Magpadayon sa Paglakaw Sama sa Paglakaw ni Jesu-Kristo
Magpadayon sa Paglakaw Sama sa Paglakaw ni Jesu-Kristo
‘Siya nga nag-ingon nga siya nagpabiling nahiusa uban sa Diyos nailalom usab sa obligasyon nga magpadayon sa paglakaw sama sa paglakaw ni Jesus.’—1 JUAN 2:6.
1, 2. Unsay nalangkit sa pagtutok kang Jesus?
“DAGANON nato nga malahutayon ang lumba nga gibutang sa atong atubangan,” misulat si apostol Pablo, “samtang atong tutokan ang Pangulong Ahente ug Maghihingpit sa atong pagtuo, si Jesus.” (Hebreohanon 12:1, 2) Aron makasubay sa dalan sa pagkamatinumanon, kinahanglan natong tutokan si Jesu-Kristo.
2 Ang pulong sa orihinal nga pinulongan alang sa “tutokan,” sumala sa pagkagamit diha sa Kristohanon Gregong Kasulatan, nagkahulogan nga “itumong ang pagtagad nga dili malinga,” “ilingiw ang pagtan-aw gikan sa usa ka butang aron makita ang laing butang,” “isentro ang panan-aw.” Usa ka reperensiyang basahon nag-ingon: “Sa gutlo nga ilingiw sa Gregong maglulumba ang iyang pagtagad gikan sa lumbaanan ug sa dulnganan nga paingon niana tulin siyang nagdagan, ug ipunting kana sa mga tumatan-aw, ang iyang pagdagan mohinay. Ingon usab niana ang mahitabo sa mga Kristohanon.” Ang mga kabaldahan makapugong sa atong espirituwal nga pag-uswag. Kinahanglang motutok kita kang Jesu-Kristo. Ug unsay atong ginatan-aw diha sa Pangulong Ahente? Ang Gregong termino nga gihubad nga “pangulong ahente” nagpasabot nga “pangunang lider, usa nga nagapanguna sa bisan unsang butang ug sa ingon naghatag ug panig-ingnan.” Ang pagtutok kang Jesus nagpasabot nga sundon ang iyang panig-ingnan.
3, 4. (a) Unsay gikinahanglan aron makalakaw kita sama sa paglakaw ni Jesu-Kristo? (b) Unsang mga pangutana ang angay natong tagdon?
3 ‘Siya nga nag-ingon nga siya nagpabiling nahiusa uban sa Diyos nailalom usab sa obligasyon nga magpadayon sa paglakaw sama sa paglakaw ni Jesus,’ nag-ingon ang Bibliya. (1 Juan 2:6) Kinahanglan kitang magpabiling nahiusa sa Diyos pinaagi sa pagsunod sa mga sugo ni Jesus sama nga siya nagsunod sa mga sugo sa iyang Amahan.—Juan 15:10.
4 Busa, aron kita makalakaw sama sa paglakaw ni Jesus, kinahanglan natong sud-ongon siya pag-ayo ingong Pangunang Lider ug atong sundon pag-ayo ang iyang mga lakang. Ang hinungdanong mga pangutana nga tagdon bahin niini mao: Sa unsang paagi si Kristo nagapanguna kanato karon? Unsay epekto sa iyang paagi sa paglakaw diha kanato? Unsay mga kaayohan sa dihang sundon ang sulondan nga gihatag ni Jesu-Kristo?
Kon sa Unsang Paagi si Kristo Nagapanguna sa Iyang mga Sumusunod
5. Una pa mosaka sa langit, unsay gisaad ni Jesus ngadto sa iyang mga sumusunod?
5 Una pa mosaka sa langit, ang nabanhawng si Jesu-Kristo nagpakita sa iyang mga tinun-an ug naghatag kanilag usa ka hinungdanong buluhaton. Siya miingon: “Busa panglakaw kamo ug paghimog mga tinun-an sa katawhan sa tanang kanasoran.” Niadtong higayona gisaaran usab sila sa Pangunang Lider nga siya magauban kanila samtang tumanon nila ang maong tinudlong buluhaton, nga nag-ingon: “Tan-awa! ako magauban kaninyo sa tanang adlaw hangtod sa kataposan sa sistema sa mga butang.” (Mateo 28:19, 20) Sa unsang paagi si Jesu-Kristo nagauban sa iyang mga sumusunod niining panahon sa kataposan sa sistema sa mga butang?
