Si Jehova ang Atong Magbalantay

“Si Jehova mao ang akong Magbalantay. Walay makulang kanako.”—SALMO 23:1.

1-3. Nganong dili ikatingala nga gitandi ni David si Jehova sa usa ka magbalantay?

 KON ipahubit kanimo ang paagi sa pag-atiman ni Jehova sa iyang katawhan, unsa may imong isulti? Sa unsa nimo ikatandi ang iyang malumong pag-atiman sa iyang matinumanong mga alagad? Kapin sa 3,000 ka tuig kanhi, ang harianong salmista nga si David nagsulat ug matahom nga kahubitan ni Jehova, nga ang gikuhaan ug kaamgiran mao ang iyang trabaho sa batan-on pa siya.

² Sa batan-on pa siya, si David usa ka magbalantay, busa sinati siya kon unsaon pag-atiman ang mga karnero. Nahibalo gayod siya nga ang mga karnero, kon pasagdan lang, dali rang mangawala ug mahimong dagiton sa mga kawatan o tukbon sa ihalas nga mga mananap. (1 Samuel 17:34-36) Kon walay mahingawaong magbalantay, lagmit dili nila makaplagan ang ilang sibsibanan. Sa hamtong na siya, walay duhaduha nga gihandom ni David ang daghang oras nga iyang gigugol sa pag-agak, pagpanalipod, ug pagpakaon sa mga karnero.

³ Dili ikatingala nga ang buluhaton sa usa ka magbalantay misantop sa hunahuna ni David sa dihang giinspirar siya sa paghubit sa pag-atiman ni Jehova sa iyang katawhan. Ang ika-23 nga Salmo, nga gisulat ni David, nagsugod pinaagi sa mga pulong: “Si Jehova mao ang akong Magbalantay. Walay makulang kanako.” Hisgotan nato kon nganong haom kini nga pamulong. Unya, sa tabang sa Salmo 23, atong mahibaloan kon sa unsang mga paagi si Jehova nag-atiman sa iyang mga magsisimba sa samang paagi nga ang magbalantay nag-atiman sa iyang mga karnero.—1 Pedro 2:25.

Usa ka Haom nga Pagtandi

4, 5. Sa unsang paagi gihubit sa Bibliya ang kinaiya sa mga karnero?

⁴ Si Jehova adunay daghang titulo diha sa Kasulatan, apan ang titulo nga “Magbalantay” nagpakita ug dakong kalumo. (Salmo 80:1) Aron mas masabtan kon nganong si Jehova haom nga tawgon ug Magbalantay, makatabang nga mahibaloan nato ang duha ka butang: una, ang kinaiya sa mga karnero ug ikaduha, ang mga buluhaton ug hiyas sa usa ka maayong magbalantay.

⁵ Ang Bibliya subsob nga maghisgot bahin sa kinaiya sa mga karnero, nga naghubit kanila ingong daling mosanong sa pagmahal sa magbalantay (2 Samuel 12:3), dili-agresibo (Isaias 53:7), ug dili-makadepensa sa kaugalingon. (Miqueas 5:8) Ang usa ka magsusulat nga nagbuhi ug mga karnero sulod sa daghang katuigan miingon: “Ang mga karnero dili ‘gayod makaatiman sa ilang kaugalingon’ ingon sa gihunahuna tingali sa uban. Sila nagkinahanglan, labaw kay sa bisan unsang matang sa hayop, ug makanunayong pagtagad ug mainampingong pag-atiman.” Aron mabuhi, kining dili-makapanalipod sa kaugalingon  nga mga linalang nagkinahanglan ug usa ka mahingawaong magbalantay.—Ezequiel 34:5.

6. Sa unsang paagi ang usa ka diksiyonaryo sa Bibliya naghubit sa ordinaryong adlaw sa kinabuhi sa usa ka karaang magbalantay?

