Si Jehova Dili Gayod Mobiya Kanimo

ANG mga Kristohanon sa Judea nag-antos sa grabeng pagsupak, ug sila nagsagubang pa ug materyalistiko nga panghunahuna sa mga tawo sa ilang palibot. Sa pagdasig kanila, gikutlo ni apostol Pablo ang gipamulong ni Jehova ngadto sa mga Israelinhon sa hapit na silang mosulod sa Yutang Saad. Si Pablo misulat: “Dili ko gayod ikaw pagabiyaan ni sa bisan unsang paagi pagatalikdan.” (Hebreohanon 13:5; Deuteronomio 31:6) Kining saara seguradong nakapadasig sa unang-siglong mga Kristohanon sa Judea.

Kining saara makapalig-on usab kanato sa pagsagubang sa mga kabalaka tungod sa pagkinabuhi niining “makuyaw nga mga panahong lisod sagubangon.” (2 Timoteo 3:1) Kon kita may pagsalig kang Jehova ug molihok sa ingon niana nga paagi, kita iyang palig-onon bisan sa lisod kaayo nga mga kahimtang. Aron mahibaloan kon sa unsang paagi tumanon ni Jehova kining saara, atong hisgotan ang pananglitan kon ang usa kalit nga mawad-an ug trabaho.

Pag-atubang sa Wala-Damhang Kausaban sa mga Kahimtang

Ang mga tawong walay trabaho nagkadaghan sa tibuok kalibotan. Sumala pa sa usa ka magasin sa Polandia, ang pagkawalay trabaho giisip nga “usa sa labing malisod nga mga problema sa panalapi ug sa katilingban.” Ang adunahang mga nasod apektado usab. Pananglitan, bisan taliwala sa mga membro sa Organization for Economic Cooperation and Development, sa tuig 2004 ang gidaghanon sa mga tawong walay trabaho “misaka ug kapin sa 32 ka milyon, nga mas daghan kay sa panahon sa Great Depression sa katuigan sa 1930.” Sa Polandia, nalista diha sa Central Statistical Office nga tulo ka milyong tawo ang walay trabaho niadtong Disyembre 2003, nga “gilangkoban ug 18 porsiyentong mga sibilyan nga makaarang pa sa pagtrabaho.” Ang usa ka basahon miingon nga ang gidaghanon sa lumad nga mga Aprikanong walay trabaho sa Habagatang Aprika miabot ug 47.8 porsiyento sa 2002!

Ang kalit nga pagkawalay trabaho ug ang wala-damhang pagkatangtang sa trabaho problema sa daghan, bisan sa mga alagad ni Jehova. “Ang panahon ug ang wala damhang panghitabo” modangat sa tanan. (Ecclesiastes 9:11) Tingali atong ikasulti usab ang gisulti ni salmistang David: “Ang mga kasakit sa akong kasingkasing midaghan.” (Salmo 25:17) Maantos mo kaha kining dili-maayong mga kahimtang? Tingali maapektahan niini ang imong emosyonal, espirituwal, ug materyal nga kahimtang. Kon mawad-an ka ug trabaho, makabalik ka kaha sa imong kanhing kahimtang?

 Pagsagubang sa Mabug-at nga mga Pagbati

“Ang pagkatangtang gikan sa trabaho masakit kaayo sa mga lalaki,” kay sila man ang gilantaw ingong tigpangitag pangabuhi sa pamilya, miingon ang sikologo nga si Janusz Wietrzyński. Siya miingon nga tungod niini ang usa ka lalaki mahimong masuko ug mawad-an ug paglaom. Ang usa ka amahan nga gitangtang sa trabaho tingali mawad-an ug kompiyansa sa kaugalingon ug mangitag “away sa iyang pamilya.”

Si Adam, usa ka Kristohanong amahan nga duhay anak, misaysay kon unsay iyang gibati dihang nawad-an siya ug trabaho: “Dali ako nga mapikal; masuko ako sa bisan unsang butang. Bisan magabii wala akoy laing gidamgo kondili pulos trabaho ug kon unsaon pagsustento sa akong mga anak ug sa akong asawa, kinsa gitangtang usab sa trabaho nga wala damha.” Sa dihang si Ryszard ug Mariola, usa ka magtiayon nga dunay anak, nawad-an ug trabaho, sila dakog utang sa bangko. Ang asawa miasoy: “Gubot kaayo ang akong hunahuna, ako gitulisok sa akong konsensiya nga sayop ang akong pagpangutang. Nagpunay ako ug hunahuna nga sayop nako ang tanan.” Kon mag-atubang niini nga mga kahimtang, tingali kita mobati dayon ug kasuko, kabalaka, o kahigawad, ug madaog kita sa atong emosyon. Nan, sa unsang paagi mapugngan nato ang atong bationg negatibong mga emosyon?

