Ang mga Tawo “Gikan sa Tanang Pinulongan” Nakadungog sa Maayong Balita
Ang mga Tawo “Gikan sa Tanang Pinulongan” Nakadungog sa Maayong Balita
“Napulo ka tawo gikan sa tanang pinulongan sa mga nasod . . . magaingon: ‘Mouban kami kaninyo, kay kami nakadungog nga ang Diyos nagauban kaninyo.’”—ZACARIAS 8:23.
1. Sa unsang paagi gitagana ni Jehova ang kinamaayohang okasyon ug kahimtang sa pagsugod sa pagsangyaw ngadto sa mga tawo sa lainlaing mga pinulongan ug nasyonalidad?
ANG okasyon ug ang kahimtang maayo kaayo. Adlaw kadto sa Pentekostes 33 K.P. Pipila ka semana una pa niana, ang mga Hudiyo ug mga kinabig gikan sa labing menos 15 ka rehiyon sa halapad nga Imperyo sa Roma nagtapok sa Jerusalem aron sa pagsaulog sa Paskuwa. Nianang adlawa, libolibo kanila ang nakadungog—nga wala maglibog, sama niadtong sa karaang Babel, kondili nakasabot—sa gipamulong sa ordinaryong mga tawo nga napuno sa balaang espiritu nga nagmantala sa maayong balita diha sa lainlaing pinulongan nga gisulti sa mga tawo diha sa imperyo. (Buhat 2:1-12) Kanang okasyona nagtimaan sa pagkatukod sa Kristohanong kongregasyon ug sa sinugdanan sa daghag-pinulongan, internasyonal nga edukasyonal nga buluhaton nga nagpadayon hangtod karon.
2. Nganong “nahingangha” man sa mga tinun-an ni Jesus ang ilang mga mamiminaw nga lainlaig pinulongan panahon sa Pentekostes 33 K.P.?
2 Ang mga tinun-an ni Jesus lagmit makasulti sa komon nga Grego, ang pinulongan nga ginasulti nianang panahona. Nagsulti usab sila ug Hebreohanon, ang pinulongan nga gisulti diha sa templo. Apan, nianang adlaw sa Pentekostes, “nahingangha” ang ilang mga mamiminaw nga lainlaig pinulongan tungod kay sila nagsulti sa lumad nga mga pinulongan nianang mga tawhana. Unsay resulta? Ang kasingkasing sa mga mamiminaw natandog sa hinungdanong mga kamatuoran nga ilang nadungog diha sa ilang lumad nga pinulongan. Pagkahapon niana, ang gamayng grupo sa mga tinun-an nahimong usa ka dakong panon sa kapin sa 3,000 ka tawo!—Buhat 2:37-42.
3, 4. Sa unsang paagi ang buluhatong pagsangyaw mikaylap sa dihang ang mga tinun-an namalhin gikan sa Jerusalem, Judea, ug Galilea?
3 Wala madugay human nianang hinungdanong okasyon, nahitabo ang sunodsunod nga paglutos diha sa Jerusalem, ug “kadtong nangatibulaag milibot sa kayutaan nga nagpahayag sa maayong balita bahin sa pulong.” (Buhat 8:1-4) Pananglitan, atong mabasa sa Buhat kapitulo 8 ang bahin kang Felipe, nga dayag nga usa ka ebanghelisador nga nagsultig-Grego. Gisangyawan ni Felipe ang mga Samarianhon. Gisangyawan usab niya ang usa ka Etiopianhong opisyal nga midawat sa mensahe bahin kang Kristo.—Buhat 6:1-5; 8:5-13, 26-40; 21:8, 9.
4 Sa dihang ang mga Kristohanon namalhin ug nangitag kapuy-an sa gawas sa utlanan sa Jerusalem, Judea, ug Galilea, sila nakaatubang ug bag-ong mga babag labot sa rasa ug pinulongan. Ang uban kanila basin nagsangyaw lamang ngadto sa mga Hudiyo. Apan ang tinun-ang si Lucas nagtaho: “Dihay pipila ka tawong taga-Cipro ug taga-Cirene nga nangadto sa Antioquia ug misulti ngadto sa katawhang nagsultig-Grego, nga nagpahayag sa maayong balita bahin sa Ginoong Jesus.”—Buhat 11:19-21.
