Ang mga Mennonite Nangitag Kamatuoran sa Bibliya

USA ka buntag niadtong Nobyembre 2000, sa paglantaw nila sa bentana sa ilang gamayng balay, nasiklapan sa pipila ka mga misyonaryo sa mga Saksi ni Jehova sa Bolivia ang usa ka grupo sa yanog-pamesti nga mga lalaki ug babaye nga mahadlokong nagbarog sa ganghaan. Sa dihang gibuksan sa mga misyonaryo ang ganghaan, ang unang giingon sa mga bisita maoy, “Gusto namong masayran ang kamatuoran bahin sa Bibliya.” Ang mga bisita maoy mga Mennonite. Ang mga lalaki nagsul-ob ug ober-ol, ang mga babaye adunay lugom-ug-kolor nga ipron, ug nagsultihanay sila diha sa Aleman nga diyalekto. Dihay kahadlok sa ilang mga mata. Nagsige silag lingi sa pagtan-aw kon may nagsunod ba kanila. Bisan pa niana, sa pagsaka pa lang nila sa hagdan, usa sa batan-ong mga lalaki ang miingon, “Gusto nakong mailhan ang mga tawo nga naggamit sa ngalan sa Diyos.”

Sulod sa balay, ang mga bisita nahuwasan sa ilang kahadlok samtang gidalitan sila ug pabugnaw. Gikan pa sila sa halayo ug nahilit nga pundok sa mga mag-uuma. Didto, sila nagadawat ug magasing Bantayanang Torre pinaagi sa koreyo sulod sa unom na ka tuig. “Nabasahan namo nga ang yuta mahimo unyang paraiso. Tinuod ba kini?” nangutana sila. Gipakita kanila sa mga Saksi ang tubag sa Bibliya. (Isaias 11:9; Lucas 23:43; 2 Pedro 3:7, 13; Pinadayag 21:3, 4) “Tan-awa!” matod pa sa usa ka mag-uuma ngadto sa iyang mga kauban. “Tinuod lagi kini. Ang yuta mahimong paraiso unya.” Ang uban balikbalik nga miingon: “Nagtuo ko nga nakaplagan na nato ang kamatuoran.”

Kinsa ang mga Mennonite? Unsay ilang gituohan? Aron matubag kining mga pangutanaha, kinahanglang mobalik kita sa ika-16 nga siglo.

Kinsa ang mga Mennonite?

Sa mga tuig sa 1500, ang pag-uswag sa gidaghanon sa mga Bibliya nga gihubad ug giimprenta diha sa kasagarang mga pinulongan sa Uropa nakapukaw pag-usab ug kaikag sa pagtuon sa Bibliya didto. Gisalikway ni Martin Luther ug sa ubang mga Repormador ang kadaghanan sa mga pagtulon-an sa Katolikong Simbahan. Apan, ang bag-ong natukod nga Protestanteng mga relihiyon nagsunod gihapon ug daghang dili-Kasulatanhong mga tulumanon. Pananglitan, gituohan sa kadaghanan nga ang matag bag-ong natawo nga bata angayng bunyagan sa simbahan. Hinunoa, ang pipila niadtong nagsusi sa kamatuoran sa Bibliya nakaamgo nga ang usa ka tawo mahimong membro lamang sa Kristohanong kongregasyon pinaagi sa paghimog desisyon base sa iyang nahibaloan ayha pa siya bawtismohan.  (Mateo 28:19, 20) Ang masibotong mga magwawali nga nagtuo niini nangadto sa mga lungsod ug mga balangay aron sa pagtudlo bahin sa Bibliya ug sa pagbawtismo sa mga hamtong. Busa, sila gitawag nga mga Anabaptist, nga nagkahulogang “tigbawtismo sa ikaduhang higayon.”

Usa niadtong miduol sa mga Anabaptist sa iyang pagpangita sa kamatuoran mao si Menno Simons, usa ka Katolikong pari sa balangay sa Witmarsum sa amihanang bahin sa Netherlands. Pagka-1536, siya mibiya sa simbahan ug gipangita aron patyon. Niadtong 1542, ang Balaang Romanong Emperador Charles V mismo nagsaad nga mohatag sa kantidad nga 100 guilder ingong ganti sa pagdakop kang Menno. Bisan pa niana, gihugpong ni Menno ang pipila ka mga Anabaptist ngadto sa mga kongregasyon. Siya ug ang iyang mga sumusunod gitawag nga mga Mennonite.

