Imo Bang Isumbalik-silaw ang Himaya sa Diyos?

“Atong . . . ginasumbalik-silaw samag mga salamin ang himaya ni Jehova.”—2 CORINTO 3:18.

1. Unsay nakita ni Moises, ug unsay nahitabo human niadto?

 KADTO maoy usa sa labing kahibulongang mga panan-awon nga nasinati sukad ni bisan kinsang tawo. Nga nag-inusara didto sa itaas sa Bukid sa Sinai, gitugotan si Moises sa iyang talagsaong hangyo. Gipakitaan siyag usa ka butang nga wala pay tawo nga nakakita sukad—ang himaya ni Jehova. Hinuon, si Moises wala direktang makakita kang Jehova. Ang dagway sa Diyos sulaw kaayo nga walay tawo nga makakita kaniya ug unya mabuhi pa. Hinunoa, si Jehova nagbutang sa iyang “palad” ibabaw kang Moises nga kadto nahisamag salipod hangtod nakalabay na Siya, nga dayag migamit ug usa ka manulonda isip iyang hawas. Dayon gitugotan ni Jehova nga makakita si Moises ug dan-ag sa maong pagpadayag sa himaya sa Diyos. Si Jehova nakigsulti usab kang Moises pinaagig usa ka manulonda. Gibatbat sa Bibliya kon unsay nahitabo human niadto: “Karon nahitabo sa paglugsong ni Moises gikan sa Bukid sa Sinai . . . nga ang panit sa iyang nawong misilaw tungod sa iyang pagpakigsulti [kang Jehova].”—Exodo 33:18–34:7, 29.

2. Unsay gisulat ni apostol Pablo bahin sa himaya nga gisumbalik-silaw sa mga Kristohanon?

² Handurawa nga ikaw kauban ni Moises niadtong bukira. Makapaukyab gayod unta nga makakita sa matahom nga kasilaw sa Labing Gamhanan ug makapamati sa iyang mga pulong! Pagkadungganon nga ikaw molugsong gikan sa Bukid sa Sinai kauban ni Moises, ang tigpataliwala sa pakigsaad sa Balaod! Apan, nahibalo ka ba nga sa pipila ka paagi ang matuod nga mga Kristohanon nagsumbalik-silaw sa himaya sa Diyos nga labaw pa kaayo kay sa pagsumbalik-silaw niana ni Moises? Kanang makapukaw-sa-hunahuna nga kamatuoran makaplagan diha sa usa ka sulat ni apostol Pablo. Misulat siya nga ang dinihogang mga Kristohanon ‘nagsumbalik-silaw samag mga salamin sa himaya ni Jehova.’ (2 Corinto 3:7, 8, 18) Sa usa ka diwa, ang mga Kristohanong adunay yutan-ong paglaom nagsumbalik-silaw usab sa himaya sa Diyos.

Kon sa Unsang Paagi ang mga Kristohanon Nagsumbalik-Silaw sa Himaya sa Diyos

3. Sa unsang paagi aduna kitay nahibaloan bahin kang Jehova nga wala mahibaloi ni Moises?

³ Sa unsang paagi makasumbalik-silaw kita sa himaya sa Diyos? Wala kita makakita o makadungog kang Jehova sama kang Moises. Hinuon, kita adunay nahibaloan bahin kang Jehova nga wala mahibaloi ni Moises. Si Jesus mipatim-aw ingong Mesiyas halos 1,500 ka tuig human mamatay si Moises. Busa, wala mahibalo si Moises kon sa unsang paagi natuman ang Balaod diha kang Jesus, kinsa namatay aron sa pagtubos sa mga tawo gikan sa makalilisang nga pagdaogdaog sa sala ug kamatayon. (Roma 5:20, 21; Galacia 3:19) Dugang pa, gamay rag nasabtan si Moises bahin sa kahibulongang katuyoan ni Jehova, nga nalanggikit pag-ayo sa Mesiyanikong Gingharian ug sa yutan-ong Paraiso nga ipatungha niini. Busa, kita nakakita sa himaya ni Jehova, dili pinaagi sa literal nga mga mata, kondili pinaagi sa mga mata sa pagtuo nga gipasukad sa mga pagtulon-an sa Bibliya. Dugang pa, kita nakadungog sa tingog ni Jehova, dili pinaagi sa usa ka manulonda, kondili pinaagi sa Bibliya, ilabina ang mga Ebanghelyo, nga nindot kaayong nagbatbat sa mga pagpanudlo ug ministeryo ni Jesus.