Ang Bibliya naghatag ug epektibong tambag kon unsaon sa paghupot ug positibong tinamdan. “Ayaw kabalaka sa bisan unsang butang,” si apostol Pablo nagtambag, “apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” (Filipos 4:6, 7) Ang pagduol kang Jehova pinaagi sa pag-ampo mohatag kanato ug “kalinaw sa Diyos,” usa ka kalmadong kahimtang sa hunahuna pinasukad sa atong pagtuo kaniya. Ang asawa ni Adam, nga si Irena, miingon: “Diha sa among mga pag-ampo, among gisugid kang Jehova ang among kahimtang ug kon unsaon namo pagkinabuhi nga mas simple. Ang akong bana, nga mabalak-on kaayo, nagsugod sa pagtuo nga may solusyon ra kining maong problema.”

Kon kalit nga nawad-an ka ug trabaho, maayong imong ipadapat ang tambag ni Jesu-Kristo sa Wali sa Bukid: “Hunong na sa pagkabalaka bahin sa inyong mga kalag kon unsay inyong kan-on o kon unsay inyong imnon, o bahin sa inyong mga lawas kon unsay inyong isul-ob. . . . Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang igadugang ra kaninyo.” (Mateo 6:25, 33) Gipadapat ni Ryszard ug Mariola kining tambaga sa pagsagubang sa ilang mga emosyon. “Kanunay akong hupayon sa akong bana ug nagpasalig nga kami dili gayod talikdan ni Jehova,” nahinumdom si Mariola. Ang iyang bana midugang: “Pinaagi sa kanunay nga pag-ampo, kami labi pang nasuod sa Diyos ug sa usag usa, ug kana nakapahupay gayod kanamo.”

Ang balaang espiritu makatabang usab kanato sa pagsagubang. Ang pagpugong sa kaugalingon, nga ipatungha sa espiritu diha kanato, makatabang kanato sa pagkahimong kalmado. (Galacia 5:22, 23) Tingali dili kini sayon, apan posible kini tungod kay si Jesus nagsaad nga “ang inyong Amahan sa langit mohatag ug balaang espiritu niadtong nagapangayo kaniya.”—Lucas 11:13; 1 Juan 5:14, 15.

 Ayaw Pasagdi ang Imong Espirituwal nga mga Panginahanglan

Ang wala-damhang pagkatangtang sa trabaho sa sinugdanan makapabalaka bisan sa balanse kaayo nga Kristohanon, apan dili gayod angay nga atong pasagdan ang atong espirituwal nga mga panginahanglan. Tagda pananglitan ang 40-anyos nga si Moises, kansang kinabuhi nabag-o sa dihang iyang gitalikdan ang iyang pagkamembro sa harianong pamilya ug nahimong usa ka magbalantay sa hayop, usa ka trabaho nga gipakaubos sa mga Ehiptohanon. (Genesis 46:34) Si Moises nagpasibo sa iyang bag-ong mga kahimtang. Sulod sa 40 ka tuig, iyang gitugotan si Jehova sa pag-umol ug pag-andam kaniya alang sa bag-ong mga buluhaton sa umaabot. (Exodus 2:11-22; Acts 7:29, 30; Hebreohanon 11:24-26) Bisag nag-atubang ug mga problema, gihatagan ug dakong importansiya ni Moises ang espirituwal nga mga butang, nga andam sa pagdawat sa pagbansay ni Jehova. Hinaot nga dili gayod nato tugotan nga ang atong espirituwalidad malandongan sa dili maayong mga kahimtang!

Bisag lisod kaayong mawad-an ug trabaho, maayo kaayo kining panahon sa pagpakigsuod kang Jehova nga Diyos ug sa iyang katawhan. Si Adam, nga gihisgotan sa sinugdan mibati nga maayong panahon kini nga makigsuod kang Jehova. Siya miingon: “Sa dihang ako ug ang akong asawa nataktak sa trabaho, wala gayod mosantop sa among hunahuna nga mohunong kami sa pagtambong sa Kristohanong mga tigom o sa pagpakigbahin sa buluhatong pagsangyaw. Tungod sa maong kaisipan kami wala na kaayo mabalaka bahin sa umaabot.” Susama usab niana ang giingon ni Ryszard: “Kon dili pa sa mga tigom ug sa ministeryo, kami dili gayod unta makasagubang; seguradong madaog kami sa kabalaka. Ang espirituwal nga mga panagkabildohay sa uban makapadasig, kay dili na kami magkalinga ug hunahuna sa among kaugalingong  mga panginahanglan kondili sa ilang mga panginahanglan.”—Filipos 2:4.

Oo, imbes mabalaka bahin sa pagkawalay trabaho, gamita ang maong panahon alang sa espirituwal nga mga kalihokan pinaagi sa personal nga pagtuon, pagpakigbahin sa mga kalihokan sa kongregasyon, o pagpadako sa imong ministeryo. Imbes magtuk-ong lang, ikaw makabaton ug ‘daghang buluhaton sa Ginoo’—nga makapalipay kanimo ug sa tanang sinserong mga tawo kinsa mosanong sa mensahe sa Gingharian nga imong gisangyaw.—1 Corinto 15:58.

