Kita Magalakaw sa Ngalan ni Jehova nga Atong Diyos
Kita Magalakaw sa Ngalan ni Jehova nga Atong Diyos
“Kita, sa atong bahin, magalakaw sa ngalan ni Jehova nga atong Diyos hangtod sa panahong walay tino, bisan hangtod sa kahangtoran.”—MIQUEAS 4:5.
1. Mahitungod sa moralidad, unsay situwasyon sa adlaw ni Noe, ug sa unsang paagi lahi si Noe?
ANG unang tawo nga gihisgotan sa Bibliya nga naglakaw uban sa Diyos mao si Enoc. Ang ikaduha mao si Noe. Ang rekord nag-ingon: “Si Noe maoy usa ka tawong matarong. Siya walay-ikasaway taliwala sa iyang mga katalirongan. Si Noe naglakaw uban sa matuod nga Diyos.” (Genesis 6:9) Sa panahon ni Noe, ang mga tawo sa katibuk-an nahitipas na gikan sa putli nga pagsimba. Ang daotang situwasyon misamot pa tungod sa dili-matinumanong mga manulonda nga dili-kinaiyanhong nakigminyo sa mga babaye ug nagpatunghag mga anak nga gitawag ug Nepilim, “ang mga gamhanan,” o “mga tawong bantogan,” niadtong adlawa. Mao diay nga ang yuta napuno sa kapintasan! (Genesis 6:2, 4, 11) Bisan pa niana, gipamatud-an ni Noe ang iyang kaugalingon nga walay ikasaway ug siya “usa ka magwawali sa pagkamatarong.” (2 Pedro 2:5) Sa dihang gisugo siya sa Diyos sa pagtukod ug arka aron sa pagtipig sa kinabuhi, si Noe masinugtanong ‘mibuhat sa tanan nga gisugo sa Diyos kaniya. Gibuhat niya ang ingon gayod.’ (Genesis 6:22) Sa pagkatinuod, si Noe naglakaw uban sa Diyos.
2, 3. Unsang maayong panig-ingnan ang gitagana ni Noe alang kanato karon?
2 Giapil ni Pablo si Noe sa iyang listahan sa matinumanong mga saksi sa dihang siya misulat: “Tungod sa pagtuo si Noe, human hatagi sa Diyos ug pasidaan mahitungod sa mga butang nga wala pa makita, nagpakitag diyosnong kahadlok ug nagtukod ug arka aron sa pagluwas sa iyang panimalay; ug pinaagi niini nga pagtuo iyang gihukman ang kalibotan, ug siya nahimong manununod sa pagkamatarong nga maoy sumala sa pagtuo.” (Hebreohanon 11:7) Pagkamaayong panig-ingnan! Tungod kay siya segurado nga ang pulong ni Jehova matuman, si Noe naggamit sa iyang panahon, kusog, ug mga kahinguhaan aron sa pagtuman sa mga sugo sa Diyos. Sa susamang paagi, daghan karon ang nagsalikway sa sekular nga mga kahigayonan niining kalibotana ug migamit sa ilang panahon, kusog, ug mga kahinguhaan aron sa pagsugot sa mga sugo ni Jehova. Ang ilang pagtuo talagsaon gayod ug moresulta sa ilang kaluwasan maingon man sa uban.—Lucas 16:9; 1 Timoteo 4:16.
3 Si Noe ug ang iyang pamilya lagmit nga nalisdan gayod sa pagpasundayag ug pagtuo sama kang Enoc, ang apohan sa tuhod ni Noe, nga gihisgotan sa nag-unang artikulo. Sa adlaw ni Noe, sama sa adlaw ni Enoc, diyutay lang ang matuod nga mga magsisimba—walo lamang ka tawo ang nagmatinumanon ug nakalabang-buhi sa Lunop. Si Noe nagsangyaw ug pagkamatarong diha sa mapintas ug imoral nga kalibotan. Dugang pa, siya ug ang iyang pamilya nagtukod ug usa ka dakong kahoy nga arka ingong pagpangandam sa usa ka tibuok-kalibotang lunop, bisan tuod wala pay nakakita ug lunop sukad. Lagmit nga kadto gikatingad-an pag-ayo sa naniid kanila.
