‘Ang Gugma Ninyong Tanan Nagauswag’

DAGHANG kinaiyanhong katalagman ang mihugpa sa Japan sa 2004. Lakip niana ang mga bagyo, pagbaha, ug mga linog. Grabeng naapektohan niana ang kinabuhi sa daghang tawo, lakip na sa mga Saksi ni Jehova. (Ecclesiastes 9:11) Apan ang maong mga trahedya naghatag ug kahigayonan sa mga Saksi sa pagpakitag inigsoong pagbati alang sa usag usa.—1 Pedro 1:22.

Pananglitan, tungod sa bunok nga pag-ulan sa Hulyo, miawas ang mga tampi sa usa ka suba sa sentral Japan. Ang maong pagbaha nakadaot sa kapin sa 20 ka balay sa mga Saksi ni Jehova. Sa usa ka Kingdom Hall, ang katas-on sa tubig maoy mga usa ka metros gikan sa salog. Mitabang gilayon ang mga Saksi gikan sa sikbit nga mga kongregasyon. Ginatos ka boluntaryo ang naghinlo sa punog-lapok nga mga balay. Ang Kingdom Hall bug-os nga nahinloan ug naayo sulod sa duha lang ka semana.

Sa Oktubre 23, usa ka kusog nga linog nga misukod ug 6.8 sa Richter scale ang nahitabo sa mao ra gihapong dapit. Nakalas ang labing menos 40 ka kinabuhi, ug kapin sa 100,000 ka tawo ang gipabakwet sa ilang mga balay. Nawad-an silag tubig, gas, ug koryente. Bisan tuod mga 50 kilometros ra ang gilay-on sa sentro sa linog, ang giayo nga Kingdom Hall wala maunsa. Dihadiha kana nahimong temporaryong sentro sa hinabang. Gisusi dayon sa Kristohanong mga ansiyano kon luwas ba ang kahimtang sa ilang mga igsoon didto ug nalipay sila sa pagkasayod nga walay naangol o namatay. Sayo sa pagkasunod buntag, unom ka Saksi nga nabiktima sa pagbaha sa miaging Hulyo ang maikagong miboluntaryo sa pagtabang sa paghatod ug pagkaon ug tubig ngadto sa naapektohang dapit. Miabot dayon ang mga hinabang pipila lang ka oras human sa linog.

“Kadtong mga nabiktima sa baha nag-isip sa pagpanghatag ug hinabang ngadto sa mga naapektohan sa linog ingong kahigayonan sa pagpahayag sa ilang pasalamat sa tabang nga ila mismong nadawat,” matod pa sa usa ka ansiyano. “Makugihon silang nagtrabaho gikan sa sayo sa buntag hangtod sa lawom nang gabii. Ug sila malipayon kaayo!”

Ang baha ug linog dili makalugtas sa gugma nga nagbugkos sa Kristohanong panag-igsoonay sa mga Saksi ni Jehova. Sa pagkatinuod, sa dihang mohugpa ang maong mga katalagman, masinati sa mga Kristohanon ang giingon ni apostol Pablo ngadto sa iyang mga isigkamagtutuo sa Tesalonica: “Ang gugma sa matag usa ug ninyong tanan nagauswag ngadto sa usag usa.”—2 Tesalonica 1:3.