Lakaw Uban sa Diyos Niining Magubot nga Panahon
Lakaw Uban sa Diyos Niining Magubot nga Panahon
“Si Enoc nagpadayon sa paglakaw uban sa matuod nga Diyos. Unya siya wala na, kay gikuha man siya sa Diyos.”—GENESIS 5:24.
1. Unsa ang pipila ka kahimtang nga nakapalisod sa atong panahon?
MAGUBOT nga panahon! Kanang mga pulonga maoy haom nga kahubitan sa kasamok ug kapintasan nga naagoman sa katawhan sa daghang katuigan sukad sa pagkatukod sa Mesiyanikong Gingharian sa 1914. Nianang panahona, ang mga tawo anaa na sa “kataposang mga adlaw.” Ang mga kalamidad sama sa gutom, sakit, linog, ug gubat naghampak kanila sa sukod nga wala pa hitupngi. (2 Timoteo 3:1; Pinadayag 6:1-8) Kadtong nagasimba kang Jehova apektado usab niana. Sa usa ka sukod, kitang tanan kinahanglang mosagubang sa mga kalisdanan ug kawalay-kasegurohan sa atong panahon. Ang kalisod sa ekonomiya, kagubot sa politika, krimen, ug sakit nalakip sa mga butang nga nakapalisod kaayo sa kinabuhi.
2. Unsang mga hagit ang giatubang sa mga alagad ni Jehova?
2 Gawas pa, daghan sa mga alagad ni Jehova ang nag-antos ug grabeng mga paglutos tungod kay si Satanas nagpadayon sa pagpakiggubat niadtong “nagbantay sa sugo sa Diyos ug may buluhaton sa pagpamatuod bahin kang Jesus.” (Pinadayag 12:17) Ug bisan tuod dili kitang tanan ang nag-antos ug direktang paglutos, ang tanang matuod nga mga Kristohanon kinahanglang makigbisog kang Satanas nga Yawa ug sa espiritu nga iyang gipalambo taliwala sa katawhan. (Efeso 2:2; 6:12) Kinahanglang magbantay kanunay aron dili maimpluwensiyahan nianang maong espiritu, tungod kay anaa kana sa trabahoan, sa eskuylahan, ug sa bisan unsang dapit nga makauban nato kadtong walay interes sa putli nga pagsimba.
Lakaw Uban sa Diyos, Dili Uban sa mga Nasod
3, 4. Sa unsang paagi ang mga Kristohanon lahi sa kalibotan?
3 Sa unang siglo, ang mga Kristohanon nakigbugno usab pag-ayo batok sa espiritu niining kalibotana, ug tungod niana sila nahimong lahi kaayo niadtong anaa sa gawas sa Kristohanong kongregasyon. Gihubit ni Pablo ang kalainan sa dihang siya misulat: “Busa, ako mosulti ug magpamatuod niini diha sa Ginoo, nga kamo dili na magpadayon sa paglakaw sama sa paglakaw usab sa kanasoran diha sa pagkawalay-pulos sa ilang mga kaisipan, samtang sila anaa sa kangitngit sa kaisipan, ug nahimulag sa kinabuhi nga iya sa Diyos, tungod sa kawalay-alamag nga anaa kanila, tungod sa pagkakubol sa ilang mga kasingkasing. Nga nawad-an na sa tanang moral nga pagbati, ilang gitugyan ang ilang kaugalingon sa malaw-ay nga panggawi sa pagbuhat sa tanang matang sa kahugawan uban ang kadalo.”—Efeso 4:17-19.