4. Unsang kasaypanan sa mga katalirongan ni Noe ang gipasiugda ni Jesus?
4 Makaiikag nga sa dihang naghisgot si Jesus sa mga adlaw ni Noe, wala siya maghisgot sa kapintasan, bakak nga relihiyon, o sa imoralidad—bisan tuod kini maoy grabeng mga kasaypanan. Ang kasaypanan nga gipasiugda ni Jesus mao ang pagdumili sa mga tawo sa pagpatalinghog sa pasidaan nga gihatag. Siya miingon nga sila ‘nangaon ug nanginom, ang mga lalaki nagminyo ug ang mga babaye gihatag sa kaminyoon, hangtod sa adlaw nga misulod si Noe sa arka.’ Nangaon, nanginom, nagminyo, gihatag sa kaminyoon—unsa may daotan niana? Sila nagkinabuhi lamang nga “normal”! Apan taliabot ang lunop, ug si Noe nagsangyaw sa pagkamatarong. Ang iyang pulong ug panggawi maoy pasidaan na unta kanila. Bisan pa niana, sila “wala magtagad hangtod nga miabot ang baha ug gibanlas silang tanan.”—Mateo 24:38, 39.
5. Unsang mga hiyasa ang gikinahanglan ni Noe ug sa iyang pamilya?
5 Sa paglantaw ug balik niadtong mga panahona, atong makita ang kaalam sa dalan nga gisubay ni Noe. Apan, sa mga adlaw sa wala pa ang Lunop, nagkinahanglan ug kaisog aron mahimong lahi sa uban. Si Noe ug ang iyang pamilya nagkinahanglag lig-ong kombiksiyon aron magtukod ug dakong arka ug pun-on kana sa mga hawas sa lainlaing matang sa mananap. May pipila ba niadtong matinumanong mga tawo ang nangandoy usahay nga sila dili ra unta kaayo mamatikdan ug magkinabuhi lamang nga “normal”? Bisan pag misantop kana sa ilang hunahuna, wala mohuyang ang ilang integridad. Human sa daghang katuigan—nga mas taas pa kay sa panahon nga kinahanglang antoson ni bisan kinsa kanato niining sistemaha sa mga butang—ang pagtuo ni Noe misangpot sa iyang pagkaluwas sa Lunop. Apan, gihukman ni Jehova ang tanang nagkinabuhi nga “normal” ug wala magtagad sa kahulogan sa mga panahon nga ilang gikinabuhian.
Gihasi na Usab sa Kapintasan ang Katawhan
6. Human sa Lunop, unsang situwasyon ang naglungtad gihapon?
6 Human mohubas ang Lunop, ang katawhan adunay bag-ong sinugdanan. Apan, ang mga tawo dili pa gihapon hingpit, ug “ang kiling sa kasingkasing sa tawo” “daotan [gihapon] sukad pa sa iyang pagkabatan-on.” (Genesis 8:21) Gawas pa niana, bisag ang mga demonyo dili na makasul-ob ug tawhanong mga lawas, sila aktibo pa gihapon kaayo. Ang kalibotan sa dili-diyosnong katawhan nagpakita dayon nga kini “nailalom sa gahom sa usa nga daotan,” ug sama karon, ang matuod nga mga magsisimba kinahanglang makigbisog batok “sa mga malipatlipatong kaugdahan sa Yawa.”—1 Juan 5:19; Efeso 6:11, 12.
