Armagedon—Usa ka Malipayong Sinugdanan

ANG pulong “Armagedon” naggikan sa Hebreohanong pulong “Har–Magedon,” o “Bukid sa Megido.” Makaplagan kini sa Pinadayag 16:16, nga nag-ingon: “Ilang gitigom sila sa dapit nga gitawag sa Hebreohanon ug Har–Magedon.” Kinsa ang ginatigom sa Armagedon, ug ngano? Duha lang ka bersikulo una niana, sa Pinadayag 16:14, atong mabasa: ‘Ang mga hari sa tibuok gipuy-ang yuta’ ginatigom “ngadto sa gubat sa dakong adlaw sa Diyos nga Labing Gamhanan.” Ingon sa gidahom, kanang mga pulonga nagpatunghag dugang makapainteres kaayong mga pangutana. Asa man makiggubat kini nga “mga hari”? Unsa ang isyu nga husayon niining gubata, ug kang kinsa sila makiggubat? Kini bang mga haria, sama sa gihunahuna sa daghang tawo, mogamit sa mga hinagiban sa dinaghan nga pagpamatay? Aduna bay maluwas sa Armagedon? Tugoting ang Bibliya maoy motubag niining mga pangutanaha.

Ang paghisgot ba sa “Bukid sa Megido” nagpasabot nga ang Armagedon sangkaon diha usa ka espesipikong bukid sa Tungang Sidlakan? Dili. Sa panguna, wala gayoy ingon niana nga bukid ang naglungtad—diha sa dapit sa karaang Megido, aduna lamay usa ka bungdo nga mituybo ug mga 20 metros ibabaw sa sikbit nga walog. Dugang pa, ang luna palibot sa Megido gamay ra kaayo nga dili mapaigo ang tanang “mga hari sa yuta ug ang ilang kasundalohan.” (Pinadayag 19:19) Bisan pa niana, ang Megido mao ang dapit diin gisangka ang pipila sa kinabangisan ug labing mahukmanong mga gubat sa kasaysayan sa Tungang Sidlakan. Busa, ang ngalang Armagedon nagsimbolo sa usa ka mahukmanong gubat, nga usa lamang ang seguradong mananaog.—Tan-awa ang kahong “Megido—Usa ka Haom nga Simbolo,” diha sa panid 5.

Ang Armagedon dili mahimong usa lamang ka panaggubatay sa mga nasod sa yuta, tungod kay ang Pinadayag 16:14 nag-ingon nga ‘ang mga hari sa tibuok gipuy-ang yuta’ nagkahiusa aron makigsangka diha “sa gubat sa dakong adlaw sa Diyos nga Labing Gamhanan.” Diha sa iyang dinasig nga tagna, si Jeremias miingon nga “ang mga pinatay ni Jehova” molukop “gikan gayod sa usa ka tumoy sa yuta hangtod sa laing tumoy sa yuta.” (Jeremias 25:33) Busa, ang Armagedon dili usa ka tawhanong gubat nga sangkaon diha sa usa ka tinong dapit sa Tungang Sidlakan. Kini maoy gubat ni Jehova, ug kini maoy tibuok-kalibotan.

Apan matikdi nga diha sa Pinadayag 16:16, ang Armagedon gitawag ug “dapit.” Diha sa Bibliya, ang “dapit” mahimong magpasabot ug kahimtang o situwasyon—niining kahimtanga, usa ka situwasyon diin ang tibuok kalibotan magkahiusa sa pagpakig-away kang Jehova. (Pinadayag 12:6, 14) Sa Armagedon ang tanang nasod sa yuta maghiusa batok sa “mga panon nga didto sa langit” ilalom sa militaryong pagmando sa “Hari sa mga hari ug Ginoo sa mga ginoo,” si Jesu-Kristo.—Pinadayag 19:14, 16.

Unsa na man ang bahin sa pangangkon nga ang Armagedon maoy usa ka katalagman nga naglangkit sa mga hinagiban sa dinaghan nga pagpamatay o sa usa ka pagbanggaay sa langitnong mga butang ug sa planetang yuta? Tugotan kaha sa usa ka mahigugmaong Diyos ang maong makalilisang nga kataposan sa katawhan ug sa ilang pinuy-anan, ang yuta? Dili. Siya espesipikong nag-ingon nga wala niya lalanga ang yuta “sa wala lamay kapuslanan” apan “nag-umol niini aron pagapuy-an.” (Isaias 45:18; Salmo 96:10) Sa Armagedon, dili laglagon ni Jehova ang atong yuta pinaagi sa kalayonhong katalagman. Hinunoa, iyang ‘laglagon ang mga nagalaglag sa yuta.’—Pinadayag 11:18.

