Ang Pagsabot sa mga Ilhanan Maoy Usa ka Seryosong Butang!

“Sa primero, abi nakog gilabdan lang ug ulo ang among anak nga lalaki nga si Andreas. Apan nawad-an siyag ganang mokaon ug taas kaayo ang iyang hilanat. Misamot ang kasakit sa iyang ulo, ug ako nabalaka. Pag-uli sa akong bana, gidala namo si Andreas sa doktor. Gisusi niya ang mga simtoma ug gipaospital dayon si Andreas. Dili ra diay kadto yanong sakit sa ulo. Si Andreas adunay meningitis. Siya gitambalan ug naayo sa wala madugay.”—Gertrud, usa ka inahan sa Alemanya.

DAGHANG ginikanan ang aduna tingaliy samang kasinatian ni Gertrud. Ilang namatikdan ang mga simtoma nga nagpaila nga ang ilang anak lagmit adunay sakit. Bisan tuod dili tanang sakit grabe, dili mahimong ibalewala sa mga ginikanan ang mga simtoma sa sakit sa ilang mga anak. Ang pagpaniid sa mga simtoma ug paghimog nahiangayng aksiyon dakog mahimo sa maong situwasyon. Kini maoy usa ka seryosong butang.

Tinuod usab kini sa ubang butang gawas sa panglawas. Usa ka pananglitan mao ang tsunami (dagkong balod) nga nahitabo niadtong Disyembre 2004 sa mga dapit palibot sa Dagat Indian. Namatikdan sa mga ahensiya sa gobyerno sa Australia ug Hawaii ang dakong linog sa amihanang Sumatra ug napanan-aw nilang daan ang posibleng daotang epekto sa maong linog. Apan, wala gayoy paagi nga mapasidan-an ang mga tawo niadtong nameligro nga mga dapit. Ingong resulta, kapin sa 220,000 ang namatay.

Mas Hinungdanon nga mga Ilhanan

Sa dihang si Jesu-Kristo anaa pa sa yuta, iyang gihatagan ang iyang mga mamiminaw ug usa ka pagtulon-an bahin sa pagpaniid sa mga ilhanan ug sa paglihok sumala niana. Siya naghisgot ug usa ka butang nga labawng hinungdanon. Ang Bibliya nagtaho: “Ang mga Pariseo ug mga Saduseo miduol kaniya ug, aron sa pagtental kaniya, ilang gihangyo siya nga ipadayag kanila ang usa ka ilhanan gikan sa langit. Sa pagtubag siya miingon kanila: ‘Inigkilumkilom na nabatasan ninyo ang pag-ingon, “Mahimong maayo ang panahon, kay daw kalayo ang kapula sa langit”; ug sa pagkabuntag, “Tugnaw, ulanon nga panahon karong adlawa, kay daw kalayo ang kapula sa langit, apan nagadagtom.” Mahibalo kamong mohubad sa  dagway sa langit, apan dili kamo makahubad sa mga ilhanan sa kapanahonan.’”—Mateo 16:1-3.

Sa paghisgot bahin sa “mga ilhanan sa kapanahonan,” gipadayag ni Jesus nga angayng maamgohan sa iyang unang-siglo nga Hudiyong mga mamiminaw ang pagkadinalian sa panahon nga ilang gikinabuhian. Ang Hudiyong sistema sa mga butang hapit nang makaagom ug katalagman nga mag-apektar kanilang tanan. Mga pipila ka adlaw una siya mamatay, gisulti ni Jesus ngadto sa iyang mga tinun-an ang laing ilhanan—ang ilhanan sa iyang presensiya. Ang iyang giingon niadtong tungora hinungdanon kaayo sa matag usa karon.