7. Sa unsang paagi misamot ang kapintasan sa kalibotan pagkahuman sa Lunop?
7 Labing menos sukad sa panahon ni Nimrod, ang yuta napuno na usab sa kapintasan pagkahuman sa Lunop. Tungod sa nagkadaghan nga populasyon ug sa pag-uswag sa teknolohiya, ang maong kapintasan misamot sa paglabay sa panahon. Sa una, anaa ang espada, bangkaw, pana ug udyong, ug karo. Sa di pa dugayng katuigan anaa ang pusil ug kanyon, dayon ang riple ug ang moderno kaayong mga hinagiban sa unang bahin sa ika-20ng siglo. Ang Gubat sa Kalibotan I nagpatungha ug mas makahahadlok nga mga hinagiban, sama sa ayroplano, tangke, submarino, ug makahilong gas. Nianang gubata, kining maong mga hinagiban mikalas ug milyonmilyong kinabuhi. Nahibaloan bang daan nga mahitabo kana? Oo.
8. Sa unsang paagi natuman ang Pinadayag 6:1-4?
8 Sa tuig 1914, si Jesus naentrono ingong Hari sa langitnong Gingharian sa Diyos, ug ang “adlaw sa Ginoo” nagsugod. (Pinadayag 1:10) Sa usa ka panan-awon nga gitaho sa basahon sa Pinadayag, si Jesus nakita ingong Hari nga madaogong nagsakay sa puti nga kabayo. Ang ubang mga mangangabayo nagsunod kaniya, ang matag usa naghawas ug lainlaing hampak sa katawhan. Ang usa kanila nagsakay sa kabayo nga ang bulok samag kalayo, ug gitugotan siya sa “pagkuha sa pakigdait gikan sa yuta aron sila magpinatyanay sa usag usa; ug gihatag kaniya ang usa ka dakong espada.” (Pinadayag 6:1-4) Kining maong kabayo ug ang nagsakay niini naghulagway sa gubat, ug ang dakong espada naghawas sa dili-hitupngan nga pagkamalaglagon sa modernong mga gubat uban ang puwersadong mga hinagiban niini. Ang maong mga hinagiban karon naglakip sa nukleyar nga mga armas, nga ang matag usa makapatay ug tinagpulo ka libong tawo; mga roket nga makapasupot nianang maong mga armas ngadto sa mga target nga libolibo ka kilometros ang gilay-on; maingon man sa modernong kemikal ug biolohikal nga mga hinagiban nga gigamit sa pinakyaw nga pagpamatay.
Kita Nagtagad sa mga Pasidaan ni Jehova
9. Aduna bay kalainan ang kalibotan karon nianang naglungtad una pa ang Lunop?
9 Sa mga adlaw ni Noe, gilaglag ni Jehova ang katawhan tungod sa grabeng kapintasan sa daotang mga tawo nga gihulhogan sa mga Nepilim. Komosta karon? Menos ba ang kapintasan sa yuta karon kon itandi kaniadto? Dili gayod! Dugang pa, sama sa adlaw ni Noe, ang mga tawo karon nagpadayon sa ilang adlaw-adlaw nga mga kalihokan, nga naningkamot sa pagkinabuhing “normal,” nga wala magpatalinghog sa mga pasidaan nga gipalanog. (Lucas 17:26, 27) Nan, aduna bay katarongan nga magduhaduha nga laglagon pag-usab ni Jehova ang katawhan? Wala.
10. (a) Unsang pasidaan ang sublisubling gihatag diha sa tagna sa Bibliya? (b) Unsa ang bugtong maalamon nga dalan karon?