⁶ Sama sa unsa ang ordinaryong adlaw sa usa ka karaang magbalantay? Ang usa ka diksiyonaryo sa Bibliya naghubit niana: “Sa sayong kabuntagon iyang pagulaon sa toril ang panon, nga magtultol kanila ngadto sa dapit diin sila manibsib. Dinhi bantayan niya sila sa tibuok adlaw, nga seguroon nga walay karnerong mahisalaag, ug kon adunay wala niya mamatikdi nga nahimulag sa panon, pangitaon niya kana hangtod nga iya kanang makaplagan ug madala pagbalik ngadto sa panon. . . . Sa gabii iyang pasudlon sa toril ang panon, nga mag-ihap kanila diha sa pultahan samtang sila moagi ilalom sa iyang olisi aron sa pagseguro nga walay nakulang. . . . Subsob nga iyang bantayan ang panon sa magabii aron dili tukbon sa ihalas nga mga mananap, o mahaylo sa malipotong mga paningkamot sa nagsuroy-suroy nga kawatan.” a

7. Nganong ang usa ka magbalantay kinahanglang magpakita usahay ug dugang pailob ug kalumo?

⁷ Dunay mga panahon nga ang mga karnero, ilabina ang mga mabdos ug mga nati, nagkinahanglan ug dugang pailob ug kalumo. (Genesis 33:13) Ang usa ka reperensiya sa Bibliya nag-ingon: “Ang usa ka karnero kasagarang manganak nga layo sa panon, diha sa daplin sa bukid. Bantayan pag-ayo sa magbalantay ang inahan sulod niining mga yugto nga dili siya makapanalipod sa iyang kaugalingon ug sakwaton sa magbalantay ang nati ug dad-on kini ngadto sa panon. Sulod sa pipila ka adlaw, hangtod kini makalakaw na, iya tingali kining kugoson o ibutang sa naglaylay nga mga bahin sa iyang panggawas nga besti.” (Isaias 40:10, 11) Klaro nga ang usa ka maayong magbalantay nagkinahanglan ug mga hiyas nga kalig-on ug kalumo.

8. Gihisgotan ni David ang unsang mga rason sa iyang pagsalig kang Jehova?

⁸ “Si Jehova ang akong Magbalantay”—dili ba kana haom nga kahubitan sa atong langitnong Amahan? Samtang susihon nato ang Salmo 23, atong mahibaloan kon sa unsang paagi ang Diyos nag-atiman kanato uban ang kalig-on ug kalumo sa usa ka magbalantay. Sa bersikulo 1, gipahayag ni David ang iyang pagsalig nga ang Diyos mohimo sa tanang gikinahanglan nga mga tagana alang sa Iyang mga karnero aron “walay makulang” kanila. Sa sunod nga mga bersikulo, gihisgotan ni David ang tulo ka rason sa iyang pagsalig: si Jehova nagaagak, nanalipod, ug nagapakaon sa Iyang mga karnero. Tagsatagsaon nato kini paghisgot.

“Siya Nagaagak Kanako”

9. Unsang malinawong dapit ang gihubit ni David, ug sa unsang paagi ang mga karnero mahidangat sa maong kahimtang?

⁹ Una, si Jehova nagaagak sa iyang katawhan. Si David misulat: “Siya nagapahigda kanako sa mga sibsibanan nga malunhaw; siya nagatultol kanako sa daplin sa mga dapit-pahulayan nga maayong pagkatubig. Siya nagapabaskog sa akong kalag. Siya nagaagak kanako sa mga alagianan sa pagkamatarong tungod sa iyang ngalan.” (Salmo 23:2, 3) Usa ka panon sa mga karnero nga nanghigda nga malinawon taliwala sa kadagaya—dinhi gihubit ni David ang usa ka dapit diin adunay pagkakontento, kahayahay, ug kasegurohan. Ang Hebreohanong pulong nga gihubad ug “mga sibsibanan” mahimong magpasabot ug “maanindot nga dapit.” Lagmit, kon silasila ra, ang mga karnero dili makakaplag ug hayahay nga dapit diin sila makahigda nga malinawon. Ang ilang magbalantay kinahanglang mag-agak kanila ngadto nianang “maanindot nga dapit.”

