Ang mga Kristohanon Nagsumbalik-Silaw sa Himaya ni Jehova
Ang mga Kristohanon Nagsumbalik-Silaw sa Himaya ni Jehova
“Malipayon ang inyong mga mata tungod kay makakita man kini, ug ang inyong mga dalunggan tungod kay makabati man kini.”—MATEO 13:16.
1. Unsang pangutana ang mosantop sa hunahuna bahin sa reaksiyon sa mga Israelinhon kang Moises didto sa Bukid sa Sinai?
ANG mga Israelinhon nga nagkatigom sa Bukid sa Sinai may lig-ong hinungdan nga makigsuod kang Jehova. Sa pagkatinuod, iyang giluwas sila gikan sa Ehipto sa gamhanang paagi. Iyang gitagan-an sila sa ilang mga panginahanglan, nga gihatagan silag pagkaon ug tubig didto sa kamingawan. Dayon, iyang gihatag kanila ang kadaogan batok sa misulong nga kasundalohang Amalekanhon. (Exodo 14:26-31; 16:2–17:13) Samtang nagkampo sila sa kamingawan atbang sa Bukid sa Sinai, ang katawhan nangahadlok kaayo tungod sa mga dalugdog ug mga kilat mao nga sila nangurog. Sa ulahi, ilang nakita si Moises nga milugsong gikan sa Bukid sa Sinai, nga ang iyang nawong misilaw sa himaya ni Jehova. Bisan pa niadto, inay mahingangha ug ilhon ang himaya ni Jehova, sila nanibog. “Sila nangahadlok sa pagduol [kang Moises].” (Exodo 19:10-19; 34:30) Nganong nangahadlok man sila sa pagkakita sa sumbalik-silaw sa himaya ni Jehova, nga siya dako man kaayog nahimo alang kanila?
2. Nganong ang mga Israelinhon nangahadlok sa pagkakita sa silaw sa himaya sa Diyos nga gisumbalik-silaw diha sa nawong ni Moises?
2 Lagmit gayod, ang mga Israelinhon nangahadlok kaayo tungod sa nahitabo dili pa dugay. Sa dihang tinuyo silang misupak kang Jehova pinaagi sa paggama ug bulawan nga nating baka, iyang gidisiplina sila. (Exodo 32:4, 35) Sila ba nakakat-on sa pagdisiplina ni Jehova kanila ug nagpasalamat tungod niadto? Wala gayod, ang kadaghanan wala makakat-on. Sa hinapos sa iyang kinabuhi, gihinumdoman ni Moises ang panghitabo bahin sa bulawan nga nating baka ug ang ubang mga higayon nga ang mga Israelinhon wala magmasinugtanon. Siya miingon sa katawhan: “Kamo nagmasuklanon sa sugo ni Jehova nga inyong Diyos, ug kamo wala magpasundayag ug pagtuo kaniya ug wala mamati sa iyang tingog. Nagmasuklanon kamo kang Jehova sukad sa adlaw sa akong pagkaila kaninyo.”—Deuteronomio 9:15-24.
3. Unsay gihimo ni Moises bahin sa pagtaptap sa iyang nawong?
3 Tagda kon unsay sanong ni Moises sa kahadlok nga gipadayag sa mga Israelinhon. Ang asoy mabasa: “Sa dihang si Moises mahuman na sa pagpakigsulti kanila, siya magbutang ug taptap sa iyang nawong. Apan sa dihang mosulod si Moises [sa tabernakulo] atubangan ni Jehova aron makigsulti kaniya, iyang kuhaon ang taptap hangtod sa iyang paggula. Ug siya migula ug misulti sa mga anak sa Israel kon unsay gisugo kaniya. Ug nakita sa mga anak sa Israel ang nawong ni Moises, nga ang panit sa nawong ni Moises misilaw; ug gibutang ug balik ni Moises sa iyang nawong ang taptap hangtod nga siya misulod sa pagpakigsulti [kang Jehova].” (Exodo 34:33-35) Nganong may mga higayong gitaptapan ni Moises ang iyang nawong? Unsay atong makat-onan gikan niini? Ang mga tubag niining mga pangutanaha makatabang kanato sa pagtimbangtimbang sa atong kaugalingong relasyon kang Jehova.
