Si Jehova Mao ang “Tigganti sa mga Matinuorong Nagapangita Kaniya”
Si Jehova Mao ang “Tigganti sa mga Matinuorong Nagapangita Kaniya”
“Siya nga moduol sa Diyos angay nga motuo nga siya mao ug nga siya maoy tigganti sa mga matinuorong nagapangita kaniya.”—HEBREOHANON 11:6.
1, 2. Nganong ang pipila ka alagad ni Jehova nakigbisog sa negatibong mga pagbati?
“AKO usa ka Saksi ni Jehova sa halos 30 na ka tuig, apan wala gayod ako mobating takos nianang ngalana,” misugid si Barbara. a “Bisan tuod ako nakapayunir na ug nakabaton ug daghang pribilehiyo, daw walay usa niana ang makapatuo kanako nga ako takos tawgong Saksi.” Si Keith nagpahayag ug susamang mga hunahuna. “Usahay mobati akong dili takos tungod kay ang mga alagad ni Jehova daghag rason nga magmalipayon, apan ako dili malipayon,” matod pa niya. “Kini nakapahasol sa akong tanlag, nga nakapasamot lamang sa akong gibati.”
2 Daghang matinumanon nga mga alagad ni Jehova, kaniadto ug karon, ang nakigbisog sa susamang mga pagbati. Ikaw ba usab nakigbisog usahay nianang mga pagbatia? Tingalig nabug-atan ka sa daghang problema, samtang ang imong mga isigkamagtutuo daw nagkalipay sa kinabuhi, walay problema ug malipayon. Tungod niini, mobati ka tingali nga wala nimo maangkon ang pag-uyon ni Jehova o ikaw dili takos sa iyang pagtagad. Ayaw dayon paghunahuna nga mao kana ang kahimtang. Ang Bibliya nagpasalig kanato: ‘Wala tamaya ni Jehova ni gidumtan ang kasakitan sa sinakit; ug wala niya itago ang iyang nawong gikan kaniya, ug sa dihang siya mituaw kaniya aron sa pagpakitabang siya namati.’ (Salmo 22:24) Kanang matagnaong mga pulong bahin sa Mesiyas nagpakita nga si Jehova dili lamang mamati sa mga matinumanon kaniya kondili magaganti usab kanila.
3. Nganong maapektahan man kita sa mga kapit-os niining sistemaha sa mga butang?
3 Walay tawo nga dili maapektahan sa mga kapit-os niining sistemaha sa mga butang. Bisan ang katawhan ni Jehova maapektahan usab. Kita nagkinabuhi sa kalibotan nga gimandoan sa pangunang kaaway ni Jehova, si Satanas nga Yawa. (2 Corinto 4:4; 1 Juan 5:19) Imbes gipanalipdan sa milagrosong paagi, ang mga alagad ni Jehova, sa pagkatinuod, mao ang pangunang gipuntirya ni Satanas. (Job 1:7-12; Pinadayag 2:10) Busa, sa dili pa moabot ang tinudlong panahon sa Diyos, kita kinahanglang “mag-antos ilalom sa kasakitan” ug ‘molahutay sa pag-ampo,’ nga masaligon nga si Jehova may kahingawa kanato. (Roma 12:12) Dili kita angayng magpadala sa hunahuna nga kita wala higugmaa sa atong Diyos, si Jehova!
Karaang mga Panig-ingnan sa Pagkamainantoson
4. Paghatag ug pipila ka pananglitan sa matinumanong mga alagad ni Jehova nga nag-antos ug makapaguol nga mga kahimtang.
4 Daghang karaang mga alagad ni Jehova ang kinahanglang moantos sa makapaguol nga mga kahimtang. Pananglitan, si Ana mibatig “kapait sa kalag” tungod kay siya walay anak—usa ka kahimtang nga iyang giisip nga susama ra nga nakalimtan siya sa Diyos. (1 Samuel 1:9-11) Sa dihang si Elias gigukod ni Rayna Jezebel, kinsa nagtinguha sa pagpatay kaniya, siya nahadlok ug miampo kang Jehova: “Igo na! Karon, Oh Jehova, kuhaa ang akong kalag, kay ako dili mas maayo kay sa akong mga katigulangan.” (1 Hari 19:4) Ug lagmit nga si apostol Pablo naguol gayod sa iyang pagkadili-hingpit sa dihang siya miangkon: “Sa dihang buot nakong buhaton ang maayo, ang daotan ania kanako.” Siya midugang: “Alaot ako nga tawo!”—Roma 7:21-24.
