Mga Pangutana Gikan sa mga Magbabasa

Makahupot ba ang usa ka Kristohanon ug maayong tanlag kon siya modawat ug trabaho nga naglangkit ug pagdalag armas?

Ang mga Saksi ni Jehova sa tibuok kalibotan seryosong nagtuman sa ilang hinatag-sa-Diyos nga responsibilidad sa pagtagana ug materyal sa ilang mga pamilya. (1 Timoteo 5:8) Apan, adunay pipila ka matang sa trabaho nga dayag nga naglapas sa mga prinsipyo sa Bibliya ug angayng likayan. Kini naglakip sa trabaho nga nalangkit sa pagsugal, sayop nga paggamit sa dugo, ug sa pagdasig sa paggamit sa mga produkto sa tabako. (Isaias 65:11; Buhat 15:29; 2 Corinto 7:1; Colosas 3:5) Ang ubang matang sa trabaho, bisan tuod dili direktang gisaway sa Bibliya, makahasol sa kaugalingong tanlag o sa tanlag sa uban.

Ang pagsulod sa usa ka sekular nga trabaho nga nagkinahanglan ug pagdalag armas maoy personal nga desisyon. Apan, ang maong trabaho magladlad sa tawo sa posibilidad nga mahimong sad-an sa dugo kon kinahanglan niyang gamiton ang gidalang hinagiban. Busa, kinahanglang mainampoong hunahunaon sa usa ka Kristohanon kon andam ba siyang modawat sa responsibilidad sa paghimog hinanaling desisyon kon kinabuhi nay nalangkit. Ang pagdalag hinagiban magpameligro usab sa usa ka tawo nga masamdan o mamatay kon atakehon o balosan.

Ang uban lagmit maapektohan usab sa desisyon sa maong tawo. Pananglitan, ang pangunang responsibilidad sa usa ka Kristohanon mao ang pagsangyaw sa maayong balita sa Gingharian sa Diyos. (Mateo 24:14) Posible ba nga tudloan sa usa ang uban nga “makigdinaitay sa tanang tawo,” samtang ang iyang panginabuhi naglangkit ug pagdalag hinagiban? (Roma 12:18) Komosta ang mga anak o ubang mga membro sa pamilya? Dili kaha ang pagtener ug usa ka pistola diha sa balay magpameligro sa ilang mga kinabuhi? Dugang pa, aduna bay mapandol tungod sa baroganan sa usa bahin nianang butanga?—Filipos 1:10.

Niining “kataposang mga adlaw,” nagkadaghan ang mga tawong “mabangis, walay gugma sa pagkamaayo.” (2 Timoteo 3:1, 3) Kay nahibalo niini, ang usa ka tawo ba makapabiling ‘walay ikasaway’ kon mopili siyag trabaho nga naglangkit ug pagdalag armas nga tungod niana lagmit maengkuwentro niya kanang matanga sa mga tawo? (1 Timoteo 3:10) Dili gayod. Tungod niini, ang kongregasyon maglantaw nianang tawhana ingong “salawayon” kon siya magpadayon sa pagdalag hinagiban human mahatagig tambag sa Bibliya sa malulotong paagi. (1 Timoteo 3:2; Tito 1:5, 6) Busa, ang maong lalaki o babaye dili takos nga hatagan ug linaing mga pribilehiyo diha sa kongregasyon.

Gipasaligan ni Jesus ang iyang mga tinun-an nga kon ilang unahon ang intereses sa Gingharian diha sa ilang mga kinabuhi, sila dili kinahanglang sobrang mabalaka bahin sa pagbaton ug mga kinahanglanon sa kinabuhi. (Mateo 6:25, 33) Sa pagkatinuod, kon kita bug-os nga mosalig kang Jehova, “siya magasapnay [kanato]. Dili gayod niya itugot nga matarog ang matarong.”—Salmo 55:22.