Mga Mennonite Karong Adlawa

Sa ngadtongadto, libolibong Mennonite gikan sa Kasadpang Uropa ang milalin ngadto sa Amerika del Norte tungod sa paglutos. Didto, libre silang makapadayon sa pagpangita sa kamatuoran ug sa pagpakaylap sa ilang mensahe ngadto sa mas daghan pang tawo. Apan ang nagdilaab nga kasibot sa ilang mga katigulangan alang sa mauswagong pagtuon sa Bibliya ug pagsangyaw sa publiko naawop na. Ang kadaghanan misagop sa pipila ka dili-Kasulatanhong mga pagtulon-an, sama sa Trinidad, imortalidad sa tawhanong kalag, ug impiyernong kalayo. (Ecclesiastes 9:5; Ezequiel 18:4; Marcos 12:29) Karong adlawa, kasagarang hatagan sa mga misyonaryong Mennonite ug mas dakong pagtagad ang medikal ug katilingbanong mga serbisyo inay ang pagwali.

Gibanabana nga aduna na karoy mga 1,300,000 ka Mennonite nga nagpuyo sa 65 ka nasod. Bisan pa niana, sama ni Menno Simons mga kasiglohan na kanhi, ang mga Mennonite karon nahigawad tungod sa ilang kawalay-panaghiusa. Niadtong Gubat sa Kalibotan I, ang kalainan sa mga opinyon maylabot sa mga panagbangi sa kalibotan nagpahinabog grabeng pagkabahinbahin. Daghan sa Amerika del Norte ang midumili sa serbisyo militar tungod sa Kasulatanhong mga hinungdan. Apan ang An Introduction to Mennonite History miingon: “Pagka-1914, ang mga simbahan sa Mennonite sa Kasadpang Uropa miuyon na sa serbisyo militar.” Karon, ang pipila ka grupo sa mga Mennonite medyo misagop na sa modernong paagi sa kinabuhi. Ang uban mogamit gihapon ug mga hook and eye sa ilang mga sinina inay mga butones ug nagtuo nga ang mga lalaki dili angayng mamalbas.

Kay determinado nga magpabiling bulag sa modernong kalibotan, ang ubang grupo sa mga Mennonite mibalhin sa mga dapit diin ang lokal nga gobyerno dili manghilabot sa ilang paagi sa pagkinabuhi. Pananglitan, sa Bolivia, gibanabanang 38,000 ka hamtong nga mga Mennonite ang nagpuyo sa daghang nahilit nga mga pundok, nga ang matag usa niana adunay kaugalingong mga lagda sa panggawi. Ang ubang mga pundok nagdili sa demotor nga mga sakyanan, nga nagtugot lang ug mga kabayo ug mga karwahe. Gidili sa ubang mga pundok ang radyo, TV, ug musika. Gidili pa gani sa uban ang pagkat-on sa pinulongan sa nasod nga ilang gipuy-an. “Aron makontrolar nila kami, dili kami tugtan sa mga magwawali sa pagkat-on ug Kinatsila,” miingon ang usa ka molupyo sa usa ka pundok. Daghan ang mibating napig-otan ug nahadlok nga palagpoton gikan sa komunidad—usa ka makalilisang nga palaaboton alang sa usa nga wala gayod makasulay sa pagkinabuhi nga bulag sa ilang pundok.

Kon sa Unsang Paagi Napugas ang Binhi sa Kamatuoran

Usa ka mag-uumang Mennonite nga ginganlag Johann ang nagkinabuhi ilalom niining kahimtanga sa dihang nakita niya ang magasing Bantayanang Torre sa balay sa iyang silingan. Ang pamilya ni Johann milalin gikan sa Canada ngadto sa Mexico ug sa ulahi sa Bolivia. Apan si Johann nagtinguha gayod ug tabang sa iyang pagpangita sa kamatuoran sa Bibliya. Gihulaman niya ang maong magasin.

 Sa ulahi, samtang didto siya sa siyudad aron sa pagbaligya sa iyang mga produkto sa uma, giduol ni Johann ang usa ka Saksi nga nagtanyag ug Ang Bantayanang Torre diha sa tiyanggihan. Gitultolan siya sa Saksi ngadto sa usa ka misyonaryo nga nagsultig Aleman, ug sa wala madugay si Johann nagadawat ug Aleman nga Ang Bantayanang Torre pinaagi sa koreyo. Ang matag isyu maampingong gitun-an ug gipaambit ngadto sa lainlaing mga pamilya sa iyang pundok hangtod nga magisi na lang intawon ang magasin. Usahay, ang mga pamilya magtapok ug magtuon sa magasing Bantayanang Torre hangtod sa tungang gabii, nga nagasusi sa gisitar nga mga teksto sa Bibliya. Si Johann nakombinsir nga ang mga Saksi ni Jehova mao gayod ang katawhan nga hiniusang nagabuhat sa kabubut-on sa Diyos sa tibuok yuta. Una siya mamatay, giingnan ni Johann ang iyang asawa ug mga anak: “Basaha ninyo kanunay Ang Bantayanang Torre. Motabang kini kaninyo sa pagsabot sa Bibliya.”