10 Gatosan ka tuig una pa ang Lunop, gitagna ni Enoc nga ang kalaglagan mahitabo gayod sa atong adlaw. (Judas 14, 15) Si Jesus naghisgot usab sa nagsingabot nga “dakong kasakitan.” (Mateo 24:21) Ang ubang mga manalagna nagpasidaan bahin nianang panahona. (Ezequiel 38:18-23; Daniel 12:1; Joel 2:31, 32) Ug sa basahon sa Pinadayag, atong mabasa ang tataw nga kahubitan nianang kataposang kalaglagan. (Pinadayag 19:11-21) Ingong mga indibiduwal, kita nagsundog kang Noe ug aktibong nagawali sa pagkamatarong. Kita nagtagad sa mga pasidaan ni Jehova ug mahigugmaong nagtabang sa atong mga silingan sa pagbuhat usab niana. Busa, sama kang Noe, kita naglakaw uban sa Diyos. Sa pagkatinuod, hinungdanon nga si bisan kinsa nga gustong mabuhi magpadayon sa paglakaw uban sa Diyos. Sa unsang paagi mahimo nato kana bisan pa sa mga kapit-os nga atong giatubang kada adlaw? Kinahanglang ugmaron nato ang lig-ong pagtuo sa katumanan sa katuyoan sa Diyos.—Hebreohanon 11:6.
Padayon sa Paglakaw Uban sa Diyos sa Magubot nga Panahon
11. Sa unsang paagi masundog nato ang unang-siglong mga Kristohanon?
11 Sa unang siglo, ang dinihogang mga Kristohanon gihisgotan ingong iya sa “Dalan.” (Buhat 9:2) Ang ilang tibuok nga dalan sa kinabuhi nasentro diha sa pagtuo kang Jehova ug kang Jesu-Kristo. Sila naglakaw diha sa dalan nga gilaktan sa ilang Agalon. Karon, mao usab kanay gibuhat sa matinumanong mga Kristohanon.
12. Unsay nahitabo human pakan-a ni Jesus sa milagrosong paagi ang panon sa katawhan?
12 Ang kahinungdanon sa pagtuo makita diha sa usa ka hitabo panahon sa ministeryo ni Jesus. Sa usa ka higayon, gipakaon ni Jesus sa milagrosong paagi ang usa ka panon sa mga 5,000 ka lalaki. Ang mga tawo natingala ug nalipay. Apan, matikdi kon unsay sunod nga nahitabo. Atong mabasa: “Sa dihang nakita sa mga tawo ang mga ilhanan nga iyang gihimo, sila miingon: ‘Kini siya mao gayod ang manalagna nga moanhi sa kalibotan.’ Busa si Jesus, kay nahibalo nga sila moduol na ug mosakmit kaniya aron himoon siyang hari, mipahawa na usab paingon sa bukid nga nag-inusara.” (Juan 6:10-15) Nianang gabhiona miadto siya sa laing dapit. Lagmit nga daghan ang nahigawad sa dihang midumili si Jesus nga mahimong hari. Kon buot hunahunaon, iyang gipakita nga siya may kaalam nga takos mahimong hari ug siya may gahom nga makatagbaw sa pisikal nga mga panginahanglan sa mga tawo. Apan, dili pa panahon nga magmando siya ingong Hari sumala sa orasan ni Jehova. Gawas pa, ang Gingharian ni Jesus maoy langitnon, dili yutan-on.
13, 14. Unsang panglantaw ang gipakita sa daghan, ug sa unsang paagi nasulayan ang ilang pagtuo?
13 Bisan pa niana, ang mga panon sa katawhan determinadong misunod kang Jesus ug ilang nakaplagan siya, sumala sa giingon ni Juan, “sa tabok sa dagat.” Nganong misunod man sila kaniya human niya isalikway ang ilang mga paningkamot nga himoon siyang hari? Daghan ang nagpakita ug unodnong panglantaw, nga way-lipodlipod nga naghisgot sa pagkaon nga gitagana ni Jehova sa kamingawan sa adlaw ni Moises. Ilang gipasumbingay nga si Jesus kinahanglang magpadayon sa pagtaganag pagkaon kanila. Kay nakasabot sa ilang sayop nga mga motibo, si Jesus nagsugod sa pagtudlo kanila ug espirituwal nga mga kamatuoran nga makatabang sa pagtul-id sa ilang panghunahuna. (Juan 6:17, 24, 25, 30, 31, 35-40) Ingong sanong, ang uban nagbagulbol batok kaniya, ilabina sa dihang iyang gisulti kining maong ilustrasyon: “Sa pagkatinuod gayod ako magaingon kaninyo, Gawas kon kamo mokaon sa unod sa Anak sa tawo ug moinom sa iyang dugo, kamo walay kinabuhi diha sa inyong kaugalingon. Siya nga mokaon sa akong unod ug moinom sa akong dugo adunay kinabuhing walay kataposan, ug pagabanhawon ko siya sa kataposang adlaw.”—Juan 6:53, 54.