Usa ka Diyos nga Walay-Pinalabi—Usa ka Mensahe Alang sa Tanan
5. Sa unsang paagi nadayag nga si Jehova walay pinalabi maylabot sa maayong balita?
5 Ang maong mga kalamboan maoy kaharmonya sa mga paagi sa Diyos; siya walay pinalabi. Human matabangi ni Jehova si apostol Pedro sa pag-usab sa iyang panglantaw bahin sa mga tawo sa kanasoran, siya mapasalamatong miingon: “Tinong naila ko nga ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” (Buhat 10:34, 35; Salmo 145:9) Sa dihang si apostol Pablo, nga usa ka maglulutos kanhi sa mga Kristohanon, nagmantala nga ang “kabubut-on [sa Diyos] mao nga ang tanang matang sa mga tawo mangaluwas unta,” iyang gipamatud-an nga ang Diyos walay pinalabi. (1 Timoteo 2:4) Dayag nga ang Maglalalang walay pinalabi tungod kay ang paglaom sa Gingharian mahimong mabatonan sa mga tawo sa tanang sekso, rasa, nasyonalidad, o pinulongan.
6, 7. Unsang mga tagna sa Bibliya ang naghisgot bahin sa pagkaylap sa maayong balita ngadto sa lainlaing kanasoran ug pinulongan?
6 Kining pagkaylap sa maayong balita sa tanang kanasoran gitagna kasiglohan una pa niana. Sumala sa tagna ni Daniel, “gihatag [kang Jesus ang] pagmando ug dignidad ug gingharian, aron ang tanang mga katawhan, nasodnong mga pundok ug mga pinulongan magaalagad gayod kaniya.” (Daniel 7:14) Ang kamatuoran nga kining magasina gipatik diha sa 151 ka pinulongan ug giapod-apod sa tibuok kalibotan, nga tungod niana mabasa nimo ang mahitungod sa Gingharian ni Jehova, nagpakita sa katumanan nianang maong tagna sa Bibliya.
7 Ang Bibliya nagtagna nga moabot ang panahon sa dihang ang mga tawo nga lainlaig pinulongan makadungog sa nagahatag-ug-kinabuhi nga mensahe niini. Naghubit kon sa unsang paagi ang matuod nga pagsimba makadani sa daghan, si Zacarias nagtagna: “Mahitabo unya niadtong mga adlawa nga napulo ka tawo gikan sa tanang pinulongan sa mga nasod mokupot, oo, sila gayod mokupot sa sidsid sa tawo nga usa ka Hudiyo [dinihogan-sa-espiritu nga Kristohanon, bahin sa “Israel sa Diyos”], nga magaingon: ‘Mouban kami kaninyo, kay kami nakadungog nga ang Diyos nagauban kaninyo.’” (Zacarias 8:23; Galacia 6:16) Ug nag-asoy bahin sa iyang nakita sa usa ka panan-awon, si apostol Juan miingon: “Tan-awa! usa ka dakong panon, nga walay tawong makaihap, gikan sa tanang kanasoran ug mga tribo ug katawhan ug mga pinulongan, nga nagbarog atubangan sa trono ug atubangan sa Kordero.” (Pinadayag 7:9) Nakita nato nga natuman ang maong mga tagna!
Pagsangyaw Ngadto sa Tanang Matang sa mga Tawo
8. Unsang modernong-adlaw nga kahimtang ang nagkinahanglan ug pagpasibo diha sa atong buluhatong pagsangyaw?
8 Karong adlawa, nagkadaghang tawo ang milalin. Tungod sa globalisasyon, daghan ang nanglalin. Panonpanon sa mga tawo gikan sa mga dapit nga naggubatay ug sa mga lugar nga nag-ilaid sa kalisod ang namalhin ngadto sa maarang-arang nga mga dapit, nga nangita ug mas maayong kahimtang sa kinabuhi. Diha sa daghang kayutaan, ang pag-abot sa daghang lalin ug mga kagiw miresulta sa pagkatukod sa langyawg-sinultihan nga mga grupo. Pananglitan, sa Pinlandia kapin sa 120 ka pinulongan ang ginasulti; sa Australia dunay kapin sa 200 ka pinulongan. Sa usa lamang ka siyudad sa Tinipong Bansa—sa San Diego—kapin sa 100 ka pinulongan ang madungog!
