Kinsa si Jesu-Kristo?

HANDURAWA kon unsa ka mahinamon ang usa ka batan-ong Hudiyo nga ginganlag Andres sa dihang siya nakadungog sa unang higayon sa mga pulong ni Jesus sa Nasaret! Ang Bibliya nag-ingon nga si Andres midali sa pag-adto sa iyang igsoong lalaki ug miingon: “Nakaplagan namo ang Mesiyas [o, Kristo].” (Juan 1:41) Sa Hebreohanon ug Gregong mga pinulongan, ang mga pulong nga sagad gihubad ug “Mesiyas” ug “Kristo” nagkahulogang “Dinihogang Usa.” Si Jesus mao ang Dinihogang Usa, o ang Usa nga Pinili sa Diyos—ang gisaad nga Pangulo. (Isaias 55:4) Ang Kasulatan naundan ug mga tagna mahitungod kaniya, ug ang mga Hudiyo niadtong panahona nagdahom sa iyang pag-abot.—Lucas 3:15.

Unsaon nato pagkahibalo nga si Jesus mao gayod ang Usa nga Pinili sa Diyos? Aw, tagda kon unsay nahitabo sa tuig 29 K.P. sa dihang si Jesus nag-edad ug 30 anyos. Miadto siya kang Juan Bawtista aron magpabawtismo kaniya sa Suba sa Jordan. Ang Bibliya nag-ingon: “Human mabawtismohi, si Jesus mihaw-as gilayon sa tubig; ug, tan-awa! ang mga langit nabuksan, ug iyang nakita nga mikunsad diha kaniya ang espiritu sa Diyos ingon sa usa ka salampati. Tan-awa! Dihay tingog usab gikan sa mga langit nga nag-ingon: ‘Kini mao ang akong Anak, ang hinigugma, nga akong giuyonan.’” (Mateo 3:16, 17) Human makabati sa maong mga pulong sa pag-uyon, nagduhaduha pa kaha si Juan nga si Jesus mao ang Usa nga Pinili sa Diyos? Pinaagi sa pagbubo sa Iyang balaang espiritu diha kang Jesus, gidihogan o gitudlo siya ni Jehova nga Diyos nga mahimong Hari sa Iyang umaabot nga Gingharian. Busa, si Jesus nahimong Kristo, o Dinihogang Usa. Apan, nganong si Jesus gitawag nga Anak sa Diyos? Unsay iyang kagikan?

Ang Iyang Kagikan Maoy “Gikan pa sa Unang Kapanahonan”

Ang kinabuhi ni Jesus mahimong bahinon sa tulo ka hugna. Ang unang hugna nagsugod sa wala pa siya ipanganak ingong usa ka tawo. Ang iyang kagikan maoy “gikan pa sa unang kapanahonan, gikan sa mga adlaw sa panahong walay tino,” nag-ingon ang Miqueas 5:2. Si Jesus mismo miingon: “Ako gikan sa mga dapit sa itaas”—nga mao, sa langit. (Juan 8:23) Siya naglungtad na sa langit ingong usa ka gamhanan nga espirituhanong persona.

Sanglit ang tanang linalang nga mga butang adunay sinugdanan, dihay panahon nga ang Diyos nag-inusara lang gayod. Apan sa dili maihap nga katuigan kanhi, ang Diyos misugod sa pagpanglalang. Kinsay una niyang gilalang? Ang kataposang basahon sa Bibliya nagpaila kang Jesus ingong “ang sinugdan sa mga kalalangan sa Diyos.” (Pinadayag 3:14) Si Jesus mao ang “panganay sa tanang kalalangan.” Tinuod kana “tungod kay pinaagi kaniya gilalang ang tanang ubang butang sa langit ug sa yuta, ang mga butang nga makita ug ang mga butang nga dili-makita.” (Colosas 1:15, 16) Oo, si Jesus mao ang bugtong direktang gilalang sa Diyos mismo. Busa, siya gitawag nga “bugtong nga Anak” sa Diyos. (Juan 3:16) Ang panganay nga Anak aduna usay titulong “ang Pulong.” (Juan 1:14) Ngano? Tungod kay sa wala pa siya ipanganak ingong tawo, siya nag-alagad didto sa langit ingong tigpamaba sa Diyos.

“Ang Pulong” uban kang Jehova nga Diyos “sa sinugdan,” sa dihang gilalang “ang mga langit ug ang yuta.” Siya ang usa nga giingnan sa Diyos: “Buhaton nato ang tawo sumala sa atong larawan.” (Juan 1:1; Genesis 1:1, 26) Ang panganay nga Anak ni Jehova didto sa tupad sa iyang Amahan, nga aktibong nagbuhat uban kaniya. Sa Proverbio 8:22-31, siya gipadayag nga nagsulti: “Didto ako tupad [sa Maglalalang] ingon nga batid nga magbubuhat, ug ako iyang gikahinangpan pag-ayo sa matag adlaw, ako nagakalipay sa iyang atubangan sa tanang panahon.”

