Sukli ang Sayop nga Panghunahuna!

SA DIHANG nakasinatig katalagman, ang patriarkang si Job giduaw sa iyang tulo ka higala nga si Elipaz, Bildad, ug Zopar. Nangabot sila aron mosimpatiya ug maghupay kaniya. (Job 2:11) Ang labing impluwensiyado ug tingali labing tigulang sa tulo mao si Elipaz. Siya ang unang misulti ug labing daghan siyag gisulti. Unsang matang sa panghunahuna ang gipadayag ni Elipaz diha sa iyang tulo ka pakigpulong?

Nga naghinumdom sa usa ka dili-kinaiyanhong kasinatian nga iyang nabatonan, si Elipaz miingon: “Ang usa ka espiritu milabay sa akong atubangan; ang balhibo sa akong lawas nanglimbawot. Kini mihunong, apan wala ko hiilhi ang dagway niini; dihay usa ka hitsura atubangan sa akong mga mata; dihay kahilom, ug ako karon nakadungog ug tingog.” (Job 4:15, 16) Unsang matanga sa espiritu ang nag-impluwensiya sa panghunahuna ni Elipaz? Ang hinawayong tono sa mga pulong nga misunod nagpakita nga ang espiritu dili gayod usa sa matarong nga mga manulonda sa Diyos. (Job 4:17, 18) Kadto maoy usa ka daotang espiritung linalang. Kon dili pa, nganong si Jehova nagbadlong kang Elipaz ug sa iyang duha ka kauban tungod sa pagsultig mga bakak? (Job 42:7) Oo, si Elipaz naimpluwensiyahan sa demonyo. Ang iyang mga komento nagpadayag ug dili-diyosnong panghunahuna.

Unsang mga ideya ang masabtan gikan sa mga gipamulong ni Elipaz? Nganong hinungdanong magbantay kita batok sa sayop nga panghunahuna? Ug unsang mga lakang ang atong mahimo aron masuklan kini?

“Sa Iyang mga Alagad Siya Walay Pagsalig”

Sa tanang tulo ka pakigpulong, gipadayag ni Elipaz ang ideya nga ang Diyos mapig-oton kaayo nga ang bisan unsang buhaton sa iyang mga alagad dili makapahimuot kaniya. “Tan-awa! Sa iyang mga alagad siya walay pagsalig,” giingnan ni Elipaz si Job, “ug ang iyang mga mensahero iyang giakusahan nga masalaypon.” (Job 4:18) Si Elipaz sa ulahi miingon bahin sa Diyos: “Sa iyang mga balaan siya walay pagsalig, ug ang kalangitan dili mahinlo sa iyang mga mata.” (Job 15:15) Ug siya nangutana: “May kahimuot ba ang Labing Gamhanan nga ikaw matarong?” (Job 22:3) Si Bildad miuyon sa maong punto-debista, kay siya miingon: ‘Anaa gani ang bulan, ug kana dili hayag; ug ang mga bituon dili mahinlo sa mga mata sa Diyos.’—Job 25:5.

Kinahanglang magbantay kita nga dili maimpluwensiyahan sa maong panghunahuna. Kana mahimong mopabati kanato nga ang gikinahanglan sa Diyos kanato maoy sobra kaayo. Kining hunahunaa magdaot gayod sa atong relasyon kang Jehova. Dugang pa, kon magpadaog kita sa maong matang sa pagpangatarongan, unsay atong sanong kon kita kinahanglang disiplinahon? Imbes mapaubsanong dawaton ang pagtul-id, ang atong kasingkasing basin “maaligutgot batok kang Jehova,” ug basin kita maghambin ug kayugot kaniya. (Proverbio 19:3) Makadaot gayod kana sa espirituwalidad!

 “Ang Usa ka Tawo nga Lig-on ug Lawas May Pulos ba Alang sa Diyos?”

Nalanggikit sa ideya nga ang Diyos mapig-oton kaayo mao ang panghunahuna nga siya nag-isip sa mga tawo ingong walay pulos. Ang ikatulong pakigpulong ni Elipaz adunay pangutana: “Ang usa ka tawo nga lig-on ug lawas may pulos ba alang sa Diyos, nga siya nga hait ug salabotan magmapuslanon alang kaniya?” (Job 22:2) Gipasabot ni Elipaz nga ang tawo walay pulos alang sa Diyos. Sa susama, si Bildad nangatarongan: “Busa unsaon man pagkahusto sa may-kamatayong tawo atubangan sa Diyos, o unsaon man pagkahinlo niya nga gipakatawo sa usa ka babaye?” (Job 25:4) Sumala sa maong pangatarongan, ngano mang si Job, usa nga may-kamatayon, mangahas gayod sa pagbaton ug matarong nga baroganan atubangan sa Diyos?

