sa unsang paagi gitabangan ni Jesus ang mga apostoles nga dili mahadlok sa mahitabo sa umaabot? (b) Sa unsang paagi si Pablo nagpakitag pagsalig nga si Jehova may kahingawa kaniya?
5 Ang mga apostoles nakadawat ug talagsaong gahom gikan kang Jesus, lakip na sa “awtoridad ibabaw sa mga mahugawng espiritu, aron hinginlan kini sila ug ayohon ang tanang matang sa balatian ug ang tanang matang sa kaluyahon.” Apan, wala kini magpasabot nga dili gayod sila makasinati ug mga pagsulay ug mga kalisdanan. Sa kasukwahi, detalyadong gihubit ni Jesus ang pipila sa mga butang nga mahitabo kanila. Apan, giawhag niya sila: “Ayaw ninyo kahadloki silang makapatay sa lawas apan dili makapatay sa kalag; apan hinunoa kahadloki ninyo siya nga makalaglag sa kalag ug sa lawas sa Gehenna.”—Mateo 10:1, 16-22, 28.
6 Aron matabangan ang iyang mga apostoles sa pagsabot kon nganong dili sila angayng mahadlok, si Jesus naghatag ug duha ka ilustrasyon. Siya miingon kanila: “Dili ba ang duha ka goryon ikabaligya man sa usa ka sensilyo nga gamay ug bili? Bisan pa niana, walay usa kanila ang mahulog sa yuta nga dili mahibaloan sa inyong Amahan. Apan ang mismong mga buhok sa inyong ulo naihap ang tanan. Busa ayaw kamo kahadlok: kamo labaw pag bili kay sa daghang goryon.” (Mateo 10:29-31) Matikdi nga ang pagkadili-mahadlokon atubangan sa kalisdanan gilangkit ni Jesus sa pagkamasaligon nga si Jehova may kahingawa kanato. Dayag nga si apostol Pablo nakabaton nianang maong pagsalig. Siya misulat: “Kon ang Diyos dapig kanato, kinsa ang batok kanato? Siya nga wala gani magpalingkawas sa iyang kaugalingong Anak kondili nagtugyan kaniya alang kanatong tanan, dili ba siya usab uban kaniya malulotong maghatag kanato sa tanang ubang butang?” (Roma 8:31, 32) Bisan unsang mga kalisdanan ang imong giatubang, ikaw makaseguro usab nga si Jehova may kahingawa kanimo basta ikaw magmaunongon kaniya. Kini mas madayag pa gani sa dihang susihon nato pag-ayo ang tambag ni Jesus sa iyang mga apostoles.
Ang Bili sa Usa ka Goryon
7, 8. (a) Sa unsang paagi ang mga goryon gilantaw sa adlaw ni Jesus? (b) Ngano kahang gigamit sa Mateo 10:29 ang usa ka porma sa Gregong pulong para sa “mga goryon” nga nagpasabot ug gagmayng mga goryon?
7 Ang mga ilustrasyon ni Jesus epektibong naghubit sa kahingawa ni Jehova alang sa matag usa sa Iyang mga alagad. Tagda una ang mahitungod sa mga goryon. Sa adlaw ni Jesus, ang mga goryon gigamit ingong kalan-on, apan tungod kay mangdaot man silag mga tanom, sila kasagarang gilantaw ingong mga peste. Ang mga goryon daghan ug barato kaayo nga makapalit kag duha ka buok sa presyo nga menos pa sa katumbas nga kantidad niini karon nga mga tres pesos. Kon doblehon nimo ang maong kantidad ikaw dili lang makapalit ug upat kondili lima ka goryon—ang ikalimang langgam gipakapin lang, nga morag wala gayod kiniy bili!—Lucas 12:6.