5. (a) Sa unsang paagi si Ana, Elias, ug Pablo gigantihan? (b) Unsang paghupay ang atong mabatonan gikan sa Pulong sa Diyos kon kita nakigbisog sa negatibong mga pagbati?
5 Siyempre, kita nahibalo nga si Ana, Elias, ug Pablo nakalahutay sa pag-alagad kang Jehova, ug Siya dagayang nagganti kanila. (1 Samuel 1:20; 2:21; 1 Hari 19:5-18; 2 Timoteo 4:8) Bisan pa niana, sila nakigbisog sa tanang matang sa tawhanong emosyon, lakip na ang kaguol, kawalay-paglaom, ug kahadlok. Nan, dili kita angayng matingala kon usahay kita maghambin ug negatibong mga pagbati. Apan, unsay imong mahimo kon tungod sa mga kabalaka sa kinabuhi ikaw magduhaduha kon ikaw gihigugma ba gayod ni Jehova? Makabaton kag kahupayan gikan sa Pulong sa Diyos. Pananglitan, sa nag-unang artikulo, atong gihisgotan ang giingon ni Jesus nga naihap ni Jehova ‘ang mismong mga buhok sa imong ulo.’ (Mateo 10:30) Kanang makapadasig nga mga pulong nagpaila nga si Jehova interesado gayod sa matag usa sa iyang mga alagad. Hinumdomi usab ang ilustrasyon ni Jesus bahin sa mga goryon. Kon walay usa nianang gagmayng mga langgam ang mahulog sa yuta nga dili mamatikdan ni Jehova, nganong dili man siya magpakabana sa imong kahimtang?
6. Sa unsang paagi ang Bibliya usa ka tuboran sa kahupayan niadtong nakigbisog sa negatibong mga pagbati?
6 Posible ba gayod nga kitang dili-hingpit nga mga tawo mahimong bililhon sa panglantaw sa gamhanan-sa-tanan nga Maglalalang, si Jehova nga Diyos? Oo! Gani, adunay daghang teksto sa Bibliya nga nagpasalig kanato niini. Kon palandongon nato kining mga tekstoha, makasulti usab kita sama sa gisulti sa salmista nga miingon: “Sa dihang ang makapatugaw nga mga hunahuna midaghan sa akong kahiladman, ang imong mga paghupay mihapohap sa akong kalag.” (Salmo 94:19) Hisgotan nato ang pipila niining makapahupay nga mga pahayag gikan sa Pulong sa Diyos nga motabang kanato nga mas bug-os pang masabtan nga kita gipabilhan sa Diyos ug siya magaganti kanato samtang kita magpadayon sa pagtuman sa iyang kabubut-on.
“Linaing Katigayonan” ni Jehova
7. Unsang makapadasig nga tagna ang gihatag ni Jehova pinaagi kang Malaquias ngadto sa hiwi nga nasod?
7 Makaluluoy ang kahimtang sa mga Hudiyo panahon sa ikalimang siglo W.K.P. Ang mga saserdote midawat ug masakiton nga mga mananap ug naghalad niini kang Jehova. Ang mga maghuhukom mapihigpihigon. Ang pagpamarang, pagpamakak, pagpanikas, ug pagpanapaw kaylap kaayo. (Malaquias 1:8; 2:9; 3:5) Si Malaquias misulti ug usa ka makapahinganghang tagna ngadto niining hiwi kaayo nga nasod. Sa ngadtongadto, ipasig-uli ni Jehova ang iyang katawhan sa inuyonang kahimtang. Atong mabasa: “‘Sila mahimong akoa gayod,’ miingon si Jehova sa mga panon, ‘sa adlaw nga ako magpatunghag usa ka linaing katigayonan. Ug ako maluoy kanila, ingon sa usa ka tawo nga naluoy sa iyang anak nga nagaalagad kaniya.’”—Malaquias 3:17.