Ang ubang membro sa pamilya ni Johann misugod sa pagpaambit sa mga butang nga ilang nakat-onan sa Bibliya ngadto sa ilang mga silingan. “Ang yuta dili malaglag. Hinunoa, kini himoon sa Diyos nga usa ka paraiso,” sila miingon. “Ug dili sakiton sa Diyos ang mga tawo diha sa impiyerno.” Sa wala madugay, nasayran sa mga magwawali sa simbahan ang maong mga panaghisgot, ug gibaharan nila ang pamilya ni Johann nga palagpoton sa pundok kon dili sila mohunong sa ilang ginabuhat. Sa ulahi, sa dihang ang pamilya nag-estoryahanay bahin sa pagpig-ot kanila sa mga pangulo nga Mennonite, gipadayag sa usa ka batan-ong lalaki ang iyang hunahuna. “Wala ko kasabot kon nganong nagbagulbol kita bahin sa mga pangulo sa atong simbahan,” miingon siya. “Nasayod kitang tanan kon unsa ang matuod nga relihiyon, apan wala kitay gihimo nga bisan unsa bahin niana.” Kining mga pulonga nakatandog sa kasingkasing sa amahan sa batan-ong lalaki. Sa wala madugay, napulo ka membro sa ilang pamilya ang sekretong mipanaw sa pagpangita sa mga Saksi ni Jehova ug nakaabot sa balay sa mga misyonaryo, ingon sa gihisgotan sa sinugdan.

Pagkasunod adlaw, giduaw sa mga misyonaryo ang bag-o nilang mga higala sa maong pundok. Ang sakyanan sa mga misyonaryo mao lang ang demotor nga sakyanan nga nagdagan sa dalan. Nahibulong silang nagtan-aw sa giguyod-ug-kabayo nga mga karwahe samtang hinayhinay nilang gilabyan kini, ug ang mga nagsakay sa karwahe nahibulong usab nga nagtan-aw kanila. Sa wala madugay sila nanglingkod atubangan sa lamesa uban sa napulo ka Mennonite, nga naghawas sa duha ka pamilya.

Niadtong adlawa, upat ka oras nilang gitun-an ang kapitulo 1 sa libro nga Kahibalo nga Motultol sa Kinabuhing Walay Kataposan. a Sa matag parapo, gisusi sa mga mag-uuma ang dugang mga teksto sa Bibliya ug gusto nilang masayran kon husto ba ang ilang pagpadapat sa mga teksto. Mohunong silag pipila ka minuto sa matag pangutana sa tun-anan samtang ang mga mag-uuma mokonsulta sa usag usa diha sa Aleman nga diyalekto ayha pa motubag sa Kinatsila ang tigpamaba sa grupo. Halandomon kaayo kadtong adlawa, apan dihay dakong paglutos nga nagpaabot kanila. Makaagom unya sila ug mga pagsulay, sama ni Menno Simons sa dihang nagsugod siya pagpangita sa kamatuoran sa Bibliya duolag lima ka siglo kanhi.

Nakaagom ug mga Pagsulay Tungod sa Kamatuoran

Pipila ka adlaw sa ulahi, ang mga pangulo sa simbahan miadto sa balay sa pamilya ni Johann nga nagbahad niadtong interesado sa mga Saksi: “Nadunggan namo nga ang mga Saksi ni Jehova miduaw kaninyo. Ayaw na sila pabalika, ug kon dili ninyo itunol ang inyong mga literatura aron sunogon, kamo palagpoton.” Usa ka beses pa lang silang nagtuon sa Bibliya uban sa mga Saksi, busa usa kadto ka dakong pagsulay.

“Dili namo mahimo ang inyong gihangyo,”  matod sa usa sa mga ulo sa pamilya. “Kadtong mga tawhana mianhi aron sa pagtudlo kanamo bahin sa Bibliya.” Unsay sanong sa mga pangulo? Gipalagpot nila sila tungod sa pagtuon sa Bibliya! Kadto nagpahinabo gayod ug dakong kalisdanan. Labyan lang sa kariton sa tighimog keso sa maong pundok ang balay sa usa sa pamilya ug dili niini kolektahon ang ilang gatas, nga naghikaw kanila sa ilang bugtong tinubdan sa kinitaan. Usa ka ulo sa pamilya ang gipapahawa sa iyang trabaho. Ang usa wala tugoting makapalit ug mga suplay gikan sa tindahan sa maong pundok, ug ang iyang diyes-anyos nga anak nga babaye gipalagpot sa tunghaan. Gilibotan sa mga silingan ang usa ka balay aron sa pagkuha sa asawa sa usa sa batan-ong mga lalaki, nga miinsistir nga dili siya angayng mopuyo uban sa iyang gipalagpot nga bana. Bisan pa niining tanan, ang mga pamilya nga nagtuon sa Bibliya wala mohunong sa ilang pagpangita sa kamatuoran.

