Lakaw Pinaagi sa Pagtuo, Dili Pinaagi sa Makita!
Lakaw Pinaagi sa Pagtuo, Dili Pinaagi sa Makita!
“Kita nagalakaw pinaagi sa pagtuo, dili pinaagi sa makita.”—2 CORINTO 5:7.
1. Unsay nagpakita nga si apostol Pablo naglakaw pinaagi sa pagtuo, dili pinaagi sa makita?
ANG tuig maoy 55 K.P. Mga 20 ka tuig na ang milabay sukad nga ang tawong ginganlan kaniadto ug Saulo, nga maoy usa ka maglulutos sa mga Kristohanon, nahimong Kristohanon. Paglabay sa panahon, ang iyang pagtuo sa Diyos nagpabiling lig-on. Bisan pag wala siya makakita sa mga butang sa langit pinaagi sa iyang pisikal nga mga mata, ang iyang pagtuo malig-on. Mao nga sa nagsulat siya ngadto sa dinihogang mga Kristohanon, nga may langitnong paglaom, si apostol Pablo miingon: “Kita nagalakaw pinaagi sa pagtuo, dili pinaagi sa makita.”—2 Corinto 5:7.
2, 3. (a) Sa unsang paagi gipasundayag nato nga kita nagalakaw pinaagi sa pagtuo? (b) Unsay ipasabot sa paglakaw pinaagi sa makita?
2 Gikinahanglan ang bug-os nga pagsalig sa katakos sa Diyos sa pagtultol sa atong mga kinabuhi aron makalakaw pinaagi sa pagtuo. Kinahanglan kitang bug-os nga kombinsido nga siya nahibalo gayod kon unsay labing mapuslanon kanato. (Salmo 119:66) Samtang mohimo kitag mga desisyon sa kinabuhi ug buhaton kana, atong tagdon ang “mga katinuoran bisan tuod wala makita.” (Hebreohanon 11:1) Naglakip kini sa gisaad nga “bag-ong mga langit ug usa ka bag-ong yuta.” (2 Pedro 3:13) Sa laing bahin, ang paglakaw pinaagi sa makita nagpasabot nga kita nagkinabuhi nga gimandoan lamang sa atong nasabtan pinaagi sa atong pisikal nga mga sentido. Kini peligroso kay kini mahimong mosangpot sa dili nato pagpakabana sa bug-os sa kabubut-on sa Diyos.—Salmo 81:12; Ecclesiastes 11:9.
3 Bisan kon kita sakop sa “gamayng panon,” nga may langitnong pagtawag, o sa “ubang mga karnero,” nga may yutan-ong paglaom, ugdang nga pagaisipon sa matag usa kanato ang tambag nga maglakaw pinaagi sa pagtuo ug dili pinaagi sa makita. (Lucas 12:32; Juan 10:16) Atong tan-awon kon sa unsang paagi ang pagsunod niining inspiradong tambag magapanalipod kanato aron dili kita mabiktima sa “umalaging kalipay sa pagpakasala,” dili malit-agan sa materyalismo, ug dili mahikalimot nga haduol na ang kalaglagan niining sistema sa mga butang. Atong susihon usab ang mga kapeligrohan sa paglakaw pinaagi sa makita.—Hebreohanon 11:25.
Pagsalikway sa “Umalaging Kalipay sa Pagpakasala”