10. Sa unsang paagi gipakita sa Diyos ang iyang pagsalig kanato?

¹⁰ Sa unsang paagi kita giagak ni Jehova karon? Ang usa ka paagi nga gibuhat niya kana maoy pinaagi sa panig-ingnan. Ang iyang Pulong nag-awhag kanato nga “mahimong mga tigsundog sa Diyos.” (Efeso 5:1) Ang konteksto nianang mga pulonga naghisgot ug pagkamabination, pagpasaylo, ug gugma. (Efeso 4:32; 5:2) Tino nga si Jehova nagpakita sa labing maayong panig-ingnan sa pagpasundayag nianang dalayegong mga hiyas. Realistikanhon ba siya sa iyang pag-awhag kanato nga sundogon siya? Oo. Kanang inspiradong tambag sa pagkatinuod maoy kahibulongang pagpasundayag sa iyang pagsalig kanato. Sa unsang paagi? Kita gihimo sumala sa larawan sa Diyos, nga nagkahulogan nga kita gihatagag mga hiyas ug katakos sa pagsabot sa espirituwal nga mga butang. (Genesis 1:26)  Busa, si Jehova nahibalo nga bisan pa sa atong mga kahuyangan, kita adunay katakos sa pag-ugmad sa mga hiyas nga iyang gipakita. Hunahunaa lang—ang atong mahigugmaong Diyos masaligon nga kita mahisama kaniya. Kon sundon nato ang iyang panig-ingnan, siya magaagak kanato, ingnon ta, ngadto sa maanindot nga “dapit-pahulayan.” Taliwala sa mapintas nga kalibotan kita ‘magpuyo sa kasegurohan,’ nga makatagamtam sa kalinaw nga nagsumikad sa pagkahibalo nga kita giuyonan sa Diyos.—Salmo 4:8; 29:11.

11. Sa pag-agak sa iyang mga karnero, unsay ginatagad ni Jehova, ug sa unsang paagi kini gibanaag diha sa iyang gipangayo kanato?

¹¹ Sa pag-agak kanato, si Jehova malumo ug mapailobon. Ang usa ka magbalantay magtagad sa mga limitasyon sa iyang mga karnero, busa siya magaagak kanila “sumala sa lakat sa kahayopan.” (Genesis 33:14) Sa susama si Jehova nagaagak “sumala sa lakat sa” iyang mga karnero. Iyang gitagad ang atong mga katakos ug mga sirkumstansiya. Sa pagkatinuod, iyang gipasibo ang iyang paglakaw, nga dili gayod mangayo ug labaw sa atong ikahatag. Ang iya lamang gipangayo mao nga kita magmabug-os-kalag. (Colosas 3:23) Apan komosta kon ikaw tigulang na ug dili na makahimo sa imong mahimo kaniadto? O komosta kon ikaw adunay grabeng sakit nga naglimite kanimo? Nianang kahimtanga nga makahupay kaayo ang kinahanglanon nga kita magmabug-os-kalag. Walay duha ka tawo nga susama sa tanang bahin. Ang pag-alagad nga bug-os-kalag nagpasabot nga gamiton nimo ang tanan mong kusog kutob sa imong maarangan diha sa pag-alagad sa Diyos. Bisan pa sa mga kahuyangan nga mag-apektar tingali sa atong paglakaw, pabilhan ni Jehova ang atong tibuok-kasingkasing nga pagsimba.—Marcos 12:29, 30.

12. Unsang pananglitan gikan sa Moisesnong Balaod ang nag-ilustrar nga si Jehova nagaagak “sumala sa lakat sa” iyang mga karnero?

¹² Sa pag-ilustrar nga si Jehova nagaagak “sumala sa lakat sa” iyang mga karnero, tagda ang giingon mahitungod sa pipila ka halad sa pagkasad-an diha sa Moisesnong Balaod. Gusto ni Jehova ang maayong mga halad nga gitukmod sa mapasalamatong mga kasingkasing. Sa samang higayon, ang mga halad giklasipikar sumala sa maarangan sa naghalad. Ang Balaod nag-ingon: “Kon . . . siya dili makaarang sa usa ka karnero, nan siya magdala . . . ug duha ka tukmo o duha ka piso sa salampati.” Ug komosta kon siya dili makaarang bisan sa duha ka salampati? Nan, makadala siya ug “pinong harina.” (Levitico 5:7, 11) Kini nagpakita nga ang Diyos wala mangayo ug bisan unsa nga dili maabot sa naghalad. Tungod kay ang Diyos dili mausab, kita mahupayan sa pagkahibalo nga siya dili gayod mangayo ug labaw kay sa atong ikahatag; hinunoa, siya malipay nga modawat kon unsay atong maabot. (Malaquias 3:6) Makapalipay gayod nga agakon nianang masinaboton kaayong Magbalantay!