9. Unsaon nato paglantaw ang mga tawo diha sa atong teritoryo nga nagsultig lainlaing pinulongan?
9 Ingong Kristohanong mga ministro, gilantaw ba nato ang mga tawo nga nagsultig lainlaing pinulongan ingong babag sa atong ministeryo? Wala gayod! Hinunoa, gilantaw nato kini ingong maayong kahigayonan nga mapalapad ang teritoryo nga atong sangyawan—‘kaumahan nga puti na aron anihon.’ (Juan 4:35) Kita naningkamot aron maatiman ang mga tawo nga mahunahunaon sa ilang espirituwal nga panginahanglan, bisan unsa pay ilang nasyonalidad o pinulongan. (Mateo 5:3) Tungod niini, kada tuig nagkadaghang tawo sa ‘matag pinulongan’ ang nahimong mga tinun-an ni Kristo. (Pinadayag 14:6) Pananglitan, hangtod sa Agosto 2004, ang buluhatong pagsangyaw sa Alemanya gihimo na diha sa mga 40 ka pinulongan. Nianang panahona usab, ang maayong balita ginawali didto sa Australia sa duolan sa 30 ka pinulongan, nga miuswag gikan sa 18 napulo lamang ka tuig kanhi. Sa Gresya, ang mga Saksi ni Jehova nakigsulti sa mga tawo diha sa duolan sa 20 ka pinulongan. Sa tibuok kalibotan, mga 80 porsiyento sa mga Saksi ni Jehova ang dili makasultig Iningles, ang internasyonal nga pinulongan karon.
10. Unsay papel sa matag magmamantala diha sa paghimog mga tinun-an sa katawhan sa “tanang kanasoran”?
10 Sa pagkatinuod, ang sugo ni Jesus sa “paghimog mga tinun-an sa tanang kanasoran” ginatuman! (Mateo 28:19) Mahinamong midawat nianang maong sugo, ang mga Saksi ni Jehova aktibo diha sa 235 ka kayutaan, nga nag-apod-apod ug literatura diha sa kapin sa 400 ka pinulongan. Bisan tuod ang organisasyon ni Jehova nagtagana sa mga galamiton nga gikinahanglan sa pagsangyaw ngadto sa mga tawo, ang tagsatagsa ka magmamantala sa Gingharian kinahanglang maoy mohimo sa unang lakang sa pagpaambit sa mensahe sa Bibliya ngadto sa “tanang matang sa katawhan” diha sa pinulongan nga masabtan pag-ayo nila. (Juan 1:7) Kining hiniusang paningkamot makapaarang sa milyonmilyong tawo sa lainlaing pinulongan sa pagbenepisyo gikan sa maayong balita. (Roma 10:14, 15) Oo, ang matag usa kanato adunay hinungdanong papel!
Pag-atubang sa Kalisdanan
11, 12. (a) Unsang kalisdanan ang kinahanglang atubangon, ug sa unsang paagi makatabang ang balaang espiritu? (b) Nganong ang pagsangyaw ngadto sa mga tawo diha sa ilang lumad nga pinulongan subsob nga makatabang?
11 Karon, daghang magmamantala sa Gingharian ang gustong makakat-on ug laing pinulongan, apan dili na sila makadahom ug milagrosong mga gasa sa espiritu sa Diyos aron makasultig laing pinulongan. (1 Corinto 13:8) Ang pagtuon ug bag-ong pinulongan nagkinahanglan ug dakong paningkamot. Bisan kadtong makamao nang mosultig ikaduhang pinulongan basin kinahanglang magpasibo sa ilang panghunahuna ug pamaagi aron ang mensahe sa Bibliya makapadani sa mga tawo nga nagsulti sa maong pinulongan apan lahi ug mga kagikan ug kultura. Dugang pa, ang mga bag-ong lalin subsob nga maulawon; gikinahanglan ang pagpaningkamot aron masabtan ang ilang paagi sa paghunahuna.
12 Bisan pa niana, ang balaang espiritu naglihok gihapon taliwala sa mga alagad ni Jehova sa ilang paningkamot nga matabangan ang mga tawo nga nagsultig laing mga pinulongan. (Lucas 11:13) Imbes mohatag ug milagrosong katakos sa pagsultig pinulongan, ang espiritu makapadako sa atong tinguha nga makigsulti sa mga tawo nga dili sama natog pinulongan. (Salmo 143:10) Ang pagsangyaw o pagtudlo sa mensahe sa Bibliya ngadto sa mga tawo diha sa pinulongan nga dili pamilyar kanila motukbil tingali sa ilang hunahuna. Apan, aron matandog ang kasingkasing sa atong mga mamiminaw, subsob nga mas maayong gamiton ang ilang lumad nga pinulongan—ang pinulongan nga motukbil sa ilang kinailadmang mga pangandoy, motibo, ug paglaom.—Lucas 24:32.
