Mga Amot nga Makapahimuot sa Diyos

DILI nindot ang sugilanon. Giilog ni Rayna Atalia ang trono sa Juda pinaagi sa panglingla ug pagbuno. Kay nagtuo nga ang tanang kinaiyanhong mga manununod napatay na, milingkod siya sa trono ingong rayna. Adunay laing babaye, ang prinsesa nga si Jehoseba, kinsa nahigugma pag-ayo kang Jehova ug sa iyang Balaod, nga maisogong nagtago sa anak sa hari, ang masuso nga si Jehoas. Si Jehoseba ug ang iyang bana, ang Hataas nga Saserdoteng si Jehoiada, nagtago sa manununod sulod sa unom ka tuig diha sa ilang lawak sa templo.—2 Hari 11:1-3.

Pag-edad ni Jehoas ug siyete anyos, ang Hataas nga Saserdoteng si Jehoiada andam nang mosugod sa iyang plano sa pagpakanaog sa nangilog nga rayna gikan sa trono nga nakuha niya sa malimbongong paagi. Iyang gipakita ang bata ug gikoronahan siya ingong angayang manununod sa gingharian. Dayon ang daotan nga Rayna Atalia gidala sa mga guwardiya sa palasyo ngadto sa nataran sa templo ug gipatay, nga nakahatag sa mga tawo ug dakong kahupayan ug kalipay. Pinaagi sa ilang gibuhat, si Jehoiada ug Jehoseba nakatabang ug dako sa pagpasig-uli sa matuod nga pagsimba sa yuta sa Juda. Apan labawng hinungdanon, sila nakatabang nga mapadayon ang harianong kaliwat ni David, nga mitultol ngadto sa Mesiyas.—2 Hari 4-21.

Ang bag-ong gipalingkod nga hari may nahimo usab nga nakapahimuot sa Diyos. Ang balay ni Jehova kinahanglan gayong ayohon. Tungod sa dakong ambisyon ni Atalia nga mahimong bugtong magmamando sa Juda, wala lamang mapasagdi ang templo kondili naguba usab kini. Busa si Jehoas determinadong tukoron pag-usab ug ipasig-uli ang templo. Sa walay langan, siya naghatag ug sugo nga tigomon ang gikinahanglang salapi sa pag-ayo sa balay ni Jehova. Siya miingon: “Ang tanang salapi alang sa balaang mga halad nga gidala sa balay ni Jehova, ang salapi nga gitasal sa matag usa, ang salapi alang sa mga kalag sumala sa pagbanabana sa bili sa tagsatagsa, ang tanang salapi nga naggikan sa kasingkasing sa matag usa aron dad-on sa balay ni Jehova, ipakuha sa mga saserdote alang sa ilang kaugalingon, ang matag usa gikan sa iyang kaila; ug sa ilang bahin, ipaayo nila ang mga liki sa balay bisan diin nga makaplagan ang liki.”—2 Hari 12:4, 5.

Ang mga tawo miamot nga kinabubut-on. Apan, ang mga saserdote dili kinasingkasing nga nagtuman sa ilang katungdanan sa pag-ayo sa templo. Busa, ang hari nakahukom nga siya mismo ang magdumala niana ug nagsugo nga ang tanang amot isulod sa usa ka linaing kahon. Si Jehoiada ang iyang gipiyalan, ug ang asoy nag-ingon: “Si Jehoiada nga saserdote karon mikuha ug usa ka kahon ug gibangagan ang taklob niini ug gibutang kini tupad sa halaran sa tuo nga kiliran kon ang usa ka tawo mosulod sa balay ni Jehova, ug didto ang mga saserdote, ang mga magbalantay sa pultahan, magsulod sa tanang salapi nga gidala sa balay ni Jehova. Ug unya sa pagkakita gayod nila nga didtoy daghang salapi sa kahon, ang sekretaryo sa hari ug ang hataas nga saserdote moadto, ug ilang puston kini ug iphon ang salapi nga makaplagan sa balay ni Jehova. Ug ilang gihatag ang salapi nga naihap ngadto sa mga kamot sa mga nagabuhat  sa buluhaton nga gitudlo sa balay ni Jehova. Unya ilang gibayad kini sa mga panday ug sa mga magtutukod nga nagtrabaho didto sa balay ni Jehova, ug sa mga kantero ug sa mga tigsapsap sa bato, ug aron sa pagpalit ug mga kahoy ug mga bato nga sinapsapan alang sa pag-ayo sa mga liki sa balay ni Jehova ug alang sa tanan nga gigamit sa balay aron sa pag-ayo niini.”—2 Hari 12:9-12.