Wala Mapahimusli nga Kahigayonan
4. Unsang kahulogan ang gibutyag ni apostol Pablo bahin sa pagbutang ni Moises ug taptap?
4 Gipatin-aw ni apostol Pablo nga ang pagbutang ni Moises ug taptap may kalangkitan sa kahimtang sa mga hunahuna ug kasingkasing sa mga Israelinhon. Si Pablo misulat: “Ang mga anak sa Israel dili makasud-ong sa nawong ni Moises tungod sa himaya sa iyang nawong . . . Ang ilang gahom sa pangisip nahabol.” (2 Corinto 3:7, 14) Pagkamakapasubo nga kahimtang! Ang mga Israelinhon maoy pinili nga katawhan ni Jehova, ug buot niyang sila makigsuod kaniya. (Exodo 19:4-6) Bisan pa niana, nag-ukon-ukon sila sa pagsud-ong sa aninag sa himaya sa Diyos. Inay ikiling ang ilang mga kasingkasing ug mga hunahuna kang Jehova diha sa mahigugmaong debosyon, sa usa ka diwa sila mitalikod kaniya.
5, 6. (a) Sa unsang paagi magkaamgid ang mga Hudiyo sa unang siglo ug ang mga Israelinhon sa adlaw ni Moises? (b) Unsay kalainan tali sa mga namati kang Jesus ug sa mga wala mamati kaniya?
5 Makita nato ang kaamgid niini sa unang siglo K.P. Sa panahong si Pablo nakabig sa Kristiyanidad, ang pakigsaad sa Balaod gipulihan nag bag-ong pakigsaad, nga gipataliwad-an ni Jesu-Kristo, ang Mas Dakong Moises. Sa pulong ug sa buhat, hingpit nga gisumbalik-silaw ni Jesus ang himaya ni Jehova. Si Pablo misulat mahitungod sa nabanhaw nga si Jesus: “Siya ang aninag sa . . . himaya [sa Diyos] ug ang tukma nga larawan sa iyang pagkamao.” (Hebreohanon 1:3) Pagkatalagsaon ang kahigayonang nabatonan sa mga Hudiyo! Sila makapamati sa mga pulong mahitungod sa kinabuhing walay kataposan gikan sa Anak sa Diyos mismo! Ikasubo, wala mamati ang kadaghanan sa mga giwalihan ni Jesus. Mahitungod kanila, si Jesus mikutlo sa tagna ni Jehova pinaagi ni Isaias: “Ang kasingkasing niini nga katawhan nahimong dili-madinawaton, ug pinaagi sa ilang mga dalunggan sila nakadungog nga walay pagsanong, ug ilang gipiyong ang ilang mga mata; aron dili gayod sila makakita pinaagi sa ilang mga mata ug makabati pinaagi sa ilang mga dalunggan ug makasabot sa diwa niini pinaagi sa ilang mga kasingkasing ug makabalik, ug ayohon ko sila.”—Mateo 13:15; Isaias 6:9, 10.
6 Dayag kaayo ang kalainan tali sa mga Hudiyo ug sa mga tinun-an ni Jesus, nga bahin kanila si Jesus miingon: “Malipayon ang inyong mga mata tungod kay makakita man kini, ug ang inyong mga dalunggan tungod kay makabati man kini.” (Mateo 13:16) Ang matuod nga mga Kristohanon nangandoy nga mahibalo bahin kang Jehova ug mag-alagad kaniya. Nagakalipay sila sa pagtuman sa iyang kabubut-on, ingon nga gipadayag kini diha sa mga panid sa Bibliya. Ingon nga sangpotanan, ang dinihogang mga Kristohanon nagsumbalik-silaw sa himaya ni Jehova diha sa ilang ministeryo sa bag-ong pakigsaad, ug ang ubang mga karnero susamang nagbuhat niana.—2 Corinto 3:6, 18.
Kon Nganong Tinaptapan ang Maayong Balita
7. Nganong dili kita matingala nga ang kadaghanang tawo mosalikway sa maayong balita?
7 Sumala sa atong nasabtan, ang kadaghanang Israelinhon sa adlaw ni Jesus ug sa adlaw ni Moises nagsalikway sa talagsaong kahigayonan nga gibuksan alang kanila. Susama usab sa atong panahon. Ang kadaghanang tawo mosalikway sa maayong balita nga atong ginasangyaw. Dili kita matingala niini. Si Pablo misulat: “Kon, karon, ang maayong balita nga among ginapahayag sa pagkatinuod gitaptapan man, kini gitaptapan taliwala niadtong nagakalaglag, taliwala kanilang ang diyos niini nga sistema sa mga butang nagbuta sa mga hunahuna sa mga dili-magtutuo.” (2 Corinto 4:3, 4) Gawas pa sa pagpaningkamot ni Satanas nga itago ang maayong balita, gitaptapan sa daghang tawo ang ilang mga nawong tungod kay dili sila gustong makakita.
