“Usa sa Kinamaayohang mga Adlaw sa Akong Kinabuhi”

“ANG depresyon mao ang subsob kaayong gitaho, ug lagmit mao ang pangunang suliran sa mental nga kahimsog alang sa mga batan-on,” matod pa sa Beyondblue, usa ka ahensiya sa Australia nga gigastoan sa gobyerno. Gipakita sa mga pagtuon nga kada tuig mga 100,000 ka batan-on sa Australia ang nag-antos sa depresyon.

Ang Kristohanong mga batan-on nakaagom usab sa depresyon. Apan, ang ilang pagtuo kang Jehova nakatabang sa daghan kanila sa pagbuntog sa negatibong mga pagbati ug sa paghimo sa ilang pagkabatan-on nga malamposon. Tungod niini, ang uban nakadayeg kanila. Sa unsang paagi?

Tagda ang eksperyensiya sa 18-anyos nga si Claire. Siya ug ang iyang inahan tigtambongan sa usa ka kongregasyon sa mga Saksi ni Jehova sa Melbourne. Sa dihang giabandonar sa amahan ni Claire ang ilang pamilya, siya nakaagom sa depresyon. Apan ang iyang pagtuo sa iyang langitnong Amahan, si Jehova, nagpabiling lig-on. Usa ka adlaw niana, ang doktor sa pamilya, si Lydia, miadto sa balay ni Claire aron sa pagsusi sa iyang inahan nga nagmasakiton. Pagkahuman niana, siya malulotong naghatod kang Claire ngadto sa shopping center. Samtang nagbiyahe, iyang gipangutana si Claire kon may trato na ba siya. Si Claire mitubag nga ingong usa ka Saksi ni Jehova, siya dili makigdeyt ingong lingawlingaw lamang. Kini nakapatingala sa doktor. Gipatin-aw ni Claire kon sa unsang paagi ang Bibliya nakatabang kaniya sa paghimog maalamong mga desisyon sa iyang kinabuhi. Unya, iyang giingnan ang doktor nga hatagan niya siya ug usa ka kopya sa binase-sa-Bibliya nga basahon nga nakatabang ug dako kaniya. Ang maong libro nag-ulohang Mga Pangutanang Gisukna sa mga Batan-on—Mga Tubag nga Mosaler.

Tulo ka adlaw human madawat ang libro, giteleponohan ni Lydia ang inahan ni Claire ug gisuginlan kini nga nalingaw kaayo siya sa pagbasa sa libro. Unya nangayo siya ug unom pa ka kopya alang sa iyang mga kauban sa trabaho. Sa dihang gihatod ni Claire ang mga libro, ang doktor miingon nga nakadayeg kaayo siya sa pagtuo ni Claire. Gitanyagan siya ni Claire ug pagtuon sa Bibliya, ug kini gidawat sa doktor.

Sulod sa pipila ka bulan, si Claire nagdumala sa pagtuon panahon sa tingpahulay sa doktor sa udto. Unya gihangyo ni Lydia si Claire nga mopakigpulong sa usa ka seminar nga naghisgot bahin sa depresyon sa mga batan-on. Bisan tuod gikuyawan, si Claire misugot. Kapin sa 60 ka tawo ang mitambong sa seminar. Upat ka eksperto bahin sa mental nga kahimsog—ang tanan hamtong na—ang mipakigpulong. Dayon turno na ni Claire. Iyang gipasiugda nga hinungdanon gayod alang sa mga batan-on nga magbaton ug relasyon uban sa Diyos. Siya miingon nga si Jehova nga Diyos nahingawa gayod sa mga batan-on ug motabang sa tanan nga modangop kaniya alang sa pagpaluyo ug kahupayan. Dugang pa, iyang gipahayag ang iyang hugot nga pagtuo nga si Jehova hapit nang magtapos sa tanang matang sa pisikal ug mental nga sakit. (Isaias 33:24) Unsay resulta niining maayong pagpamatuod?

“Pagkahuman sa seminar, daghan ang miduol kanako ug miingon nga nakadayeg kaayo sila sa pagkadungog sa usa ka batan-on nga naghisgot bahin sa Diyos,” matod pa ni Claire. “Ako nakapahimutang ug 23 ka kopya sa Gisukna sa mga Batan-on nga libro. Dunay tulo ka batan-ong babaye nga mihatag sa ilang numero sa telepono kanako. Usa kanila nagtuon na sa Bibliya karon. Kadto maoy usa sa kinamaayohang mga adlaw sa akong kinabuhi.”