“Mabuhian ra Unta Dayon Sila”

PERSONAL nga nailhan ni Geneviève de Gaulle, pag-umangkong babaye ni Charles de Gaulle, kanhi presidente sa Pransiya, ang mga Saksi ni Jehova didto sa kampong konsentrasyon sa Nazi sa Ravensbrück, amihanang Alemanya. Gisulat niya ang mga pulong sa ibabaw diha sa usa ka sulat niadtong Agosto 1945.

Ang kampong konsentrasyon sa Auschwitz, Polandia, nalibre niadtong Enero 27, 1945. Sukad sa 1996, kining petsaha maoy usa ka memoryal nga adlaw sa Alemanya para sa mga biktima sa Third Reich ni Hitler.

Panahon sa usa ka opisyal nga pakigpulong sa adlaw sa memoryal niadtong Enero 27, 2003, ang presidente sa Parliamento sa Estado sa Baden-Württemberg, nga si Peter Straub, mikomento: “Ang tanan niadtong nag-antos sa paglutos tungod sa ilang relihiyoso o politikanhon nga mga pagtuo ug kinsa andam nga mamatay inay magpasakop sa pagmando ni Hitler takos sa atong dakong pagtahod. Kining maong pagtahod dili gayod ikahubit sa mga pulong. Ang mga Saksi ni Jehova mao lang ang bugtong relihiyon nga bug-os midumili sa pagsugot sa pagmando ni Hitler: Wala nila iisa ang ilang mga kamot aron sa pagsaludar kang Hitler. Wala sila manumpa nga magmasinugtanon sa ‘Führer [o Lider] ug Estado,’ ug sila midumili usab sa pagsundalo ug pagtrabaho. Ug ang ilang mga anak wala moapil sa Kalihokan sa mga Batan-on ni Hitler.”

Si Jesu-Kristo nag-ingon bahin sa iyang mga sumusunod: “Sila dili bahin sa kalibotan, ingon nga ako dili bahin sa kalibotan.” (Juan 17:16) Busa, ang baroganan sa mga Saksi ni Jehova maoy tungod sa relihiyosong katarongan lamang. Mipadayon si Straub: “Ang mga Saksi ni Jehova, nga kinahanglang magtaod ug purpurang trianggulo diha sa ilang mga sinina ingong mga binilanggo sa kampong konsentrasyon, mao ra gayod ang makatapos sa kaugalingon nilang pagkamartir. Igo ra unta ang pagpirma sa usa ka deklarasyon nga nagsalikway sa ilang pagtuo.”

Para sa kadaghanang Saksi, ang pagsalikway sa ilang pagtuo dili usa ka kapilian. Tungod niana, mga 1,200 kanila ang namatay panahon sa Nazi. Duha ka gatos ug kapitoan ang gipamatay ingong mga magsusupak tungod sa tanlag. Gituman gayod nila ang panultihong: “Kinahanglang among sugton ang Diyos ingong magmamando inay ang mga tawo.”—Buhat 5:29.

Ang mga Saksi ni Jehova ordinaryo rang mga tawo, sama sa giingon ni Ulrich Schmidt, presidente sa Parliamento sa Estado sa Amihanang Rhine-Westphalia. Nga nagpunting sa iyang pakigpulong, ang brosyur nga Landtag Intern nagtawag sa mga Saksi ingong “ordinaryong mga tawo kinsa, agig pagsunod sa ilang tanlag, lig-ong mibarog tungod ug alang sa ilang relihiyosong tinuohan, mipakitag kaisog ingong mga lungsoranon, ug misupak sa ideolohiya sa Nazi tungod sa ilang pagtuo ingong mga Kristohanon.” Makaseguro kita nga si Jehova nga Diyos malipay sa tanang magmaunongon kaniya ilalom sa malisod nga mga kahimtang. Sa Proverbio 27:11, atong mabasa: “Magmaalamon, anak ko, ug lipaya ang akong kasingkasing, aron matubag ko siya nga nagatamay kanako.”

[Picture Credit Line sa panid 30]

Courtesy of United States Holocaust Memorial Museum