4 Klaro kaayo kana nga kahubitan sa mabaga nga espirituwal ug moral nga kangitngit niining kalibotana—sa adlaw ni Pablo ug sa atoa! Sama sa unang siglo, ang mga Kristohanon karon wala ‘magpadayon sa paglakaw sama sa paglakaw sa kanasoran.’ Hinunoa, nabatonan nila ang maanindot kaayong pribilehiyo nga maglakaw uban sa Diyos. Tinuod, ang ubang mga tawo magduhaduha tingali kon makataronganon ba ang pag-ingon nga ang ubos, dili-hingpit nga mga tawo makalakaw uban kang Jehova. Apan, gipakita sa Bibliya nga posible kana. Dugang pa, gidahom ni Jehova nga buhaton nila kana. Sa ikawalong siglo una pa sa atong Komong Panahon, ang manalagnang si Miqueas misulat sa mosunod nga inspiradong mga pulong: “Unsa ba ang gipangayo ni Jehova kanimo kondili ang pagbuhat sa hustisya ug ang paghigugma sa kalulot ug ang paglakaw nga makasaranganon uban sa imong Diyos?”—Miqueas 6:8.
Sa Unsang Paagi ug Ngano nga Molakaw Uban sa Diyos?
5. Sa unsang paagi ang dili-hingpit nga mga tawo makalakaw uban sa Diyos?
5 Sa unsang paagi kita makalakaw uban sa gamhanan-sa-tanan, dili makita nga Diyos? Dayag nga dili kini sama sa paagi sa atong paglakaw uban sa mga tawo. Sa Bibliya ang pulong nga “paglakaw” mahimong magpasabot ug “pagsubay sa usa ka pamaagi.” a Kay nasayod niini, atong masabtan nga ang usa nga nagalakaw uban sa Diyos nagasubay sa paagi sa kinabuhi nga gilatid sa Diyos ug usa nga makapahimuot kaniya. Ang pagsubay sa maong paagi sa kinabuhi maghimo kanatong lahi sa kadaghanang tawo sa atong palibot. Bisan pa niana, mao lamang kana ang paagi sa kinabuhi nga angayng pilion sa usa ka Kristohanon. Ngano? Adunay daghang rason.
6, 7. Nganong ang paglakaw uban sa Diyos mao ang kinamaayohang paagi sa pagkinabuhi?
6 Una, si Jehova mao ang atong Maglalalang, ang Tuboran sa atong kinabuhi, ug ang Magtatagana sa tanan nga atong gikinahanglan aron mabuhi. (Pinadayag 4:11) Tungod niini, siya lamang ang adunay katungod sa pagsulti kon sa unsang paagi kita magalakaw. Gawas pa, ang paglakaw uban sa Diyos mao ang labing mapuslanong paagi sa pagkinabuhi nga posible. Alang niadtong nagalakaw uban kaniya, si Jehova naghimog kahikayan nga mapasaylo ang ilang sala, ug siya nagtanyag sa seguradong paglaom nga mabuhi sa walay kataposan. Ang atong mahigugmaon-sa-tanan nga langitnong Amahan nagtagana usab ug maalamong tambag nga motabang niadtong nagalakaw uban kaniya nga magmalamposon sa kinabuhi karon, bisan pag sila dili hingpit ug nagkinabuhi sa kalibotan nga nailalom sa gahom ni Satanas. (Juan 3:16; 2 Timoteo 3:15, 16; 1 Juan 1:8; 2:25; 5:19) Ang laing rason sa paglakaw uban sa Diyos mao nga ang atong pagkaandam nga mobuhat niana makapalambo sa pakigdait ug panaghiusa sa kongregasyon.—Colosas 3:15, 16.
7 Ang kataposan ug ang labing hinungdanong rason mao nga sa dihang kita nagalakaw uban sa Diyos, atong gipakita kon asa kita nagbarog labot sa dakong isyu nga gipatungha didto sa tanaman sa Eden—ang isyu sa pagkasoberano. (Genesis 3:1-6) Atong gipasundayag pinaagi sa atong paagi sa pagkinabuhi nga kita bug-os nga midapig kang Jehova, ug kita maisogong nagmantala nga siya lamang ang takos nga mahimong Soberano. (Salmo 83:18) Sa ingon kita nagalihok nga kaharmonya sa atong pag-ampo nga pagabalaanon unta ang ngalan sa Diyos ug matuman unta ang iyang kabubut-on. (Mateo 6:9, 10) Pagkamaalamon niadtong mopili sa paglakaw uban sa Diyos! Sila makaseguro nga sila nagalakaw sa hustong direksiyon, tungod kay si Jehova ang “bugtong maalamon.” Dili gayod siya masayop.—Roma 16:27.