8 Hunahunaa usab ang gidak-on niining komon nga langgam. Kon itandi sa ubang mga langgam, bisan ang gulang na nga goryon gamay kaayo. Apan, ang Gregong pulong nga gihubad ug “mga goryon” diha sa Mateo 10:29 espesipikong nagtumong sa gagmayng mga goryon. Dayag nga buot ni Jesus nga handurawon sa iyang mga apostoles ang usa ka langgam nga kinamenosan ug bili. Sumala sa giingon sa usa ka reperensiyang basahon, “si Jesus naghisgot ug gamay kaayo nga matang sa langgam ug naghubit pa niana ingong gamay kaayo!”
9. Unsa ang hinungdanong punto diha sa ilustrasyon ni Jesus sa mga goryon?
9 Ang pagtandi nga gihimo ni Jesus ngadto sa mga goryon adunay hinungdanong punto: Ang gihunahuna sa mga tawo nga walay bili hinungdanon diay para kang Jehova nga Diyos. Gipasiugda pa ni Jesus kining kamatuorana pinaagi sa pag-ingon nga ang usa ka gamayng goryon dili “mahulog sa yuta” nga dili mamatikdan ni Jehova. c Tin-aw ang leksiyon. Kon mamatikdan ni Jehova nga Diyos bisan ang kinagamyan ug kinamenosan ug bili nga langgam, labaw pa siyang mahingawa sa kahimtang sa usa ka tawo nga mipili sa pag-alagad kaniya!
10. Unsay kahulogan sa pahayag: “Ang mismong mga buhok sa inyong ulo naihap ang tanan”?
10 Gawas pa sa iyang ilustrasyon sa mga goryon, si Jesus miingon: “Ang mismong mga buhok sa inyong ulo naihap ang tanan.” (Mateo 10:30) Kining mubo apan tulugkaron nga pahayag nagpasiugda sa punto sa ilustrasyon ni Jesus sa mga goryon. Tagda kini: Kasagaran, ang ulo sa tawo adunay duolan sa 100,000 ka lugas sa buhok. Kasagaran, ang usa ka buhok daw sama ra sa lain, ug walay usa ka lugas sa buhok ang hatagan natog linaing pagtagad. Bisan pa niana, ang matag lugas sa buhok namatikdan ug naihap ni Jehova nga Diyos. Tungod kay mao kini ang kahimtang, aduna bay detalye sa atong kinabuhi nga dili mahibaloan ni Jehova? Segurado nga nasabtan ni Jehova ang talagsaong pagkagama sa matag usa sa iyang mga alagad. Sa pagkatinuod, siya “nagatan-aw sa kasingkasing.”—1 Samuel 16:7.
11. Sa unsang paagi gipahayag ni David ang iyang pagsalig sa kahingawa ni Jehova alang kaniya?
11 Si David, kinsa nakaagom sa daghang kalisdanan, masaligon nga namatikdan siya ni Jehova. “Oh Jehova, ikaw nakasusi kanako, ug ikaw nakaila kanako,” siya misulat. “Ikaw nahibalo sa akong paglingkod ug sa akong pagtindog. Gitagad mo ang akong hunahuna gikan sa halayo.” (Salmo 139:1, 2) Makaseguro ka usab nga si Jehova nakaila kanimo. (Jeremias 17:10) Ayaw pagdalidali sa paghunahuna nga ikaw walay bili nga dili ka na mamatikdan ni Jehova, kinsa makakita sa tanang butang!
“Isulod ang Akong mga Luha sa Imong Botelya nga Panit”
12. Sa unsang paagi nato nasayran nga si Jehova nahibalo gayod sa mga kalisdanan nga giantos sa iyang katawhan?
12 Wala lamang makaila si Jehova sa matag usa sa iyang mga alagad kondili nahibalo gayod usab siya sa mga kalisdanan nga giantos sa matag usa. Pananglitan, sa dihang ang mga Israelinhon gidaogdaog ingong mga ulipon, miingon si Jehova kang Moises: “Sa walay duhaduha nakita ko ang kasakitan sa akong katawhan nga atua sa Ehipto, ug nadungog ko ang ilang pagtuaw tungod sa mga nagpugos kanila sa pagtrabaho; tungod kay ako nahibalo pag-ayo sa mga kasakit nga ilang giantos.” (Exodo 3:7) Pagkamakapahupay ang pagkaamgo nga sa dihang kita nag-antos ug pagsulay, si Jehova makakita kon unsay nagakahitabo ug siya makadungog sa atong mga pagtuaw! Magpakabana gayod siya sa atong pag-antos.