14 Ang mga ilustrasyon ni Jesus subsob nga nagpalihok sa mga tawo sa pagpakita kon gusto ba gayod nilang molakaw uban sa Diyos o dili. Mao usab kiniy epekto niining ilustrasyona. Kini nagpatungha ug lainlaing reaksiyon. Atong mabasa: “Daghan sa iyang mga tinun-an, sa nadungog nila kini, miingon: ‘Kining mga pulonga makapakugang; kinsa ang makapatalinghog niini?’” Mipadayon si Jesus sa pagpatin-aw nga kinahanglang susihon nila ang espirituwal nga kahulogan sa iyang mga pulong. Siya miingon: “Ang espiritu mao ang naghatag-kinabuhi; ang unod wala gayoy kapuslanan. Ang mga pulong nga gisulti ko kaninyo maoy espiritu ug kinabuhi.” Bisan pa niana, daghan ang wala mamati, ug ang asoy nag-ingon: “Tungod niini daghan sa iyang mga tinun-an ang namalik ngadto sa mga butang nga ilang gitalikdan ug wala na molakaw kauban niya.”—Juan 6:60, 63, 66.
15. Unsang hustong panglantaw ang nabatonan sa pipila ka mga sumusunod ni Jesus?
15 Bisan pa niana, dili tanang tinun-an ni Jesus ang ingon nianag reaksiyon. Tinuod nga ang maunongong mga tinun-an wala kaayo makasabot sa giingon ni Jesus. Bisan pa niana, hugot gihapon ang ilang pagsalig kaniya. Si Pedro, nga usa niadtong maunongong mga tinun-an, nagpahayag sa pagbati sa tanang tinun-an nga nagpabilin uban kang Jesus sa dihang siya miingon: “Ginoo, kang kinsa man kami moadto? Ikaw mao ang may mga pulong mahitungod sa kinabuhing walay kataposan.” (Juan 6:68) Pagkamaayong tinamdan ug panig-ingnan!
16. Sa unsang paagi kita masulayan, ug unsang hustong panglantaw ang angay natong ugmaron?
16 Kita usab karon masulayan sama niadtong unang mga tinun-an. Sa atong kahimtang, mahigawad tingali kita nga ang mga saad ni Jehova wala dayon matuman sa panahon nga gusto natong matuman kana. Tingali maglisod kita sa pagsabot sa mga Kasulatan nga gipatin-aw diha sa atong binase-sa-Bibliya nga mga publikasyon. Ang panggawi sa usa ka isigka-Kristohanon makapahigawad tingali kanato. Husto ba nga mohunong sa paglakaw uban sa Diyos tungod niini o sa susamang mga rason? Siyempre dili! Ang mga tinun-an nga mibiya kang Jesus nagpakita ug unodnong paagi sa paghunahuna. Kinahanglang likayan nato ang pagbuhat niana.