4. Unsay gipalabi ni Moises, ug ngano?
4 Hunahunaa kon unsa untay kinabuhi nga natagamtam ni Moises, nga anak ni Amram. Kay gipadako kauban sa harianong mga anak sa karaang Ehipto, posible unta nga si Moises makabaton ug gahom, bahandi, ug impluwensiya. Mahimong mangatarongan si Moises: ‘Naedukar ako sa dinayeg kaayo nga kaalam sa Ehipto, ug ako gamhanan sa mga pulong ug sa mga buhat. Kon ako magpabilin sa harianong panimalay, magamit ko ang akong posisyon aron matabangan ang akong dinaogdaog nga Hebreohanong mga igsoon!’ (Buhat 7:22) Gipalabi hinuon ni Moises nga “daogdaogon uban sa katawhan sa Diyos.” Ngano? Unsay mitukmod kang Moises sa pagtalikod sa tanang gitanyag sa Ehipto? Ang Bibliya nagtubag: “Tungod sa pagtuo [si Moises] mibiya sa Ehipto, apan dili kay nahadlok sa kasuko sa hari, kay siya nagpabiling lig-on nga daw nakakita sa Usa nga dili-makita.” (Hebreohanon 11:24-27) Ang pagtuo ni Moises diha sa seguradong ganti ni Jehova tungod sa pagkamatarong nakatabang kaniya sa pagsukol sa pagpakasala ug pagpatuyang ug pagpahimulos sa umalaging kalipay niini.
5. Sa unsang paagi ang panig-ingnan ni Moises nagdasig kanato?
5 Kinahanglan usab kitang mohimog lisod nga mga desisyon bahin sa mga isyung sama niini: ‘Angay ko bang hunongon ang pipila ka batasan o bisyo nga dili bug-os nahiuyon sa mga prinsipyo sa Bibliya? Angay ko bang dawaton ang trabaho nga daw daghag materyal nga kaayohan apan makababag sa akong espirituwal nga pag-uswag?’ Ang panig-ingnan ni Moises nagdasig kanato nga dili nato himoon ang mga desisyon nga nagpadayag sa hiktin nga panglantaw niining kalibotana; hinunoa angay kitang magpasundayag ug pagtuo sa taas-ug-panglantaw nga kaalam sa “Usa nga dili-makita”—si Jehova nga Diyos. Sama kang Moises, hinaot mahalon nato ang pagpakighigala ni Jehova nga labaw pa kay sa bisan unsang gitanyag niining kalibotana.
6, 7. (a) Sa unsang paagi gipakita ni Esau nga iyang gipalabi ang paglakaw pinaagi sa makita? (b) Unsang pasidaan ang atong makaplagan diha kang Esau?
6 Itandi ang kalainan ni Moises ug ni Esau, nga anak lalaki sa patriarkang si Isaac. Si Esau nagpalabi sa dihadiha nga katagbawan. (Genesis 25:30-34) Kay “wala magpabili sa sagradong mga butang,” gihatag ni Esau ang iyang mga katungod ingong panganay “baylo sa usa ka pagkaon.” (Hebreohanon 12:16) Napakyas siya sa paghunahuna kon sa unsang paagi ang iyang desisyon sa pagbaligya sa iyang katungod sa pagkapanganay makaapekto sa iyang relasyon kang Jehova o kon unsay epekto sa iyang gibuhat diha sa iyang mga kaliwat. Wala siyay espirituwal nga panglantaw sa unahan. Wala tagda ni Esau ang bililhong mga saad sa Diyos, hinuon iyang giisip kana ingong gamayg bili. Siya naglakaw pinaagi sa makita, dili pinaagi sa pagtuo.
7 Si Esau maoy usa ka pasidaan alang kanato karon. (1 Corinto 10:11) Kon mag-atubang kitag mga desisyon, dagko man o gagmay, dili gayod kita magpadaldal sa propaganda sa kalibotan ni Satanas, nga nag-ingon nga angay nimong angkonon karon dayon kon unsay imong gusto. Maayong suknaon nato ang atong kaugalingon: ‘Ang samag-Esau nga mga hilig gipadayag ba diha sa mga desisyon nga akong gihimo? Ang akong pagpangagpas kon unsay akong gusto karon nagpasabot ba nga ang espirituwal nga intereses mabutang na lamang sa ikaduhang dapit? Ang akong mga desisyon nagapameligro ba sa akong pagpakighigala sa Diyos ug sa akong umaabot nga ganti? Unsang matang sa panig-ingnan ang akong ginahatag alang sa uban?’ Kon ang atong mga desisyon nagpadayag nga atong gipabilhan ang sagradong mga butang, kita panalanginan ni Jehova.—Proverbio 10:22.