Tibuok-kasingkasing ang pagsanong sa mga tawo. Napasig-uli ang balay sa pagsimba ni Jehova mao nga ang iyang pagsimba nakapadayon sa dungganong paagi. Busa, ang tanang giamot nga salapi gigamit sa haom nga paagi. Gitino kana ni Haring Jehoas!

Karon, ang makitang organisasyon ni Jehova nagbantay pag-ayo nga ang tanang giamot nga salapi gigamit sa hustong paagi sa pagpalambo sa pagsimba ni Jehova, ug ang matuod nga mga Kristohanon kinasingkasing nga misanong sama niadtong karaang mga Israelinhon. Tingali nalakip ka niadtong nakaamot sa pagpauswag sa mga intereses sa Gingharian sa miaging tuig sa pag-alagad. Tan-awon nato ang pipila ka paagi diin gigamit ang imong mga amot.

PAGPATIK

Sa tibuok kalibotan, ang mosunod nga mga publikasyon gipatik aron tun-an ug iapod-apod:

• Mga libro: 47,490,247

• Mga pulyeto: 6,834,740

• Mga brosyur: 167,854,462

• Mga kalendaryo: 5,405,955

• Mga magasin: 1,179,266,348

• Mga tract: 440,995,740

• Mga video: 3,168,611

Ang pagpatik gihimo sa Aprika, Amerika del Norte, Sentral, ug del Sur, Asia, Uropa, ug isla nga mga nasod sa Pasipiko—19 ka nasod tanan.

“Ako si Katelyn May. Ako otso anyos. Ako adunay $28, ug gusto nakong ihatag kini kaninyo aron makatabang sa galastohan sa mga imprentahan. Ang inyong igsoon, Katelyn.”

“Naghisgot ang among pamilya bahin sa bag-ong mga imprentahan. Ang among mga anak, nga nag-edad ug 11 ug 9 anyos, nakahukom sa pagkuhag kuwarta gikan sa ilang tinigom ug sa pag-amot niana. Malipay kami nga ipadala ang ilang mga amot lakip na sa amoa.”

 KONSTRUKSIYON

Ang mosunod mao ang pipila sa mga proyekto sa pagpanukod nga gihimo aron sa pagpaluyo sa mga kalihokan sa mga Saksi ni Jehova:

• Mga Kingdom Hall diha sa kayutaan nga limitado ang kahinguhaan: 2,180

• Mga Assembly Hall: 15

• Mga sangang buhatan: 10

• Bug-os-panahong internasyonal nga mga boluntaryo: 2,342

“Niining hinapos sa semana gipahigayon ang unang tigom diha sa among bag-ong Kingdom Hall. Nalipay kaayo mi nga nakabaton ug angayang dapit sa pagdayeg sa atong Amahan, si Jehova nga Diyos. Kami nagpasalamat kang Jehova ug kaninyo tungod sa pag-atiman sa among mga panginahanglan pinaagi sa pagpanukod ug dugang mga Kingdom Hall. Sa pagkatinuod, ang among Kingdom Hall maoy tinuod nga bahandi sa kasilinganan.”—Chile.

“Ang mga igsoon mapasalamaton kaayo sa tabang nga gihatag sa organisasyon ni Jehova. Hangtod karon, magsige gihapon mi ug estorya bahin sa malipayong panahon nga among gigugol uban sa grupo sa konstruksiyon.”—Moldova.

“Ang akong asawa ug ako di pa dugayng nagsaulog sa among ika-35 nga anibersaryo sa kasal. Naghunahuna mi kon unsay among iregalo sa usag usa alang sa maong okasyon, ug nakahukom mi nga mohatag kang Jehova ug sa iyang organisasyon, kay kon wala ang ilang tabang, lagmit dili molampos ang among kaminyoon. Buot namo nga ang salapi nga gisukip gamiton sa pagtabang sa pagtukod ug Kingdom Hall diha sa usa sa kabos nga mga nasod.”

“Di pa dugay ako nakadawat ug panulondon, ug tungod kay ang akong ‘mga gusto’ diyutay ra ug ang akong ‘mga kinahanglanon’ mas diyutay pa, ihatag nako kaninyo ang kuwarta nga gisukip aron sa pagtabang sa pagtukod ug mga Kingdom Hall, nga gikinahanglan pag-ayo sa daghang nasod.”