13, 14. (a) Unsay nagtukmod sa uban sa pagsangyaw ngadto sa mga tawo nga lahi ug pinulongan? (b) Sa unsang paagi nadayag ang espiritu sa pagsakripisyo sa kaugalingon?
13 Daghang magmamantala sa Gingharian ang nakigbahin sa pagsangyaw ngadto sa mga tawo nga langyaw ug pinulongan sa dihang ilang mamatikdan nga sila madinawaton sa kamatuoran sa Bibliya. Ang uban madasig sa dihang ang ilang pag-alagad mahimong mas makaiikag. “Daghan niadtong naggikan sa Sidlakang Uropa mga uhaw sa kamatuoran,” nag-ingon ang sangang buhatan sa mga Saksi ni Jehova sa habagatang Uropa. Makapatagbaw kaayo nga motabang nianang matanga sa mga tawo nga mamati sa mensahe!—Isaias 55:1, 2.
14 Apan, aron magmabungahon niining buluhatona, gikinahanglan nato ang determinasyon ug pagsakripisyo sa kaugalingon. (Salmo 110:3) Pananglitan, daghang Saksing mga pamilya nga Hapones ang mibiya sa ilang haruhay nga mga balay sa dagkong mga siyudad ug namalhin ngadto sa hilit nga mga dapit aron sa pagtabang sa mga grupo sa Insek nga mga lalin sa pagsabot sa Bibliya. Sa kasadpang kabaybayonan sa Tinipong Bansa, ang mga magmamantala kanunayng mobiyahe ug usa ngadto sa duha ka oras aron sa pagdumalag mga panagtuon sa Bibliya uban sa mga Pilipino. Sa Norway, usa ka magtiayon ang nagtuon sa Bibliya uban sa usa ka pamilya nga gikan sa Afghanistan. Ang magtiayon nga Saksi naggamit sa Iningles ug Norwego nga edisyon sa brosyur nga Unsay Gikinahanglan sa Diyos Kanato? a Basahon sa pamilya ang mga parapo diha sa Persianhon, usa ka pinulongan nga susama sa ilang lumad nga pinulongang Dari. Sila makigsulti sa Iningles ug Norwego. Ang maong espiritu sa pagsakripisyo sa kaugalingon ug pagkamapasiboon dagayang gibalosan sa dihang ang mga langyaw mosanong sa maayong balita. b
15. Sa unsang paagi kitang tanan makapakigbahin sa pagsangyaw ginamit ang lainlaing pinulongan?
15 Makapakigbahin ka ba niining matanga sa pagsangyaw nga naggamit ug lainlaing pinulongan? Nganong dili magsugod karon pinaagi sa pagsusi kon unsang langyawng mga pinulongan ang subsob nga ginasulti diha sa inyong teritoryo? Unya mahimong magdala ka ug pipila ka tract o brosyur nianang mga pinulongana. Ang pulyetong Good News for People of All Nations, nga giluwatan sa 2004, mapuslanon sa pagpakaylap sa paglaom sa Gingharian pinaagi sa yano, positibo nga mensahe niini diha sa daghang pinulongan.—Tan-awa ang artikulong “Good News for People of All Nations,” diha sa panid 32.
‘Paghigugma sa Langyaw nga Pumoluyo’
16. Sa unsang paagi ang responsableng mga igsoon nagpasundayag ug dili-mahakogong kaikag sa pagtabang sa mga tawo nga nagsultig langyawng pinulongan?