Armagedon—Kanus-a?

Latas sa kasiglohan, ang kanunayng gisuknang pangutana nga nagpatunghag daghan kaayong pangagpas mao, Kanus-a Moabot ang Armagedon? Ang pagsusi sa basahon sa Pinadayag duyog sa giingon  sa ubang mga bahin sa Bibliya makatabang kanato sa pagtino kon kanus-a mahitabo kining hinungdanon kaayong gubat. Gilangkit sa Pinadayag 16:15 ang Armagedon sa pag-abot ni Jesus sama sa usa ka kawatan. Kana nga ilustrasyon gigamit usab ni Jesus sa paghubit sa iyang pag-abot aron magpahamtang ug paghukom niini nga sistema sa mga butang.—Mateo 24:43, 44; 1 Tesalonica 5:2.

Sumala sa gipakita sa katumanan sa mga tagna sa Bibliya, sukad sa 1914 kita nagkinabuhi na sa kataposang mga adlaw niini nga sistema sa mga butang. a Ang magtimaan sa kataposang bahin sa kataposang mga adlaw mao ang yugto nga gitawag ni Jesus ug “dakong kasakitan.” Wala isulti sa Bibliya kon unsa unya ka dugay ang maong yugto, apan ang mga katalagman nga ipahinabo niini mao ang kinagrabehan nga maagoman sa kalibotan sukad masukad. Ang maong dakong kasakitan mosangko sa Armagedon.—Mateo 24:21, 29.

Sanglit ang Armagedon mao ang “gubat sa dakong adlaw sa Diyos nga Labing Gamhanan,” wala gayoy mahimo ang mga tawo sa pag-oktaba niana. Gitakda ni Jehova ang “tinudlong panahon” kon kanus-a magsugod ang maong gubat. “Kini dili maulahi.”—Habacuc 2:3.

Usa ka Diyos sa Pagkamatarong Nakigsangka Diha sa Usa ka Matarong nga Gubat

Apan, nganong ang Diyos makigsangka diha sa usa ka tibuok-kalibotang gubat? Ang Armagedon dakog kalabotan sa usa sa iyang pangunang mga  hiyas, ang hustisya. Ang Bibliya nagpahayag: “Si Jehova mahigugmaon sa hustisya.” (Salmo 37:28) Iyang nakita ang tanang inhustisya nga gibuhat sulod sa kasaysayan sa tawo. Tataw nga kini maoy nagpukaw sa iyang matarong nga kasuko. Busa, iyang gitudlo ang iyang Anak nga makigsangka diha sa usa ka matarong nga gubat aron sa paglaglag niining tibuok daotang sistema.

Si Jehova lamang ang makahimo sa pagpakigsangka diha sa usa ka matarong ug mapilion nga gubat diin nianang panahona ang matarong-ug-kasingkasing nga mga tawo, bisan hain sila sa yuta, pagaluwason. (Mateo 24:40, 41; Pinadayag 7:9, 10, 13, 14) Ug siya lamang usab ang may katungod nga magpatuman sa iyang pagkasoberano sa tibuok yuta, tungod kay siya may naglalang niini.—Pinadayag 4:11.

Unsay gamiton ni Jehova sa paglaglag sa iyang mga kaaway? Wala gayod kita mahibalo. Ang atong nahibaloan mao nga magamit niya ang bisan unsa sa paglaglag nga bug-os sa daotang mga nasod. (Job 38:22, 23; Sofonias 1:15-18) Apan, ang mga magsisimba sa Diyos dinhi sa yuta dili moapil sa gubat. Ang panan-awon sa Pinadayag kapitulo 19 nagpakita nga ang langitnong mga panon lamang ang moduyog kang Jesu-Kristo sa pagpakiggubat. Walay Kristohanong alagad ni Jehova sa yuta ang makigbahin niana.—2 Cronicas 20:15, 17.

Usa ka Diyos sa Kaalam Nagahatag ug Igong Pasidaan

Aduna ba unyay maluwas? Sa pagkamatuod, dili gayod kinahanglang mamatay ang si bisan kinsa sa Armagedon. Si apostol Pedro miingon: “Si Jehova . . . wala magtinguha nga adunay malaglag apan nagtinguha nga ang tanan makakab-ot sa paghinulsol.” (2 Pedro 3:9) Ug si apostol Pablo nag-ingon nga ang “kabubut-on [sa Diyos] mao nga ang tanang matang sa mga tawo mangaluwas unta ug makadangat sa tukmang kahibalo sa kamatuoran.”—1 Timoteo 2:4.

