Tugoting ang “Pulong” ni Jehova Manalipod Kanimo

SA MAKASAYSAYANHONG gubat sa Marathon niadtong 490 W.K.P., mga 10 ka libo ngadto sa 20 ka libong taga-Atenas ang nakigharong sa mas daghan nga Persianong kasundalohan. Ang pangunang bahin sa estratehiya sa mga Grego mao ang phalanx—usa ka bagang tropa sa mga sundalo nga nagdutdotay pagmartsa. Ang ilang mga taming nahisamag usa ka lig-on nga paril nga may nagtuy-od nga mga bangkaw. Ang phalanx maoy naghatag sa mga taga-Atenas sa ilang gibantog nga kadaogan batok sa mas dakong kasundalohan sa mga Persiano.

Ang matuod nga mga Kristohanon nakigsangka diha sa espirituwal nga pagpakiggubat. Sila nakigbisog batok sa gamhanang mga kaaway—ang dili-makitang mga magmamando niining presenteng daotang sistema, nga gihubit sa Bibliya ingong “mga magmamando sa kalibotan niini nga kangitngit, . . . daotang mga puwersa nga espirituhanon sa langitnong mga dapit.” (Efeso 6:12; 1 Juan 5:19) Ang katawhan sa Diyos padayong nagmadaogon—apan dili gumikan sa ilang kaugalingong kusog. Ang tanang kadungganan iya ni Jehova, kinsa nanalipod ug nagatudlo kanila, sumala sa giingon sa Salmo 18:30: “Ang pulong ni Jehova dinalisay. Siya usa ka taming alang sa tanan nga modangop kaniya.”

Oo, pinaagi sa iyang dalisay nga “pulong,” nga nasulat sa Balaang Kasulatan, panalipdan ni Jehova ang iyang maunongong mga alagad batok sa espirituwal nga kadaot. (Salmo 19:7-11; 119:93) Maylabot sa kaalam nga makita diha sa Pulong sa Diyos, si Solomon misulat: “Ayaw kini pagbiyai, ug kini magabantay kanimo. Higugmaa kini, ug kini magapanalipod kanimo.” (Proverbio 4:6; Ecclesiastes 7:12) Sa unsang paagi ang kaalam sa Diyos manalipod kanato? Tagda ang panig-ingnan sa karaang Israel.

Usa ka Katawhan nga Gipanalipdan sa Kaalam sa Diyos

Ang Balaod ni Jehova nanalipod ug naggiya sa mga Israelinhon sa tanang bahin sa ilang kinabuhi. Pananglitan, ang mga lagda labot sa pagkaon, kahinlo, ug pagkuwarentinas nanalipod kanila batok sa mga sakit nga mihampak sa ubang mga nasod. Ang siyensiya nakakab-ot lang ug  samang sukdanan sa Balaod sa Diyos sa dihang nadiskobrehan sa tawo ang bakterya sa ika-19ng siglo. Ang mga balaod bahin sa pagpanag-iyag yuta, pagpalit-pag-usab, pagkanselar sa utang, ug pagpatanto nakahatag ug kaayohan sa kinabuhi sa mga Israelinhon pinaagi sa pagpatunhay sa kasegurohan diha sa katilingban ug sa makiangayon nga sistema sa panalapi. (Deuteronomio 7:12, 15; 15:4, 5) Ang Balaod ni Jehova nakatabang pa gani sa pagpreserbar sa katabunok sa yuta sa Israel! (Exodo 23:10, 11) Ang mga sugo nga nagpahilayo kanila gikan sa bakak nga pagsimba nanalipod sa mga tawo sa espirituwal nga paagi, nga nagpahilayo kanila gikan sa pagpanghasi sa mga demonyo, paghalad ug bata, ug daghan pang ubang kadaotan, gawas pa sa makapaubos-sa-dignidad nga pagyukbo sa mga tawo atubangan sa walay-kinabuhi nga mga idolo.—Exodo 20:3-5; Salmo 115:4-8.

Tin-aw nga ang “pulong” ni Jehova ‘dili kay walay bili nga pulong’ alang sa Israel; hinunoa, kini nagkahulogan ug taas nga kinabuhi alang niadtong nagpatalinghog niini. (Deuteronomio 32:47) Tinuod usab kini karon alang niadtong nagasunod sa maalamong mga pulong ni Jehova, bisan tuod ang mga Kristohanon dili na ilalom sa pakigsaad sa Balaod. (Galacia 3:24, 25; Hebreohanon 8:8) Sa pagkatinuod, ang mga Kristohanon gigiyahan ug gipanalipdan sa mga prinsipyo sa Bibliya, inay sa usa ka kalagdaan sa mga balaod.