6, 7. Sa unsang paagi gigamit ni Jesus ang balaang espiritu sa pagpanguna kanato?
6 “Ang magtatabang, ang balaang espiritu, nga ipadala sa Amahan sa akong ngalan,” matod ni Jesus, “siya magtudlo kaninyo sa tanang butang ug magpahinumdom kaninyo sa tanang butang nga akong gisulti kaninyo.” (Juan 14:26) Ang balaang espiritu, nga gipadala sa ngalan ni Jesus, magagiya ug magapalig-on kanato karon. Kini maglamdag kanato sa espirituwal nga paagi ug motabang kanato sa pagsabot ‘bisan sa lawom nga mga butang sa Diyos.’ (1 Corinto 2:10) Dugang pa, ang diyosnong mga hiyas nga mao ang “gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon” maoy “bunga sa espiritu.” (Galacia 5:22, 23) Sa tabang sa balaang espiritu, makaugmad kita nianang mga hiyasa.
7 Samtang kita magtuon sa Kasulatan ug maningkamot nga ipadapat ang atong nakat-onan, ang espiritu ni Jehova motabang kanato aron kita mouswag sa kaalam, katakos sa pag-ila, pagsabot, kahibalo, panghukom, ug katakos sa panghunahuna. (Proverbio 2:1-11) Ang balaang espiritu motabang usab kanato sa pag-antos sa mga tentasyon ug mga pagsulay. (1 Corinto 10:13; 2 Corinto 4:7; Filipos 4:13) Giawhag ang mga Kristohanon sa ‘paghinlo sa ilang kaugalingon sa tanang kahugawan sa unod ug espiritu, nga magahingpit sa pagkabalaan.’ (2 Corinto 7:1) Dili gayod nato masunod ang kinahanglanon sa Diyos bahin sa pagkabalaan o kahinlo diha sa atong pagkinabuhi kon wala ang tabang sa balaang espiritu. Ang usa ka instrumento ni Jesus sa pagpanguna kanato karon mao ang balaang espiritu, nga gitugot ni Jehova nga Diyos nga gamiton sa iyang Anak.—Mateo 28:18.
8, 9. Sa unsang paagi gigamit ni Kristo “ang matinumanon ug maalamong ulipon” sa pagpanguna sa kongregasyon?
8 Tagda ang laing instrumento ni Kristo sa pagpanguna sa kongregasyon karon. Sa pagkomento bahin sa iyang presensiya ug sa kataposan sa sistema sa mga butang, si Jesus miingon: “Kinsa ba gayod ang matinumanon ug maalamong ulipon nga gitudlo sa iyang agalon ibabaw sa iyang mga sulugoon sa panimalay, sa paghatag kanila sa ilang pagkaon sa hustong panahon? Malipayon kanang ulipona kon sa pag-abot sa iyang agalon makaplagan siya nga nagabuhat sa ingon! Sa pagkatinuod ako magaingon kaninyo, igatudlo niya siya ibabaw sa tanan niyang mga kabtangan.”—Mateo 24:3, 45-47.
9 Ang “agalon” mao si Jesu-Kristo. Ang “ulipon” mao ang grupo sa dinihogang mga Kristohanon sa yuta. Ang maong ulipon nga matang gitugyanan sa pag-atiman sa mga butang ni Jesus nga may kalabotan sa yuta ug sa pagtaganag tukma-sa-panahong espirituwal nga pagkaon. Ang usa ka gamayng grupo sa may-katakos nga mga magtatan-aw gikan sa taliwala sa daghag-sakop nga “matinumanon ug maalamong ulipon” naglangkob sa Nagamandong Lawas, nga nag-alagad ingong hawas sa ulipon nga matang. Sila ang nagdumala sa tibuok-kalibotan nga buluhaton sa pagwali sa Gingharian ug pagtaganag espirituwal nga pagkaon sa tukmang panahon. Sa maong paagi si Kristo nagapanguna sa kongregasyon pinaagi sa dinihogan-sa-espiritung “matinumanon ug maalamong ulipon” ug sa Nagamandong Lawas niini.