13. Unsay nagpakita nga si Jehova mobati gayod sa iyang mga alagad?
13 Ang kahingawa ni Jehova niadtong misulod sa usa ka relasyon uban kaniya makita usab diha sa iyang pagbati sa mga Israelinhon. Bisan tuod ang ilang pag-antos subsob nga maoy resulta sa ilang pagkagahian, si Isaias misulat bahin kang Jehova: “Sa panahon sa tanan nilang kasakit kadto nakapasakit kaniya.” (Isaias 63:9) Nan, ingong matinumanong alagad ni Jehova, makaseguro ka nga kon ikaw masakitan, si Jehova masakitan usab. Dili ba kana magtukmod kanimo sa pag-atubang sa kalisdanan nga walay kokahadlok ug sa pagpadayon sa paghimo sa imong kinamaayohan sa pag-alagad kaniya?—1 Pedro 5:6, 7.
14. Pinasukad sa unsang mga sirkumstansiya nga gisulat ang Salmo 56?
14 Ang hugot nga pagtuo ni Haring David nga si Jehova may kahingawa ug mibati kaniya gipadayag diha sa Salmo 56, nga gisulat ni David samtang mikalagiw siya gikan kang Haring Saul kinsa nagtinguha sa pagpatay kaniya. Si David mikalagiw ngadto sa Gat, apan nahadlok siyang madakpan sa dihang nailhan siya sa mga Filistehanon. Siya misulat: “Ang akong mga kaaway nagpunay pagbanghag sa tibuok nga adlaw, kay daghan ang nakig-away nga mapahitas-on batok kanako.” Tungod sa iyang peligrosong kahimtang, si David midangop kang Jehova. “Sa tibuok nga adlaw sila nagdaot kanunay sa akong mga kalihokan,” siya miingon. “Ang tanan nilang hunahuna maoy batok kanako alang sa kadaotan.”—Salmo 56:2, 5.
15. (a) Unsay gipasabot ni David sa dihang mihangyo siya kang Jehova nga isulod ang iyang mga luha sa botelya nga panit o isulat kana diha sa usa ka basahon? (b) Sa dihang kita mag-antos sa usa ka pagsulay sa atong pagtuo, sa unsa kita makaseguro?
15 Unya, sumala sa gisulat diha sa Salmo 56:8, si David misulti niining makaiikag nga mga pulong: “Ang pagkahimo nakong usa ka kagiw imong gitala. Isulod ang akong mga luha sa imong botelya nga panit. Dili ba anaa man sila sa imong basahon?” Pagkamakapatandog nga kahubitan sa malumong kahingawa ni Jehova! Sa dihang kita mag-antos sa kapit-os, kita motuaw tingali kang Jehova uban ang mga luha. Bisan ang hingpit nga tawong si Jesus mihimo niana. (Hebreohanon 5:7) Hugot ang pagtuo ni David nga si Jehova nakamatikod kaniya ug mahinumdom sa iyang pag-antos, nga daw gitipigan ang iyang mga luha diha sa botelya nga panit o gisulat kana diha sa usa ka basahon. d Tingali gibati nimo nga halos mapuno sa imong mga luha ang maong botelya nga panit o ang maong basahon. Kon mao kanay imong gibati, makabaton kag kahupayan. Ang Bibliya nagpasalig kanato: “Si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.”—Salmo 34:18.