Pagtagana sa Materyal nga Panginahanglan sa Imong Pamilya

Apan, ang espirituwal nga pagkaon dili makabusog sa walay sulod nga tiyan. Maayong atong ibutang sa hunahuna ang mosunod nga prinsipyo: “Tino nga kon adunay si bisan kinsa nga wala magtagana alang sa mga iya, ug ilabina alang sa mga sakop sa iyang panimalay, siya naglimod sa pagtuo ug mas daotan pa kay sa tawong walay pagtuo.” (1 Timoteo 5:8) “Bisan pag gitagan-an dayon sa mga igsoon ang among pisikal nga mga panginahanglan,” matod pa ni Adam, “kay mga Kristohanon man, kinahanglang mangita gayod kami ug trabaho.” Kita makasalig sa tabang ni Jehova ug sa iyang katawhan, apan dili gayod nato kalimtan nga kinahanglang mangita gayod kita ug paagi aron makakitag trabaho.

Unsa nga paagi? “Ayaw paghulat nga molihok ang Diyos, nga magpaabot ug milagro,” miingon si Adam. “Sa dihang mangita ka ug trabaho, ipaila dayon nga ikaw Saksi ni Jehova. Kasagarang hatagan kana ug importansiya sa mga tigpaempleyo.” Si Ryszard mitambag: “Pangutana kang bisan kinsa kon may mga nagkinahanglan ug trabahante, susiha kanunay ang mga ahensiya nga nagpangitag mga trabahante, basa ug mga paanunsiyo, sama sa: ‘Gikinahanglan, babaye nga moatiman ug tawong baldado’; o, ‘Temporaryo nga trabaho: Pagpamupo ug strawberry.’ Padayon sa pagpangita! Ayaw pagpilig trabaho, bisag ubos nga mga trabaho o trabaho nga sa tan-aw nimo dili angay kanimo.”

Oo, si “Jehova ang [imong] magtatabang.” Siya ‘dili gayod mobiya kanimo.’ (Hebreohanon 13:5, 6) Ayaw kaayog kabalaka. Ang salmistang David misulat: “Itugyan kang Jehova ang imong dalan, ug salig kaniya, ug siya molihok.” (Salmo 37:5) Ang ‘pagtugyan kang Jehova sa atong dalan’ nagkahulogan nga kita may pagsalig kaniya ug nga atong buhaton ang mga butang sa iyang paagi, bisan kon ang mga kahimtang daw dili maayo alang kanato.

Si Adam ug Irena nabuhi ra pinaagi sa paghinlog mga bentana ug mga hagdanan ug pagdaginot kon mamalit. Ginaadto usab nila kanunay ang ahensiya nga nagpangitag mga trabahante. “Ang tabang miabot gayod sa eksaktong panahon nga kami nanginahanglan niana,” miingon si Irena. Ang iyang bana midugang: “Natin-aw kanamo nga ang mga butang nga among giampo dili subay sa kabubut-on sa Diyos. Kini nagtudlo kanamo sa pagsalig sa iyang kaalam ug sa dili paglihok sumala sa among kaugalingong pagsabot. Mas maayong maghulat nga kalmado sa solusyon nga itagana sa Diyos.”—Santiago 1:4.

Si Ryszard ug Mariola midawat ug dili permanenteng mga trabaho ug sa samang higayon nagmapuliki sa pagsangyaw sa mga teritoryo nga dako ang panginahanglan. “Nakakita kami ug mga trabaho sa panahon mismo nga kami wala nay makaon,” miingon si Ryszard. “Wala namo dawata ang dakog-suweldo nga mga trabaho nga makababag sa among teokratikanhong mga responsibilidad. Mipili kami sa paghulat kang Jehova.” Sila nagtuo nga gimaniobra ni Jehova ang mga butang nga tungod niana sila nakakitag barato-ug-abang nga apartment ug si Ryszard sa kataposan nakakitag trabaho.

Sakit kaayong mawad-an ug trabaho, apan nganong dili lantawon kini ingong usa ka higayon sa pagsinati mismo nga si Jehova dili gayod mobiya kanimo? Si Jehova moatiman kanimo. (1 Pedro 5:6, 7) Siya nagsaad pinaagi kang manalagnang Isaias: “Ayaw iliraw ang imong panan-aw, kay ako imong Diyos. Ako magapalig-on kanimo. Ako sa pagkatinuod magatabang kanimo.” (Isaias 41:10) Ayaw itugot nga ang usa ka wala-damhang hitabo, lakip na ang pagkatangtang sa trabaho, magparalisar kanimo. Paningkamot kutob sa imong maarangan, ug dayon itugyan ang tanan diha sa mga kamot ni Jehova. Paghulat kang Jehova, ‘bisan sa hilom.’ (Lamentaciones 3:26) Ikaw makabaton ug dagayang mga panalangin.—Jeremias 17:7.

[Hulagway sa panid 9]

Gamita ang maong panahon alang sa espirituwal nga mga kalihokan

[Mga hulagway sa panid 10]

Pagtuon sa pagdaginot, ug ayaw pagpili kon mangita ka ug trabaho