“Ang Akong Tabang Nagagikan Kang Jehova”

Dakong Panon sa Katawhan Midawat sa Pagsimba Kang Jehova

ANG mga tagna sa Bibliya bahin sa atong adlaw nag-ingon nga ang mga tawo gikan sa tanang kanasoran magpanon ngadto sa binayaw nga pagsimba ni Jehova. Pananglitan, pinaagi ni manalagnang Haggeo, si Jehova nga Diyos mipahayag: “Uyogon ko ang tanang kanasoran, ug ang tilinguhaong mga butang sa tanang kanasoran manulod; ug pun-on ko kining balaya sa himaya.” (Haggeo 2:7) Si Isaias ug si Miqueas nagtagna nga sa atong panahon—“sa kaulahiang bahin sa mga adlaw”—ang mga nasod ug mga katawhan managsimba kang Jehova sa dalawatong paagi.—Isaias 2:2-4; Miqueas 4:1-4.

Natuman ba gayod kanang mga tagnaa karon? Atong susihon ang mga kamatuoran. Sulod sa miaging napulo ka tuig lamang, kapin sa 3,110,000 ka bag-ohan ang nagpahinungod sa ilang kaugalingon kang Jehova diha sa kapin sa 230 ka nasod. Sa pagkatinuod, 6 sa matag 10 ka Saksi ni Jehova nga nag-alagad karon sa tibuok kalibotan ang nabawtismohan sa miaging dekada. Sa 2004, dunay aberids nga usa ka bag-ong dedikadong alagad sa Diyos nga nadugang sa Kristohanong kongregasyon sa matag duha ka minuto! a

Sama sa unang siglo, ‘daghan kaayo karon ang nahimong mga magtutuo ug miliso ngadto sa Ginoo.’ Bisag ang pag-uswag sa gidaghanon dili lamang maoy pamatuod sa panalangin sa Diyos, kini naghatag gayod ug ebidensiya nga “ang kamot ni Jehova” nagauban sa iyang katawhan. (Buhat 11:21) Unsay mitultol sa milyonmilyong katawhan ngadto sa pagsimba kang Jehova? Ug sa unsang paagi ikaw mismo naapektohan ning maong pag-uswag?

Nadani ang Matinud-anog-Kasingkasing nga mga Tawo

Sa prangkang pagkasulti, si Jesus miingon: “Walay tawo nga makaari kanako gawas kon ang Amahan, kinsa nagpadala kanako, magkabig kaniya.” (Juan 6:44) Busa, sa panguna, si Jehova maoy magkabig sa mga tawo nga “hustong nakiling alang sa kinabuhing walay kataposan.” (Buhat 13:48) Ang espiritu sa Diyos makapaamgo sa mga tawo nga sila adunay panginahanglan sa espirituwal. (Mateo 5:3) Ang nahasol nga tanlag, desperadong pagpangita ug paglaom, o usa ka suliran nga sobrang gihunahuna mahimong motultol sa pipila sa pagpangita sa Diyos ug tungod niana ilang makat-onan ang iyang katuyoan alang sa katawhan.—Marcos 7:26-30; Lucas 19:2-10.

Daghang indibiduwal ang nadani sa pagsimba kang Jehova tungod kay ang edukasyonal nga programa sa Bibliya sa Kristohanong kongregasyon nakatabang kanila nga matubag ang mga pangutana nga nakapalibog kanila.

“Kon duna pay Diyos, nganong ang mga tawo padayong nag-antos sa inhustisya?” Kanay pangutana nga nakahasol kang Davide, usa ka tigbaligyag droga sa Italya. Dili gayod siya interesado bahin sa relihiyon, busa gipatungha niya kining pangutanaha aron lang makiglalis. “Wala ko magtuo nga makadawat kog makataronganon ug makapakombinsir nga tubag,” matod niya. “Apan mapailobon kaayo ang Saksi nga nakig-estorya nako ug gisuportahan niyag mga teksto sa Bibliya ang iyang mga tubag. Ang maong panag-estorya adunay dakong epekto kanako.” Karon, gitul-id na ni Davide ang iyang kinabuhi ug nag-alagad kang Jehova.