8. Sa unsang paagi nabutaan ang daghang tawo tungod sa kawalay-alamag bahin sa Diyos, ug sa unsang paagi makalikay kita nga susamang maapektohan?
8 Nabutaan ang masambingayong mga mata sa daghang tawo tungod kay wala silay alamag bahin sa Diyos. Ang Bibliya naghisgot nga ang kanasoran “anaa sa kangitngit sa kaisipan, ug nahimulag sa kinabuhi nga iya sa Diyos, tungod sa kawalay-alamag nga anaa kanila.” (Efeso 4:18) Sa wala pa ma-Kristohanon, si Pablo, nga usa ka tawong batid sa Balaod, nabutaan kaayo tungod sa kawalay-alamag mao nga iyang gilutos ang kongregasyon sa Diyos. (1 Corinto 15:9) Bisan pa niana, gipadayag ni Jehova ang kamatuoran kaniya. Nagpatin-aw si Pablo: “Ang hinungdan kon nganong ako gipakitaag kaluoy mao nga pinaagi kanako ingong kinalabwang pananglitan si Kristo Jesus makapasundayag sa tanan niyang hataas-nga-pailob ingong usa ka sanglitanan niadtong magabutang sa ilang pagtuo kaniya alang sa kinabuhing walay kataposan.” (1 Timoteo 1:16) Sama kang Pablo, daghan nga misupak kaniadto sa kamatuoran sa Diyos nag-alagad na karon Kaniya. Usa kini ka maayong katarongan sa pagpadayon sa pagsangyaw bisan sa mga tawo nga mosupak kanato. Kasamtangan, pinaagi sa regular nga pagtuon sa Pulong sa Diyos ug pagsabot niini, kita mapanalipdan batok sa pagbuhat ug daotang mga butang gumikan sa kawalay-alamag nga makapasuko kang Jehova.
9, 10. (a) Sa unsang paagi gipakita sa mga Hudiyo sa unang siglo nga dili nila gustong makakat-on ug ang ilang mga opinyon dili matarog? (b) Aduna bay susamang butang diha sa Kakristiyanohan karon? Ipatin-aw.
9 Daghan ang dili makasabot nga tin-aw sa espirituwal nga mga butang tungod kay sila dili magpatudlo ug ang ilang mga opinyon dili matarog. Daghang Hudiyo ang nagsalikway kang Jesus ug sa iyang mga pagtulon-an tungod kay sila estriktong nagsunod sa Moisesnong Balaod. Hinuon, may mga eksepsiyon. Pananglitan, human mabanhaw si Jesus, “usa ka dakong panon sa mga saserdote ang nagpasakop sa pagtuo.” (Buhat 6:7) Bisan pa niana, mahitungod sa kinabag-ang mga Hudiyo, si Pablo misulat: “Hangtod karong adlawa sa dihang ang mga basahon ni Moises ginabasa, usa ka taptap ang nahimutang sa ilang mga kasingkasing.” (2 Corinto 3:15) Lagmit nahibalo si Pablo sa gisulti ni Jesus kanhi ngadto sa mga Hudiyong relihiyosong pangulo: “Kamo nagasusi sa mga Kasulatan, tungod kay kamo nagahunahuna nga pinaagi niini kamo makabaton ug kinabuhing walay kataposan; ug kini mismo ang nagapamatuod bahin kanako.” (Juan 5:39) Ang Kasulatan nga ilang gisusi pag-ayo angay untang nakatabang kanila sa pagsabot nga si Jesus mao ang Mesiyas. Ugaling lang, ang mga Hudiyo may kaugalingong mga panghunahuna, ug bisan ang Anak sa Diyos nga naghimog mga milagro wala makadani kanila.
10 Tinuod usab kana sa daghan diha sa Kakristiyanohan karon. Sama sa mga Hudiyo sa unang siglo, “sila may kasibot sa Diyos; apan dili sumala sa tukmang kahibalo.” (Roma 10:2) Bisan pag ang pipila nagtuon sa Bibliya, dili nila gustong motuo kon unsay ginaingon niini. Dili sila motuo nga si Jehova nagtudlo sa iyang katawhan pinaagi sa iyang matinumanon ug maalamong ulipon nga matang nga gilangkoban sa dinihogang mga Kristohanon. (Mateo 24:45) Apan kita nakasabot nga si Jehova nagtudlo sa iyang katawhan ug ang pagsabot sa kamatuoran sa Diyos kanunayng nag-uswag. (Proverbio 4:18) Tungod kay kita nagpatudlo kang Jehova, gihatagan kitag kahibalo bahin sa iyang kabubut-on ug katuyoan.
