Good News for People of All Nations

GIPAKITA sa ibabaw ang usa ka pulyeto nga giluwatan niadtong 2004/05 “Lakaw Uban sa Diyos” nga Distritong mga Kombensiyon sa mga Saksi ni Jehova. Ang usa ka edisyon niini mao ang 96-panid nga pulyeto nga adunay mubong mensahe diha sa 92 ka pinulongan, nga naglakip sa Afrikaans ug Yoruba, ug kini gidisenyo sa pagtabang sa pagpakaylap sa maayong balita sa Gingharian ngadto sa daghang tawo kutob sa mahimo. (Mateo 24:14) Gipakita sa mosunod nga mga eksperyensiya ang sagad nga moresulta sa dihang gamiton kining pulyetoha.

• Human makakuhag pulyeto sa kombensiyon, giadto sa usa ka pamilyang Saksi ang tulo ka nasodnong parke. Didto ilang nahibalag ang mga tawo gikan sa India, Netherlands, Pakistan, ug Pilipinas. Ang bana nag-ingon: “Bisan pag kining mga tawhana makasultig Iningles, sa dihang gipakita namo kanila ang mensahe diha sa ilang kaugalingong pinulongan, sila nahingangha tungod kay sila halayo kaayo sa ilang nasod. Tin-aw nilang nasabtan nga ang among buluhaton gihimo sa tibuok kalibotan ug kami nagkahiusa.”

• Gipakita sa usa ka sister ang pulyeto ngadto sa iyang kauban sa trabaho nga taga-India. Nalipay ang lalaki sa pagkakita sa tanang pinulongan niini ug iyang gibasa ang mensahe diha sa iyang kaugalingong pinulongan. Kini mitultol sa dugang pang panaghisgot sa Bibliya. Usa ka Pilipina nga kauban usab niya sa trabaho nahingangha sa pagkakita sa iyang lumad nga pinulongan diha sa pulyeto ug interesado nga makakat-on pag dugang bahin sa mga Saksi ni Jehova.

• Sa Canada, usa ka babaye nga taga-Nepal ang miuyon sa pagtuon sa Bibliya uban sa usa ka Saksi pinaagi sa telepono apan nagpanuko sa pagdapit sa sister ngadto sa iyang balay. Apan, sa dihang gisultian sa Saksi ang babaye bahin sa pulyeto nga dunay mensahe sa pinulongang Nepali, malipayon niyang giimbitar ang sister sa iyang balay. Buot niyang makita mismo ang mensahe diha sa iyang lumad nga pinulongan! Sukad niadto, ang pagtuon sa Bibliya gihimo na diha sa balay sa babaye.