Mga Pangutana Gikan sa mga Magbabasa

Unsay pasikaranan sa pag-ingon nga ang mga pamulong sama sa “[siya] mao lamang ang nagbaton sa pagkawalay-kamatayon” ug ang usa nga “kaniya walay tawo nga nakakita o makakita” nagtumong kang Jesus inay kang Jehova nga Diyos?

Si apostol Pablo misulat: “Kini nga pagpadayag ipakita sa malipayon ug bugtong Magmamando sa tinudlong mga panahon niini, siya nga Hari sa mga nagmando ingong mga hari ug Ginoo sa mga nagmando ingong mga ginoo, nga mao lamang ang nagbaton sa pagkawalay-kamatayon, nga nagpuyo sa kahayag nga dili-maduol, nga kaniya walay tawo nga nakakita o makakita.”—1 Timoteo 6:15, 16.

Ang mga komentarista sa Bibliya kasagarang mangatarongan: ‘Sa unsang paagi ang mga pamulong nga sama sa “[siya] mao lamang ang nagbaton sa pagkawalay-kamatayon,” ang “bugtong Magmamando,” ug ang usa nga “kaniya walay tawo nga nakakita o makakita” magtumong kang bisan kinsa gawas sa Labing Gamhanan?’ Tinuod, ang maong mga termino mahimong gamiton sa paghubit kang Jehova. Apan, ang konteksto nagpaila nga sa 1 Timoteo 6:15, 16, si Pablo espesipikong nagtumong kang Jesus.

Sa kataposan sa bersikulo 14, si Pablo naghisgot “sa pagpadayag sa atong Ginoong Jesu-Kristo.” (1 Timoteo 6:14) Busa, sa dihang si Pablo misulat diha sa bersikulo 15 nga “kini nga pagpadayag ipakita sa malipayon ug bugtong Magmamando sa tinudlong panahon niini,” siya nagtumong sa pagpadayag ni Jesus, dili ni Jehova nga Diyos. Nan, kinsa ang “bugtong Magmamando”? Daw makataronganong mohinapos nga si Jesus mao ang Magmamando nga gitumong ni Pablo. Ngano? Gipatin-aw sa konteksto nga gitandi ni Pablo si Jesus sa tawhanong mga magmamando. Sumala sa gisulat ni Pablo, si Jesus sa pagkatinuod mao ang “Hari sa mga [tawo nga] nagmando ingong mga hari ug Ginoo sa mga [tawo nga] nagmando ingong mga ginoo.” a Oo, kon itandi kanila, si Jesus mao ang “bugtong Magmamando.” Si Jesus gihatagan ug “pagmando ug dignidad ug gingharian, aron ang tanang mga katawhan, nasodnong mga pundok ug mga pinulongan magaalagad gayod kaniya.” (Daniel 7:14) Walay tawhanong magmamando ang makapangangkon niana!

Komosta ang pamulong nga “[siya] mao lamang ang nagbaton sa pagkawalay-kamatayon”? Sa makausa pa, si Jesus gitandi sa tawhanong mga hari. Walay yutan-ong mga magmamando ang makapangangkon nga gihatagan ug pagkawalay-kamatayon, kondili si Jesus lamang. Si Pablo misulat: “Kita nahibalo nga si Kristo, karon nga siya gibangon na gikan sa mga patay, dili na mamatay; ang kamatayon dili na agalon ibabaw kaniya.” (Roma 6:9) Busa, si Jesus mao ang unang giingon sa Bibliya nga nakadawat sa gasa sa pagkawalay-kamatayon. Sa pagkatinuod, sa panahon sa pagsulat niini ni Pablo, si Jesus mao lamang ang gihatagan ug pagkawalay-kamatayon.

Angayng hinumdoman usab nga sayop unta ang pag-ingon ni Pablo nga si Jehova nga Diyos lamang ang walay kamatayon, tungod kay si Jesus usab walay kamatayon sa dihang gisulat ni Pablo kanang mga pulonga. Apan makaingon si Pablo nga si Jesus lamang ang walay kamatayon kon itandi sa yutan-ong mga magmamando.

Dugang pa, tinuod gayod nga human sa pagkabanhaw ug pagsaka ni Jesus sa langit, siya mahubit ingong usa nga “kaniya walay tawong nakakita o makakita.” Tinuod nga ang dinihogang mga tinun-an ni Jesus makakita kaniya human sa ilang kamatayon ug pagkabanhaw ngadto sa langit ingong espiritung mga linalang. (Juan 17:24) Apan walay tawo dinhi sa yuta nga makakita kang Jesus sa iyang hinimayang kahimtang. Busa, tinuod nga ikaingon nga sukad sa pagkabanhaw ug pagsaka ni Jesus sa langit, “walay tawo” nga aktuwal nga nakakita kang Jesus.

Tinuod nga sa unang tan-aw, morag ang mga kahubitan nga makita diha sa 1 Timoteo 6:15, 16 mapadapat sa Diyos. Apan ang konteksto sa mga pulong ni Pablo—duyog sa pamatuod sa ubang mga teksto—nagpakita nga si Jesus mao ang gitumong ni Pablo.

[Footnote]