8. Sa unsang paagi ang panahon ni Enoc ug Noe susama sa atong panahon?
8 Apan, posible ba nga magkinabuhi ingong Kristohanon sa dihang ang panahon gubot kaayo ug ang kadaghanan sa mga tawo walay interes sa pag-alagad kang Jehova? Mahibaloan nato ang tubag kon tagdon nato ang matinumanong mga tawo sa kakaraanan nga naghupot sa ilang integridad bisan pa sa malisod kaayong panahon. Ang duha kanila mao sila si Enoc ug Noe. Silang duha nagkinabuhi sa panahon nga susama gayod sa atoa. Kaylap kaniadto ang pagkadaotan. Sa adlaw ni Noe ang yuta napuno sa kapintasan ug imoralidad. Bisan pa niana, si Enoc ug Noe nakigbisog sa espiritu sa kalibotan sa ilang panahon ug naglakaw uban sa Diyos. Sa unsang paagi nahimo nila kana? Aron matubag ang maong pangutana, atong hisgotan ang panig-ingnan ni Enoc niining artikuloha. Sa sunod nga artikulo, atong hisgotan si Noe.
Si Enoc Naglakaw Uban sa Diyos sa Magubot nga Panahon
9. Unsang impormasyon ang atong nabatonan bahin kang Enoc?
9 Si Enoc ang unang tawo nga gihubit sa Kasulatan ingong naglakaw uban sa Diyos. Ang rekord sa Bibliya nag-ingon: “Human siya manganak kang Matusalem si Enoc nagpadayon sa paglakaw uban sa matuod nga Diyos.” (Genesis 5:22) Unya, human magtaho bahin sa gitas-on sa kinabuhi ni Enoc—nga, bisan tuod taas kini kon itandi sa gitas-on sa atong kinabuhi, kini mubo ra niadtong mga adlawa—ang rekord nag-ingon: “Si Enoc nagpadayon sa paglakaw uban sa matuod nga Diyos. Unya siya wala na, kay gikuha man siya sa Diyos.” (Genesis 5:24) Dayag nga gilalin ni Jehova si Enoc gikan sa yuta sa mga buhi ngadto sa pagkatulog sa kamatayon sa dili pa siya mapatay sa mga magsusupak. (Hebreohanon 11:5, 13) Gawas nianang mugbong mga bersikulo, pipila ka beses lamang nga gihisgotan si Enoc diha sa Bibliya. Bisan pa niana, gikan sa impormasyon nga atong nabatonan ug nianang gipaila sa ubang mga asoy, kita makataronganong makaingon nga magubot ang panahon nga gikinabuhian ni Enoc.
10, 11. (a) Sa unsang paagi ang kadunotan mikaylap human sa pagrebelde ni Adan ug Eva? (b) Unsang matagnaong mensahe ang gisangyaw ni Enoc, ug unsay reaksiyon sa mga tawo niini?