8. Nganong ang prinsipyo sa Malaquias 3:17 ikapadapat sa dakong panon?
8 Ang tagna ni Malaquias adunay modernong-adlaw nga katumanan maylabot sa dinihogan-sa-espiritu nga mga Kristohanon, nga maoy naglangkob sa espirituwal nga nasod sa 144,000. Kanang nasora mao gayoy “linaing katigayonan,” o “katawhan alang sa linaing pagpanag-iya,” ni Jehova. (1 Pedro 2:9) Ang tagna ni Malaquias makapadasig usab sa “dakong panon,” nga “nagbarog atubangan sa trono ug atubangan sa Kordero, nga nagsul-ob ug maputing tag-as nga mga besti.” (Pinadayag 7:4, 9) Sila mahimong usa ka panon uban sa mga dinihogan, ilalom sa usa ka Magbalantay, si Jesu-Kristo.—Juan 10:16.
9. Nganong ang katawhan ni Jehova “usa ka linaing katigayonan” alang kaniya?
9 Sa unsang paagi gilantaw ni Jehova kadtong mopili sa pag-alagad kaniya? Sumala sa giingon sa Malaquias 3:17, siya naglantaw kanila sa paagi nga ang usa ka mahigugmaong amahan naglantaw sa iyang anak. Ug matikdi ang mainitong paagi nga gihubit niya ang iyang katawhan—“usa ka linaing katigayonan.” Ang ubang mga hubad nagbadbad nianang mga pulonga ingong “akoa mismo,” “akong labing bililhong kabtangan,” ug “akong mga mutya.” Nganong lantawon man ni Jehova kadtong nag-alagad kaniya nga ingon niana ka linain o espesyal? Ang usa ka rason mao nga siya usa ka mapabilhong Diyos. (Hebreohanon 6:10) Siya makigsuod niadtong kinasingkasing nga nag-alagad kaniya ug lantawon niya sila ingong linain o espesyal.
10. Sa unsang paagi si Jehova nanalipod sa iyang katawhan?
10 Makahunahuna ka ba ug usa ka bililhong kabtangan nga imong giisip ingong linaing katigayonan? Dili ka ba maningkamot sa pagpanalipod niana? Mao usab kanay gibuhat ni Jehova sa iyang “linaing katigayonan.” Tinuod, dili niya panalipdan ang iyang katawhan batok sa tanang pagsulay ug mga trahedya sa kinabuhi. (Ecclesiastes 9:11) Apan si Jehova makapanalipod ug manalipod sa iyang matinumanong mga alagad sa espirituwal nga paagi. Siya naghatag kanila sa kusog nga ilang gikinahanglan aron makaantos sa bisan unsang pagsulay. (1 Corinto 10:13) Busa, gisultian ni Moises ang karaang katawhan sa Diyos, ang mga Israelinhon: “Magmaisogon ug magmakusganon kamo. . . . Si Jehova nga imong Diyos mao ang magauban kanimo. Dili ka niya talikdan ni biyaan sa bug-os.” (Deuteronomio 31:6) Si Jehova nagabuhat ug maayo sa iyang katawhan. Alang kaniya, sila maoy “linaing katigayonan.”
Si Jehova ang “Tigganti”
11, 12. Sa unsang paagi ang pagpabili sa papel ni Jehova ingong atong Tigganti motabang kanato sa pagpakigbisog sa mga pagduhaduha?