“Ako Walay Kahadlokan nga Daotan, kay Ikaw Magauban Kanako”

13. Sa Salmo 23:4, sa unsang paagi si David nagsulti nga mas mabination, ug nganong dili kini ikatingala?

¹³ Gihatag ni David ang ikaduhang rason sa iyang pagsalig: Si Jehova nanalipod sa iyang mga karnero. Atong mabasa: “Bisan kon magalakaw ako sa walog sa mabagang kangiob, ako walay kahadlokan nga daotan, kay ikaw magauban kanako; ang imong olisi ug ang imong sungkod maoy magapahupay kanako.” (Salmo 23:4) Niining tungora si David nagsulti nga mas mabination, nga nakigsulti kang Jehova ginamit ang pronombreng “ikaw.” Dili kini ikatingala, kay si David naghisgot kon sa  unsang paagi siya gitabangan sa Diyos sa pag-antos sa kalisdanan. Si David nakaagi ug daghang mangiob nga mga walog—mga panahon sa dihang ang iya mismong kinabuhi nameligro. Apan, siya wala magpadaog sa kahadlok, kay iyang gibati nga ang Diyos—nga nag-andam sa Iyang “olisi” ug “sungkod”—nagauban kaniya. Ang pagkahibalo nga siya gipanalipdan sa Diyos naghupay kang David ug sa walay duhaduha mas nakapasuod kaniya kang Jehova. b

14. Unsang pasalig ang gihatag sa Bibliya mahitungod sa panalipod ni Jehova, apan unsay wala ipasabot niana?

¹⁴ Sa unsang paagi si Jehova nanalipod sa iyang mga karnero karon? Ang Bibliya nagpasalig kanato nga walay magsusupak—demonyo o tawo—nga molampos sa pagpapha sa iyang mga karnero gikan sa yuta. Dili gayod kana tugotan ni Jehova. (Isaias 54:17; 2 Pedro 2:9) Apan, wala kini magpasabot nga ang atong Magbalantay manalipod kanato batok sa tanang kalamidad. Atong maagoman ang mga pagsulay nga kasagaran sa mga tawo, ug atong maatubang ang mga pagsupak nga gipahinabo ngadto sa tanang matuod nga mga Kristohanon. (2 Timoteo 3:12; Santiago 1:2) Adunay mga panahon sa dihang kita tingali, ingnon ta, ‘nagalakaw sa walog sa mabagang kangiob.’ Pananglitan, kita tingali mag-ungaw sa kamatayon tungod sa paglutos o sa usa ka sakit. O tingali aduna kitay minahal nga mag-ungaw sa kamatayon o mamatay pa gani. Nianang daw mangiob kaayong mga yugto, ang atong Magbalantay magauban kanato, ug siya manalipod kanato. Sa unsang paagi?

15, 16. (a) Sa unsang mga paagi si Jehova motabang kanato sa pagsagubang sa mga babag nga ato tingaling maatubang? (b) Iasoy ang usa ka eksperyensiya sa pagpakita kon sa unsang paagi si Jehova motabang kanato panahon sa kalisdanan.

