Pagkahimong Mauswagon ug Mapasiboon nga mga Ministro

“Ako nahimong tanang butang ngadto sa tanang matang sa katawhan, aron maluwas ko sa bisan unsa mang paagi ang pipila.”—1 CORINTO 9:22.

1, 2. (a) Sa unsang mga paagi si apostol Pablo usa ka epektibong ministro? (b) Sa unsang paagi gihubit ni Pablo ang iyang tinamdan bahin sa iyang asaynment?

 SIYA relaks nga nakig-uban sa makinaadmanong mga tawo ug sa ubos nga tighimog mga tolda. Siya nakapakombinsir sa dungganong mga Romano ug sa kabos nga mga Prigianhon. Ang iyang mga sinulat nakapatandog sa liberal nga mga Grego ug sa konserbatibong mga Hudiyo. Ang iyang pangatarongan dili malalis ug natukbil usab niya pag-ayo ang emosyon sa mga tawo. Siya naningkamot sa pagpangitag punto nga gikauyonan sa tanan aron matabangan niya ang uban nga motuo kang Kristo.—Buhat 20:21.

² Ang tawo mao si apostol Pablo, nga sa walay duhaduha usa ka epektibo ug mauswagon nga ministro. (1 Timoteo 1:12) Nadawat niya gikan kang Jesus ang sugo nga ‘magdala sa ngalan ni Kristo ngadto sa tanang kanasoran maingon man sa mga hari ug sa mga anak sa Israel.’ (Buhat 9:15) Unsay iyang tinamdan niining maong asaynment? Siya miingon: “Ako nahimong tanang butang ngadto sa tanang matang sa katawhan, aron maluwas ko sa bisan unsa mang paagi ang pipila. Apan gihimo ko ang tanang butang tungod sa maayong balita, aron ako mahimong mag-aambit niini sa uban.” (1 Corinto 9:19-23) Unsay atong makat-onan gikan sa panig-ingnan ni Pablo nga makatabang kanato nga mahimong mas epektibo diha sa atong pagsangyaw ug pagpanudlo?

Usa ka Tawong Nagbag-o Miatubang sa Hagit

3. Unsay gibati ni Pablo ngadto sa mga Kristohanon sa wala pa siya makabig?

³ Si Pablo ba sa sinugdan usa ka tawo nga hataas-ug-pailob ug mahunahunaon, nga takos sa asaynment nga iyang nadawat? Dili gayod! Tungod sa relihiyosong panatisismo, si Saulo (nga maoy tawag kang Pablo sa una) nahimong mabangis nga maglulutos sa mga sumusunod ni Kristo. Sa dihang siya batan-on pa, siya miuyon sa pagpatay kang Esteban. Human niana, si Pablo walay-kokaluoy nga naggukod sa mga Kristohanon. (Buhat 7:58; 8:1, 3; 1 Timoteo 1:13) Siya nagpadayon sa pagpangusmog “hulga ug pagbuno batok sa mga tinun-an sa Ginoo.” Kay wala makontento sa paglutos sa mga magtutuo diha lamang sa Jerusalem, gipakaylap niya ang iyang kampanya sa pagdumot, paamihanan hangtod sa Damasco.—Buhat 9:1, 2.

4. Unsang kausaban ang kinahanglang himoon ni Pablo sa pagtuman sa iyang asaynment?

⁴ Ang hinungdan sa hilabihang pagdumot ni Pablo sa Kristiyanidad lagmit mao ang kombiksiyon nga ang bag-ong relihiyon makadaot sa Judaismo pinaagi sa pagsagol niana ug lahi, dili-maayo nga mga ideya. Sa pagkatinuod, si Pablo kaniadto usa ka “Pariseo,” nga nagpasabot ug “usa nga gilain.” (Buhat 23:6) Handurawa kon unsa kaha ka dako ang kakurat ni Pablo sa dihang iyang nahibaloan nga gipili siya sa Diyos sa pagsangyaw bahin kang Kristo ngadto pa gayod sa mga Hentil! (Buhat 22:14, 15; 26:16-18) Aw, ang mga Pariseo dili gani mokaon uban niadtong ilang giisip nga mga makasasala! (Lucas 7:36-39) Sa walay duhaduha kinahanglang maningkamot siya pag-ayo aron mausab ang iyang panglantaw ug ipahiuyon kana sa kabubut-on sa Diyos nga ang tanang matang sa mga tawo maluwas.—Galacia 1:13-17.