Ang uban pa nadani ngadto sa yutan-ong bahin sa organisasyon ni Jehova tungod sa ilang pagpangita  sa kahulogan ug katuyoan sa kinabuhi. Kay nangitag kahupayan para sa iyang emosyonal nga mga problema, ang usa ka babayeng sikyatrista sa Zagreb, Croatia, miduaw sa usa niya ka iladong isigka-sikyatrista. Sa iyang katingala, gihatagan siya sa maong doktor ug numero sa telepono sa opisina sa sangang buhatan sa mga Saksi ni Jehova sa Zagreb, maingon man sa ngalan sa usa ka Saksi nga iyang kaila. “Sa akong pagtuo makatabang nimo kining mga tawhana,” matod sa maong doktor. Kon paadtoon ti ka sa simbahan, makakita ka lag way-kinabuhing mga estatwa—walay makig-estorya nimo, ug wala kay makuhang espirituwal nga kalamdagan. Sa akong pagtuo dili ka matabangan sa simbahan. Gisugyotan nako ang ubang mga pasyente nga moadto sa mga Saksi ni Jehova, ug sa akong hunahuna labing maayo nga adtoon usab nimo sila.” Sa kinabubut-on, ang mga Saksi miduaw sa maong babaye ug sa wala madugay nasugdan ang pagtuon sa Bibliya uban niya. Sulod sa pipila ka semana, ang maong sikyatrista malipayong miingon nga ang kahibalo bahin sa katuyoan sa Diyos nakapahimo sa iyang kinabuhi nga may kahulogan.—Ecclesiastes 12:13.

Sa dihang modangat ang personal nga kalisdanan, daghan ang nakasinati nga ang kamatuoran lamang sa Bibliya ang makahatag ug tinuod nga kahupayan. Sa Gresya, usa ka siyete-anyos nga batang lalaki ang nahulog gikan sa atop sa iyang eskuylahan ug namatay. Pipila ka bulan sa ulahi, duha ka Saksi ang nakahimamat sa iyang inahan ug naghupay kaniya pinaagi sa paghisgot sa paglaom sa pagkabanhaw. (Juan 5:28, 29) Tungod niana, nakahilak ang maong inahan. Nangutana ang mga sister: “Kon gusto nimong mahibalo ug dugang bahin sa Bibliya, kanus-a man mi makaduaw nimo?” “Karon dayon,” mitubag siya. Gidala sa maong babaye ang mga sister ngadto sa iyang balay, ug gisugdan ang pagtuon sa Bibliya. Karon, ang tibuok niyang pamilya nag-alagad na kang Jehova.

Nakigbahin Ka Ba?

Ang maong mga kasinatian maoy kasagaran nang mahitabo sa tibuok kalibotan. Si Jehova nagtigom ug nagbansay sa usa ka dakong panon sa matuod nga mga magsisimba diha sa nagkalainlaing kanasoran. Kining internasyonal nga grupo adunay malipayong kalaoman nga makalabang-buhi sa nagsingabot nga kataposan niining daotang sistema sa mga butang ug padayong magkinabuhi ngadto sa matarong nga bag-ong kalibotan.—2 Pedro 3:13.

Ingong resulta sa panalangin ni Jehova, kining wala pa sukad mahitabo nga buluhaton sa pagpanigom nagauswag nga dili mapugngan hangtod sa malamposong katumanan niini. (Isaias 55:10, 11; Mateo 24:3, 14) Ikaw ba masibotong nakigbahin niining buluhaton sa pangsangyaw sa Gingharian? Kon mao, makasalig ka sa pagpaluyo sa Diyos ug makasulti usab niining mga pulonga nga gisulti sa salmista: “Ang akong tabang nagagikan kang Jehova.”—Salmo 121:2.

[Footnote]

[Blurb sa panid 9]

“Walay tawo nga makaari kanako gawas kon ang Amahan, kinsa nagpadala kanako, magkabig kaniya.”—JUAN 6:44

[Kahon sa panid 8]

KINSAY NAGPALUYO NING MAONG PAG-USWAG?

“Gawas nga si Jehova ang magatukod sa balay, kawang lamang ang paghago sa mga magtutukod niini.”—Salmo 127:1.

“Ang Diyos ang nagpadayon sa pagpatubo niini; mao nga ang mahinungdanon dili ang nagtanom ni ang nagbisibis, kondili ang Diyos nga maoy nagpatubo niini.”—1 Corinto 3:6, 7.