4. (a) Sa unsang paagi ang dinihogang mga Kristohanon nagsumbalik-silaw sa himaya sa Diyos? (b) Sa unsang mga paagi ikasumbalik-silaw niadtong adunay yutan-ong paglaom ang himaya sa Diyos?

⁴ Bisan pag ang mga Kristohanon wala magsumbalik-silaw sa himaya sa Diyos pinaagig mga silaw nga nagdan-ag gikan sa ilang mga nawong, ang ilang mga nawong nagdan-ag sa katahom samtang nakigsulti sila sa uban bahin sa mahimayaong personalidad ug mga katuyoan ni Jehova. Mahitungod sa atong panahon, ang manalagnang si Isaias mitagna nga ang katawhan sa Diyos “tinong mosaysay  bahin sa himaya [ni Jehova] taliwala sa kanasoran.” (Isaias 66:19) Dugang pa, sa 2 Corinto 4:1, 2, atong mabasa: “Sanglit nakabaton man kami niini nga ministeryo . . . , kami mibiya na sa sinuwitik nga mga butang nga angayng ikaulaw, nga wala magalakaw pinaagig lipatlipat, ni nagasambog sa pulong sa Diyos, kondili pinaagi sa pagpadayag sa kamatuoran nagarekomendar sa among kaugalingon ngadto sa matag tawhanong tanlag diha sa atubangan sa Diyos.” Si Pablo naghisgot ilabina bahin sa dinihogang mga Kristohanon, kinsa maoy “mga ministro sa usa ka bag-ong pakigsaad.” (2 Corinto 3:6) Apan ang ilang ministeryo may epekto diha sa di-maihap nga mga tawong naglaom nga mabuhing walay kataposan sa yuta. Nalakip sa ministeryo sa maong duha ka grupo ang pagsumbalik-silaw sa himaya ni Jehova diha sa ilang pagpanudlo ug diha usab sa ilang mga binuhatan. Atong responsabilidad ug kadungganan ang pagsumbalik-silaw sa himaya sa Labing Hataas nga Diyos!

5. Unsay gipamatud-an sa atong espirituwal nga kauswagan?

⁵ Karong adlawa, ang mahimayaong maayong balita sa Gingharian sa Diyos ginawali sa tibuok pinuy-anang yuta, sumala sa gitagna ni Jesus. (Mateo 24:14) Ang mga tawo gikan sa tanang kanasoran, tribo, katawhan, ug pinulongan madasigong nagdawat sa maayong balita ug nagbag-o sa ilang kinabuhi aron buhaton ang kabubut-on sa Diyos. (Roma 12:2; Pinadayag 7:9) Sama sa unang mga Kristohanon, dili sila makahunong sa pagsulti bahin sa mga butang nga ilang nakita ug nadungog. (Buhat 4:20) Kapig unom ka milyong tawo, nga labaw kay sukad masukad sa kasaysayan sa tawo, nagsumbalik-silaw sa himaya sa Diyos karon. Apil ka ba kanila? Ang espirituwal nga kauswagan sa katawhan sa Diyos maoy lig-ong pamatuod nga sila gipanalanginan ug gipanalipdan ni Jehova. Labi pang dayag nga ang espiritu ni Jehova ania kanato sanglit adunay gamhanang mga puwersa nga nakigbatok kanato. Tan-awon nato kon nganong tinuod kini.