Usa ka Katawhan nga Gipanalipdan sa mga Prinsipyo

Usahay, ang mga balaod limitado rag kapadapatan ug temporaryo lang. Apan, ang mga prinsipyo sa Bibliya kasagarang adunay masangkaron ug permanente nga kapadapatan tungod kay gilangkoban man kini ug pasukaranang mga kamatuoran. Tagda, pananglitan, ang prinsipyo nga nasulat sa Santiago 3:17, nga sa bahin nag-ingon: “Ang kaalam nga gikan sa itaas maoy una sa tanan putli, unya makigdaiton.” Sa unsang paagi mapanalipdan niining maong pasukaranang kamatuoran ang katawhan sa Diyos karon?

Ang pagkaputli nagkahulogan ug pagkahinlo sa moral. Busa, kadtong nagpabili sa kaputli dili lang maningkamot sa paglikay sa imoralidad kondili bisan sa mga butang nga motultol niana, lakip na ang paghanduraw bahin sa sekso ug pornograpiya. (Mateo 5:28) Sa susama, ang mga managtrato nga nagpabili sa prinsipyo sa Santiago 3:17 molikay sa pagkarinyohay nga lagmit motultol sa pagkawala sa pagpugong sa kaugalingon. Tungod kay sila nagiyahan sa prinsipyo, sila dili matental sa pagsalikway sa kaputli, nga basin maghunahuna nga basta dili lang nila aktuwal nga lapason ang balaod sa Diyos, ang ilang panggawi uyonan gihapon ni Jehova. Nasayod sila nga si Jehova “nagatan-aw sa kasingkasing” ug mogawi sila kaharmonya niana. (1 Samuel 16:7; 2 Cronicas 16:9) Tungod kay sila maalamong nagasunod sa mga prinsipyo ni Jehova, ilang malikayan ang daghang mapasa-sa-sekso nga mga sakit nga kaylap karong adlawa ug mahuptan ang ilang mental ug emosyonal nga kahimsog.

Ang kaalam sa Diyos “makigdaiton” usab, nag-ingon ang Santiago 3:17. Nasayod kita nga si Satanas naningkamot sa pagpahilayo kanato gikan kang Jehova pinaagi sa pagpugas ug espiritu sa kapintasan diha sa atong mga kasingkasing, usahay pinaagi sa kuwestiyonableng mga basahon, pelikula, musika, ug mga dula sa kompiyuter—ang pipila niini mag-aghat pa gani sa mga magdudula nga sundogon ang makalilisang nga mga buhat sa kapintasan ug pagpatay! (Salmo 11:5) Ang pagdagsang sa mapintas nga mga krimen nagpamatuod nga si Satanas nagmalamposon. Mahitungod sa maong mga krimen, ang mantalaan sa Australia nga The Sydney Morning Herald nagkutlo mga pipila na ka tuig kanhi kang Robert Ressler, nga maoy nagmugna sa terminong “serial killer.” Miingon si Ressler nga ang pagbati sa mga mamumuno nga giinterbiyo niya niadtong katuigan sa 1970 napukaw tungod sa pornograpikong mga materyal nga “ang kalaw-ay niini wala ra sa kumingking kon itandi sa pornograpikong mga materyal karon.” Busa, si Ressler nagpadayag ug “usa ka dulom nga panglantaw sa umaabot—usa ka bag-ong siglo diin ang mga tawong mopatayg dinaghan modaghan pa gayod.”

Sa pagkatinuod, pipila lang ka bulan human mogula sa mantalaan ang iyang pahayag, gipatay sa usa ka mamumusil ang 16 ka bata ug ilang magtutudlo diha sa usa ka kindergarten sa Dunblane, Scotland, una niya patya ang iyang kaugalingon. Pagkasunod bulan, gipatay sa laing mamumusil ang 32 ka tawo sa malinawong lungsod sa Port Arthur sa Tasmania, Australia. Sa di pa dugayng katuigan, ang Tinipong Bansa nalisang tungod sa daghang pagpamatay diha sa tunghaan, mao nga ang mga Amerikano nakapangutana, Ngano man? Niadtong Hunyo 2001, ang  Japan nahimong ulohang-balita sa tibuok kalibotan sa dihang usa ka tawong nalisoan ug pangisip misulod sa usa ka tunghaan ug nagdunggab ug nagpatay sa 8 ka bata sa una ug ikaduhang ang-ang sa elementarya ug nakasamad ug lain pang 15 ka tawo. Tinuod, lisod sabton ang mga hinungdan sa maong daotan nga mga buhat, apan gituohan nga ang kapintasan nga makita diha sa media nakaamot ug dako niana. “Kon ang 60-segundo nga pag-anunsiyo ug produkto makapausbaw sa halin niini,” misulat ang Australianong kolumnista nga si Phillip Adams, “ayaw kog ingna nga ang duha-ka-oras, multimilyon nga pelikula dili makapausab sa tinamdan sa mga tawo.” Makaiikag nga didto sa balay sa mamumusil sa Port Arthur, ang mga polis nakakompiskar ug 2,000 ka mapintas ug pornograpiko nga mga video.