5. Sa unsang paagi masundog nato si Pablo diha sa atong ministeryo?

⁵ Tingali kinahanglang himoon nato ang susama niana. Sa dihang kita makahimamat ug mga tawo diha sa atong teritoryo nga lahig rasa ug pinulongan, kita kinahanglang maningkamot pag-ayo sa pagsusi sa atong tinamdan ug wagtangon ang bisan unsang pagpihig. (Efeso 4:22-24) Naamgohan man nato o wala, kita naimpluwensiyahan sa atong sosyal ug edukasyonal nga pagbansay. Kini makapatisok diha kanato sa mga  panglantaw ug mga tinamdan nga mapihigon ug dili mapasiboon. Kinahanglang buntogon nato ang maong mga pagbati aron kita molampos sa pagpangita ug pagtabang sa mga karnerohon. (Roma 15:7) Mao kanay gibuhat ni Pablo. Iyang gidawat ang hagit nga pauswagon ang iyang ministeryo. Kay gitukmod sa gugma, iyang naugmad ang mga kahanas sa pagtudlo nga takos sundogon. Sa pagkatinuod, ang pagtuon bahin sa ministeryo sa “apostol alang sa kanasoran” nagpakita nga siya mapaniiron, mapasiboon, ug mapaagihon diha sa pagsangyaw ug pagpanudlo. a—Roma 11:13.

Usa ka Mauswagong Ministro

6. Sa unsang paagi si Pablo mapaniiron sa kagikan sa iyang mga mamiminaw, ug unsay resulta?

⁶ Si Pablo mapaniiron sa kon unsay gituohan ug kagikan sa iyang mga mamiminaw. Sa dihang nakigsulti kang Haring Agripa II, giila ni Pablo nga ang hari “batid sa tanang kostumbre ug mga panaglantugi sa mga Hudiyo.” Dayon sa kahanas gigamit ni Pablo ang iyang nahibaloan bahin sa gituohan ni Agripa ug gihisgotan uban kaniya ang mga butang nga nasabtan pag-ayo sa hari. Tin-aw ug makapakombinsir kaayo ang pangatarongan ni Pablo nga si Agripa miingon: “Sa mubong panahon makombinsir mo ako nga mahimong Kristohanon.”—Buhat 26:2, 3, 27, 28.

7. Sa unsang paagi si Pablo nagpakita ug pagkamapasiboon sa dihang nagsangyaw ngadto sa usa ka panon sa Listra?

⁷ Si Pablo mapasiboon usab. Matikdi ang dakong kalainan sa iyang pagpakigsulti sa dihang gisanta niya ang usa ka panon sa siyudad sa Listra sa pagsimba kaniya ug kang Bernabe ingong mga diyos. Giingon nga kining mga tawhana, nga nagsultig Licaonianhon, giisip nga mubog edukasyon ug mas matuotuohon kay sa ubang mga tawo. Sumala sa Buhat 14:14-18, gipunting ni Pablo ang paglalang ug ang mga gasa sa kinaiyahan ingong pamatuod sa pagkalabaw sa matuod nga Diyos. Ang argumento dali rang nasabtan, ug dayag nga kini ‘nakapugong  sa mga panon sa paghalad’ ngadto kang Pablo ug Bernabe.

8. Sa unsang mga paagi gipakita ni Pablo nga siya mapasiboon bisan pag usahay siya adunay hugot nga opinyon bahin sa pipila ka butang?

⁸ Siyempre, si Pablo dili hingpit, ug usahay, siya adunay hugot nga opinyon bahin sa pipila ka butang. Pananglitan, sa dihang siya gipakaulawan ug gipakitaag pagpihig, siya misultig masakit nga mga pulong sa Hudiyo nga ginganlag Ananias. Apan sa dihang giingnan si Pablo nga ang hataas nga saserdote diay ang iyang nainsulto, siya nangayo dayon ug pasaylo. (Buhat 23:1-5) Sa Atenas, siya sa sinugdan “giabot ug kalagot sa pagkakita nga ang siyudad napuno sa mga idolo.” Bisan pa niana, sa iyang pakigpulong sa Mars’ Hill, wala ipakita ni Pablo ang maong kapungot. Hinunoa, siya nakigsulti sa mga taga-Atenas diha sa ilang hukmanan, nga nangatarongan pinasukad sa punto nga gikauyonan pinaagi sa paghisgot sa ilang halaran “Alang sa Usa ka Diyos nga Wala Mailhi” ug pagkutlo sa usa sa ilang mga magbabalak.—Buhat 17:16-28.