Dili Mapahilom ang Katawhan sa Diyos

6. Nganong gikinahanglan ang pagtuo ug kaisog aron makabarog dapig kang Jehova?

⁶ Pananglit kon kuhaon kang saksi sa hukmanan batok sa usa ka mangtas nga kriminal. Ikaw nahibalo nga ang maong kriminal adunay gamhanang organisasyon ug gamiton niya ang tanang paagi aron mapugngan ka sa pagyagyag kaniya. Aron makasaksi ka batok sa maong kriminal, kinahanglan ang kaisog ug pagsalig nga ang mga awtoridad manalipod kanimo batok kaniya. Susama ang atong kahimtang. Sa pagsaksi bahin kang Jehova ug sa iyang mga katuyoan, kita nagsaksi batok kang Satanas nga Yawa, nga nagyagyag kaniya ingong usa ka mamumuno ug bakakon nga nagpahisalaag sa tibuok pinuy-anang yuta. (Juan 8:44; Pinadayag 12:9) Nagkinahanglan kag pagtuo ug kaisog aron makabarog dapig kang Jehova ug batok sa Yawa.

7. Unsa ka dako ang impluwensiya ni Satanas, ug unsay iyang gipaningkamotan sa pagbuhat?

⁷ Siyempre, si Jehova mao ang Supremo. Ang iyang gahom labaw kaayo kay sa kang Satanas. Makasalig kita nga si Jehova makahimo ug maikagon sa pagpanalipod kanato samtang kita maunongong nag-alagad kaniya. (2 Cronicas 16:9) Bisan pa niana, si Satanas maoy magmamando sa mga demonyo ug sa kalibotan nga nahimulag sa Diyos. (Mateo 12:24, 26; Juan 14:30) Kay dili na makagawas sa silinganan sa yuta ug nahupong sa “dakong kasuko,” si Satanas grabeng nagasupak sa mga alagad ni Jehova ug nagagamit sa kalibotan nga iyang gigamhan sa pagpaningkamot nga pahilomon ang tanan nga nagwali sa maayong balita. (Pinadayag 12:7-9, 12, 17) Sa unsang paagi iyang gibuhat kini? Sa labing menos tulo ka paagi.

8, 9. Sa unsang paagi gigamit ni Satanas ang sayop nga paghigugma, ug nganong kinahanglan kitang mag-amping sa atong pagpilig mga kauban?

 ⁸ Ang usa ka paagi nga si Satanas naningkamot sa pagtugaw kanato maoy pinaagi sa mga kabalaka sa kinabuhi. Ang mga tawo niining kataposang mga adlaw maoy mahigugmaon sa salapi, mahigugmaon sa ilang kaugalingon, ug mahigugmaon sa kalipayan. Dili sila mahigugmaon sa Diyos. (2 Timoteo 3:1-4) Kay nalinga kaayo sa adlaw-adlaw nga kalihokan sa kinabuhi, ang kadaghanang tawo ‘wala magtagad’ sa maayong balita nga atong gidala kanila. Sila dili gayod interesadong mahibalo sa kamatuoran sa Bibliya. (Mateo 24:37-39) Ang maong tinamdan makatakod, nga maghimo kanatong dili na matinagdanon sa espirituwal nga mga butang. Kon atong tugotan nga maugmad diha kanato ang paghigugma sa materyal nga mga butang ug mga kalipayan sa kinabuhi, ang atong gugma sa Diyos mabugnaw.—Mateo 24:12.

⁹ Tungod niana, ang mga Kristohanon kinahanglang mag-amping sa pagpili sa ilang mga kauban. “Siya nga nagalakaw uban sa mga tawong maalamon mahimong maalamon,” misulat si Haring Solomon, “apan siya nga may pakiglabot sa mga hungog mahisugamak sa kadaot.” (Proverbio 13:20) Hinaot kita ‘maglakaw’ uban sa mga nagsumbalik-silaw sa himaya sa Diyos. Kahimut-anan gayod ang pagbuhat niana! Samtang makig-uban sa atong espirituwal nga mga igsoon diha sa atong mga panagkatigom ug sa ubang mga higayon, kita madasig sa ilang gugma, ilang pagtuo, ilang kalipay, ug ilang kaalam. Ang maong kahimut-anang pagpakig-uban makapalig-on sa atong determinasyon nga molahutay sa atong ministeryo.

