Mga Pangutana Gikan sa mga Magbabasa

Ang pagdula sa usa ka tawo ug mapintas nga mga dula sa kompiyuter makadaot ba sa iyang relasyon kang Jehova?

Si Haring David sa karaang Israel misulat: “Si Jehova magausisa sa matarong ug sa daotan, ug si bisan kinsa nga nahigugma sa kapintasan ginadumtan gayod sa Iyang kalag.” (Salmo 11:5) Ang orihinal nga Hebreohanong pulong alang sa “pagdumot” mahimong magpasabot sa “usa ka kaaway.” Busa, si bisan kinsa nga nahigugma sa kapintasan maghimo sa iyang kaugalingon nga kaaway sa Diyos. Nan, ang pangutana nga angay natong tagdon mao kini: Maugmad ba nato ang gugma sa kapintasan kon magdula kitag pipila ka dula sa kompiyuter?

Ang pintas nga mga dula sa kompiyuter nagpasiugda sa paggamit ug mga hinagiban. Ang magdudula kasagarang ginabansay niini sa pagpakiggubat. Ang magasing The Economist nag-ingon: “Ang kasundalohan sa Amerika nagsalig pag-ayo sa mga dula sa kompiyuter ingong mga kasangkapan sa pagbansay. Ang pipila ka dula nga gigamit sa mga sundalo gipamaligya na karon diha sa publiko.”

Tinuod, kadtong modulag mapintas nga mga dula sa kompiyuter wala magdaot sa tinuod nga mga tawo. Apan unsa kahay mahimong epekto niining matanga sa kalingawan diha sa ilang mga kasingkasing? (Mateo 5:21, 22; Lucas 6:45) Unsay imong ikaingon bahin sa usa ka tawo nga malingaw sa pagpanunggab, pagpamusil, pagpamiang, ug pagpamatay sa dili tinuod nga mga tawo? Unsa kahay mahitabo kon kining tawhana mogugol ug daghang oras matag semana nga magsigeg tan-aw nianang mapintas nga mga handurawan, nga halos naadik na sa maong mga dula? Labing menos, ikaw makahinapos nga siya nakaugmad ug gugma sa kapintasan, maingon nga ang usa ka tawo nga motan-aw ug pornograpiya makaugmad ug imoral nga mga tinguha.—Mateo 5:27-29.

Unsa ka dako ang pagdumot ni Jehova sa usa nga nahigugma sa kapintasan? Si David miingon nga si Jehova ‘nagadumot gayod’ kaniya. Sa adlaw ni Noe, gipakita ni Jehova kon unsa ka dako ang iyang pagdumot sa mga tawo nga nahigugma sa kapintasan. Si Jehova miingon kang Noe: “Ang kataposan sa tanang unod miabot sa akong atubangan, tungod kay ang yuta napuno sa kapintasan gumikan kanila; ug ania, laglagon ko sila uban sa yuta.” (Genesis 6:13) Gilaglag sa matuod nga Diyos ang tibuok kalibotan sa katawhan tungod sa ilang mapintas nga mga dalan. Si Noe lang ug ang iyang pamilya ang iyang giluwas—walo ka tawo nga wala mahigugma sa kapintasan.—2 Pedro 2:5.

Ang mga tawo nga gustong mahimong mga higala ni Jehova ‘nagsalsal sa ilang mga espada nga mga punta sa daro ug sa ilang mga bangkaw nga mga galab.’ Inay magkat-on sa paghigugma sa kapintasan, sila wala na ‘magkat-on pa ug gubat.’ (Isaias 2:4) Aron magpabiling higala sa Diyos imbes mahimong iyang kaaway, angay natong ‘biyaan ang daotan ug buhaton ang maayo.’ Kinahanglan natong ‘pangitaon ang pakigdait ug sundon kana.’—1 Pedro 3:11.

Komosta man kon kita nakadula na ug mapintas nga mga dula sa video? Nan kinahanglang determinado kitang mopahimuot kang Jehova pinaagi sa paghunong sa pagbuhat sa kon unsay iyang ginadumtan. Sa pagkatinuod, makaampo kita sa tabang sa balaang espiritu sa Diyos aron mapukgo ang maong binuhatan nga makadaot sa atong espirituwalidad. Mapukgo nato kini kon tugotan nato ang mga hiyas nga sama sa pakigdait, pagkamaayo, ug pagpugong sa kaugalingon nga maoy moimpluwensiya sa atong pagkinabuhi nga mahiuyon sa mga paagi sa Diyos.—Lucas 11:13; Galacia 5:22, 23.