Pagkahimong Suod nga Kauban sa Diyos
16, 17. (a) Giunsa nato pagkahibalo nga si Jehova nagpakabana sa mga problema nga giatubang sa iyang katawhan? (b) Unsay ginahimo ni Jehova aron ang mga tawo makatagamtam ug suod nga relasyon kaniya?
16 Ang kamatuoran nga naihap ni Jehova ‘ang mismong mga buhok sa atong ulo’ naghatag kanato ug ideya kon unsa ka mapaniiron ug mahingawaon ang Diyos nga atong ginasimba. Bisan tuod kinahanglang maghulat pa kita sa gisaad nga bag-ong kalibotan aron mahanaw ang tanang kasakit ug pag-antos, si Jehova naghimo ug usa ka kahibulongang butang alang sa iyang katawhan bisan karon. Si David misulat: “Ang pagkasuod kang Jehova ila sa mga nahadlok kaniya, mao man usab ang iyang pakigsaad, aron sila mahibalo niini.”—Salmo 25:14.
17 “Pagkasuod kang Jehova.” Aw, ang maong ideya morag imposible para sa dili-hingpit nga mga tawo! Bisan pa niana, gidapit ni Jehova ngadto sa iyang tolda kadtong mga tawo nga nahadlok kaniya. (Salmo 15:1-5) Ug unsay buhaton ni Jehova para sa iyang mga dinapit? Iyang ipahibalo kanila ang iyang pakigsaad, sumala pa ni David. Si Jehova mosugid diha kanila, nga magbutyag sa iyang “kompidensiyal nga butang” pinaagi sa mga manalagna, aron sila mahibalo kon unsa ang iyang mga katuyoan ug kon unsay angay nilang buhaton aron magkinabuhi nga kaharmonya niana.—Amos 3:7.
18. Giunsa nato pagkahibalo nga buot ni Jehova nga kita makabaton ug suod nga relasyon kaniya?
18 Tinuod, makapadasig ang pagkahibalo nga kitang dili-hingpit nga mga tawo mahimong suod nga mga kauban sa Labing Hataas, si Jehova nga Diyos. Gani, kita iyang giawhag nga makigsuod kaniya. “Duol [o, pakigsuod] sa Diyos, ug siya moduol [o, makigsuod] kaninyo,” nag-ingon ang Bibliya. (Santiago 4:8) Buot ni Jehova nga kita makabaton ug suod nga relasyon kaniya. Sa pagkatinuod, naghimo na siya ug mga lakang aron maposible ang maong relasyon. Ang halad lukat ni Jesus nagbukas sa dalan aron kita mahimong higala sa Labing Hataas nga Diyos. Ang Bibliya nag-ingon: “Bahin kanato, kita nahigugma, tungod kay siya unang nahigugma kanato.”—1 Juan 4:19.
19. Sa unsang paagi ang pagkamainantoson makapalig-on sa atong relasyon kang Jehova?
19 Kanang suod nga relasyon mapalig-on kon kita moantos ilalom sa malisod nga mga sirkumstansiya. Ang tinun-an nga si Santiago misulat: “Ipatapos sa pagkamainantoson ang buluhaton niini, aron nga kamo mahimong bug-os ug maayo sa tanang bahin, nga dili makulangan sa bisan unsa.” (Santiago 1:4) Unsang “buluhaton” ang mapalampos pinaagi sa pag-antos sa kalisdanan? Hinumdomi ang “tunok sa unod” ni Pablo. Unsay nalampos sa pagkamainantoson diha kaniya? Mao kiniy giingon ni Pablo bahin sa iyang mga pagsulay: “Busa, sa tumang kalipay ako manghambog hinuon bahin sa akong mga kaluyahon, aron ang gahom ni Kristo mahimong samag tolda nga magpabilin ibabaw kanako. Busa ako nagakalipay sa kaluyahon, sa mga pag-insulto, sa mga higayon sa panginahanglan, sa mga paglutos ug sa mga kalisdanan, alang kang Kristo. Kay sa dihang ako maluya, ako gamhanan hinuon.” (2 Corinto 12:9, 10) Naeksperyensiyahan ni Pablo nga si Jehova mohatag sa gikinahanglang gahom—“ang gahom nga labaw sa kasarangan” kon gikinahanglan—aron siya makaantos. Kana, sa baylo, mas nakapasuod kaniya kang Kristo ug kang Jehova nga Diyos.—2 Corinto 4:7; Filipos 4:11-13.