¹⁵ Si Jehova wala magsaad ug milagrosong pagpangilabot. c Apan makaseguro kita niini: Si Jehova motabang kanato sa pagbuntog sa bisan unsang mga babag nga ato tingaling maatubang. Siya makahatag kanato ug kaalam sa pagsagubang sa “nagkadaiyang mga pagsulay.” (Santiago 1:2-5) Ang usa ka magbalantay mogamit sa iyang olisi o sungkod dili lamang sa pagsanta sa mga manunukob kondili usab sa hinay nga pagduso sa iyang mga karnero aron sila mosubay sa hustong direksiyon. Si Jehova “hinay nga moduso” kanato, tingali pinaagi sa usa ka isigkamagsisimba, sa pagpadapat sa gibase-sa-Bibliya nga tambag nga lagmit makahimog dakong kausaban sa atong kahimtang. Gawas pa, si Jehova makahatag kanato ug kusog aron makalahutay. (Filipos 4:13) Pinaagi sa iyang balaang espiritu, siya makahatag kanato ug “gahom nga labaw sa kasarangan.” (2 Corinto 4:7) Ang espiritu sa Diyos makapaarang kanato sa paglahutay sa bisan unsang pagsulay nga ipadangat ni Satanas kanato. (1 Corinto 10:13) Dili ba makapahupay ang pagkahibalo nga si Jehova kanunayng andam nga motabang kanato?

¹⁶ Oo, bisan unsa ka ngiob ang walog nga atong mahimutangan, dili kinahanglang mag-inusara kita sa paglakaw diha niana. Ang atong Magbalantay nagauban kanato, nga nagtabang kanato sa mga paagi nga tingali dili nato bug-os nga masabtan sa sinugdan. Tagda ang eksperyensiya sa usa ka Kristohanong ansiyano nga gidayagnos nga adunay kanseron nga tumor sa utok. “Angkonon ko nga sa sinugdan ako naghunahuna nga basin si Jehova nasuko kanako o kon gihigugma ba gayod niya ako. Apan determinado ako nga dili mopalayo kang Jehova. Hinunoa, akong gisulti ang akong mga kabalaka kaniya. Ug si Jehova mitabang kanako, nga subsob naghupay kanako pinaagi sa akong espirituwal nga mga igsoon. Daghan ang nagpaambit ug mapuslanong mga obserbasyon pinasukad sa ilang kaugalingong eksperyensiya sa pagsagubang sa grabeng sakit. Ang ilang timbang nga mga komento nagpahinumdom kanako nga dili talagsaon ang akong ginasagubang. Ang praktikal nga tabang, lakip na ang makapatandog nga pagpakitag kalulot kanako, nagpasalig kanako nga si Jehova wala masuko kanako. Siyempre, kinahanglang padayon akong makigbisog sa akong sakit, ug wala ko mahibalo kon unsay sangpotan niini. Apan kombinsido ako nga si Jehova nagauban kanako ug siya magpadayon sa pagtabang kanako sa pagsagubang niining maong kalisdanan.”

 “Ikaw Nag-andam ug Usa ka Lamesa”

17. Sa unsang paagi gihubit ni David si Jehova diha sa Salmo 23:5, ug nganong kini dili kasumpaki sa ilustrasyon sa usa ka magbalantay?

¹⁷ Karon gihisgotan ni David ang ikatulong rason sa iyang pagsalig sa iyang Magbalantay: si Jehova nagapakaon sa iyang mga karnero, ug gihimo niya kana nga madagayaon. Si David misulat: “Ikaw nag-andam ug usa ka lamesa sa atubangan niadtong nagapakitag pagkamabatokon kanako. Ikaw naghiso ug lana sa akong ulo; ang akong kopa puno kaayo.” (Salmo 23:5) Niining bersikuloha, gihubit ni David ang iyang Magbalantay ingong manggihatagong tig-abiabi kinsa nagtagana ug dagayang pagkaon ug ilimnon. Ang duha ka ilustrasyon—usa ka mahingawaong magbalantay ug manggihatagong tig-abiabi—dili magkasumpaki. Kon buot hunahunaon, ang usa ka maayong magbalantay kinahanglang mahibalo kon asa mangitag mga sibsibanan nga baga ug sagbot ug igong tubig nga mainom aron ang iyang mga karnero ‘dili makulangan.’—Salmo 23:1, 2.