Panalipdan niadtong nagsunod sa mga prinsipyo sa Bibliya ang ilang hunahuna ug kasingkasing batok sa tanang matang sa kalingawan nga nagpasiugdag kapintasan. Busa, dili sila motugot nga ang “espiritu sa kalibotan” mag-impluwensiya sa ilang hunahuna ug mga tinguha. Hinunoa, sila ‘natudloan sa espiritu sa Diyos,’ ug naningkamot sa pag-ugmad ug gugma sa mga bunga niini, nga naglakip sa pakigdait. (1 Corinto 2:12, 13; Galacia 5:22, 23) Gihimo nila kini pinaagi sa regular nga pagtuon sa Bibliya, pag-ampo, ug positibong pagpamalandong. Sila dili usab makig-uban sa mga tawo nga mahiligon sa kapintasan kondili makig-uban lamang sa mga tawo nga, sama kanila, nangandoy sa malinawong bag-ong kalibotan ni Jehova. (Salmo 1:1-3; Proverbio 16:29) Oo, pagkadakong panalipod ang gitagana sa kaalam sa Diyos!

Tugoting ang “Pulong” ni Jehova Manalipod sa Imong Kasingkasing

Sa dihang gitental sa kamingawan, gipamatud-an ni Jesus nga sayop ang gisulti ni Satanas pinaagi sa tukma nga pagkutlo sa Pulong sa Diyos. (Lucas 4:1-13) Apan, siya wala makigsulti sa Yawa aron ipakita kon kinsay labaw ug kaalam. Pinaagi sa pagbase sa iyang pangatarongan diha sa Kasulatan, gisulti ni Jesus kon unsay anaa sa iyang kasingkasing, nga maoy hinungdan nga ang estratehiya sa Yawa, nga misaler sa Eden, wala mosaler kang Jesus. Kita dili usab malingla sa mga malipatlipatong kaugdahan ni Satanas kon pun-on nato ang atong kasingkasing sa mga pulong ni Jehova. Wala nay mas hinungdanon pa niini, sanglit ‘ang mga tuboran sa kinabuhi nagagikan sa kasingkasing.’—Proverbio 4:23.

Dugang pa, kinahanglang padayon natong panalipdan ang atong kasingkasing, nga dili gayod molunga. Bisag napakyas didto sa kamingawan, si Satanas wala mohunong sa pagsulay kang Jesus. (Lucas 4:13) Siya magpadayon usab sa pagsulay kanato, nga mogamit ug lainlaing estratehiya aron sa pagpahuyang sa atong integridad. (Pinadayag 12:17) Busa, sundogon nato si Jesus pinaagi sa pag-ugmad ug dulot nga gugma alang sa Pulong sa Diyos, nga sa samang panahon magpadayon sa pag-ampo alang sa balaang espiritu ug kaalam. (1 Tesalonica 5:17; Hebreohanon 5:7) Sa iyang bahin, si Jehova nagsaad niadtong tanan nga modangop kaniya nga sila dili makaagom ug espirituwal nga kadaot.—Salmo 91:1-10; Proverbio 1:33.

Ang Pulong sa Diyos Nanalipod sa Kongregasyon

Dili mapugngan ni Satanas ang gitagnang kaluwasan sa “dakong panon” gikan sa dakong kasakitan. (Pinadayag 7:9, 14) Bisan pa niana, siya naningkamot gihapon sa pagdaot sa kaputli sa mga Kristohanon aron ang pipila kanila mawad-an sa pag-uyon ni Jehova. Ang maong estratehiya nagmalamposon sa karaang Israel ug misangpot sa kamatayon sa 24,000 diha sa mismong ganghaan sa Yutang Saad. (Numeros 25:1-9) Siyempre, ang nakasalang mga Kristohanon nga magpakitag tinuod nga paghinulsol makadawat ug mahigugmaong tabang aron maulian sa espirituwal. Apan ang dili-mahinulsolong mga makasasala, sama ni Zimri sa karaang panahon, nagpameligro sa moralidad ug espirituwalidad sa uban. (Numeros 25:14) Sama sa mga sundalo diha sa phalanx nga nagsalibay sa ilang mga taming, gipameligro nila dili lamang ang ilang kaugalingon kondili ang uban usab.