Paglikay sa Lit-ag sa Materyalismo
8. Unsang pasidaan ang nadawat sa mga Kristohanon sa Laodicea, ug nganong makapaikag kana kanato?
8 Sa usa ka pinadayag ngadto kang apostol Juan sa hinapos sa unang siglo, gipahayag sa hinimayang si Jesu-Kristo ang usa ka mensahe ngadto sa kongregasyon nga didto sa Laodicea, Asia Minor. Kadto maoy usa ka mensahe nga nagpasidaan batok sa materyalismo. Bisan pag dato sa materyal, ang mga Kristohanon sa Laodicea kabos sa espirituwal. Inay magpadayon sa paglakaw pinaagi sa pagtuo, ang ilang espirituwal nga panglantaw gibutaan sa materyal nga mga butang. (Pinadayag 3:14-18) Ang materyalismo adunay susamang epekto karon. Kini makapahuyang sa atong pagtuo ug makapahunong kanato sa ‘pagdagan nga malahutayon sa lumba’ alang sa kinabuhi. (Hebreohanon 12:1) Kon dili kita magbantay, ang “mga kalipayan niining kinabuhia” makababag sa espirituwal nga mga kalihokan ngadto sa punto nga kini “natuok sa bug-os.”—Lucas 8:14.
9. Sa unsang paagi ang pagkakontento ug pagpabili sa espirituwal nga pagkaon makapanalipod kanato?
9 Usa ka hinungdanong paagi nga kita mapanalipdan sa espirituwal mao ang pagkakontento imbes pagpahimulos sa bug-os niining kalibotana ug pagpadato sa atong kaugalingon sa materyal nga mga butang. (1 Corinto 7:31; 1 Timoteo 6:6-8) Sa dihang kita magalakaw pinaagi sa pagtuo ug dili pinaagi sa makita, kita magkalipay sa espirituwal nga paraiso karon. Samtang nagkaon kitag sustansiyadong espirituwal nga pagkaon, dili ba madasig kita nga ‘mohugyaw sa kalipay tungod sa maayong kahimtang sa kasingkasing’? (Isaias 65:13, 14) Dugang pa, kita nagkalipay sa atong pagpakig-uban niadtong nagpasundayag sa mga bunga sa espiritu sa Diyos. (Galacia 5:22, 23) Pagkahinungdanon nga makakaplag kitag katagbawan ug kahayahay diha sa espirituwal nga mga tagana ni Jehova!
10. Unsang mga pangutana ang maayong isukna nato sa atong kaugalingon?
10 Ang pipila ka pangutana nga maayong isukna nato sa atong kaugalingon mao: ‘Unsay dapit sa materyal nga mga butang diha sa akong kinabuhi? Gigamit ko ba ang akong materyal nga mga kabtangan alang sa mga kalingawan o sa pagpauswag sa matuod nga pagsimba? Unsay makahatag kanakog labing dakong katagbawan? Ang pagtuon ba sa Bibliya ug pagpakig-uban diha sa Kristohanong mga tigom, o ang mga hinapos-sa-semana nga walay Kristohanong mga kaakohan? Gireserba ko ba ang daghang hinapos-sa-semana alang sa kalingawan imbes gamiton sa pagsangyaw sa kanataran ug sa ubang mga kalihokang may kalabotan sa maputling pagsimba?’ Ang paglakaw pinaagi sa pagtuo nagpasabot nga kita kanunayng mapuliki sa buluhaton sa Gingharian, nga may bug-os nga pagsalig sa mga saad ni Jehova.—1 Corinto 15:58.