16 Makakat-on man kita o dili ug laing pinulongan, kitang tanan makatabang nga matudloan sa espirituwal nga mga butang ang mga langyaw diha sa atong dapit. Gisugo ni Jehova ang iyang katawhan nga ‘higugmaon ang langyaw nga pumoluyo.’ (Deuteronomio 10:18, 19) Pananglitan, diha sa usa ka dakong siyudad sa Amerika del Norte, lima ka kongregasyon ang magtigom sa mao rang Kingdom Hall. Sama sa daghang tigomanan, adunay tinuig nga pagpulipuli sa eskedyul sa tigom nga tungod niana ang Ininsek nga mga tigom mabalhin unta sa gabii sa Dominggo. Apan, magpasabot kini nga daghan sa mga lalin nga nagtrabaho sa restawran ang dili makatambong. Ang mga ansiyano sa ubang mga kongregasyon malulotong naghimog mga kausaban aron ang Ininsek nga tigom mapahigayon sa buntag sa Dominggo.
17. Unsay angay natong bation sa dihang ang uban mohukom sa pagbalhin aron motabang sa laing grupo sa pinulongan?
17 Ang mahigugmaong mga magtatan-aw nagdayeg sa kuwalipikado ug hanas nga mga igsoon nga gustong mobalhin aron sa pagtabang sa ubang mga grupo sa pinulongan. Ang mga kongregasyon nianang eksperyensiyadong mga magtutudlo sa Bibliya mawad-an tingalig kasaligang mga membro, apan ang mga magtatan-aw sa maong mga kongregasyon mibati ug susama sa gibati sa mga ansiyano sa Listra ug Iconio. Ang maong mga ansiyano wala magpugong kang Timoteo sa pagpanaw uban kang Pablo, bisan pag si Timoteo sinaligan diha sa ilang mga kongregasyon. (Buhat 16:1-4) Dugang pa, kadtong nanguna diha sa buluhatong pagsangyaw, wala mahigawad bisan pa sa lainlaing panghunahuna, kostumbre, o batasan sa mga langyaw. Hinuon, ilang gidawat ang maong kadaiyahan ug nangita silag mga paagi sa pag-ugmad ug maayong relasyon uban sa maong mga langyaw tungod sa maayong balita.—1 Corinto 9:22, 23.
18. Unsang dakong pultahan sa kalihokan ang bukas alang sa tanan?
18 Sumala sa gitagna, ang maayong balita ginasangyaw sa “tanang pinulongan sa kanasoran.” Aduna gihapoy dakong kalaoman sa pag-uswag diha sa langyawg-pinulongan nga mga teritoryo. Libolibong mapaagihon nga mga magmamantala ang misulod sa “dakong pultahan nga nagatultol ngadto sa kalihokan.” (1 Corinto 16:9) Bisan pa niana, labaw pa ang gikinahanglan aron sa pag-ugmad sa maong mga teritoryo, ingon sa ipakita sa sunod nga artikulo.
[Mga footnote]
a Gipatik sa mga Saksi ni Jehova.
b Alang sa dugang mga panig-ingnan, tan-awa “Ang Ginagmayng mga Sakripisyo Nakahatag Kanamog Dagayang Panalangin,” diha sa Ang Bantayanang Torre, Abril 1, 2004, mga panid 24-8.
Makapatin-aw Ka Ba?
• Sa unsang paagi kita makasundog kang Jehova sa pagpakita ug pagkawalay-pinalabi sa tanang tawo?
• Unsaon nato paglantaw ang mga tawo diha sa atong teritoryo nga dili sama natog pinulongan?
• Nganong makatabang ang pagsangyaw sa mga tawo diha sa ilang lumad nga pinulongan?
• Sa unsang paagi kita makapakita ug kahingawa sa mga langyaw nga anaa sa atong taliwala?
[Mga Pangutana sa Pagtuon]
[Mapa/Hulagway sa panid 23]
(Alang sa aktuwal nga pagkahan-ay, tan-awa ang publikasyon)
Roma
CRETA
ASIA
PRIGIA
PAMFILIA
PONTUS
CAPADOCIA
MESOPOTAMIA
MEDIA
PARTIA
ELAM
ARABIA
LIBYA
EHIPTO
JUDEA
Jerusalem
[Kadagatan]
Dagat Mediteranyo
Itom nga Dagat
Pulang Dagat
Gulpo sa Persia
[Hulagway]
Sa Pentekostes 33 K.P., ang mga tawo gikan sa 15 ka rehiyon sa Romanhong Imperyo nakadungog sa maayong balita diha sa ilang lumad nga mga pinulongan
[Mga hulagway sa panid 24]
Daghang langyaw ang maayog pagsanong sa kamatuoran sa Bibliya
[Hulagway sa panid 25]
Karatula sa Kingdom Hall diha sa lima ka pinulongan