Usa ka Diyos o Usa ka Tawo?

“AKO mao ang kahayag sa kalibotan. Siya nga magasunod kanako dili gayod magalakaw sa kangitngit, apan makabaton sa kahayag sa kinabuhi.” (Juan 8:12) Si Jesu-Kristo maoy nagsulti niining mga pulonga. Usa ka edukadong tawo sa unang siglo misulat bahin kaniya: “Maampingong natago diha kaniya ang tanang bahandi sa kaalam ug kahibalo.” (Colosas 2:3) Dugang pa, ang Bibliya nag-ingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Hinungdanon ang tukmang kahibalo bahin kang Jesus aron matagbaw ang atong espirituwal nga panginahanglan.

Nakadungog na ang daghang tawo sa tibuok yuta bahin kang Jesu-Kristo. Dili malalis ang iyang impluwensiya sa kasaysayan sa tawo. Gani, ang kalendaryo nga gigamit sa labing daghang bahin sa kalibotan gipasukad sa tuig nga gituohang iyang natawhan. “Daghang tawo nagtumong sa mga petsa sa wala pa kanang tuiga ingong B.C., o before Christ,” nag-ingon ang The World Book Encyclopedia. “Migamit sila ug A.D., o anno Domini (sa tuig sa atong Ginoo), alang sa mga petsa human nianang tuiga.”

Bisan pa niana, dunay nagkasumpaki nga mga ideya bahin sa tinuod nga pagkatawo ni Jesus. Alang sa pipila, siya maoy usa lamang ka tawo nga nagbilin ug talagsaong talaan diha sa kasaysayan. Apan, ang uban nagsimba kaniya ingong Diyos nga Labing Gamhanan. Ang pipila ka sumusunod nga Hindu nagpakasama kang Jesu-Kristo ngadto kang Krishna nga diyos sa mga Hindu, nga giingon sa daghan nga usa ka diyos nga nagpakatawo. Si Jesus usa ba lamang ka ordinaryong tawo, o usa nga angayng simbahon? Kinsa ba gayod siya? Diin siya gikan? Unsay iyang mga kinaiya? Ug hain na siya karon? Samtang atong susihon ang mosunod nga artikulo, ang basahon nga daghag gisulti bahin kang Jesus maghatag ug matinud-anong mga tubag niining mga pangutanaha.