Mga Pangutana Gikan sa mga Magbabasa

Sa karaang Israel, unsay kahulogan sa milagrosong kahayag nga usahay gitawag ug Shechinah nga makita diha sa Labing Balaan sa tabernakulo ug sa templo?

Si Jehova, ang mahigugmaong Amahan ug Tigpanalipod sa iyang katawhan, tin-awng nagpadayag sa iyang presensiya sa Israel. Ang usa ka paagi nga iyang gihimo kini maoy pinaagi sa usa ka masanag nga panganod nga suod nga nalangkit sa iyang dapit sa pagsimba.

Kanang talagsaong kahayag naghawas sa dili-makitang presensiya ni Jehova. Kini makita diha sa Labing Balaan sa tabernakulo ug sa templo nga gitukod ni Solomon. Kanang milagrosong kahayag wala magpasabot nga si Jehova literal nga atua didto. Ang Diyos dili mopuyo sa bisan unsang tinukod nga hinimo sa mga tawo. (2 Cronicas 6:18; Buhat 17:24) Pinaagi niining talagsaong kahayag nga gipahinabo sa Diyos diha sa iyang sangtuwaryo, ang hataas nga saserdote makasalig ug pinaagi kaniya ang tanang Israelinhon makasalig usab nga sila panalipdan ug hatagan sa ilang mga panginahanglan tungod kay anaa ang presensiya ni Jehova.

Sa Aramaikong pinulongan nga gigamit human sa pagsulat sa Bibliya, kining maong kahayag gitawag ug Shechinah (shekhi·nahʹ), nga nagkahulogang “kanang nagpuyo” o “ang pagpuyo.” Kining terminoha dili makita diha sa Bibliya apan makita diha sa Aramaikong mga hubad sa Hebreohanong Kasulatan, nga nailhan usab nga mga Targum.

Sa dihang naghatag ug mga instruksiyon sa pagtukod sa tabernakulo, si Jehova miingon kang Moises: “Imong ibutang ang tabon ibabaw sa Arka, ug imong ibutang sa Arka ang pagpamatuod nga akong ihatag kanimo. Ug akong ipakita ang akong kaugalingon kanimo didto ug mosulti kanimo gikan sa ibabaw sa tabon, gikan sa taliwala sa duha ka kerubin nga anaa ibabaw sa arka.” (Exodo 25:21, 22) Ang Arka nga gihisgotan maoy usa ka hinaklapan-ug-bulawan nga kaban diha sa Labing Balaan. Dihay duha ka bulawang kerubin sa tabon sa Arka.

Gikan sa unsang dapit mosulti si Jehova? Gitubag niya kanang pangutanaha sa dihang giingnan niya si Moises: “Diha sa usa ka panganod ako magpakita ibabaw sa tabon.” (Levitico 16:2) Kining maong panganod nagpatigbabaw sa sagradong Arka taliwala sa duha ka bulawang mga kerubin. Wala ibutyag sa Bibliya kon unsa ka taas ang maong panganod o kon unsay distansiya niini ibabaw sa mga kerubin.

Kining hayag nga panganod maoy naglamdag sa Labing Balaan. Gani, kini ang bugtong tinubdan sa kahayag nianang lawaka. Makakita ang hataas nga saserdote gumikan sa maong kahayag inigsulod niya sa kinasulorang lawak panahon sa Adlaw sa Pagtabon sa Sala. Nagtindog siya diha sa presensiya ni Jehova.

Aduna bay kahulogan kining milagrosong kahayag alang sa mga Kristohanon? Diha sa panan-awon, si apostol Juan nakakita ug usa ka siyudad diin ‘walay gabii didto.’ Ang maong siyudad mao ang Bag-ong Jerusalem, nga gilangkoban sa binanhaw nga dinihogang mga Kristohanon nga magmando uban kang Jesus. Ang kahayag niining simbolikong siyudad dili gikan sa adlaw o sa bulan. Ang himaya ni Jehova nga Diyos maoy direktang naglamdag niining organisasyona, ingon nga ang panganod nga Shechinah naglamdag sa Labing Balaan. Gawas pa, ang Kordero, si Jesu-Kristo, mao ang “lampara” sa maong siyudad. Sa baylo, kining ‘siyudara’ naghatag sa espirituwal nga kahayag ug sa pag-uyon niini nganha sa tinubos nga katawhan gikan sa tanang kanasoran aron magiyahan sila.—Pinadayag 21:22-25.

Tungod kay ilang nadawat ang maong dagayang mga panalangin gikan sa kahitas-an, makaseguro ang mga magsisimba ni Jehova nga si Jehova mao ang ilang mapanalipdanong Magbalantay ug mahigugmaong Amahan.