Kanunayng Hinumdomi nga Duol na ang Kataposan
11. Sa unsang paagi ang paglakaw pinaagi sa pagtuo makatabang kanato sa paghinumdom kanunay nga duol na ang kataposan?
11 Ang paglakaw pinaagi sa pagtuo makatabang kanato sa paglikay sa unodnong mga panghunahuna nga ang kataposan maoy layo pa o dili na gayod moabot. Lahi sa maduhaduhaong mga tawo nga nagatamay sa tagna sa Bibliya, kita nakasabot nga ang mga panghitabo sa kalibotan nahiuyon sa gitagna sa Pulong sa Diyos alang sa atong adlaw. (2 Pedro 3:3, 4) Pananglitan, dili ba ang tinamdan ug panggawi sa kadaghanang tawo nagpamatuod nga kita nagakinabuhi na sa “kataposang mga adlaw”? (2 Timoteo 3:1-5) Pinaagi sa mga mata sa pagtuo, atong nasabtan nga ang mga panghitabo sa kalibotan karon maoy dili lang nagbalikbalik nga mga panghitabo sa kasaysayan. Hinunoa, sila maoy ‘ilhanan sa presensiya ni Kristo ug sa kataposan sa sistema sa mga butang.’—Mateo 24:1-14.
12. Sa unsang paagi ang mga pulong ni Jesus nga nahitala sa Lucas 21:20, 21 natuman sa unang siglo?
12 Tagda ang usa ka panghitabo sa unang siglo sa atong Komong Panahon nga adunay kaamgiran sa atong adlaw. Sa dinhi siya sa yuta, si Jesu-Kristo nagpasidaan sa iyang mga sumusunod: “Inigkakita ninyo nga malibotan ang Jerusalem sa nagkampong kasundalohan, nan hibaloi nga haduol na ang paglaglag kaniya. Nan silang anaa sa Judea pakalagiwa ngadto sa kabukiran, ug kadtong anaa sa iyang taliwala pabiyaa.” (Lucas 21:20, 21) Ingon nga katumanan nianang tagnaa, ang Romanong kasundalohan ubos sa pagmando ni Cestius Gallus miatake sa Jerusalem niadtong 66 K.P. Apan ang kasundalohan kalit nga miatras, nga nagpaila nga kadto panahon na aron ang mga Kristohanon didto ‘mokalagiw ngadto sa kabukiran.’ Sa 70 K.P., ang Romanong kasundalohan namalik ug giatake ang siyudad sa Jerusalem ug gilumpag ang templo niini. Gitaho ni Josephus nga kapin sa usa ka milyong Hudiyo ang namatay, ug 97,000 ang gidalang binihag. Ang paghukom sa Diyos gipahamtang niadtong Hudiyohanong sistema sa mga butang. Kadtong naglakaw pinaagi sa pagtuo ug namati sa pasidaan ni Jesus nakaikyas sa katalagman.
13, 14. (a) Unsang mga panghitabo ang hapit nang mahitabo? (b) Nganong angay kitang magpabiling igmat bahin sa katumanan sa tagna sa Bibliya?
13 Ang susamang butang hapit nang mahitabo sa atong adlaw. Ang mga elemento sa Hiniusang Kanasoran malangkit unya sa pagpatuman sa hukom sa Diyos. Ingong ang katuyoan sa Romanong kasundalohan sa unang siglo mao ang pagpalungtad sa Pax Romana (Romanhong Kalinaw), ang katuyoan sa Hiniusang Kanasoran karon mao nga kini mahimong instrumento sa pagpalungtad sa kalinaw. Bisan pag ang Romanong kasundalohan naningkamot sa pagtino nga adunay kalinaw ug kasegurohan sa tibuok kalibotan niadtong panahona, sila nahimong tiglaglag sa Jerusalem. Susama karong adlawa, ang tagna sa Bibliya nagpaila nga ang militarisadong mga puwersa sa Hiniusang Kanasoran mag-isip nga ang relihiyon maoy makapatugawng elemento ug molihok sa paglaglag sa modernong-adlaw nga Jerusalem—ang Kakristiyanohan—ug sa nahibiling bahin sa Dakong Babilonya. (Pinadayag 17:12-17) Oo, hapit nang malaglag ang imperyo sa bakak nga relihiyon sa tibuok kalibotan.