Nagkasuod gayod si Jehova nga Diyos ug ang  iyang bugtong Anak samtang sila nag-uban sa pagbuhat! Ang maong suod nga panag-ubanay uban kang Jehova sulod sa dili-maisip nga katuigan nakaimpluwensiya gayod sa Anak sa Diyos. Kining masinugtanong Anak nahimong sama sa iyang Amahan, si Jehova. Gani, ang Colosas 1:15 nagtawag kang Jesus nga “larawan sa dili-makita nga Diyos.” Kini maoy usa ka rason kon nganong ang kahibalo bahin kang Jesus hinungdanon sa pagtagbaw sa atong espirituwal nga panginahanglan ug sa atong kinaiyanhong tinguha nga makaila sa Diyos. Ang tanang butang nga gibuhat ni Jesus samtang dinhi siya sa yuta mao gayod ang gidahom ni Jehova nga iyang himoon. Busa, ang pagkaila kang Jesus nagkahulogan usab nga nagauswag ang atong kahibalo bahin kang Jehova. (Juan 8:28; 14:8-10) Apan sa unsang paagi si Jesus nahiabot sa yuta?

Iyang Kinabuhi Ingong Tawo

Ang ikaduhang hugna sa kinabuhi ni Jesus nagsugod sa dihang gipadala sa Diyos ang iyang Anak dinhi sa yuta. Sa milagrosong paagi, gibalhin ni Jehova ang kinabuhi ni Jesus gikan sa langit ngadto sa tagoangkan sa usa ka matinuohong ulay nga Hudiya nga ginganlag Maria. Wala makapanunod ug pagkadili-hingpit si Jesus tungod kay ang iyang amahan dili man usa ka tawo. Ang balaang espiritu, o aktibong puwersa ni Jehova mikunsad kang Maria, ug ang iyang gahom ‘milandong’ kaniya, nga sa milagrosong paagi nagpasamkon kaniya. (Lucas 1:34, 35) Busa si Maria nanganak ug usa ka hingpit nga bata. Ingong sinagop nga anak sa panday nga si Jose, siya gipadako diha sa usa ka kabos nga panimalay ug mao ang panganay sa daghang anak ni Jose ug Maria.—Isaias 7:14; Mateo 1:22, 23; Marcos 6:3.

Diyutay ray nahibaloan bahin sa pagkabata ni Jesus, apan usa ka hitabo ang talagsaon. Sa dihang si Jesus nag-edad ug 12 anyos, gidala siya sa iyang mga ginikanan sa ilang tinuig nga pagduaw sa Jerusalem alang sa Paskuwa. Samtang didto, gigugol niya ang daghang panahon sa templo, “nga naglingkod taliwala sa mga magtutudlo ug nagpatalinghog kanila ug nangutana kanila.” Dugang pa, “kadtong tanan nga nagpatalinghog kaniya nahibulong kanunay sa iyang pagsabot ug sa iyang mga tubag.” Oo, ang batang si Jesus nagsukna ug makapukaw-sa-hunahunang mga pangutana bahin sa relihiyon ug naghatag usab ug maalamong mga tubag nga nakapahingangha sa uban. (Lucas 2:41-50) Samtang nagdako siya siyudad sa Nasaret, sa walay duhaduha nakakat-on siya sa pagpamanday gikan sa iyang amaama nga si Jose.—Mateo 13:55.

Si Jesus nagpuyo sa Nasaret hangtod nag-edad siyag 30 anyos. Dayon miadto siya kang Juan Bawtista aron magpabawtismo. Human sa iyang bawtismo, gisugdan ni Jesus ang iyang masibotong ministeryo. Sulod sa tulo ka tuig ug tunga, gipanaw niya ang iyang tibuok yutang natawhan nga nagpahayag sa maayong balita sa Gingharian sa Diyos. Gipamatud-an niya nga siya gipadala sa Diyos. Sa unsang paagi? Pinaagi sa paghimog daghang milagro—gamhanang mga buhat nga dili mahimo sa ordinaryong mga tawo.—Mateo 4:17; Lucas 19:37, 38.