10. Unsay angay natong tinamdan bahin sa mga ansiyano, ug ngano?
10 Ang lain pang pagpadayag sa pagpanguna ni Kristo mao ang “mga gasa nga mga lalaki”—ang Kristohanong mga ansiyano o mga magtatan-aw. Sila gihatag “alang sa pagpasibo ug balik sa mga balaan, alang sa ministeryal nga buluhaton, alang sa pagpalig-on sa lawas ni Kristo.” (Efeso 4:8, 11, 12) Mahitungod kanila, ang Hebreohanon 13:7 nag-ingon: “Hinumdomi sila nga nagapanguna kaninyo, nga nagasulti sa pulong sa Diyos kaninyo, ug samtang mamalandong kamo kon unsay gisangpotan sa ilang panggawi sundoga ang ilang pagtuo.” Ang mga ansiyano nagapanguna sa kongregasyon. Sanglit sila nagsundog kang Kristo Jesus, ang ilang pagtuo angayang sundogon. (1 Corinto 11:1) Ikapakita nato ang atong pagkamapasalamaton sa kahikayan bahin sa mga ansiyano pinaagi sa pagkamasinugtanon ug pagpasakop sa maong “mga gasa nga mga lalaki.”—Hebreohanon 13:17.
11. Pinaagi sa unsa nga si Kristo nagapanguna sa iyang mga sumusunod karon, ug unsay nalangkit sa paglakaw sama sa iyang paglakaw?
11 Oo, si Jesu-Kristo nagapanguna sa iyang mga sumusunod karon pinaagi sa balaang espiritu, sa “matinumanon ug maalamong ulipon,” ug sa mga ansiyano sa kongregasyon. Aron makalakaw sama sa paglakaw ni Kristo, kinahanglang masabtan nato ang iyang paagi sa pagpanguna ug magpasakop niana. Kinahanglan usab natong sundogon ang iyang paagi sa paglakaw. “Niini nga dalan kamo gipanagtawag,” misulat si apostol Pedro, “tungod kay bisan si Kristo nag-antos alang kaninyo, nga nagbilin kaninyog sulondan aron kamo managsunod pag-ayo sa iyang mga tunob.” (1 Pedro 2:21) Unsay angayng epekto diha kanato ang pagsunod sa hingpit nga sulondan ni Jesus?
Magmakataronganon sa Dihang Magagamit ug Awtoridad
12. Unsang bahin sa panig-ingnan ni Kristo ang ilabinang makapaikag sa mga ansiyano diha sa kongregasyon?
12 Bisan pag si Jesus nakadawat ug dili-hitupngang awtoridad gikan sa iyang Amahan, makataronganon ang iyang paggamit niana. Ang tanan diha sa kongregasyon—ilabina ang mga magtatan-aw—angayng ‘magpaila sa ilang pagkamakataronganon sa tanang tawo.’ (Filipos 4:5; 1 Timoteo 3:2, 3) Sanglit ang mga ansiyano adunay usa ka sukod sa awtoridad diha sa kongregasyon, kinahanglang sundon nila ang mga lakang ni Kristo sa ilang paggamit niana.
13, 14. Sa unsang paagi makasundog ang mga ansiyano kang Kristo samtang ilang dasigon ang uban sa pag-alagad sa Diyos?
13 Gikonsiderar ni Jesus ang mga limitasyon sa iyang mga tinun-an. Wala siya mangayog labaw gikan kanila kay sa ilang arang ikahatag. (Juan 16:12) Nga wala mamugos kanila, si Jesus nagdasig sa iyang mga sumusunod nga ‘manlimbasog nga kusganon’ sa pagbuhat sa kabubut-on sa Diyos. (Lucas 13:24) Iyang gihimo kana pinaagi sa pagpanguna ug sa pagdasig sa ilang kasingkasing. Sa susamang paagi, ang Kristohanong mga ansiyano karon dili manghadlok sa uban aron moalagad sila sa Diyos pinaagi sa pagpakaulaw kanila. Hinunoa, ilang gidasig sila sa pag-alagad kang Jehova tungod sa ilang paghigugma kaniya ug kang Jesus, ingon man sa ilang isigkatawo.—Mateo 22:37-39.