14 Ang pagkalaglag sa bakak nga relihiyon mao unyay ilhanan sa pagsugod sa dakong kasakitan. Sa kataposang bahin sa dakong kasakitan, ang nahibiling mga elemento niining daotang sistema sa mga butang pagalaglagon. (Mateo 24:29, 30; Pinadayag 16:14, 16) Ang paglakaw pinaagi sa pagtuo kanunayng makapaigmat kanato bahin sa katumanan sa tagna sa Bibliya. Dili kita malimbongan sa paghunahuna nga ang ginamag-tawo nga ahensiya sama sa Hiniusang Kanasoran maoy gamiton sa Diyos sa pagpatunghag matuod nga kalinaw ug kasegurohan. Busa, dili ba ang atong paagi sa kinabuhi angayng magpasundayag nga kita nagtuo nga “ang dakong adlaw ni Jehova haduol na”?—Sofonias 1:14.
Paglakaw Pinaagi sa Makita—Unsa ka Peligroso?
15. Bisan pag nakasinati sa panalangin sa Diyos, unsang lit-ag ang nakabitik sa nasod sa Israel?
15 Ang mga kasinatian sa karaang Israel naghulagway sa mga kapeligrohan nga mahuyang ang imong pagtuo tungod sa paglakaw pinaagi sa makita. Bisan pag sila nakakita sa napulo ka hampak nga nagpakaulaw sa bakak nga mga diyos sa Ehipto ug unya nakasinati sa talagsaong pagluwas latas sa Pulang Dagat, ang mga Israelinhon sa kamasupilon naghimog usa ka bulawang baka ug nagsimba niana. Sila nawad-ag pailob ug gilaayan sa pagpinaabot kang Moises, kinsa “nadugay paglugsong gikan sa bukid.” (Exodo 32:1-4) Tungod sa kawalay-pailob, sila nagsimbag usa ka idolo nga makita sa kinaiyanhong mata. Ang ilang paglakaw pinaagi sa makita nag-insulto kang Jehova ug misangpot sa pagpatay sa “mga tulo ka libo ka tawo.” (Exodo 32:25-29) Makapasubo gayod sa dihang ang usa ka magsisimba ni Jehova karong adlawa mohimog mga desisyon nga magpaila sa kawalay-pagsalig kang Jehova ug sa iyang katakos sa pagtuman sa iyang mga saad!
16. Sa unsang paagi naapektohan ang mga Israelinhon sa mga butang nga ilang nakita?
16 Ang mga butang nga nakita sa mga Israelinhon nakadaot sa ubang mga paagi. Ang paglakaw pinaagi sa makita nagpakurog kanila tungod sa kahadlok sa ilang mga kaaway. (Numeros 13:28, 32; Deuteronomio 1:28) Tungod niadto, ilang gilalis ang hinatag-sa-Diyos nga awtoridad ni Moises ug sila mibagulbol bahin sa kahimtang sa ilang pagkinabuhi. Ang maong kakulang sa pagtuo mitultol sa ilang pagpalabi sa kontrolado-sa-demonyo nga Ehipto inay sa Yutang Saad. (Numeros 14:1-4; Salmo 106:24) Nasakitan gayod si Jehova sa dihang iyang nakita ang grabeng kawalay-pagtahod nga gipakita sa iyang katawhan alang sa ilang dili-makita nga Hari!
17. Unsay hinungdan nga gisalikway sa mga Israelinhon ang giya ni Jehova sa adlaw ni Samuel?
17 Sa adlaw sa manalagnang si Samuel, ang giuyonang nasod sa Israel nabitik na usab sa lit-ag sa paglakaw pinaagi sa makita. Ang katawhan misugod pagtinguha ug hari nga ilang makita. Bisan pag si Jehova nagpasundayag nga siya mao ang ilang Hari, dili pa kadto igo aron maglakaw sila pinaagi sa pagtuo. (1 Samuel 8:4-9) Sa ilang kadaotan mismo, sa kahungog ilang gisalikway ang dili-masayop nga giya ni Jehova, nga gipalabi hinuon nga mahisama sa kasikbit nga mga nasod.—1 Samuel 8:19, 20.