10. Sa unsang mga paagi gigamit ni Satanas ang pagbiaybiay batok sa mga nagsumbalik-silaw sa himaya sa Diyos?

¹⁰ Ang ikaduhang paagi nga si Satanas naningkamot sa pagpugong sa tanang Kristohanon sa pagsumbalik-silaw sa himaya sa Diyos maoy pinaagi sa pagbiaybiay. Kinahanglang dili kita matingala sa maong taktika. Panahon sa iyang ministeryo sa yuta, si Jesu-Kristo gibiaybiay—gikataw-an, giyam-iran, gibugalbugalan, gipasipad-an, ug gilud-an pa gani. (Marcos 5:40; Lucas 16:14; 18:32) Ang unang mga Kristohanon gibiaybiay usab. (Buhat 2:13; 17:32) Ang mga alagad ni Jehova karong mga adlawa nagsagubang ug susamang pag-abuso. Ngani, sumala kang apostol Pedro, nganlan silag “mini nga mga manalagna.” “Sa kataposang mga adlaw,” mitagna si Pedro, “adunay mangabot nga mga mabiaybiayon uban sa ilang mga pagbiaybiay, nga magpahiuyon sa ilang kaugalingong mga tinguha ug magaingon: ‘Hain na man kining gisaad nga presensiya niya? Aw, . . . ang tanang butang nagpadayon nga mao ra gayod sukad sa sinugdan sa kalalangan.’” (2 Pedro 3:3, 4) Gibiaybiay ang katawhan sa Diyos ingong dili realistiko. Ang mga sukdanan sa moralidad sa Bibliya giisip nga kinaraan na. Alang sa kadaghanan, ang mensahe nga atong giwali maoy kabuangan. (1 Corinto 1:18, 19) Ingong mga Kristohanon, biaybiayon tingali kita diha sa tunghaan, sa trabahoan, ug usahay sa mga membro pa gani sa pamilya. Kay wala mahadlok, kita mopadayon sa pagsumbalik-silaw sa himaya sa Diyos pinaagi sa atong pagwali, kay nahibalo kita, sama kang Jesus, nga ang Pulong sa Diyos maoy kamatuoran.—Juan 17:17.

11. Sa unsang paagi gigamit ni Satanas ang paglutos sa pagpaningkamot nga pahilomon ang mga Kristohanon?

¹¹ Ang ikatulong taktika nga gigamit sa Yawa sa pagpaningkamot nga pahilomon kita mao ang pagsupak o paglutos. Miingon si Jesus ngadto sa iyang  mga sumusunod: “Itugyan kamo sa mga tawo ngadto sa kasakitan ug pagapatyon kamo, ug kamo pagadumtan sa tanang kanasoran tungod sa akong ngalan.” (Mateo 24:9) Sa pagkamatuod, ingong mga Saksi ni Jehova, nagsagubang kitag mapintas nga paglutos diha sa daghang bahin sa yuta. Nahibalo kita nga dugay nang gitagna ni Jehova nga maugmad ang pagdumtanay o panag-away tali sa mga nag-alagad sa Diyos ug sa mga nag-alagad kang Satanas nga Yawa. (Genesis 3:15) Nahibalo usab kita nga pinaagi sa paghupot sa integridad samtang ginasulayan, atong gipamatud-an ang pagkamatarong sa unibersohanong pagkasoberano ni Jehova. Ang pagkahibalo niini makapalig-on kanato bisan kita nailalom sa labing lisod nga mga kahimtang. Walay paglutos ang permanenteng makapahilom kanato kon kita magpadayon nga determinado sa pagsumbalik-silaw sa himaya sa Diyos.