 HINABANG PANAHON SA KATALAGMAN

Niining kataposang mga adlaw, ang mga katalagman subsob nga mahitabo nga walay pasidaan. Daghan sa mga Saksi ni Jehova ang naghatag ug dugang mga amot aron matabangan ang ilang mga igsoon diha sa mga dapit nga apektado niana. Ingong pahinumdom, ang mga kontribusyon alang sa hinabang panahon sa katalagman gamiton ingong bahin sa tibuok-kalibotang buluhaton. Ang mosunod mao ang pipila sa mga dapit diin ang mga Saksi ni Jehova nakatabang sa mga biktima sa katalagman:

• Aprika

• Asia

• Rehiyon sa Caribbeano

• Mga Isla sa Pasipiko

“Ang akong bana ug ako gustong magpasalamat pag-ayo kaninyo tungod sa inyong pagpadala ug hinabang alang kanamo nga naapektohan sa bagyo. Nabag-o ang atop sa among balay. Mapasalamaton gayod kami nga misanong dayon kamo.”

“Ako si Connor, ug ako 11 anyos. Sa pagkakita nako sa nahitabo sa dihang mihapak ang tsunami, gusto nakong motabang. Ako naglaom nga makatabang kini sa akong mga igsoon.”

 ESPESYAL NGA BUG-OS-PANAHONG MGA ALAGAD

Daghang Kristohanon ang bug-os-panahong nag-alagad diha sa buluhatong pagwali o sa mga puy-anang Bethel. Ang pipila ka bug-os-panahong mga boluntaryo gisuportahan sa boluntaryong mga amot. Apil kanila mao ang mosunod:

• Mga misyonaryo: 2,635

• Nagapanawng mga magtatan-aw: 5,325

• Mga Bethelite: 20,092

“Tungod kay dili ako makaalagad sa Bethel karon [singko-anyos nga batang lalaki], gusto nakong ipadala kining maong amot uban ang dakong gugma. Inigkadako nako, moadto ko sa Bethel aron motrabaho nga makugihon.”

Pagpalambo sa Edukasyon Bahin sa Bibliya

Gisugo ni Jesu-Kristo ang iyang mga sumusunod sa “paghimog mga tinun-an sa katawhan sa tanang kanasoran.” (Mateo 28:19) Ingong pagsugot sa iyang sugo, ang mga Saksi ni Jehova puliki sa pagsangyaw ug pagtudlo sa mensahe sa Bibliya diha sa 235 ka kayutaan. Ilang gipatik ug giapod-apod ang literatura sa Bibliya diha sa 413 ka pinulongan.

Sa pagkatinuod, ang labing bililhong ikaamot sa usa ka Kristohanon sa pagtabang sa mas daghang tawo sa pagkakat-on bahin sa Diyos ug sa Iyang katuyoan mao ang iyang panahon. Ang mga Saksi ni Jehova madagayaong naghatag sa ilang panahon ug kusog aron sa pagtabang sa ilang mga silingan. Sila madagayaon usab nga miamot ug salapi, ug ang tanan nilang amot, sa lainlaing mga paagi, nakatabang sa pagpaila sa ngalan ug mga katuyoan ni Jehova sa tibuok yuta. Hinaot si Jehova magpadayon sa pagpanalangin niining maong mga paningkamot sa pagtabang sa uban nga makakat-on pa ug dugang bahin kaniya. (Proverbio 19:17) Ang maong pagkaandam nga motabang makapahimuot kang Jehova!—Hebreohanon 13:15, 16.

[Kahon sa panid 28-30]

Mga Paagi sa Paghatag nga Gipili sa Uban

MGA AMOT ALANG SA TIBUOK-KALIBOTANG BULUHATON

Daghan ang naggahin, o nagbadyet, ug salapi nga ilang ihulog diha sa mga kahon sa kontribusyon nga gimarkahan ug “Contributions for the Worldwide Work—Matthew 24:14.”

Matag bulan, ipadala sa mga kongregasyon kining maong salapi ngadto sa sangang buhatan sa mga Saksi ni Jehova nga nag-alagad sa ilang nasod. Ang kinabubut-on nga mga donasyong salapi mahimong ipadala usab nga direkta ngadto sa Watch Tower Bible and Tract Society of the Philippines, Inc., P.O. Box 2044, 1060 Manila, o sa sangang buhatan sa mga Saksi n Jehova nga nag-alagad sa inyong nasod. Ang mga tseke nga ipadala sa adres sa ibabaw kinahanglang himoon nga payable to “Watch Tower.” Ang alahas o ubang mahalong mga butang mahimong idonar usab. Ang mubong sulat nga nagpahayag nga kana maoy direkta nga gasa angayng ilakip sa maong mga amot.