10 Tagda, pananglitan, kon unsa ka dali ang pagkaylap sa kadunotan diha sa tawhanong rasa human makasala si Adan. Ang Bibliya nag-ingon nga ang panganay ni Adan nga si Cain nahimong unang tawhanong mamumuno sa dihang iyang gipatay ang iyang igsoon nga si Abel. (Genesis 4:8-10) Human sa pagbuno kang Abel, laing anak nga lalaki ang natawo kang Adan ug Eva, ug ilang ginganlan siya ug Seth. Bahin kaniya, atong mabasa: “Kang Set usab may natawong anak nga lalaki ug iyang gitawag ang iyang ngalan nga Enos. Nianang panahona gisugdan ang pagtawag sa ngalan ni Jehova.” (Genesis 4:25, 26) Ikasubo, ang maong “pagtawag sa ngalan ni Jehova” gihimo sa apostata nga paagi. b Daghang tuig human sa pagkatawo ni Enos, usa ka kaliwat ni Cain nga ginganlag Lamek nagkomposo ug awit alang sa iyang duha ka asawa nga nagpahayag nga siya nakapatay ug batan-ong lalaki ug nagsamad sa lain. Siya usab nagpasidaan: “Kon pito ka pilo si Cain panimaslan, nan si Lamek kapitoan ka pilo ug pito.”—Genesis 4:10, 19, 23, 24.
11 Ang maong mugbong mga impormasyon sama sa nahisgotan na nagpaila nga ang kadunotan nga gisugdan ni Satanas sa tanaman sa Eden dali rang misangpot sa pagkaylap sa pagkadaotan taliwala sa mga kaliwat ni Adan. Sa maong kahimtang, si Enoc maoy usa ka manalagna ni Jehova kansang puwersadong inspirado nga mga pulong mapadapat gihapon hangtod karon. Si Judas nagtaho nga si Enoc nagtagna: “Tan-awa! Si Jehova miabot uban sa iyang balaang mga tinagpulo ka libo, aron ipahamtang ang paghukom batok sa tanan, ug aron hukmang sad-an ang tanang dili-diyosnon labot sa tanan nilang dili-diyosnong binuhatan nga ilang gibuhat sa dili-diyosnong paagi, ug labot sa tanang makalilisang nga mga butang nga gisulti sa dili-diyosnong mga makasasala batok kaniya.” (Judas 14, 15) Kanang mga pulonga bug-os nga matuman sa Armagedon. (Pinadayag 16:14, 16) Bisan pa niana, makaseguro kita nga bisan sa adlaw ni Enoc, dihay daghang “dili-diyosnong mga makasasala” nga nasuko tungod sa gitagna ni Enoc. Pagpakita gayod ug gugma ang paglalin ni Jehova sa manalagna aron dili nila siya mapatay!
Unsay Nagpalig-on Kang Enoc sa Paglakaw Uban sa Diyos?
12. Unsay nakapalahi kang Enoc sa iyang mga katalirongan?
12 Balik sa tanaman sa Eden, si Adan ug Eva namati kang Satanas, ug si Adan mirebelde kang Jehova. (Genesis 3:1-6) Ang ilang anak nga si Abel misubay ug lahi nga dalan, ug si Jehova may pag-uyon kaniya. (Genesis 4:3, 4) Ikasubo, ang kadaghanan sa mga kaliwat ni Adan dili sama kang Abel. Apan, si Enoc, nga natawo gatosan ka tuig sa ulahi, maoy sama kang Abel. Unsay kalainan tali kang Enoc ug sa daghang ubang kaliwat ni Adan? Gitubag ni apostol Pablo kanang pangutanaha sa dihang siya misulat: “Tungod sa pagtuo si Enoc gilalin aron dili makaagom ug kamatayon, ug wala na siya hikaplagi tungod kay siya gilalin sa Diyos; kay sa wala pa siya ilalin siya gipamatud-an nga siya nakapahimuot sa Diyos.” (Hebreohanon 11:5) Si Enoc maoy bahin sa dakong “panganod sa [una-Kristohanong] mga saksi,” nga maayo kaayong mga panig-ingnan sa pagtuo. (Hebreohanon 12:1) Tungod sa pagtuo, si Enoc naghupot ug maayong panggawi sa tibuok niyang kinabuhi nga kapin sa 300 ka tuig—kapin sa tulo ka pilo sa gitas-on sa kinabuhi sa kadaghanan kanato karon!