Ang pipila ka tawo karon gihasol sa dili-maayong mga pagbati bahin sa ilang kaugalingon. Ang mga butang sama sa pagmatuto sa pamilya, pagkaladlad sa mga kapit-osan sa kinabuhi, o pagkabiktima sa pagdumot gumikan sa rasa o tribo mahimong nagpahinabo niini. Apan si Satanas ug iyang mga demonyo nagakalipay sa pagdun-ok sa usa ka tawo. Kon sila makaimpluwensiya sa usa ka tawo aron siya mobati nga ang bisan unsang butang nga iyang buhaton dili makapahimuot sa Labing Gamhanang Diyos, siya mas daling mawad-an ug paglaom. Ngadtongadto, ang maong tawo mahimong mopahilayo, nga mobulag pa gikan sa Diyos nga buhi.—Hebreohanon 2:1; 3:12.

Tungod sa pagkatigulang ug mga suliran sa panglawas, kita mahimong adunay mga limitasyon. Ang atong pagpakig-ambit sa pag-alagad sa Gingharian basin gamay na lang kon itandi sa atong gihimo sa dihang kita mas batan-on pa, mas himsog, ug mas lig-on. Hinungdanon gayod ang pag-ila nga gusto ni Satanas ug sa iyang mga demonyo nga kita mobati nga ang atong ginabuhat dili makapahimuot sa Diyos! Kinahanglang suklan nato ang maong panghunahuna.

Kon Unsaon Pagsukol ang Negatibong Panghunahuna

Bisan sa pag-antos nga gipaagom ni Satanas nga Yawa, si Job miingon: “Hangtod nga ako mamatay dili ko wad-on ang akong integridad gikan kanako!” (Job 27:5) Tungod kay siya nahigugma sa Diyos, si Job determinado nga mahuptan ang integridad bisan kon unsay mahitabo, ug dili niya itugot nga kana mausab. Ania ang usa ka hinungdanong butang sa pagsukol sa negatibong panghunahuna. Kinahanglang makabaton kitag maayong pagsabot bahin sa gugma sa Diyos ug maugmad ang kinasingkasing nga pagpabili niana. Kinahanglan usab natong palawomon ang atong gugma alang kaniya. Makab-ot kini pinaagig regular nga pagtuon sa Pulong sa Diyos ug mainampoong pagpamalandong sa atong makat-onan.

Pananglitan, ang Juan 3:16 nag-ingon: “Gihigugma pag-ayo sa Diyos ang kalibotan nga gihatag niya ang iyang bugtong nga Anak.” Si Jehova adunay lawom nga gugma alang sa kalibotan sa katawhan, ug ang iyang mga pagpakiglabot sa mga tawo sa paglabay sa panahon nagpakita sa maong gugma. Ang pagpamalandong sa mga pananglitan sa kagahapon angayng magpausbaw sa atong pagpabili kang Jehova ug magpalawom sa atong gugma alang kaniya, sa ingon makatabang kanato sa pagsukol sa sayop o negatibong panghunahuna.

Tagda ang paagi sa pagtagad ni Jehova kang Abraham sa nagsingabot ang kalaglagan sa Sodoma ug Gomora. Nangutanag walo ka beses si Abraham kang Jehova bahin sa Iyang hukom. Si Jehova wala gayod magpakitag kapikal o mobatig kapakyasan. Hinunoa, ang iyang mga tubag nagpasalig ug naghupay kang Abraham. (Genesis 18:22-33) Sa dihang ang Diyos sa ulahi nagluwas kang Lot ug sa iyang pamilya gikan sa Sodoma, mihangyo si Lot nga moikyas ngadto sa haduol nga siyudad inay ngadto sa kabukiran. Si Jehova mitubag: “Ania, ako nagpakitag konsiderasyon kanimo niining butanga usab, pinaagi sa dili ko pagpukan sa siyudad nga imong gihisgotan.” (Genesis 19:18-22) Kini bang mga asoya naghulagway kang Jehova ingong mapig-oton, dili-mahigugmaon, diktador nga magmamando? Wala. Kana nagpakita kon unsay tinuod niyang personalidad—mahigugmaon, maluloton, maluloy-on, ug masinabtanong Soberano.