12. Nganong angay kitang magmaya samtang padayon kitang magmatinumanon bisan pa sa pagsupak ni Satanas?

¹² Gisuklan mo ba ang panghaylo sa kalibotan ug nagpamatuod nga matinumanon bisan pa sa pagbiaybiay ug pagsupak? Nan ikaw adunay katarongan sa pagmaya. Gipasaligan ni Jesus kadtong mosunod kaniya: “Malipayon kamo sa dihang pakaulawan kamo sa mga tawo ug pagalutoson kamo ug sa binakak sultihan kamo sa tanang matang sa kadaotan tungod kanako. Pagmaya ug lukso sa kalipay, sanglit dako ang inyong ganti sa mga langit; kay nianang paagiha sila naglutos sa mga manalagna nga nauna kaninyo.” (Mateo 5:11, 12) Ang imong paglahutay maoy ebidensiya nga ang gamhanang espiritu ni Jehova anaa kanimo, nga naghatag kanimog gahom sa pagsumbalik-silaw sa iyang himaya.—2 Corinto 12:9.

Ikaw Makalahutay Tungod sa Tabang ni Jehova

13. Unsay usa ka pangunang hinungdan nga kita molahutay sa atong Kristohanong ministeryo?

¹³ Ang usa ka pangunang hinungdan nga kita molahutay sa ministeryo mao nga kita nahigugma kang Jehova ug nalipay sa pagsumbalik-silaw sa iyang himaya. Ang mga tawo lagmit mosundog niadtong ilang gihigugma ug gitahod, ug walay usa nga mas takos sundogon kay kang Jehova nga Diyos. Tungod sa iyang dakong gugma, iyang gipadala ang iyang Anak sa yuta aron sa pagpamatuod sa kamatuoran ug sa pagtubos sa masinugtanong katawhan. (Juan 3:16; 18:37) Sama sa Diyos, maoy atong tinguha nga ang tanang matang sa katawhan makadangat sa paghinulsol ug sa kaluwasan; kanay hinungdan nga ato silang gisangyawan. (2 Pedro 3:9) Ang maong tinguha, uban ang atong determinasyon nga mosundog sa Diyos, magdasig kanato sa paglahutay sa pagsumbalik-silaw sa iyang himaya pinaagi sa atong ministeryo.

14. Sa unsang paagi gipalig-on kita ni Jehova aron makalahutay sa atong ministeryo?

¹⁴ Hinuon, ang atong kalig-on sa paglahutay diha sa Kristohanong ministeryo naggikan kang Jehova. Siya nagpalig-on kanato pinaagi sa iyang espiritu, iyang organisasyon, ug iyang Pulong, ang Bibliya. Si Jehova ‘naghatag ug pagkamalahutayon’  niadtong andam mosumbalik-silaw sa iyang himaya. Siya motubag sa atong mga pag-ampo ug mohatag kanatog kaalam sa pagsagubang sa mga pagsulay. (Roma 15:5; Santiago 1:5) Dugang pa, dili itugot ni Jehova nga kita mapailalom sa bisan unsang pagsulay nga dili gayod nato maantos. Kon mosalig kita kang Jehova, mohatag siyag lutsanan aron makapadayon kita sa pagsumbalik-silaw sa iyang himaya.—1 Corinto 10:13.

15. Unsay makatabang kanato aron kita makalahutay?

¹⁵ Ang paglahutay diha sa atong ministeryo nagpamatuod nga ang espiritu sa Diyos ania kanato. Ingong ilustrasyon: Pananglit kon gihangyo ka nga libreng manghatag ug usa ka matang sa tinapay sa kabalayan. Giingnan ka nga himoon kini sa imong kaugalingong panahon ug gasto. Dugang pa, makahibalo ka sa dili madugay nga diyutay ra nga mga tawo nga ganahan sa imong tinapay; ang pipila mosupak pa gani sa imong paningkamot sa pagpanghatag niini. Sa imong hunahuna, mopadayon ka ba sa pagpanghatag kada bulan, kada tuig? Lagmit dili. Bisan pa niana, tingali naghago ka sa pagsangyaw sa maayong balita sa imong kaugalingong panahon ug gasto sulod sa daghang katuigan, mga dekada pa gani. Ngano? Dili ba tungod kay imong gihigugma si Jehova ug pinaagi sa iyang espiritu siya nagpanalangin sa imong mga paningkamot sa pagtabang kanimo aron makalahutay? Segurado gayod!