Ang mga misyonaryo padayong miadto nianang halayo nga dapit kada semana aron sa pagdumalag pagtuon sa Bibliya. Ang mga pamilya napalig-on gayod sa maong mga pagtuon! Ang ubang mga membro sa pamilya mibiyaheg duha ka oras sakay sa kabayo ug karwahe aron makatambong. Usa gayod ka makapatandog nga okasyon sa dihang gidapit sa mga pamilya ang usa sa mga misyonaryo sa pag-ampo sa unang higayon. Kining pundoka sa mga Mennonite moampo lang sa hilom, busa wala pa gayod sila makadungog ug tawo nga nag-ampo alang kanila. Ang mga lalaki nakahilak. Ug mahanduraw ba nimo ang ilang kamausisaon sa dihang ang mga misyonaryo nagdalag teyp rekorder? Ang musika gidili sa ilang pundok. Giganahan kaayo sila sa mananoy nga Kingdom Melodies nga nakahukom sila sa pagkantag mga alawiton sa Gingharian human sa matag pagtuon! Bisan pa niana, ang pangutana nagpabilin, Unsaon nila pagsustenir sa ilang kinabuhi ilalom sa ilang bag-ong kahimtang?

Pagkaplag ug Mahigugmaong Panag-igsoonay

Sanglit nahimulag na sa ilang komunidad, ang mga pamilya misugod sa paghimog ilang kaugalingong keso. Ang mga misyonaryo mitabang kanila sa pagpangitag mga pumapalit. Usa ka dugay nang Saksi sa Amerika del Norte nga nagdako diha sa usa ka pundok sa mga Mennonite sa Amerika del Sur ang nakadungog bahin sa kahimtang sa mga pamilya. Dako kaayo ang iyang tinguha nga motabang. Sulod sa usa ka semana, misakay siyag ayroplano paingon sa Bolivia aron sa pagduaw kanila. Gawas pa sa pagtaganag dakong espirituwal nga pagdasig, gitabangan niya ang mga pamilya nga makapalit ug ilang kaugalingong pick-up nga trak aron kasakyan nila paingon sa mga tigom sa Kingdom Hall ug sa pagdala usab sa ilang mga produkto sa uma ngadto sa tiyanggihan.

“Lisod ang among kahimtang human mapalagpot gikan sa komunidad. Mobiyahe kami paingon sa Kingdom Hall nga masulub-on,” nahinumdom ang usa ka membro sa pamilya, “apan mamauli kami nga malipayon.” Sa pagkatinuod, ang lokal nga mga Saksi mitabang ug misuportar kanila. Ang uban nagtuon ug pinulongang Aleman, ug ubay-ubayng nagsultig-Aleman nga mga Saksi sa Uropa ang miadto sa Bolivia aron motabang sa pagdumalag Kristohanong mga tigom sa pinulongang Aleman. Wala madugay, 14 gikan sa komunidad sa mga Mennonite ang nagwali sa maayong balita sa Gingharian ngadto sa uban.

Sa Oktubre 12, 2001, wala pay usa ka tuig human sa una nilang pag-adto sa balay sa mga misyonaryo, 11 niining kanhi mga Anabaptist ang nabawtismohan pag-usab, niining higayona ingong simbolo sa ilang dedikasyon kang Jehova. Sukad niadto, daghan pa ang nabawtismohan. Ang usa miingon sa ulahi: “Sukad nga nakat-onan namo ang kamatuoran sa Bibliya, mibati kami nga samag napahigawas nga mga ulipon.” Ang lain pa miingon: “Daghang Mennonite ang nagreklamo bahin sa kawalay-gugma sa ilang komunidad. Apan ang mga Saksi ni Jehova may kaikag sa usag usa. Mibati akong luwas uban kanila.” Kon ikaw nagtinguha nga mas masabtan pa ang kamatuoran sa Bibliya, tingali makaagom ka usab ug mga kalisdanan. Apan kon mangayo kag tabang kang Jehova ug magpasundayag ug pagtuo ug kaisog sama sa gibuhat niining mga pamilyaha, ikaw magmalamposon ug magmalipayon usab sama nila.

[Footnote]

[Hulagway sa panid 25]

Nalipay sa pagkadawat ug literatura sa Bibliya sa pinulongang Aleman

[Hulagway sa panid 26]

Bisan tuod gidili ang musika kaniadto, sila karon manganta na human sa matag pagtuon sa Bibliya