20. Sa unsang paagi makaseguro kita nga si Jehova motabang ug mohupay kanato atubangan sa kalisdanan?
20 Tingalig gitugotan ni Jehova nga magpadayon ang imong mga pagsulay. Kon mao, hinumdomi ang iyang saad niadtong nahadlok kaniya: “Dili ko gayod ikaw pagabiyaan ni sa bisan unsang paagi pagatalikdan.” (Hebreohanon 13:5) Maeksperyensiyahan nimo ang maong tabang ug paghupay. Naihap ni Jehova “ang mismong mga buhok sa imong ulo.” Nakita niya ang imong pagkamainantoson. Mobati siya sa imong kasakit. Nahingawa gayod siya kanimo. Ug dili gayod niya ‘kalimtan ang imong buhat ug ang gugma nga imong gipakita alang sa iyang ngalan.’—Hebreohanon 6:10.
[Mga footnote]
a Ang susamang mga pulong gisulti sa matarong nga si David ug sa matinumanong mga anak ni Kore.—Salmo 10:1; 44:24.
b Wala isulti sa Bibliya kon unsa gayod ang “tunok sa unod” ni Pablo. Lagmit usa kadto ka depekto sa lawas, sama sa hanap nga panan-aw. O ang ekspresyong “tunok sa unod” mahimong nagtumong sa bakak nga mga apostoles ug sa uban nga nagkuwestiyon sa pagkaapostol ug ministeryo ni Pablo.—2 Corinto 11:6, 13-15; Galacia 4:15; 6:11.
c Ang ubang mga eskolar nag-ingon nga ang pagkahulog sa goryon ngadto sa yuta wala lamang magtumong sa pagkamatay niini. Matod nila, ang orihinal nga mga pulong mahimong magtumong sa pagtugpa sa langgam diha sa yuta aron mangitag pagkaon. Kon mao kini ang kahimtang, kini magpasabot nga ang Diyos nakamatikod ug may kahingawa sa langgam sa adlaw-adlaw nga mga kalihokan niini, dili lamang sa dihang kini mamatay.—Mateo 6:26.
d Sa karaang mga panahon, ang mga botelya nga panit gihimo gikan sa mga panit sa karnero, kanding, ug baka. Ang maong mga botelya sudlan ug gatas, mantekilya, keso, o tubig. Ang mga panit nga dekalidad mahimong sudlag lana o bino.
Nahinumdom Ka Ba?
• Unsay mga hinungdan nga ang usa ka tawo mobati nga siya gitalikdan sa Diyos?
• Unsang leksiyon ang atong makat-onan gikan sa mga ilustrasyon ni Jesus sa mga goryon ug sa pag-ihap sa mga buhok sa atong ulo?
• Unsay kahulogan sa pagsulod sa mga luha sa usa nganha sa “botelya nga panit” ni Jehova o sa pagsulat niana diha sa iyang “basahon”?
• Sa unsang paagi kita mahimong ‘suod kang Jehova’?
[Mga Pangutana sa Pagtuon]
[Hulagway sa panid 22]
Nganong wala kuhaa ni Jehova ang “tunok sa unod” ni Pablo?
[Hulagway sa panid 23]
Unsay atong makat-onan gikan sa ilustrasyon ni Jesus sa mga goryon?
[Credit Line]
© J. Heidecker/VIREO
[Hulagway sa panid 25]
Pinaagi sa regular nga pagbasa sa Bibliya, atong makita ang mga pasalig nga ang Diyos may kahingawa kanato