13. Unsang matanga sa pagtuo ang nabatonan ni Enoc?
13 Gihubit ni Pablo ang pagtuo ni Enoc ug sa ubang mga saksi sa dihang siya misulat: “Ang pagtuo mao ang masaligan nga pagpaabot sa mga butang nga gilaoman, ang dayag nga pagpasundayag sa mga katinuoran bisan tuod wala makita.” (Hebreohanon 11:1) Oo, ang pagtuo mao ang masaligong pagpaabot, nga gipasukad sa mga pasalig, nga ang mga butang nga gilaoman moabot gayod. Nalangkit niini ang mahinamon kaayong pagpaabot nga kini makaapektar kon unsay atong giisip nga labing hinungdanon sa atong kinabuhi. Tungod nianang matanga sa pagtuo, si Enoc nakalakaw uban sa Diyos bisan pag ang mga tawo sa iyang palibot wala maglakaw uban sa Diyos.
14. Sa unsang tukmang kahibalo nga lagmit gipasukad ni Enoc ang iyang pagtuo?
14 Ang tinuod nga pagtuo gipasukad sa tukmang kahibalo. Unsang kahibaloa ang nabatonan ni Enoc? (Roma 10:14, 17; 1 Timoteo 2:4) Sa walay duhaduha, nahibalo siya sa mga panghitabo sa Eden. Lagmit, nadunggan usab niya kon sama sa unsa ang kinabuhi didto sa tanaman sa Eden—nga tingali naglungtad pa niadtong panahona, apan wala na pasudli sa mga tawo. (Genesis 3:23, 24) Ug nahibalo siya sa katuyoan sa Diyos nga pun-on sa mga anak ni Adan ang yuta ug himoon nila ang tibuok planeta nga sama niadtong orihinal nga Paraiso. (Genesis 1:28) Gawas pa, seguradong gipabilhan ni Enoc ang saad ni Jehova sa pagpatungha ug Binhi nga magdugmok sa ulo ni Satanas ug magwagtang sa daotang mga epekto sa pagpanglimbong nga gihimo ni Satanas. (Genesis 3:15) Sa pagkatinuod, ang inspiradong tagna ni Enoc, nga gitipigan diha sa basahon sa Judas, adunay kalabotan sa kalaglagan sa binhi ni Satanas. Tungod kay si Enoc adunay pagtuo, kita nahibalo nga siya nagsimba kang Jehova ingong ang usa nga “tigganti sa mga matinuorong nagapangita kaniya.” (Hebreohanon 11:6) Busa, bisan tuod wala mahupti ni Enoc ang tanang kahibalo nga atong nahuptan, iyang nabatonan ang kahibalo nga igo nang mahimong pundasyon sa usa ka lig-ong pagtuo. Pinaagi nianang maong pagtuo, iyang nahuptan ang iyang integridad sa magubot nga panahon.
Sundoga ang Panig-ingnan ni Enoc
15, 16. Sa unsang paagi masundog nato ang paagi sa pagkinabuhi ni Enoc?
15 Tungod kay, sama kang Enoc, buot natong pahimut-an si Jehova niining magubot nga panahon karon, angay natong sundogon ang panig-ingnan ni Enoc. Kinahanglang mahuptan nato ang tukmang kahibalo bahin kang Jehova ug sa iyang katuyoan. Apan labaw pa ang atong gikinahanglan. Kinahanglang tugotan nato kanang tukmang kahibalo nga magtultol sa atong dalan. (Salmo 119:101; 2 Pedro 1:19) Kinahanglang magiyahan kita sa panghunahuna sa Diyos, nga maningkamot kanunay sa pagpahimuot kaniya pinaagi sa tanan natong hunahuna ug mga lihok.