11. Nganong ang kamatuoran wala masabti sa mga tawo nga motuo lamang kon unsay gusto nilang tuohan?
11 Ang uban nabutaan tungod kay motuo lamang sila kon unsay gusto nilang tuohan. Gitagna nga ang pipila magbiaybiay sa katawhan sa Diyos ug sa mensahe nga ilang gimantala mahitungod sa presensiya ni Jesus. Si apostol Pedro misulat: “Sumala sa ilang gitinguha, sila wala makamatikod niining butanga,” nga gipalunopan sa Diyos ang kalibotan sa panahon ni Noe. (2 Pedro 3:3-6) Sa susama, daghan nga nag-angkong mga Kristohanon daling moila nga si Jehova magpasundayag ug kaluoy, kalulot, ug pagpasaylo; apan dili nila tagdon o isalikway nila ang kamatuoran nga siya magpahamtang ug silot. (Exodo 34:6, 7) Ang matuod nga mga Kristohanon maningkamot pag-ayo sa pagsabot kon unsay tinuod nga gitudlo sa Bibliya.
12. Sa unsang paagi nabutaan ang mga tawo tungod sa tradisyon?
12 Ang daghang maninimba nabutaan tungod sa tradisyon. Si Jesus miingon ngadto sa relihiyosong mga pangulo sa iyang adlaw: “Gihimo ninyo nga walay pulos ang pulong sa Diyos tungod sa inyong tradisyon.” (Mateo 15:6) Masibotong gipasig-uli sa mga Hudiyo ang maputling pagsimba sa ilang pagbalik gikan sa pagkadestiyero sa Babilonya, apan ang mga saserdote nahimong hambogiro ug nagpakamatarong sa kaugalingon. Ang relihiyosong mga pista nahimong pormalistiko, nga walay tinuod nga pagkamasimbahon sa Diyos. (Malaquias 1:6-8) Sa panahon ni Jesus, gidugangan sa mga eskriba ug sa mga Pariseo ang Moisesnong Balaod ug di-maihap nga mga tradisyon. Giyagyag ni Jesus nga sila mga salingkapaw tungod kay wala sila makasabot sa matarong nga mga prinsipyo nga maoy pasikaranan sa Balaod. (Mateo 23:23, 24) Angayng dili tugotan sa matuod nga mga Kristohanon nga sila motalikod sa matuod nga pagsimba tungod sa relihiyosong mga tradisyon nga ginama sa tawo.
“Nakakita sa Usa nga Dili-Makita”
13. Sa unsang duha ka paagi nga nakita ni Moises ang himaya sa Diyos?
13 Mihangyo si Moises nga motan-aw sa himaya sa Diyos didto sa bukid, ug iyang nakita ang dan-ag sa himaya ni Jehova. Sa dihang misulod siya sa tabernakulo, wala siya magbutang ug taptap. Si Moises maoy tawo nga may dakong pagtuo nga gustong mobuhat sa kabubut-on sa Diyos. Bisan pag nakapribilehiyo siya sa pagkakita sa himaya ni Jehova diha sa panan-awon, sa usa ka diwa siya nakakita na sa Diyos pinaagi sa mga mata sa pagtuo. Ang Bibliya nag-ingon nga si Moises “nagpabiling lig-on nga daw nakakita sa Usa nga dili-makita.” (Hebreohanon 11:27; Exodo 34:5-7) Ug iyang gisumbalik-silaw ang himaya sa Diyos dili lang pinaagi sa mga silaw nga midan-ag sa iyang nawong sa usa ka higayon kondili pinaagi usab sa iyang mga paningkamot nga tabangan ang mga Israelinhon nga mahibalo bahin kang Jehova ug mag-alagad kaniya.