9. Sa unsang paagi gipasundayag ni Pablo nga siya mapaagihon sa dihang nakigsulti sa lainlaing mamiminaw?

⁹ Sa pagpakigsulti sa lainlaing mamiminaw, si Pablo mapaagihon kaayo. Iyang gihunahuna ang kultura ug palibot nga nag-impluwensiya sa panghunahuna sa iyang mamiminaw. Sa dihang siya misulat sa mga Kristohanon sa Roma, siya nahibalo gayod nga sila nagpuyo diha sa kaulohan sa kinalabwang gahom nianang panahona. Ang pangunang punto diha sa sulat ni Pablo sa mga Kristohanon sa Roma mao nga ang gahom sa sala ni Adan nga magpahinabog kadaot gidaog sa gahom ni Kristo nga molukat. Siya nakigsulti sa Romanong mga Kristohanon ug niadtong anaa sa ilang palibot sa pinulongan nga makatukbil sa ilang kasingkasing.—Roma 1:4; 5:14, 15.

10, 11. Sa unsang paagi gipasibo ni Pablo ang iyang mga ilustrasyon sa iyang mga mamiminaw? (Tan-awa usab ang potnot.)

¹⁰ Unsay gibuhat ni Pablo sa dihang gusto niyang ipatin-aw ang laglom nga mga kamatuoran sa Bibliya ngadto sa iyang mga mamiminaw? Ang apostol hanas sa paggamit ug komon, daling masabtan nga mga ilustrasyon aron sa pagpatin-aw sa komplikadong espirituwal nga mga ideya. Pananglitan, nahibalo si Pablo nga ang mga tawo sa Roma nasinati sa sistema sa pagpangulipon diha sa tibuok Romanhong Imperyo. Sa pagkatinuod, kadaghanan sa mga tawo nga iyang gisulatan lagmit mga ulipon usab. Busa gigamit ni Pablo ang pagpangulipon ingong ilustrasyon sa pagpaluyo sa iyang puwersadong argumento bahin sa pagpili sa usa ka tawo sa pagpasakop sa sala o kaha sa pagkamatarong.—Roma 6:16-20.

¹¹ “Taliwala sa mga Romano,” matod pa sa usa ka reperensiya, “mahimong hatagan sa tag-iya ug bug-os nga kagawasan ang usa ka ulipon, o ang ulipon makapalit sa iyang kagawasan pinaagi sa pagbayad sa iyang tag-iya. Ang kagawasan mahikay usab kon ang usa ka diyos mao nay manag-iya sa usa ka ulipon.” Ang napagawas nga ulipon makapadayon sa pag-alagad sa iyang agalon nga adunay suhol. Lagmit kining maong batasan ang gitumong ni Pablo sa dihang siya misulat bahin sa pagpili sa usa ka tawo kon kinsa ang agalon nga iyang sugton—ang sala o pagkamatarong. Ang mga Kristohanon sa Roma napagawas sa sala ug iya na sa Diyos. Sila gawasnon na nga moalagad sa Diyos, apan anaa ra kanila kon gusto gihapon nilang mag-alagad sa sala—ang kanhing agalon nila. Kanang yano apan pamilyar nga ilustrasyon mag-aghat niadtong mga Kristohanon sa Roma sa pagsukna sa ilang kaugalingon, ‘Kinsa ang agalon nga akong ginaalagaran?’ b

Pagkakat-on Gikan sa Panig-ingnan ni Pablo

12, 13. (a) Unsang paningkamot ang gikinahanglan karon aron matugkad ang kasingkasing sa atong lainlaing mamiminaw? (b) Unsay imong nakaplagan nga epektibo sa dihang nagsangyaw sa mga tawo nga lainlaig kagikan?