Si Jesus usa usab ka lalaki nga may malumo ug tiunayng pagbati. Ang iyang kalumo ilabinang nadayag sa paagi sa iyang paglantaw ug pagtratar sa uban. Tungod kay si Jesus daling duolon ug buotan, ang mga tawo nadani kaniya. Bisan ang mga bata ganahang makig-uban kaniya. (Marcos  10:13-16) Gitratar ni Jesus ang mga babaye sa matinahorong paagi, bisan pag ang pipila ka tawo sa iyang panahon nagtamay kanila. (Juan 4:9, 27) Gitabangan niya ang mga kabos ug mga dinaogdaog nga ‘makakaplag ug kahayahay sa ilang mga kalag.’ (Mateo 11:28-30) Ang iyang paagi sa pagpanudlo maoy tin-aw, yano, ug praktikal. Ug ang iyang mga gipanudlo nagbanaag sa iyang kinasingkasing nga tinguha nga makaila pag-ayo ang iyang mamiminaw sa matuod nga Diyos, si Jehova.—Juan 17:6-8.

Pinaagi sa balaang espiritu sa Diyos, si Jesus mabinationg naghimog mga milagro nga nag-ayo sa mga masakiton ug mga sinakit. (Mateo 15:30, 31) Pananglitan, dihay usa ka lalaking sanlahon nga miduol kaniya ug miingon: “Kon buot mo lamang, ikaw makahinlo kanako.” Unsay gihimo ni Jesus? Gituy-od niya ang iyang kamot ug gihikap ang maong lalaki, nga miingon kaniya: “Buot ko. Mamahinlo ka.” Ug naayo ang lalaking masakiton!—Mateo 8:2-4.

Tagda usab ang usa ka higayon sa dihang may panon sa katawhan nga miduol kang Jesus ug nagsunodsunod kaniya sulod sa tulo ka adlaw nga walay kaon. Mibati siyag kaluoy sa mga tawo ug milagrosong nagpakaon sa “upat ka libong lalaki, gawas sa mga babaye ug sa mga bata.” (Mateo 15:32-38) Sa laing higayon, gipalurang ni Jesus ang bagyo nga nagpameligro sa kinabuhi sa iyang mga higala. (Marcos 4:37-39) Siya nagbanhaw pa gani ug mga patay. a (Lucas 7:22; Juan 11:43, 44) Si Jesus kinabubut-on pa ganing mitugyan sa iyang hingpit nga tawhanong kinabuhi aron ang dili-hingpit nga mga tawo makabaton ug paglaom sa umaabot. Dako gayod ang paghigugma ni Jesus sa mga tawo!

Hain na si Jesus Karon?

Si Jesus namatay diha sa usa ka sakitanang estaka sa edad nga 33 1/2. b Apan ang kamatayon dili maoy kataposan sa iyang kinabuhi. Ang ikatulong hugna sa iyang kinabuhi nagsugod mga tulo ka adlaw sa ulahi sa dihang gibanhaw ni Jehova nga Diyos ang iyang Anak ingong espirituhanong persona. Human sa iyang pagkabanhaw, mipakita si Jesus sa ginatos ka tawo nga nagkinabuhi sa unang siglo K.P. (1 Corinto 15:3-8) Human niana, siya “milingkod sa tuong kamot sa Diyos” ug nagpaabot sa pagdawat niya sa harianong gahom. (Hebreohanon 10:12, 13) Sa pag-abot sa maong panahon, si Jesus misugod sa pagmando ingong Hari. Busa sa unsang paagi angay natong hunahunaon si Jesus karon? Angay ba nato siyang isipon ingong nag-antos nga tawo nga hapit nang patyon? O ato ba siyang isipon ingong usa nga angayng simbahon? Si Jesus karon dili usa ka tawo ni siya ang Diyos nga Labing Gamhanan. Hinunoa, siya maoy usa ka gamhanang espirituhanong linalang, usa ka nagmandong Hari. Sa dili madugay, iyang ipadayag ang iyang pagmando ibabaw sa atong gubot nga yuta.

Pinaagig simbolikong pinulongan, ang Pinadayag 19:11-16 naghubit kang Jesu-Kristo ingong usa ka hari nga nagsakay sa usa ka puting kabayo nga nagsingabot aron sa paghukom ug pagpakiggubat diha sa pagkamatarong. Siya adunay “usa ka mahait, taas nga espada, aron iyang itigbas sa kanasoran.” Oo, gamiton ni Jesus ang iyang dakong gahom aron sa paglaglag sa mga daotan. Ug komosta kadtong naningkamot sa pagsundog sa panig-ingnan nga iyang gihatag sa dinhi pa siya sa yuta? (1 Pedro 2:21) Siya ug ang iyang Amahan magluwas kanila latas sa umaabot nga “gubat sa dakong adlaw sa Diyos nga Labing Gamhanan”—nga subsob gitawag ug Armagedon—aron sila mabuhing walay kataposan ingong yutan-ong mga ginsakpan sa langitnong Gingharian sa Diyos.—Pinadayag 7:9, 14; 16:14, 16; 21:3, 4.