Kanay hinungdan kon nganong sa pagkamaalamon giseguro ni Jehova nga ang “maayong balita sa gingharian” imantala sa tibuok-yuta, diha sa gatosan ka pinulongan. Ang mga tawo bisan asang dapita gihatagan ug kahigayonan nga makalabang-buhi ug maluwas. (Mateo 24:14; Salmo 37:34; Filipos 2:12) Kadtong modawat sa maayong balita makalabang-buhi sa Armagedon ug makapuyo sa walay kataposan diha sa kahingpitan sa usa ka paraisong yuta. (Ezequiel 18:23, 32; Sofonias 2:3; Roma 10:13) Dili ba mao man kini ang imong dahomon nga buhaton sa usa ka Diyos sa gugma?—1 Juan 4:8.

Ang Usa ba ka Diyos sa Gugma Mahimong Makiggubat?

Apan, daghan ang nahibulong kon nganong ang usa ka Diyos kinsa mao ang mismong larawan sa gugma mopahamtang ug kamatayon ug kalaglagan sa daghang katawhan. Ang kahimtang mahimong itandi sa usa ka balay nga gihugpaan ug mga ilaga. Dili ka ba mouyon nga ang usa ka matul-id nga tag-iya sa balay angayng manalipod sa panglawas ug kaayohan sa iyang pamilya pinaagi sa pagpuo sa mga ilaga?

Sa susama, ang hinungdan kon nganong kinahanglang sangkaon ang gubat sa Armagedon maoy tungod sa halalom nga pagmahal ni Jehova sa katawhan. Ang katuyoan sa Diyos mao ang paghimo sa yuta nga usa ka paraiso ug ang pagtuboy sa katawhan ngadto sa kahingpitan ug kalinaw, nga “walay usa nga magpakurog kanila.” (Miqueas 4:3, 4; Pinadayag 21:4) Nan, unsaon man kadtong nagpameligro sa kalinaw ug kasegurohan sa ilang mga isigkatawo? Kinahanglang paphaon sa Diyos ang maong “mga ilaga”—ang mga daotan nga dili na gayod matul-id.—alang sa kaayohan sa mga matarong.—2 Tesalonica 8, 9; Pinadayag 21:8.

Ang kadaghanan sa mga paggubatay ug pag-ulag dugo karon maoy tungod sa dili-hingpit nga tawhanong pagmando ug sa hinakog nga paningkamot alang sa intereses sa nasod. (Ecclesiastes 8:9) Kay nagtinguha sa pagpadako sa ilang gahom, ang tawhanong mga kagamhanan bug-os nga nagsalikway sa natukod nang Gingharian ni Kristo. Walay timailhan nga itugyan sa mga nasod ang ilang soberanya ngadto sa Diyos ug kang Kristo. (Salmo 2:1-9) Busa kanang mga kagamhanana kinahanglang paphaon aron sa pag-andam sa dalan alang sa matarong nga pagmando sa Gingharian ni Jehova ilalom ni Kristo. (Daniel 2:44) Ang Armagedon kinahanglang sangkaon aron masulbad sa dayon ang isyu sa kon kinsay adunay katungod sa pagmando niining yutaa ug sa katawhan.

Ang aktibong pagpangilabot ni Jehova sa Armagedon maoy alang sa kaayohan sa katawhan. Atubangan  sa nagakagrabe nga mga kahimtang sa kalibotan, ang bug-os nga makatagbaw sa mga panginahanglan sa katawhan mao lamang ang hingpit nga pagmando sa Diyos. Pinaagi lamang sa iyang Gingharian nga motunhay ang tinuod nga kalinaw ug kauswagan. Unsa kahay kahimtang sa kalibotan kon ang Diyos dili mangilabot hangtod sa hangtod? Dili kaha ang pagdumot, kapintasan, ug mga gubat padayong mohampak sa katawhan sama sa nahitabo latas sa kasiglohan sa tawhanong pagmando? Sa pagkamatuod, ang gubat sa Armagedon makahatag ug kaayohan kanato!—Lucas 18:7, 8; 2 Pedro 3:13.