18. Unsang mga pagtulon-an ang atong makat-onan bahin sa mga kapeligrohan sa paglakaw pinaagi sa makita?
18 Ingon nga modernong-adlawng mga alagad ni Jehova, gimahal nato ang atong maayong relasyon uban sa Diyos. Maikagon kitang makakat-on ug magpadapat sa bililhong mga pagtulon-an gikan sa nangaging mga panghitabo diha sa atong mga kinabuhi. (Roma 15:4) Sa dihang ang mga Israelinhon naglakaw pinaagi sa makita, ilang nalimtan nga ang Diyos maoy nagdumala kanila pinaagi ni Moises. Kon kita dili magbantay, kita mahimong malimot usab nga si Jehova nga Diyos ug ang Dakong Moises, si Jesu-Kristo, maoy nagadumala sa Kristohanong kongregasyon karon. (Pinadayag 1:12-16) Kinahanglang magbantay kita batok sa pagbaton ug tawhanong panghunahuna sa yutan-ong bahin sa organisasyon ni Jehova. Ang maong panghunahuna mahimong mosangpot sa reklamador nga espiritu ug kawalay-pagtahod alang sa mga hawas ni Jehova ingon man sa espirituwal nga pagkaon nga gitagana sa “matinumanon ug maalamong ulipon.”—Mateo 24:45.
Magmadeterminado sa Paglakaw Pinaagi sa Pagtuo
19, 20. Unsay determinado nimong buhaton, ug ngano?
19 Ang Bibliya nag-ingon: “Kita adunay pakigdumog, dili batok sa dugo ug unod, kondili batok sa mga kagamhanan, batok sa mga awtoridad, batok sa mga magmamando sa kalibotan niini nga kangitngit, batok sa daotang mga puwersa nga espirituhanon sa langitnong mga dapit.” (Efeso 6:12) Si Satanas nga Yawa ang atong pangunang kaaway. Ang iyang tumong mao ang pagdaot sa atong pagtuo kang Jehova. Dili niya sayloan ang bisan unsang matang sa argumento nga mahimong makapabulag kanato gikan sa atong desisyon sa pag-alagad sa Diyos. (1 Pedro 5:8) Unsay magapanalipod kanato aron dili kita malimbongan sa panggawas nga dagway sa sistema ni Satanas? Lakaw pinaagi sa pagtuo, dili pinaagi sa makita! Ang pagsalig sa mga saad ni Jehova magapanalipod kanato aron dili kita makasinatig “pagkalunod labot sa atong pagtuo.” (1 Timoteo 1:19) Nan, magmadeterminado kita nga ipadayon ang paglakaw pinaagi sa pagtuo, nga bug-os magmasaligon sa panalangin ni Jehova. Ug hinaot padayon kitang mag-ampo aron kita makaikyas sa tanang butang nga gitakdang mahitabo sa dili na madugay.—Lucas 21:36.
20 Samtang kita maglakaw pinaagi sa pagtuo, dili pinaagi sa makita, kita adunay labing maayong Sulondan. “Si Kristo nag-antos alang kaninyo,” nag-ingon ang Bibliya, “nga nagbilin kaninyog sulondan aron kamo managsunod pag-ayo sa iyang mga tunob.” (1 Pedro 2:21) Hisgotan sa sunod artikulo kon sa unsang paagi makapadayon kita sa paglakaw sama sa iyang paglakaw.
Nahinumdom Ka Ba?
• Unsay imong nakat-onan gikan sa mga panig-ingnan ni Moises ug Esau bahin sa paglakaw pinaagi sa pagtuo, dili pinaagi sa makita?
• Unsay usa ka hinungdanong paagi sa paglikay sa materyalismo?
• Sa unsang paagi ang paglakaw pinaagi sa pagtuo makatabang kanato sa paglikay sa panghunahuna nga ang kataposan halayo pa?
• Nganong peligroso ang paglakaw pinaagi sa makita?
[Mga Pangutana sa Pagtuon]
[Hulagway sa panid 17]
Si Moises naglakaw pinaagi sa pagtuo
[Hulagway sa panid 18]
Ang kalingawan kanunay bang makababag kanimo gikan sa teokratikanhong mga kalihokan?
[Hulagway sa panid 20]
Sa unsang paagi ang pagpamati sa Pulong sa Diyos magapanalipod kanimo?