11 Ang laing pamatuod nga gipabilhan ni Jehova ang iyang mga alagad mao nga siya nagaganti kanila. Giingnan niya ang mga Israelinhon: “‘Sulayi ako, palihog, niining bahina,’ miingon si Jehova sa mga panon, ‘kon dili ko ba buksan nganha kaninyo ang mga ganghaan sa tubig sa kalangitan ug magbubo nganha kaninyo sa panalangin hangtod nga wala nay panginahanglan.’” (Malaquias 3:10) Siyempre, sa ngadtongadto pagagantihan ni Jehova ang iyang mga alagad ug kinabuhing walay kataposan. (Juan 5:24; Pinadayag 21:4) Kining bililhon kaayong ganti nagpadayag sa gidak-on sa gugma ug pagkamanggihatagon ni Jehova. Nagpakita usab kini nga siya tinuod nga nagpabili niadtong mopili sa pag-alagad kaniya. Ang pagkakat-on sa paglantaw kang Jehova ingong manggihatagong Tigganti makatabang kanato sa pagpakigbisog sa bisan unsang mga pagduhaduha bahin sa atong baroganan atubangan sa Diyos. Sa pagkatinuod, giawhag kita ni Jehova sa paglantaw kaniya ingong usa ka Tigganti! Si Pablo misulat: “Siya nga moduol sa Diyos angay nga motuo nga siya mao ug nga siya maoy tigganti sa mga matinuorong nagapangita kaniya.”—Hebreohanon 11:6.
12 Siyempre, kita moalagad kang Jehova tungod kay kita nahigugma kaniya—dili lamang tungod kay siya nagsaad nga kita iyang gantihan. Bisan pa niana, ang pagpaabot ug usa ka ganti dili daotan o hinakog. (Colosas 3:23, 24) Tungod sa iyang gugma alang kanila ug sa iyang pagpabili kanila, si Jehova mao ang mihimo sa unang lakang ug nagganti niadtong tim-os nga nagapangita kaniya.
13. Nganong ang kahikayan sa lukat mao ang kinadak-ang ebidensiya sa gugma ni Jehova alang kanato?
13 Ang kinadak-ang ebidensiya nga ang mga tawo bililhon sa panglantaw ni Jehova mao ang kahikayan sa lukat. Si apostol Juan misulat: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Ang kahikayan sa halad lukat ni Jesu-Kristo kasukwahi sa ideya nga kita walay-bili o dili-hiligugmaon sa mga mata ni Jehova. Sa pagkatinuod, kon si Jehova nagbayad ug mahal kaayo alang kanato—nga naghalad sa iyang bugtong Anak—segurado gayod nga kita iyang gihigugma pag-ayo.
14. Unsay nagpakita kon unsay panglantaw ni Pablo sa lukat?
14 Busa, kon motungha ang negatibong mga pagbati, palandonga ang lukat. Oo, lantawa kini ingong gasa ni Jehova para kanimo. Mao kanay gibuhat ni apostol Pablo. Hinumdomi nga miingon siya: “Alaot ako nga tawo!” Apan unya mipadayon siya sa pag-ingon: “Salamat sa Diyos pinaagi kang Jesu-Kristo nga atong Ginoo,” kinsa, matod ni Pablo, “nahigugma kanako ug nagtugyan sa iyang kaugalingon alang kanako.” (Roma 7:24, 25; Galacia 2:20) Sa pagsulti niini, si Pablo wala magpaimportante sa kaugalingon. Siya may pagsalig lamang nga siya gipabilhan ni Jehova ingong indibiduwal. Sama kang Pablo, ikaw usab angayng makakat-on sa paglantaw sa lukat ingong gasa sa Diyos para kanimo. Si Jehova dili lamang usa ka gamhanan nga Manluluwas kondili usa usab ka mahigugmaong Tigganti.
Pagbantay sa “Malipatlipatong Kaugdahan” sa Yawa
15-17. (a) Sa unsang paagi pahimuslan sa Yawa ang negatibong mga pagbati? (b) Unsang pagdasig ang atong mabatonan gikan sa eksperyensiya ni Job?