¹² Sama kang Pablo, kita kinahanglang mahimong mapaniiron, mapasiboon, ug mapaagihon aron matugkad ang kasingkasing sa atong lainlaing mamiminaw. Aron matabangan ang atong mga mamiminaw nga makasabot sa maayong balita, gusto  natong mohimo ug labaw pa kay sa basta pagduaw lamang kanila, pagsulti ug inandam nga mensahe, o pagpahimutang ug literatura sa Bibliya. Kinahanglang maningkamot kita sa pag-ila sa ilang mga panginahanglan ug mga butang nga gikabalak-an, ilang mga gusto ug dili gusto, ug mga butang nga ilang gikahadlokan ug ilang mga pagpihig. Bisan tuod kini nagkinahanglan ug dugayng pagpamalandong ug dakong paningkamot, ang mga magmamantala sa Gingharian sa tibuok kalibotan madasigong nagbuhat niana. Pananglitan ang sangang buhatan sa mga Saksi ni Jehova sa Hungaria nagtaho: “Ang mga igsoon nagtahod sa mga kostumbre ug estilo sa kinabuhi sa mga tawo nga gikan sa laing nasod ug wala sila magdahom nga ang mga langyaw mosagop sa lokal nga mga kostumbre.” Ang mga Saksi sa laing mga dapit naningkamot usab sa pagbuhat sa susama niana.

¹³ Sa usa ka nasod sa Halayong Sidlakan, kadaghanan sa mga tawo mahunahunaon sa panglawas, pagbansay sa mga bata, ug edukasyon. Ang mga magmamantala sa Gingharian didto naningkamot sa pagpasiugda niining mga butanga imbes hisgotan ang mga butang sama sa nagakadaot nga kahimtang sa kalibotan o komplikado nga katilingbanong mga isyu. Sa susama, ang mga magmamantala sa usa ka dakong siyudad sa Tinipong Bansa nakamatikod nga ang mga tawo sa usa ka komunidad diha sa ilang teritoryo nabalaka sa mga butang sama sa korapsiyon, paghuot sa trapiko, ug krimen. Ang mga Saksi malamposong naggamit niining mga isyuha aron sa pagsugod ug mga panaghisgot sa Bibliya. Gitino sa epektibong mga magtutudlo sa Bibliya nga bisan unsa pay topiko nga ilang pilion, sila magpabiling positibo ug makapalig-on, nga magpasiugda sa praktikal nga bili sa pagpadapat sa mga prinsipyo sa Bibliya karon ug sa masanag nga palaaboton nga gitanyag sa Diyos alang sa umaabot.—Isaias 48:17, 18; 52:7.

14. Hubita ang mga paagi diin kita makapasibo sa lainlaing mga panginahanglan ug sirkumstansiya sa mga tawo.

¹⁴ Makatabang usab ang paglainlain sa atong paagi sa pagpakigsulti diha sa ministeryo, tungod kay ang mga tawo lainlain ug kultural, edukasyonal, ug relihiyoso nga mga kagikan. Ang atong paagi sa pagpakigsulti sa mga tawo nga nagtuo sa Maglalalang apan dili motuo sa Bibliya lahi nianang atong gamiton sa pagpakigsulti niadtong dili motuo nga ang Diyos naglungtad. Sa usa ka tawo nga naghunahuna nga ang tanang relihiyosong literatura maoy galamiton sa pagpakaylap ug propaganda, ang presentasyon nga atong gamiton lahi nianang atong gamiton sa usa ka tawo nga modawat sa ginatudlo sa Bibliya. Ang pagkamapasiboon gikinahanglan usab sa pagpakigsulti sa mga tawo nga lainlain ug lebel sa edukasyon nga nakab-ot. Ang hanas nga mga magtutudlo mogamit ug pangatarongan ug mga ilustrasyon nga haom sa situwasyon nga ilang giatubang.—1 Juan 5:20.

Tabang Alang sa Bag-ong mga Ministro

15, 16. Nganong kinahanglang bansayon ang bag-ong mga ministro?

¹⁵ Si Pablo wala lamang maghunahuna sa pagpauswag sa iyang mga pamaagi sa pagpanudlo. Iyang nakita ang panginahanglan nga bansayon ug andamon kadtong mga batabata pa, sama kang Timoteo ug Tito, nga mahimong epektibong mga ministro. (2 Timoteo 2:2; 3:10, 14; Tito 1:4) Sa susama, gikinahanglan usab pag-ayo karon ang pagtagana ug pagdawat ug pagbansay.

¹⁶ Sa 1914, dihay duolan sa 5,000 ka magmamantala sa Gingharian sa tibuok yuta; karon, kada semana mga 5,000 ka bag-ohan ang nabawtismohan! (Isaias 54:2, 3; Buhat 11:21) Sa dihang ang mga bag-ohan mosugod sa pagpakig-uban sa Kristohanong kongregasyon ug gustong makigbahin sa ministeryo, sila nagkinahanglan ug pagbansay ug paggiya. (Galacia 6:6) Hinungdanon nga gamiton nato ang mga pamaagi sa atong Agalon, si Jesus, sa pagtudlo ug pagbansay sa mga tinun-an. c

17, 18. Sa unsang paagi atong matabangan ang mga bag-ohan sa pagbaton ug kompiyansa sa kaugalingon diha sa ministeryo?