“Dili Kita ang Matang nga Mosibog”
17. Sa unsang paagi kita matabangan sa pagpadayon paglakaw uban sa Diyos?
17 Si apostol Pablo misulat: “Ang tibuok Kasulatan inspirado sa Diyos.” (2 Timoteo 3:16) Pinaagi sa mga panid sa Bibliya, klaro kitang giingnan ni Jehova: “Mao kini ang dalan. Lakaw kamo niini.” (Isaias 30:21) Ang pagsunod sa Pulong sa Diyos motabang kanato sa ‘pagbantay pag-ayo sa atong paglakaw.’ (Efeso 5:15) Ang pagtuon sa Bibliya ug ang pagpamalandong sa atong nakat-onan makapaarang kanato sa ‘pagpadayon sa paglakaw diha sa kamatuoran.’ (3 Juan 3) Sa pagkatinuod, sumala sa giingon ni Jesus, “ang espiritu . . . nagahatag ug kinabuhi; ang unod wala gayoy kapuslanan.” Ang kasaligan lamang nga giya nga magtultol sa atong mga lakang mao ang espirituwal nga giya, nga naggikan sa Pulong ni Jehova, iyang espiritu, ug sa iyang organisasyon.
18. (a) Unsay dili maalamong ginabuhat sa uban? (b) Unsang matanga sa pagtuo ang atong ugmaron?
18 Karon, kadtong nahimong diskontento tungod sa unodnong panghunahuna o sa wala matuman nga mga panahom subsob nga magpahimulos na lang sa bug-os sa mga butang nga gitanyag sa kalibotan. Kay nawad-an sila sa pagbati sa pagkadinalian, wala nila makita ang panginahanglan nga “magpadayon sa pagbantay,” ug sila mipili sa pagpangagpas sa hakog nga mga tumong inay unahon ang mga intereses sa Gingharian. (Mateo 24:42) Ang paglakaw nianang paagiha dili gayod maalamon. Matikdi ang giingon ni apostol Pablo: “Dili kita ang matang nga mosibog ngadto sa kalaglagan, kondili ang matang nga adunay pagtuo ngadto sa pagtipig nga buhi sa kalag.” (Hebreohanon 10:39) Sama kang Enoc ug Noe, kita nagkinabuhi sa gubot nga mga panahon, apan sama kanila, kita nakapribilehiyo sa paglakaw uban sa Diyos. Sa pagbuhat niana, kita makalaom gayod nga makita nato nga matuman ang mga saad ni Jehova, mahanaw ang pagkadaotan, ug matukod ang usa ka bag-ong kalibotan. Pagkanindot nga palaaboton!
19. Sa unsang paagi gihubit ni Miqueas ang dalan sa matuod nga mga magsisimba?
19 Ang inspiradong manalagna nga si Miqueas miingon nga ang mga nasod sa kalibotan “magalakaw ang tagsatagsa sa ngalan sa iyang diyos.” Dayon iyang gihisgotan ang iyang kaugalingon ug ang ubang matinumanong mga magsisimba ug miingon: “Kita, sa atong bahin, magalakaw sa ngalan ni Jehova nga atong Diyos hangtod sa panahong walay tino, bisan hangtod sa kahangtoran.” (Miqueas 4:5) Kon ang imong determinasyon susama sa iya ni Miqueas, magpabiling suod kang Jehova bisan unsa pa ka gubot ang panahon. (Santiago 4:8) Hinaot nga maoy kinasingkasing nga tinguha sa matag usa kanato ang paglakaw uban kang Jehova nga atong Diyos karon ug sa panahong walay tino, bisan hangtod sa kahangtoran!
Unsaon Nimo Pagtubag?
• Unsay kasamahan tali sa adlaw ni Noe ug karon?
• Unsang dalan ang gisubay ni Noe ug sa iyang pamilya, ug sa unsang paagi masundog nato ang ilang pagtuo?
• Unsang sayop nga panglantaw ang gipakita sa pipila ka sumusunod ni Jesus?
• Unsay determinadong buhaton sa matuod nga mga Kristohanon?
[Mga Pangutana sa Pagtuon]
[Mga hulagway sa panid 20]
Sama sa adlaw ni Noe, ang mga tawo karon nalinga sa ilang adlaw-adlaw nga mga kalihokan
[Hulagway sa panid 21]
Ingong mga magwawali sa Gingharian, “dili kita ang matang nga mosibog”