14 Wala abusohi ni Jesus ang awtoridad nga gitugyan kaniya pinaagi sa pagkontrolar sa kinabuhi sa mga tawo. Wala siya magbutang ug mga sukdanan nga dili makab-ot ug wala siya maghatag ug dili-maihap nga kalagdaan. Ang iyang metodo mao ang pagdasig sa uban pinaagi sa pagtandog sa ilang mga kasingkasing nga gigamit ang mga prinsipyong nagpaluyo sa mga balaod nga gihatag pinaagi ni Moises. (Mateo 5:27, 28) Sa pagsundog kang Jesu-Kristo, likayan sa mga ansiyano ang paggamag kinaugalingong kalagdaan o ipugos ang ilang personal nga mga punto-debista. Kon bahin sa pagpamesti ug pagpamostura o lulinghayaw ug kalingawan, maningkamot ang mga ansiyano sa pagtukbil sa mga kasingkasing pinaagi sa paggamit sa diyosnong mga prinsipyo, sama sa gipadayag diha sa Miqueas 6:8; 1 Corinto 10:31-33; ug 1 Timoteo 2:9, 10.
Magmabination ug Magmapinasayloon
15. Unsay sanong ni Jesus bahin sa mga kapakyasan sa iyang mga tinun-an?
15 Si Kristo nagbilin ug usa ka sulondan aron sundon nato ang iyang paagi sa pagtagad sa mga kapakyasan ug kasaypanan sa iyang mga tinun-an. Tagda ang duha ka panghitabo sa iyang kataposang gabii sa yuta ingong usa ka tawo. Sa pag-abot sa Getsemane, si Jesus ‘nagdala kang Pedro ug Santiago ug Juan kauban niya’ ug giingnan sila nga “magpadayon sa pagbantay.” Unya, “sa paglakaw sa unahan ug diyutay siya mihapa sa yuta ug nag-ampo.” Sa iyang pagbalik, iyang “nakaplagan sila nga nangatulog.” Unsay sanong ni Jesus? Siya miingon: “Hinuon, maikagon ang espiritu, apan maluya ang unod.” (Marcos 14:32-38) Imbes mangasaba kang Pedro, Santiago, ug Juan, nagpahayag siyag pagkamabination! Niadtong gabhiona mismo, gilimod ni Pedro si Jesus sa tulo ka higayon. (Marcos 14:66-72) Unsay pagtagad ni Jesus kang Pedro human niadto? “Ang Ginoo gibangon ug siya mipakita kang Simon [Pedro].” (Lucas 24:34) “Siya nagpakita kang Cefas,” matod sa Bibliya, “unya ngadto sa napulog-duha.” (1 Corinto 15:5) Imbes mobatig kayugot, gipasaylo ni Jesus ang mahinulsolong apostoles ug gilig-on siya. Sa ulahi, si Pedro gitugyanan ni Jesus ug dagkong mga responsabilidad.—Buhat 2:14; 8:14-17; 10:44, 45.
16. Sa unsang paagi makalakaw kita sama sa paglakaw ni Jesus sa dihang kita mahiubos o masilo sa atong mga isigkamagtutuo?
16 Sa dihang mahiubos o masilo kita sa atong isigkamagtutuo tungod sa tawhanong pagkadili-hingpit, dili ba angay usab kitang magmabination ug magmapinasayloon sama kang Jesus? Giawhag ni Pedro ang iyang mga isigkamagtutuo: “Kamong tanan magbaton ug samang panghunahuna, nga magpakitag pagbati alang sa isigkaingon, nga magbaton ug inigsoong pagbati, magmabination uban ang kalumo, magmapainubsanon sa hunahuna, nga dili magabalos ug kadaot sa kadaot o magasultig pasipala sa pasipala, kondili, sa kasukwahi, manghinaot ug kaayohan.” (1 Pedro 3:8, 9) Unsa na man kon ang laing tawo dili magtagad kanato sama kang Jesus, nga sila dili magmabination o magmapinasayloon? Bisan sa maong higayon kita obligadong maningkamot sa pagsundog kang Jesus ug mosanong sama sa iyang pagsanong.—1 Juan 3:16.