Panahon sa iyang malinawong pagmando, pagkadaghang milagro ang himoon ni Jesus alang sa tanang katawhan! (Isaias 9:6, 7; 11:1-10) Iyang ayohon ang mga sakit ug wagtangon ang kamatayon. Si Jesus gamiton sa Diyos aron banhawon ang bilyonbilyong mga patay, nga maghatag kanilag kahigayonan nga mabuhi sa walay kataposan dinhi sa yuta. (Juan 5:28, 29) Dili gayod nato mahanduraw kon unsa ka kahibulongan ang atong kinabuhi ilalom sa pagmando sa Gingharian. Busa, hinungdanon nga kita magpadayon sa pagkuhag kahibalo bahin sa Bibliya ug mas masinati pa kang Jesu-Kristo.

[Mga footnote]

 [Kahon sa panid 7]

SI JESUS BA ANG DIYOS NGA LABING GAMHANAN?

Daghang relihiyosong mga tawo moingon nga si Jesus mao ang Diyos. Moingon ang uban nga ang Diyos usa ka Trinidad. Sumala niining maong pagtulon-an, “ang Amahan maoy Diyos, ang Anak maoy Diyos, ug ang Balaang Espiritu maoy Diyos, ug bisan pa niana walay tulo ka Diyos kondili usa lang ka Diyos.” Gituohan nga silang tulo maoy “parehong walay kataposan ug walay labaw ug walay ubos.” (The Catholic Encyclopedia) Husto ba ang maong mga panghunahuna?

Si Jehova nga Diyos mao ang Maglalalang. (Pinadayag 4:11) Siya walay sinugdanan ni kataposan, ug siya ang labing gamhanan. (Salmo 90:2) Sa laing bahin, si Jesus adunay sinugdanan. (Colosas 1:15, 16) Sa pagtumong sa Diyos ingong iyang Amahan, si Jesus miingon: “Ang Amahan labaw pa kay kanako.” (Juan 14:28) Miingon usab si Jesus nga dunay pipila ka butang nga wala niya mahibaloi ug sa mga manulonda apan ang iyang Amahan ray nakahibalo niini.—Marcos 13:32.

Dugang pa, si Jesus miampo sa iyang Amahan: “Matuman unta dili ang akong kabubut-on, kondili ang imoha.” (Lucas 22:42) Kinsa bay laing giampoan ni Jesus gawas sa mas labaw nga Persona? Lain pa, ang Diyos mao ang nagbanhaw kang Jesus gikan sa mga patay, dili kay si Jesus ray nagbanhaw sa iyang kaugalingon. (Buhat 2:32) Dayag nga ang Amahan ug ang Anak dili managsama sa wala pa moanhi ni Jesus sa yuta o panahon sa iyang yutan-ong kinabuhi. Komosta man human mabanhaw si Jesus ug miadto sa langit? Ang 1 Corinto 11:3 nag-ingon: “Ang ulo ni Kristo mao ang Diyos.” Gani, ang Anak kanunayng nagpasakop sa Diyos. (1 Corinto 15:28) Busa ang Kasulatan nagpakita nga si Jesus dili mao ang Diyos nga Labing Gamhanan. Hinunoa, siya mao ang Anak sa Diyos.

Ang gitawag nga ikatulong persona sa Trinidad—ang balaang espiritu—dili usa ka persona. Sa pag-ampo sa Diyos, ang salmista miingon: “Kon ipadala mo ang imong espiritu, malalang sila.” (Salmo 104:30) Kining maong espiritu dili ang Diyos mismo; kini mao ang aktibong puwersa nga iyang ipadala o gamiton sa pagtuman sa kon unsay buot niyang buhaton. Pinaagi niini, gilalang sa Diyos ang literal nga kalangitan, ang yuta, ug ang tanang buhing mga butang. (Genesis 1:2; Salmo 33:6) Gigamit sa Diyos ang iyang balaang espiritu aron sa pag-inspirar sa mga lalaki nga nagsulat sa Bibliya. (2 Pedro 1:20, 21) Busa, ang Trinidad dili usa ka Kasulatanhong pagtulon-an. c “Si Jehova nga atong Diyos maoy usa lamang ka Jehova,” nag-ingon ang Bibliya.—Deuteronomio 6:4.

[Footnote]

[Hulagway sa panid 5]

Panahon sa iyang bawtismo, si Jesus nahimong Dinihogang Usa sa Diyos

[Hulagway sa panid 7]

Gigamit ni Jesus ang iyang kusog aron sa paghimo sa buluhaton nga gipabuhat kaniya sa Diyos

[Hulagway sa panid 7]

Karon, si Jesus maoy usa ka gamhanang Hari