¹⁷ Si Jesus wala lamang mangita ug panon sa katawhan ug dayon giingnan ang iyang mga apostoles nga makasugod na sila sa pagpakigsulti. Una, gipasiugda niya ang panginahanglan nga mosangyaw ug gidasig niya sila nga magmainampoon. Dayon mihimo siyag tulo ka sukaranang mga kahikayan: usa ka kauban, teritoryo nga kobrehan, ug usa ka mensahe. (Mateo 9:35-38; 10:5-7; Marcos 6:7; Lucas 9:2, 6) Mahimo nato ang susama niana. Kita man nagtabang sa atong anak, sa usa ka bag-ong estudyante, o sa usa nga taudtaod nang wala makasangyaw, haom nga maningkamot nga himoon ang ingon niini nga pagbansay.

¹⁸ Ang mga bag-ohan nagkinahanglan ug dakong tabang aron makabaton ug kompiyansa sa kaugalingon diha sa ilang pagpresentar sa mensahe sa Gingharian. Makatabang ka ba kanila sa pag-andam ug pag-ensayo sa usa ka yano, makapadani nga presentasyon? Sa kanataran, tugoti silang makakat-on sa imong panig-ingnan sa dihang mosangyaw ka sa unang pipila ka balay. Mahimong sundon nimo ang sumbanan ni Gideon, kinsa miingon sa iyang kaubang mga manggugubat: “Makakat-on kamo pinaagi sa pagtan-aw kanako, ug buhaton ninyo ang ingon niana.” (Maghuhukom 7:17) Dayon hatagig kahigayonan ang bag-ohan sa pagsulti. Mainitong komendahi ang mga bag-ohan sa ilang mga paningkamot, ug kon nahiangay, ihatag ang mugbong mga sugyot nga makatabang kanila sa pagpauswag.

19. Unsay determinado nimong buhaton samtang ikaw naningkamot sa ‘pagtuman sa bug-os sa imong ministeryo’?

¹⁹ Aron ‘bug-os nga matuman ang atong ministeryo,’ kita determinado nga mahimong mas mapasiboon sa atong paagi sa pagpakigsulti sa mga tawo, ug buot natong bansayon ang bag-ong mga ministro nga buhaton ang sama niana. Sa dihang palandongon nato ang pagkahinungdanon sa atong tumong—ang pagpaambit sa mismong kahibalo sa Diyos nga motultol sa kaluwasan—kita kombinsido nga angay gayong paningkamotan nga mahimong “tanang butang ngadto sa tanang matang sa katawhan, aron maluwas [nato] sa bisan unsa mang paagi ang pipila.”—2 Timoteo 4:5; 1 Corinto 9:22.

[Mga footnote]

Nahinumdom Ka Ba?

• Sa unsang mga paagi masundog nato si Pablo diha sa atong ministeryo?

• Unsang mga kausaban sa atong panghunahuna ang lagmit nga gikinahanglan?

• Sa unsang paagi atong mahuptan nga positibo ang atong mensahe?

• Unsay gikinahanglan sa bag-ong mga ministro aron sila makabaton ug kompiyansa sa kaugalingon?

 [Mga Pangutana sa Pagtuon]

[Blurb sa panid 29]

Si apostol Pablo mapaniiron, mapasiboon, ug mapaagihon diha sa pagsangyaw ug pagpanudlo

[Blurb sa panid 31]

Gihimo ni Jesus ang tulo ka kahikayan alang sa iyang mga tinun-an: usa ka kauban, teritoryo nga kobrehan, ug usa ka mensahe

[Mga hulagway sa panid 28]

Si Pablo milampos sa pagpakigsulti sa lainlaing mamiminaw pinaagi sa pagkahimong mapasiboon

[Hulagway sa panid 30]

Ang epektibong mga ministro naghunahuna sa kultural nga kagikan sa ilang mga mamiminaw

[Hulagway sa panid 31]

Ang mauswagong mga ministro nagtabang sa mga bag-ohan sa pagpangandam alang sa ministeryo