Unaha ang Intereses sa Gingharian
17. Unsay nagpakita nga ang pagbuhat sa kabubut-on sa Diyos gihatagan ni Jesus ug unang dapit diha sa iyang kinabuhi?
17 Kinahanglan kitang molakaw sama sa paglakaw ni Jesus sa laing paagi. Ang pagmantala sa maayong balita sa Gingharian sa Diyos adunay hinungdanon kaayong dapit diha sa kinabuhi ni Jesus. Human sa pagwali ngadto sa Samarianhong babaye duol sa siyudad sa Sikar sa Samaria, gisultihan ni Jesus ang iyang mga tinun-an: “Ang akong pagkaon mao ang pagbuhat sa kabubut-on niya nga nagpadala kanako ug ang paghuman sa iyang buluhaton.” (Juan 4:34) Ang pagbuhat sa kabubut-on sa iyang Amahan nakapalig-on kang Jesus; kadto nahisamag sustansiyado, makapatagbaw, ug makapabaskog nga pagkaon alang kaniya. Dili ba ang pagsundog kang Jesus pinaagi sa paghatag ug bug-os nga pagtagad sa pagbuhat sa kabubut-on sa Diyos mosangpot sa kinabuhi nga makahuloganon ug matagbawon gayod?
18. Unsang mga panalangin ang mosangpot sa pagdasig sa mga anak nga mosulod sa bug-os-panahong pag-alagad?
18 Sa dihang dasigon sa mga ginikanan ang ilang mga anak sa pagsulod sa bug-os-panahong pag-alagad, sila ug ang ilang mga anak makadawat ug daghang panalangin. Ang usa ka amahan nga may kaluhang mga anak nga lalaki nagdasig kanila sa paghimo sa pagpayunir nga ilang tumong sukad gayod sa ilang pagkabata. Pagkatapos sa ilang sekular nga edukasyon, ang kaluha nahimong mga payunir. Sa paghinumdom sa mga kalipay nga iyang natagamtam ingong resulta, ang maong amahan misulat: “Wala kami pakyasa sa among mga anak nga lalaki. Mapasalamaton kaming makaingon: ‘Ang mga anak maoy panulondon gikan ni Jehova.’” (Salmo 127:3) Ug sa unsang paagi ang mga anak makabaton ug kaayohan gumikan sa pagsulod sa bug-os-panahong pag-alagad? Ang usa ka inahan nga lima ug anak miingon: “Ang pagpayunir nakatabang sa tanan kong anak sa pag-ugmad ug mas suod nga relasyon uban kang Jehova, nakapauswag sa ilang mga batasan bahin sa personal nga pagtuon, nakatabang kanila kon unsaon paggamit ang ilang panahon sa maalamong paagi, ug nakatabang kanila sa pag-una sa espirituwal nga mga butang diha sa ilang mga kinabuhi. Bisan pag silang tanan kinahanglang mohimog daghang pagpasibo, walay usa kanila ang nagbasol sa ilang gipiling dalan.”
19. Unsang mga plano alang sa umaabot ang maalamong pagahunahunaon sa mga batan-on?
19 Mga batan-on, unsay inyong mga plano alang sa umaabot? Gitinguha ba ninyo nga mahimong inila diha sa usa ka karera? O nangagpas ba kamo alang sa bug-os-panahong pag-alagad ingon nga karera? “Pagbantay pag-ayo nga ang inyong paglakaw dili ingon sa dili-maalamon kondili ingon sa maalamon nga mga tawo,” mitambag si Pablo, “nga magapalit sa nahiangay nga panahon alang sa inyong kaugalingon, tungod kay ang mga adlaw daotan.” Siya nagkanayon pa: “Tungod niini hunong na sa pagkahimong dili-makataronganon, hinunoa padayong sabta kon unsa ang kabubut-on ni Jehova.”—Efeso 5:15-17.
Magmaunongon
20, 21. Sa unsang paagi si Jesus maunongon, ug sa unsang paagi makasundog kita sa iyang pagkamaunongon?