16 Wala kitay rekord kon kinsa pa sa panahon ni Enoc ang nag-alagad kang Jehova, apan klaro nga siya nag-inusara o kaha bahin sa usa ka gamayng grupo. Kita usab diyutay lang kon itandi sa kalibotan, apan dili kana angayng makapahigawad kanato. Tabangan kita ni Jehova bisan kinsa pay makigbatok kanato. (Roma 8:31) Si Enoc maisogong nagpasidaan bahin sa umaabot nga kalaglagan sa mga tawong dili diyosnon. Kita usab maisogon samtang nagasangyaw ‘niining maayong balita sa gingharian’ bisan pa sa pagbiaybiay, pagsupak, ug paglutos. (Mateo 24:14) Ang kinabuhi ni Enoc mas mubo kon itandi sa kadaghanan sa iyang mga katalirongan. Bisan pa niana, ang iyang paglaom wala niadtong kalibotana. Ang iyang mata nagtutok sa usa ka butang nga mas maanindot pa. (Hebreohanon 11:10, 35) Ang atong mata usab nagatutok sa katumanan sa katuyoan ni Jehova. Busa, dili nato gamiton sa bug-os kining kalibotana. (1 Corinto 7:31) Hinunoa, gamiton nato ang atong kusog ug mga kahinguhaan ilabina diha sa pag-alagad kang Jehova.
17. Unsang kahibalo ang atong nabatonan nga wala mabatoni ni Enoc, busa unsay angay natong buhaton?
17 Si Enoc nagtuo nga ang Binhi nga gisaad sa Diyos motungha sa gitakdang panahon ni Jehova. Duolan na sa 2,000 ka tuig karon sukad kanang maong Binhi—si Jesu-Kristo—mitungha, nagtagana sa lukat, ug nagbukas sa dalan alang kanato, maingon man sa matinumanong karaang mga saksi sama kang Enoc, nga makapanunod ug kinabuhing walay kataposan. Ang maong Binhi, nga karon naentrono na ingong Hari sa Gingharian sa Diyos, nagtambog kang Satanas dinhi sa yuta, ug atong nakita ang misangpot nga kasakitan sa atong palibot. (Pinadayag 12:12) Oo, mas daghang kahibalo ang atong mabatonan karon kay sa panahon ni Enoc. Nan, hinaot nga batonan nato ang lig-ong pagtuo sama kaniya. Hinaot nga ang atong pagsalig sa katumanan sa mga saad sa Diyos mag-impluwensiya sa tanan natong pagabuhaton. Hinaot kita, sama kang Enoc, magalakaw uban sa Diyos, bisag kita nagkinabuhi sa magubot nga panahon.
[Mga footnote]
a Tan-awa ang Tomo 1, panid 220, parapo 6, sa Insight on the Scriptures, nga gipatik sa mga Saksi ni Jehova.
b Una pa sa mga adlaw ni Enos, si Jehova nakigsulti kang Adan. Si Abel nagtanyag ug halad nga giuyonan ni Jehova. Ang Diyos nakigsulti gani kang Cain sa wala pa makapatay si Cain tungod sa masinahong kasuko. Busa, kining pagsugod sa “pagtawag sa ngalan ni Jehova” lagmit gihimo sa lahi nga paagi, dili sa putli nga pagsimba.
Unsaon Nimo Pagtubag?
• Unsay kahulogan sa paglakaw uban sa Diyos?
• Nganong ang paglakaw uban sa Diyos mao ang labing maayong paagi sa pagkinabuhi?
• Unsay nakapaarang kang Enoc sa paglakaw uban sa Diyos bisan pa sa magubot nga panahon?
• Sa unsang paagi masundog nato si Enoc?
[Mga Pangutana sa Pagtuon]
[Hulagway sa panid 15]
Tungod sa pagtuo, “si Enoc naglakaw uban sa matuod nga Diyos”
[Hulagway sa panid 17]
Kita hugot nga nagtuo nga ang mga saad ni Jehova matuman
[Picture Credit Lines sa panid 13]
Woman, far right: FAO photo/B. Imevbore; collapsing building: San Hong R-C Picture Company