KONDISYONAL-DONASYON NGA KAHIKAYAN

Ang salapi mahimong ibutang nga in trust uban sa Watch Tower aron magamit sa tibuok kalibotan. Apan, kon ang nagdonar mohangyo niana, ang salapi ibalik kaniya. Alang sa dugang impormasyon, palihog kontaka ang Treasurer’s Office sa adres nga gitala sa itaas.

PAGPLANO ALANG SA BUHAT SA KALUOY

Gawas pa sa direkta nga mga gasang salapi, adunay ubang mga paagi sa paghatag aron makatabang sa buluhaton sa Gingharian sa tibuok kalibotan. Kini nag-apil sa:

Insyurans: Ang Watch Tower mahimong himoon nga benepisyaryo sa usa ka polisa sa life insurance o sa usa ka programa sa pagretiro/pensiyon.

Mga Pondo sa Bangko: Ang mga pondo sa bangko, sertipiko sa deposito, o indibiduwal nga mga pondo sa pagretiro mahimong ibutang nga in trust for o himoong payable on death ngadto sa Watch Tower, nga nahiuyon sa mga kinahanglanon sa lokal nga bangko.

Stocks and Bonds: Ang mga stock o aksiyones ug mga bond mahimong idonar ngadto sa Watch Tower ingong direkta nga gasa.

Balay ug Yuta: Ang ikabaligya nga balay ug yuta mahimong idonar pinaagi kaha sa deretsong paghatag isip gasa o, sa kahimtang sa residensiyal nga propiedad, pinaagi sa pagreserba sa balay o yuta samtang buhi pa ang nagdonar, kinsa mahimong magpadayon sa pagpuyo diha niana samtang buhi pa siya. Kontaka ang sangang buhatan sa inyong nasod sa dili pa buhatag papeles ang bisan unsang balay o yuta.

Gift Annuity: Ang gift annuity maoy usa ka kahikayan diin ibalhin sa usa ang iyang salapi o mga deposito ngadto sa usa ka tinudlo nga korporasyon nga gigamit sa mga Saksi ni Jehova. Sa baylo, ang nagdonar, o ang usa nga gitudlo sa nagdonar, modawat ug usa ka tino nga bayad matag tuig sa tibuok niyang kinabuhi. Ang buhis sa kinitaan o income tax sa nagdonar makunhoran sa tuig nga gisugdan ang gift annuity.

Wills and Trusts: Ang propiedad o salapi mahimong ikabilin ngadto sa Watch Tower pinaagi sa usa ka legal nga pagkabuhat nga testamento, o ang Watch Tower mahimong nganlan nga benepisyaryo sa usa ka trust agreement. Ang trust nga mapanunod sa usa ka relihiyosong organisasyon mahimong adunay pipila ka bentaha sa buluhisan.

Ingon sa gipasabot sa terminong “pagplano alang sa buhat sa kaluoy,” kining mga matanga sa donasyon kasagarang manginahanglan ug pagplano sa bahin sa nagdonar. Aron maabagan ang mga indibiduwal nga gustong motabang sa tibuok-kalibotang buluhaton sa mga Saksi ni Jehova pinaagi sa usa ka matang sa pagplano alang sa buhat sa kaluoy, gihimo ang Iningles ug Kinatsila nga brosyur nga nag-ulohang Charitable Planning to Benefit Kingdom Service Worldwide. Ang brosyur gisulat aron sa paghatag ug impormasyon bahin sa nagkalainlaing mga paagi nga ihatag ang mga gasa karon o pinaagi sa pagbilin ug panulondon inigkamatay. Human mabasa ang brosyur ug makonsulta ang ilang mga magtatambag bahin sa legal nga mga butang o sa buhis, daghan ang nakatabang sa pagsuportar sa relihiyoso ug makitawhanon nga kalihokan sa mga Saksi ni Jehova sa tibuok kalibotan ug namenosan ang ilang bayranan sa buhis samtang nagbuhat niini. Kining brosyura mahimong mabatonan pinaagi sa pagpangayo ug kopya nga direkta gikan sa Charitable Planning Office.

Alang sa dugang impormasyon, mahimong kontakon nimo ang Charitable Planning Office, pinaagi kaha sa sulat o sa telepono, diha sa adres nga gilista sa ubos o mahimong kontakon nimo ang sangang buhatan sa mga Saksi ni Jehova nga nag-alagad sa inyong nasod.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue, San Francisco del Monte 1105 Quezon City

Telepono: (02) 411-6090

[Picture Credit Line sa panid 27]

Faithful video: Stalin: U.S. Army photo