Usa ka Buluhaton nga Angayng Hinumdoman

16. Tungod sa paglahutay sa atong ministeryo, unsay matagamtam nato ug niadtong mamati kanato?

¹⁶ Ang ministeryo sa bag-ong pakigsaad maoy di-hitupngang gasa. (2 Corinto 4:7) Sa susama, ang Kristohanong ministeryo nga gituman sa ubang mga karnero sa tibuok kalibotan maoy usa ka bahandi. Samtang molahutay ka sa imong ministeryo, sumala sa gisulat ni apostol Pablo kang Timoteo, ‘maluwas mo ang imong kaugalingon ug kadtong mamati kanimo.’ (1 Timoteo 4:16) Hunahunaa kon unsay kahulogan niana. Ang maayong balita nga imong ginawali naghatag sa uban ug kahigayonan nga mabuhing walay kataposan. Maugmad mo ang lig-ong bugkos sa panaghigala uban niadtong imong gitabangan sa espirituwal nga paagi. Hunahunaa ang dakong kalipay unya nga mabuhing dayon sa Paraiso uban niadtong imong gitabangan nga makakat-on bahin sa Diyos! Seguradong dili nila hikalimtan ang imong paningkamot sa pagtabang kanila. Makapatagbaw gayod unya kana!

17. Nganong ang atong panahon maoy talagsaong yugto sa kasaysayan sa tawo?

¹⁷ Nagkinabuhi ka sa talagsaong yugto sa kasaysayan sa tawo. Ang maayong balita dili na gayod iwali pag-usab diha sa kalibotan nga nahimulag sa Diyos. Si Noe nagkinabuhi sa maong kalibotan ug iyang nakita nga kadto nahanaw. Pagkamalipayon gayod niya kay nahibalo nga siya matinumanong nagbuhat sa kabubut-on sa Diyos pinaagi sa pagtukod sa arka, nga misangpot sa iyang kaluwasan ug sa iyang pamilya! (Hebreohanon 11:7) Ikaw makasinati usab sa maong kalipay. Hunahunaa kon unsa unyay imong bation sa bag-ong kalibotan sa dihang mahinumdom ka sa imong kalihokan niining kataposang mga adlaw, kay nahibalo ka nga imong gibuhat ang imong maarangan sa pagpalambo sa intereses sa Gingharian.

18. Unsang pasalig ug pagdasig ang gihatag ni Jehova sa iyang mga alagad?

¹⁸ Nan, ipadayon nato ang pagsumbalik-silaw sa himaya sa Diyos. Ang atong pagbuhat niana maoy butang nga atong mahinumdoman hangtod sa hangtod. Si Jehova mahinumdom usab sa atong mga buhat. Ang Bibliya naghatag niini nga pagdasig: “Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan, sa pagkaagi nga kamo nag-alagad sa mga balaan ug nagpadayon sa pag-alagad. Apan kami nagtinguha nga ang matag usa kaninyo magpakita sa samang kakugi aron makabaton sa bug-os nga pagsalig sa paglaom hangtod sa kataposan, aron dili kamo mahimong tapolan, kondili mahimong mga tigsundog kanila nga pinaagi sa pagtuo ug pailob nagapanunod sa mga saad.”—Hebreohanon 6:10-12.

Makapatin-aw Ka Ba?

• Sa unsang paagi gisumbalik-silaw sa mga Kristohanon ang himaya sa Diyos?

• Unsa ang pipila ka taktika nga gigamit ni Satanas sa iyang pagpaningkamot nga pahilomon ang katawhan sa Diyos?

• Unsay ebidensiya nga ang espiritu sa Diyos ania kanato?

[Mga Pangutana sa Pagtuon]

[Hulagway sa panid 15]

Gisumbalik-silaw sa nawong ni Moises ang himaya

[Mga hulagway sa panid 16, 17]

Atong gisumbalik-silaw ang himaya sa Diyos diha sa atong ministeryo