18. Unsay nagpakita nga si Jehova usa ka manggihatagong tig-abiabi?

¹⁸ Ang ato bang Magbalantay usa usab ka manggihatagon nga tig-abiabi? Walay duhaduha niana! Hunahunaa lang ang kalidad, gidaghanon, ug pagkadaiya sa espirituwal nga pagkaon nga atong napahimuslan karon. Pinaagi sa matinumanon ug maalamong ulipon nga matang, si Jehova nagtagana kanato ug mapuslanong mga publikasyon ug punog-instruksiyon nga mga programa diha sa mga tigom, asembliya, ug mga kombensiyon—ang tanan magtagbaw sa atong espirituwal nga mga panginahanglan. (Mateo 24:45-47) Wala gayod magnihit ang espirituwal nga pagkaon. “Ang matinumanon ug maalamong ulipon” nagpatik ug milyonmilyong Bibliya ug mga tabang sa pagtuon sa Bibliya, ug ang maong mga publikasyon mabatonan karon diha sa 413 ka pinulongan. Si Jehova nagtagana ug nagkadaiyang espirituwal nga pagkaon nga naglakip sa “gatas,” ang paninugdang mga pagtulon-an sa Bibliya ug sa “gahing pagkaon,” ang mas laglom nga espirituwal nga impormasyon. (Hebreohanon 5:11-14) Tungod niini, sa dihang kita mag-atubang ug mga problema o mohimog mga desisyon, kasagarang makaplagan nato ang ato gayong gikinahanglan. Unsa kahay atong dangatan kon wala kanang espirituwal nga pagkaon? Ang atong Magbalantay mao gayod ang labing manggihatagon nga magtatagana!—Isaias 25:6; 65:13.

“Ako Magapuyo sa Balay ni Jehova”

19, 20. (a) Sa Salmo 23:6, unsang pagsalig ang gipahayag ni David, ug sa unsang paagi mabatonan nato ang maong pagsalig? (b) Unsay hisgotan sa sunod nga artikulo?

¹⁹ Human palandonga ang gibuhat sa iyang Magbalantay ug Magtatagana, si David mihinapos: “Sa pagkamatuod ang pagkamaayo ug ang mahigugmaong-kalulot magasunod kanako sa tanang adlaw sa akong kinabuhi; ug ako magapuyo sa balay ni Jehova sa daghang mga adlaw.” (Salmo 23:6) Ang gisulti ni David naggikan sa kasingkasing nga puno sa pagpasalamat ug pagtuo—mapasalamatong naghinumdom sa nangagi ug matinuohong naglantaw sa umaabot. Kining kanhing magbalantay may-kasegurohan, kay siya nahibalo nga basta siya magpabiling suod sa iyang langitnong Magbalantay, nga daw nagpuyo diha sa Iyang balay, siya mahigugmaong atimanon kanunay ni Jehova.

²⁰ Pagkamapasalamaton nato sa matahom nga mga pulong nga nasulat diha sa ika-23 nga Salmo! Wala nay makita pa si David nga pulong nga mas labawng maghubit sa paagi nga si Jehova nagaagak, nanalipod, ug nagapakaon sa iyang mga karnero. Ang mainitong mga pahayag ni David gitipigan diha sa Bibliya aron kita makasalig nga kita usab makalantaw kang Jehova ingong atong Magbalantay. Oo, basta kita magpabiling suod kang Jehova, siya mag-atiman kanato ingong mahigugmaong Magbalantay “sa daghang mga adlaw,” bisan hangtod sa kahangtoran. Apan, ingong iyang mga karnero, kita adunay responsibilidad sa paglakaw uban sa atong dakong Magbalantay, si Jehova. Hisgotan sa sunod nga artikulo kon unsay nalangkit niini.

[Mga footnote]

Nahinumdom Ka Ba?

• Nganong haom nga gitandi ni David si Jehova sa usa ka magbalantay?

• Sa unsang paagi si Jehova masinabotong nagaagak kanato?

• Sa unsang mga paagi si Jehova motabang kanato sa paglahutay sa mga pagsulay?

• Unsay nagpakita nga si Jehova usa ka manggihatagong tig-abiabi?

[Mga Pangutana sa Pagtuon]

[Hulagway sa panid 18]

Sama sa usa ka magbalantay sa Israel, si Jehova nagaagak sa Iyang mga karnero