15 Bisan pa niana, malisdan ka tingali sa pagtuo nga ang inspiradong mga paghupay nga makaplagan diha sa Pulong sa Diyos mapadapat gayod kanimo. Bation tingali nimo nga ang ganti nga mabuhi sa walay kataposan sa bag-ong kalibotan sa Diyos maoy usa ka ganti nga makab-ot sa uban, apan ikaw dili gayod takos niana. Kon mao kiniy imong gibati, unsay imong mahimo?
16 Sa walay duhaduha sinati ka sa tambag ni Pablo ngadto sa mga taga-Efeso: “Isul-ob ang kompletong armadura gikan sa Diyos aron kamo makabarog nga malig-on batok sa mga malipatlipatong kaugdahan sa Yawa.” (Efeso 6:11) Sa dihang atong hunahunaon ang mga pamaagi ni Satanas sa paglit-ag sa mga tawo, lagmit nga ang materyalismo ug imoralidad maoy mosantop dayon sa atong hunahuna ug husto kana. Kining maong mga tentasyon nakalit-ag sa daghang katawhan sa Diyos kaniadto ug karon. Apan, dili nato angayng kalimtan ang laing malipatlipatong kaugdahan ni Satanas—ang iyang paningkamot nga patuohon ang mga tawo nga sila wala higugmaa ni Jehova nga Diyos.
17 Ang Yawa batid kaayo sa pagpahimulos sa maong pagbati sa iyang paningkamot nga mapatalikod niya ang mga tawo gikan sa Diyos. Hinumdomi ang giingon ni Bildad kang Job: “Unsaon man pagkahusto sa may-kamatayong tawo atubangan sa Diyos, o unsaon man pagkahinlo niya nga gipakatawo sa usa ka babaye? Tan-awa! Anaa gani ang bulan, ug kana dili hayag; ug ang mga bituon dili mahinlo sa iyang mga mata. Unsa pa kaha ang may-kamatayong tawo, nga usa ka ulod, ug ang anak sa tawo, nga usa ka ulod!” (Job 25:4-6; Juan 8:44) Mahanduraw ba nimo kon unsa ka makapaluya sa buot ang maong mga pulong? Busa ayaw tugoti si Satanas sa pagpaluya kanimo. Sa laing bahin, pagbantay sa mga laraw ni Satanas aron makabaton kag kaisog ug kalig-on sa pagpakigbisog pag-ayo sa pagbuhat kon unsay matarong. (2 Corinto 2:11) Bahin kang Job, bisan tuod kinahanglan siyang tul-iron, gigantihan ni Jehova ang iyang pagkamalahutayon pinaagi sa pagpasig-uli ngadto kaniya ug duha ka pilo sa tanan nga nawala kaniya.—Job 42:10.
Si Jehova “Mas Labaw kay sa Atong mga Kasingkasing”
18, 19. Sa unsang paagi ang Diyos “mas labaw kay sa atong mga kasingkasing,” ug sa unsang paagi siya “nahibalo sa tanang butang”?
18 Tinuod, lisod buntogon ang kaluya sa buot kon kini nakagamot na pag-ayo. Bisan pa niana, ang espiritu ni Jehova makatabang kanimo sa pagpadayon sa pagpukan sa “lig-ong pagkatarok nga mga butang . . . nga gibangon batok sa kahibalo sa Diyos.” (2 Corinto 10:4, 5) Sa dihang daw malumsan ka na sa negatibong mga hunahuna, palandonga ang giingon ni apostol Juan: “Pinaagi niini kita mahibalo nga kita nagagikan sa kamatuoran, ug makapasalig kita sa atong mga kasingkasing sa iyang atubangan bahin sa bisan unsa nga ihukom kanato sa atong mga kasingkasing, tungod kay ang Diyos mas labaw kay sa atong mga kasingkasing ug nahibalo sa tanang butang.”—1 Juan 3:19, 20.