Ang Gubat nga Magtapos sa Tanang Gubat

Usa ka butang ang mapalampos sa Armagedon nga wala sukad mahimo sa bisan unsang gubat—ang pagtapos sa tanang gubat. Kinsa ba ang wala mangandoy sa panahon diin ang pakiggubat maoy usa ka butang na lamang sa kagahapon? Bisan pa niana, napakyas ang tanang tawhanong paningkamot sa pagtapos sa gubat. Ang maong sublisubling pagkapakyas sa tawhanong mga paningkamot sa pagtapos sa gubat nagpasiugda lamang sa katinuoran sa mga pulong ni Jeremias: “Ako nahibalo pag-ayo, Oh Jehova, nga dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Maylabot sa kon unsay mapalampos ni Jehova, ang Bibliya nagsaad: “Gipahunong niya ang mga gubat hangtod sa kinatumyan sa yuta. Gibali niya ang busogan ug giputolputol ang bangkaw; ang mga karomata iyang gisunog sa kalayo.”—Salmo 46:8, 9.

Sa dihang gamiton sa mga nasod ang ilang makamatay nga mga hinagiban ug mameligro nga madaot ang kalikopan, ang Magbubuhat sa yuta molihok—diha sa Armagedon sa Bibliya! (Pinadayag 11:18) Busa, kining gubata magpalampos sa usa ka butang nga maoy bugtong gilaoman sa mahinadlokon-sa-Diyos nga mga tawo latas sa kasiglohan. Kini magbayaw sa katungod sa Tag-iya sa yuta, si Jehova nga Diyos, nga momando ibabaw sa tanan niyang mga linalang.

Busa, ang Armagedon dili angayng kahadlokan sa mga tawo nga nahigugma sa pagkamatarong. Hinunoa, kini magtaganag pasukaranan nga molaom. Ang gubat sa Armagedon maghinlo sa yuta sa tanang kahiwian ug pagkadaotan ug magbukas sa dalan alang sa usa ka matarong nga bag-ong sistema sa mga butang ilalom sa pagmando sa Mesiyanikong Gingharian sa Diyos. (Isaias 11:4, 5) Inay kay usa ka makalilisang nga malaglagong kataposan, ang Armagedon magtimaan sa usa ka malipayong sinugdanan alang sa matarong nga mga tawo, nga mopuyo sa walay kataposan diha sa usa ka paraisong yuta.—Salmo 37:29.

[Footnote]

[Kahon/Hulagway sa panid 5]

MEGIDO—USA KA HAOM NGA SIMBOLO

Ang karaang Megido maayong pagkapahimutang, nga nag-umbaw sa kasadpang bahin sa tabunok nga Walog sa Jezreel, sa amihanang Israel. Gikontrolar niini ang pamatigayon sa mga nasod ug ang militaryong mga ruta nga nag-abot didto. Busa, ang Megido nahimong usa ka dapit sa mahukmanong mga gubat. Si Propesor Graham Davies misulat diha sa iyang librong Cities of the Biblical World—Megiddo: “Ang siyudad sa Megido . . . sayon rang adtoon sa mga magpapatigayon ug mga lalin gikan sa tanang direksiyon; apan sa samang higayon, kon may igong gahom, mapugngan niini ang paggamit niining mga rutaha ug ingong resulta makontrolar niini ang dagan sa pamatigayon ug gubat. Busa dili ikatingala nga ang siyudad mao . . . ang ganti nga sagad giawayan ug sa dihang nailog na, kini depensahag maayo.”

Ang taas nga kasaysayan sa Megido nagsugod sa ikaduhang milenyo W.K.P. sa dihang giparot sa magmamandong Ehiptohanon nga si Thutmose III ang Canaanhong mga magmamando didto. Nagpadayon kini latas sa kasiglohan hangtod sa 1918 sa dihang ang Britanikong Heneral nga si Edmund Allenby nagpahinabog masakit nga kaparotan sa kasundalohan sa Turkey. Didto sa Megido nga ang Diyos nagtugot kang Maghuhukom Barak sa pagpahinabog dakong kalaglagan sa Canaanhong Haring Jabin. (Maghuhukom 4:12-24; 5:19, 20) Diha nianang dapita giparot ni Maghuhukom Gideon ang mga Midianhon. (Maghuhukom 7:1-22) Diha nianang dapita usab gipatay si Haring Ahazias ug Haring Josias.—2 Hari 9:27; 23:29, 30.

Nan, haom gayod ang paglangkit sa Armagedon nianang dapita tungod kay kadto maoy dapit sa daghang mahukmanong mga gubat. Kana maoy haom nga simbolo sa bug-os nga kadaogan sa Diyos batok sa tanang nakigbatok nga mga puwersa.

[Credit Line]

Pictorial Archive (Near Eastern History) Est.

[Hulagway sa panid 7]

Sa tibuok-kalibotan, ang mga tawo gihatagan ug pasidaan ug kahigayonan nga maluwas sa Armagedon

[Hulagway sa panid 7]

Ang Armagedon magtimaan sa usa ka malipayong sinugdanan