Tabang sa Pagpugong sa Atong mga Emosyon

ANG negatibong mga emosyon mao bay nagkontrolar usahay sa imong kinabuhi? Dali ka ra bang malagot, masuko, o mahigawad? Ang mga kabalaka sa kinabuhi mao bay nakapaluya kanimo? Unsay makatabang kanimo?

Ang emosyonal nga mga reaksiyon maoy kinaiyanhong bahin sa kinabuhi sa tawo. Sa dihang makontrolar sa hustong paagi, kini mahimong lamas sa kinabuhi. Hinuon, giangkon sa Bibliya nga “ang pagpanglupig makapabuang sa usa ka maalamon.” (Ecclesiastes 7:7) Sa usa ka kalibotan diin ang kapintasan ug mga aksidente subsob nga nagkahitabo, maapektohan gayod ang tanan. Apan, ang Kasulatan nag-ingon usab: “Wala nay mas maayo sa tawo kay sa magmaya sa iyang mga buluhaton.” (Ecclesiastes 3:22) Busa, aron ang kinabuhi mahimong mas makalilipay, kinahanglang makat-onan nato ang pagkalipay pinaagi sa pag-ugmad ug positibong mga emosyon. Sa unsang paagi atong maugmad ang mapuslanong mga emosyon ug mapukgo ang makadaot nga mga pagbati?

Ang paghimog mapuslanong mga lakang subsob makahupay sa kabug-at sa gibati natong negatibong mga emosyon. Pananglitan, kon mabalaka kita bahin sa mga butang nga dili nato makontrolar, dili ba mas maayo ang pag-usab sa atong naandang buluhaton o palibot imbes maghunahuna na lang kanunay nga mabalak-on? Ang lingawlingaw nga paglakawlakaw, pagpamati sa mananoy nga musika, pag-ehersisyo, o paghimog malulotong buhat alang sa uban lagmit makapahupay ug makapalipay kanato sa usa ka sukod.—Buhat 20:35.

Apan, ang labing maayong paagi sa pagwagtang sa negatibong mga hunahuna mao ang atong pagbutang ug pagsalig sa Maglalalang. Kon magpabilin ang negatibong mga hunahuna, angay natong ‘itugyan sa Diyos ang tanan natong mga kabalaka’ pinaagi sa pag-ampo. (1 Pedro 5:6, 7) Ang Bibliya nagpasalig kanato: “Si Jehova haduol niadtong mga dugmok ug kasingkasing . . . Daghan ang mga katalagman sa matarong, apan si Jehova magaluwas kaniya gikan niining tanan.” (Salmo 34:18, 19) Sa unsang paagi makasalig kita nga ang Diyos mahimong atong “katabang ug ang Magtatagana ug kaikyasan kanato”? (Salmo 40:17) Makasalig kita pinaagi sa pagtuon sa Bibliya ug pagpamalandong sa buhing mga panig-ingnan bahin sa personal nga interes sa Diyos sa kaayohan sa iyang mga alagad.