19 Unsay gipasabot sa mga pulong “ang Diyos mas labaw kay sa atong mga kasingkasing”? Usahay, hukman kita sa atong kasingkasing, ilabina sa dihang maamgohan gayod nato ang atong mga kahuyangon ug mga kasal-anan. O tingali tungod sa atong naagian, kita mokiling gayod sa paghunahunag negatibong mga butang bahin sa atong kaugalingon, nga daw wala kitay mahimo nga dalawaton ni Jehova. Ang giingon ni apostol Juan magpasalig kanato nga si Jehova mas labaw kay niana! Dili lang ang atong mga kasaypanan ang iyang makita kondili makita usab niya ang atong natagong mga katakos. Nahibalo usab siya sa atong mga motibo ug mga tumong. Si David misulat: “Siya nahibalo pag-ayo sa atong pagkaumol, nga nahinumdom nga kita abog.” (Salmo 103:14) Oo, si Jehova mas nakaila kanato kay sa atong pagkaila sa atong kaugalingon!
“Usa ka Matahom nga Purongpurong” ug “Usa ka Harianong Purong”
20. Unsay gibutyag sa tagna ni Isaias bahin sa pagpasig-uli sa Israel mahitungod sa panglantaw ni Jehova sa iyang mga alagad?
20 Pinaagi kang manalagnang Isaias, gihatagan ni Jehova ang iyang karaang katawhan sa paglaom nga mapasig-uli. Sa dihang nadestiyero sila sa Babilonya, kining maong paghupay ug pasalig mao gayoy gikinahanglan niining mga tawo nga nawad-an nag paglaom! Naglantaw sa umaabot nga panahon sa dihang sila mapasig-uli na sa ilang yutang natawhan, si Jehova miingon: “Ikaw mahimo gayod nga usa ka matahom nga purongpurong diha sa kamot ni Jehova, ug usa ka harianong purong diha sa palad sa imong Diyos.” (Isaias 62:3) Pinaagi niining mga pulonga, gihatagan ni Jehova ang iyang katawhan ug dignidad ug katahom. Gihimo usab niya kana sa iyang nasod sa espirituwal nga Israel karon. Sama ra nga gibayaw niya sila aron dayegon sa tanan.
21. Sa unsang paagi makasalig ka nga gantihan ni Jehova ang imong matinumanong paglahutay?
21 Bisan tuod kining tagnaa sa panguna natuman diha sa mga dinihogan, kini nagpakita sa dignidad nga gihatag ni Jehova sa tanan nga nag-alagad kaniya. Busa, sa dihang ikaw hasolon sa mga pagduhaduha, hinumdomi nga bisan tuod ikaw dili hingpit, ikaw mahimong sama ka bililhon sa “usa ka matahom nga purongpurong” ug sa “usa ka harianong purong” para kang Jehova. Busa padayona ang paglipay sa iyang kasingkasing pinaagi sa pagpaningkamot gayod sa pagtuman sa iyang kabubut-on. (Proverbio 27:11) Pinaagi sa pagbuhat niana, makasalig ka nga gantihan ni Jehova ang imong matinumanong paglahutay!
[Footnote]
a Ang ubang mga ngalan giusab.
Nahinumdom Ka Ba?
• Sa unsang paagi kita “usa ka linaing katigayonan” para kang Jehova?
• Nganong hinungdanon nga lantawon nato si Jehova ingong Tigganti?
• Unsang “malipatlipatong kaugdahan” ni Satanas ang angay natong bantayan?
• Sa unsang paagi ang Diyos “mas labaw kay sa atong mga kasingkasing”?
[Mga Pangutana sa Pagtuon]
[Hulagway sa panid 26]
Pablo
[Hulagway sa panid 26]
Elias
[Hulagway sa panid 26]
Ana
[Hulagway sa panid 28]
Ang Pulong sa Diyos adunay daghang makapahupay nga mga mensahe