14. Sa unsang paagi nakita ni Jesus ang himaya sa Diyos, ug unsay iyang gikalipayan sa pagbuhat?
14 Sa langit, si Jesus direktang nakakita sa himaya sa Diyos sa hataas kaayong panahon, sukad sa wala pa gani malalang ang uniberso. (Proverbio 8:22, 30) Nianang tanang panahon, naugmad ni Jehova nga Diyos ug ni Jesus ang dulot nga gugma ug pagmahal sa usag usa. Gipahayag ni Jehova nga Diyos ang labing malumong gugma ug pagmahal alang sa maong panganay sa tanang linalang. Mibalos si Jesus sa pagpahayag sa iyang lalom nga gugma ug pagmahal alang sa Diyos nga maoy naghatag sa iyang kinabuhi. (Juan 14:31; 17:24) Ang gugma sa Amahan ug Anak maoy hingpit nga gugma. Si Jesus, sama kang Moises, nalipay sa pagsumbalik-silaw sa himaya ni Jehova diha sa iyang mga pagpanudlo.
15. Sa unsang paagi pamalandongon sa mga Kristohanon ang himaya sa Diyos?
15 Sama kang Moises ug kang Jesus, ang mga Saksi sa Diyos karong adlawa dinhi sa yuta maikagon sa pagpamalandong sa himaya ni Jehova. Wala nila isalikway ang mahimayaong maayong balita. Si apostol Pablo misulat: “Sa dihang modangop kang Jehova [aron buhaton ang iyang kabubut-on], ang taptap pagakuhaon.” (2 Corinto 3:16) Nagtuon kita sa Kasulatan tungod kay buot natong buhaton ang kabubut-on sa Diyos. Gidayeg nato ang himaya nga gisumbalik-silaw diha sa nawong sa Anak ug sa Hari nga gidihogan ni Jehova nga si Jesu-Kristo, ug atong gisundog ang iyang panig-ingnan. Sama kang Moises ug kang Jesus, giasayn kanato ang usa ka ministeryo, nga nagatudlo sa uban bahin sa mahimayaong Diyos nga atong ginasimba.
16. Unsang mga kaayohan ang atong nabatonan tungod sa pagkahibalo sa kamatuoran?
16 Si Jesus miampo: “Ako sa dayag nagadayeg kanimo, Amahan, . . . tungod kay gitago mo kining mga butanga gikan sa mga maalamon ug sa mga makinaadmanon ug gipadayag kini ngadto sa mga bata.” (Mateo 11:25) Tugotan ni Jehova nga ang mga tawong sinsero ug mapaubsanon sa kasingkasing makasabot sa iyang mga katuyoan ug personalidad. (1 Corinto 1:26-28) Nailalom kita sa iyang pagpanalipod ug pag-atiman, ug siya nagtudlo kanato sa pagpahimulos sa atong kaugalingon—aron bug-os natong mapahimuslan ang atong kinabuhi. Hinaot makapahimulos kita sa tanang kahigayonan nga makigsuod kang Jehova, nga makapabili sa iyang daghang tagana aron ato siyang mailhan pag-ayo.
17. Sa unsang paagi mas bug-os natong mailhan ang mga hiyas ni Jehova?
17 Si Pablo misulat sa dinihogang mga Kristohanon: “Atong ginasumbalik-silaw samag mga salamin ang himaya ni Jehova [ug] ginausab ngadto sa samang larawan gikan sa himaya ngadto sa himaya.” (2 Corinto 3:18) Bisan kon ang atong paglaom maoy langitnon o yutan-on, kon mas mailhan nato si Jehova—ang iyang mga hiyas ug personalidad ingong gipadayag diha sa Bibliya—kita mas mahisama kaniya. Kon pamalandongon nato nga mapabilhon ang kinabuhi, ministeryo, ug mga pagtulon-an ni Jesu-Kristo, mas bug-os natong ikasumbalik-silaw ang mga hiyas ni Jehova. Makalilipay gayod ang pagkahibalo nga kita nagadayeg sa atong Diyos, kansang himaya gitinguha natong isumbalik-silaw!
Nahinumdom Ka Ba?
• Nganong ang mga Israelinhon nangahadlok nga motan-aw sa himaya sa Diyos nga gisumbalik-silaw ni Moises?
• Sa unsang mga paagi ang maayong balita ‘nataptapan’ sa unang siglo? sa atong adlaw?
• Sa unsang paagi gisumbalik-silaw nato ang himaya sa Diyos?
[Mga Pangutana sa Pagtuon]
[Hulagway sa panid 19]
Ang mga Israelinhon dili makatutok sa nawong ni Moises
[Mga hulagway sa panid 21]
Sama kang Pablo, daghan nga misupak kaniadto sa kamatuoran sa Diyos nag-alagad na karon Kaniya
[Mga hulagway sa panid 23]
Ang mga alagad ni Jehova nagakalipay sa pagsumbalik-silaw sa himaya sa Diyos