20 Aron makalakaw sama sa paglakaw ni Jesus, kinahanglan natong sundogon ang iyang pagkamaunongon. Mahitungod sa pagkamaunongon ni Jesus, ang Bibliya nag-ingon: “Bisan tuod siya naglungtad diha sa dagway sa Diyos, [siya] wala maghunahuna sa pagpangilog, nga mao, nga siya mahimong katumbas sa Diyos. Wala, apan iyang gihaw-asan ang iyang kaugalingon ug gihuptan ang dagway sa usa ka ulipon ug nahisama sa mga tawo. Labaw pa niana, sa dihang iyang nakaplagan ang iyang kaugalingon nga diha sa dagway sa usa ka tawo, siya nagpaubos ug nagmasinugtanon hangtod sa kamatayon, oo, kamatayon sa estaka sa pagsakit.” Si Jesus maunongong nagtuboy sa pagkasoberano ni Jehova pinaagi sa pagpasakop sa kabubut-on sa Diyos alang kaniya. Siya nagmasinugtanon hangtod siya namatay diha sa estaka sa pagsakit. Kinahanglan natong ‘huptan kining tinamdan sa hunahuna’ ug maunongong magpasakop sa pagbuhat sa kabubut-on sa Diyos.—Filipos 2:5-8.
21 Si Jesus nagpakita usab ug pagkamaunongon ngadto sa iyang matinumanong mga apostoles. Bisan pa sa ilang mga kahuyangan ug mga pagkadili-hingpit, si Jesus nahigugma kanila “hangtod sa kataposan.” (Juan 13:1) Sa susama, kinahanglang kita dili hinawayon sa mga kahuyangan sa atong mga igsoon.
Magpadayon sa Pagsunod sa Sulondan nga Gihatag ni Jesus
22, 23. Unsa ang mga kaayohan sa pagpadayon pagsundog sa sulondan nga gihatag ni Jesus?
22 Siyempre, ingong dili-hingpit nga mga tawo, dili kita makasunod sa eksaktong paagi sa mga lakang sa atong hingpit nga Sulondan. Bisan pa niana, makapanlimbasog kita sa pagsunod pag-ayo sa iyang mga lakang. Aron mahimo kana, kinahanglan kitang makasabot ug magpasakop sa paagi sa pagpanguna ni Kristo ug magpadayon pagsunod sa sulondan nga iyang gihatag.
23 Ang pagkahimong mga tigsundog kang Kristo moresulta sa daghang panalangin. Mahimong mas makahuloganon ug matagbawon ang atong kinabuhi tungod kay gihatagan natog bug-os nga pagtagad ang pagbuhat sa kabubut-on sa Diyos inay ang atong kaugalingon. (Juan 5:30; 6:38) Mabatonan nato ang maayong tanlag. Mahimong sulondan ang atong paagi sa paglakaw. Gidapit ni Jesus ang tanan nga nabudlayan ug nabug-atan nga moduol kaniya ug sila nakakaplag ug kahayahay alang sa ilang mga kalag. (Mateo 11:28-30) Kon atong sundon ang panig-ingnan ni Jesus, kita makapahayahay usab sa uban tungod sa atong pagpakig-uban. Nan, magpadayon kita sa paglakaw sama sa paglakaw ni Jesus.
Nahinumdom Ka Ba?
• Sa unsang paagi si Kristo nagapanguna sa iyang mga sumusunod karon?
• Sa unsang paagi ang mga ansiyano makasunod sa pagpanguna ni Kristo diha sa paggamit sa ilang hinatag-sa-Diyos nga awtoridad?
• Sa unsang paagi makasunod kita sa panig-ingnan ni Jesus sa pagsagubang sa mga kahuyangan sa uban?
• Sa unsang paagi ang mga batan-on makabutang sa intereses sa Gingharian nga una sa ilang kinabuhi?
[Mga Pangutana sa Pagtuon]
[Hulagway sa panid 23]
Ang Kristohanong mga ansiyano motabang kanato sa pagsunod sa pagpanguna ni Kristo
[Hulagway sa panid 24, 25]
Mga batan-on, unsay inyong mga plano alang sa magantihon nga Kristohanong pagkinabuhi?