Busa, ang Bibliya nagsugo: ‘Hunong na sa pagpakig-uban kang bisan kinsa nga gitawag ug igsoon nga usa ka makihilawason o tawong dalo o tigsimbag idolo o tigsultig pasipala o palahubog o mangingilkil, dili gani mokaon uban sa maong tawo. Kuhaa ang tawong daotan gikan sa inyong taliwala.’ (1 Corinto 5:11, 13) Dili ka ba mouyon nga kining maalamon nga “pulong” motabang sa pagpanalipod sa moral ug espirituwal nga kaputli sa Kristohanong kongregasyon?

 Sa kasukwahi, daghang relihiyon sa Kakristiyanohan ug mga apostata ang naghunahuna nga kinaraan na ang mga bahin sa Bibliya nga kasumpaki sa moderno ug haluag nga panglantaw sa moralidad. Busa, ipakamatarong nila ang tanang matang sa grabeng sala, bisan taliwala sa mga klero. (2 Timoteo 4:3, 4) Apan matikdi nga ang Proverbio 30:5, nga naghisgot usab sa samag-taming nga “pulong” ni Jehova, gisundan niining maong sugo sa bersikulo 6: “Ayaw dugangi ang iyang [Diyos] mga pulong, aron dili ka niya pagabadlongon, ug aron dili ka mahimong bakakon.” Oo, kadtong nagtuis sa Bibliya sa pagkatinuod maoy espirituwal nga mga bakakon—ang labing daotan nga mga bakakon sa tanan! (Mateo 15:6-9) Nan, magmapasalamaton gayod kita sa pagkahimong bahin sa organisasyon nga may lalom nga pagtahod sa Pulong sa Diyos.

Gipanalipdan sa “Humot nga Alimyon”

Sanglit ang katawhan sa Diyos nagsunod sa Bibliya ug nagpaambit sa makapahupay nga mensahe niini ngadto sa uban, sila nagsabwag ug samag-insenso nga “humot nga alimyon” sa kinabuhi nga makapahimuot kang Jehova. Apan alang sa dili-matarong nga mga indibiduwal, ang mga tigdala nianang mensahea nagsabwag ug “makamatay nga baho sa kalaglagan,” sumala pa sa hubad ni J. B. Phillips. Oo, gidaot niining sistema sa mga butang ni Satanas ang piguratibong igsisimhot sa mga daotan mao nga sila dili ganahan o mosupak pa gani niadtong nagasabwag sa “humot nga alimyon ni Kristo.” Sa laing bahin, kadtong masibotong nagawali sa maayong balita nahimong “humot nga alimyon ni Kristo taliwala niadtong ginaluwas.” (2 Corinto 2:14-16) Ang maong matinud-anog-kasingkasing nga mga tawo kasagarang gingil-aran sa pagkasalingkapaw ug relihiyosong kabakakan sa bakak nga relihiyon. Busa, sa dihang buksan nato ang Pulong sa Diyos ug ipaambit kanila ang mensahe sa Gingharian, sila madani ngadto kang Kristo ug buot nga makakat-on ug dugang.—Juan 6:44.

Busa ayawg kaluya kon ang uban dili mosanong sa mensahe sa Gingharian. Hinunoa, lantawa ingong usa ka matang sa espirituwal nga proteksiyon ang “humot nga alimyon ni Kristo” nga dili makapadani sa mga tawong lagmit makadaot sa espirituwal nga dapit nga gipuy-an sa katawhan sa Diyos, apan makapadani niadtong maayog kasingkasing.—Isaias 35:8, 9.

Tungod kay ang Gregong mga sundalo sa Marathon nagdutdotay pagmartsa ug nangupot pag-ayo sa ilang mga taming, sila nagmadaogon bisan pag daw imposible kadto. Sa susama, ang maunongong mga Saksi ni Jehova gipasaligan ug bug-os nga kadaogan sa ilang espirituwal nga pakiggubat, tungod kay kini maoy ilang “panulondon.” (Isaias 54:17) Busa, hinaot nga ang matag usa kanato padayong modangop kang Jehova pinaagi sa pagpadayon sa “pagpangupot nga hugot sa pulong sa kinabuhi.”—Filipos 2:16.

[Mga hulagway sa panid 31]

‘Ang kaalam nga gikan sa itaas maoy putli, unya makigdaiton’