Ang Maayong Pamatasan Magpatunghag Maayong Bunga

SA USA ka gamayng isla duol sa baybayon sa habagatang Japan, usa ka inahan ug iyang tulo ka gagmayng mga anak nagsugod sa pagtuon sa Bibliya uban sa mga Saksi ni Jehova. Kay nakamatikod niini, ang mga silingan nianang hilit ug konserbatibo kaayo nga dapit dili na managad sa inahan sa dihang makita nila siya. “Gisakitan ko sa dili nila pagtagad kanako apan mas nasakitan gyod ko sa bugnaw nilang tinagdan sa akong bana ug mga anak,” matod niya. Bisan pa niana, iyang giingnan ang iyang mga anak: “Kita kinahanglang magpadayon sa pagtimbaya sa atong mga silingan alang kang Jehova.”—Mateo 5:47, 48.

Sa balay, iyang gitudloan ang iyang mga anak nga magmatinahoron bisan pag sila dili panumbalingon. Sa pagpadulong nila ngadto sa init nga mga tubod sa ilang dapit diin sila tig-adtoan, ang mga bata nagbansay diha sa sakyanan kon unsaon pagtimbaya ang mga tawo. Sa pagsulod nila sa bilding, ang mga bata kanunayng malipayon nga moingon, “Konnichiwa!”—“Maayong adlaw!” Ang pamilya mapailobong nagpadayon sa pagtimbaya sa tanan nga ilang mahibalag, bisan pag dili gihapon managad kanila ang ilang mga silingan. Apan, namatikdan sa mga tawo ang maayong pamatasan sa mga bata.

Sa kataposan, ang usa ug unya ang uban pa nilang mga silingan mobalos na usab ug “Konnichiwa.” Human sa duha ka tuig, halos ang tanan diha sa lungsod mobalos na sa dihang timbayahon sa maong pamilya. Sila motimbaya na usab sa usag usa ug nahimong mas mahigalaon. Gustong pasidunggan sa luyoluyong mayor ang mga bata tungod sa ilang bahin sa maong kausaban. Apan gipaneguro sa ilang inahan kaniya nga sila igo lang nagbuhat kon unsay angay nga buhaton sa mga Kristohanon. Pagkahuman niana, sa usa ka bangga sa pakigpulong nga gipahigayon diha sa tibuok isla, ang usa ka anak nga lalaki miasoy kon sa unsang paagi gitudloan sa ilang inahan ang ilang pamilya sa pagtimbaya nga matinahoron sa uban bisan unsa pay reaksiyon nga ilang madawat. Ang iyang pakigpulong mao ang nakadaog sa unang ganti ug gipatik kini diha sa mantalaan sa lungsod. Sa pagkakaron, ang pamilya malipayon kaayo nga ang ilang pagsunod sa Kristohanong mga prinsipyo nagpatunghag maayong mga resulta. Ang pagpaambit sa maayong balita ngadto sa uban mas sayon kon ang mga tawo mahigalaon.