Mapuslanon ba nga Magmaunongon?
Mapuslanon ba nga Magmaunongon?
“DAKO ra kaayo kag ginabayran sa imong insyurans sa panglawas,” miingon si Karl, usa ka ahente sa insyurans. a “Kon mobalhin ka sa among kompaniya, makadaginot kag 20 dolyares kada bulan, ug dako kaayo kana.”
“Tinuod tingali kana,” tubag ni Jens. “Apan dugay na kong nagkuhag insyurans sa panglawas niining kompaniyaha. Matinabangon kaayo sila sa miagi, ug gusto nakong magmaunongon kanila.”
“Maayo nga hiyas ang pagkamaunongon,” tubag ni Karl. “Apan, nawad-an kag dakong kantidad sa salapi tungod sa imong pagkamaunongon nianang kompaniyaha!”
Husto si Karl. Kasagaran, ang pagkamaunongon, lagmit nga mokostar ug salapi. Nanginahanglan usab kinig panahon, kusog, ug pagkakomitido. Mapuslanon ba ang pagkamaunongon?
Daghan ang Nakadayeg Niining Hiyasa Apan Diyutay ra ang Naghimo Niini
Sa usa ka surbi nga gipahigayon didto sa Alemanya sa Allensbach Opinion Research Institute, 96 porsiyento niadtong gisukna naglantaw sa pagkamaunongon ingong usa ka tilinguhaong hiyas. Ang sunod nga surbi nga gihimo sa Allensbach taliwala niadtong nag-edad ug 18 ngadto sa 24 anyos nagpakita nga 2 sa 3 nga gisukna nakadayeg sa pagkamaunongon.
Bisan tuod daghan ang nakadayeg sa pagkamaunongon, wala kana magpasabot nga daghan ang nagmaunongon. Pananglitan, sa daghang nasod sa Uropa, ang mga magtiayon o mga membro sa pamilya kasagarang dili maunongon sa usag usa. Ang managhigala subsob nga dili maunongon sa usag usa. Ug ang pagkamaunongon nga nagbugkos kaniadto sa agalon ug empleyado o kaha sa usa ka negosyo ug sa mga kustomer niini nahanaw na. Ngano man?
Usahay, tungod sa kapuliki sa atong kinabuhi, wala na kitay panahon o emosyonal nga kalig-on alang sa mga relasyon nga nanginahanglag pagkamaunongon. Ang mga tawong gibudhian kaniadto tingalig magpanuko na sa pagpabiling maunongon kang bisan kinsa. Ang uban dili gustog permanenteng relasyon aron dili sila maobligar nga magmaunongon.
Bisan unsa pa may hinungdan, daghan ang nakadayeg sa pagkamaunongon apan diyutay ra ang naghimo niini. Busa, angay natong tagdon ang mosunod nga mga pangutana: Mapuslanon ba nga magmaunongon? Kon mao, kang kinsa kita angayng magmaunongon, ug sa unsang mga paagi? Unsay mga kaayohan sa pagkamaunongon?
[Footnote]
a Ang ubang mga ngalan niini ug sa mosunod nga artikulo giilisdan.
[Blurb sa panid 3]
Daghan ang nakadayeg sa pagkamaunongon apan diyutay ra ang naghimo niini