Nagpanghimakak sa ideya nga ang Diyos tigpangitag sayop ug walay mausa ang makapahimuot kaniya mao ang mga panig-ingnan ni Aaron, David, ug Manases sa karaang Israel. Si Aaron sad-an ug tulo ka seryosong sala. Nagbuhat siyag bulawang baka, miduyog sa iyang igsoong babaye nga si Miriam sa pagsaway kang Moises, ug napakyas sa pagbalaan ug pagpasidungog sa Diyos didto sa Meriba. Bisan pa niana, si Jehova may nakitang maayo diha kaniya ug gitugotan siya sa pagpadayon sa pag-alagad ingong  hataas nga saserdote hangtod sa iyang kamatayon.—Exodo 32:3, 4; Numeros 12:1, 2; 20:9-13.

Si Haring David nakahimog bug-at nga mga sala panahon sa iyang paghari. Nalakip niana ang pagpanapaw, pagplano sa pagpatay sa tawong walay sala, ug pagkuhag supak-sa-balaod nga pagsensus. Bisan pa niana, namatikdan ni Jehova ang paghinulsol ni David ug maunongong nagtuman sa pakigsaad bahin sa Gingharian pinaagi sa pagtugot kaniya sa paghari hangtod sa iyang kamatayon.—2 Samuel 12:9; 1 Cronicas 21:1-7.

Si Haring Manases sa Judea nagpatindog ug mga halaran alang kang Baal, nagpaagi sa iyang mga anak lalaki sa kalayo, nagdasig ug espiritistikanhong mga buhat, ug nagtukod ug mga halaran sa bakak nga relihiyon diha sa mga sawang sa templo. Bisan pa niana, human sa iyang pagpakitag kinasingkasing nga paghinulsol, gipasaylo siya ni Jehova, gibuhian siya gikan sa pagkabinihag, ug gibalik kaniya ang gingharian. (2 Cronicas 33:1-13) Kana ba maoy mga buhat sa usa ka Diyos nga alang kaniya walay mausang makapahimuot? Dili gayod!

Ang Tigbutangbutang Mismo Sad-an

Dili kita angayng matingala nga si Satanas kahugpongan mismo sa mga kinaiya nga iyang gibutangbutang kang Jehova. Si Satanas mapintason ug mapig-oton. Kini tin-awng makita gikan sa batasan sa paghalad ug bata nga nalangkit sa bakak nga pagsimba sa nangaging kapanahonan. Ang apostatang mga Israelinhon nagsunog sa ilang mga anak nga lalaki ug mga anak nga babaye sa kalayo—butang nga wala gani motungha sa kasingkasing ni Jehova.—Jeremias 7:31.

Si Satanas, dili si Jehova mao ang tigpangitag sayop. Ang Pinadayag 12:10 nagtawag kang Satanas “ang magsusumbong sa atong mga igsoon . . . , nga nagsumbong kanila adlaw ug gabii atubangan sa atong Diyos!” Sa laing bahin, mahitungod kang Jehova, ang salmista miawit: “Kon mga kasaypanan mao pa ang imong gibantayan, Oh Jah, Oh Jehova, kinsa ba ang makabarog? Kay ang matuod nga pagpasaylo anaa kanimo.”—Salmo 130:3, 4.

Sa Dihang Wala Nay Sayop nga Panghunahuna

Nahupayan gayod ang mga manulonda sa dihang si Satanas nga Yawa ug ang iyang mga demonyo gitambog gikan sa mga langit! (Pinadayag 12:7-9) Human niadto, ang maong daotang mga espiritu dili na makaapekto sa mga kalihokan sa pamilya sa mga manulonda ni Jehova sa langit.—Daniel 10:13.

Ang mga molupyo sa yuta hapit nang maglipay. Sa dili na madugay, ang usa ka manulonda nga nanaog gikan sa langit nga may dalang yawi sa kahiladman ug usa ka dakong kadena sa iyang kamot magagapos kang Satanas ug iyang mga demonyo ug magtambog kanila ngadto sa kahiladman diin sila dili na makalihok. (Pinadayag 20:1-3) Talagsaon gayong kahupayan ang atong masinati sa dihang mahitabo kana!

Kasamtangan, kinahanglang magbantay kita batok sa sayop nga panghunahuna. Sa dihang ang sayop o negatibong mga hunahuna moyuhot sa atong alimpatakan, kinahanglang suklan nato kini pinaagi sa pagsentro sa atong mga hunahuna diha sa gugma ni Jehova. Unya ‘ang kalinaw sa Diyos nga labaw sa tanang panghunahuna magbantay sa atong mga kasingkasing ug sa atong mga gahom sa pangisip.’—Filipos 4:6, 7.

[Hulagway sa panid 26]

Gisuklan ni Job ang negatibong panghunahuna

[Hulagway sa panid 28]

Nahibaloan ni Lot nga si Jehova maoy usa ka masinabtanong Soberano