Usa ka Pamatuod sa Gugma, Pagtuo, ug Pagkamasinugtanon

ANG buntag sa Mayo 16, 2005, maoy bugnaw ug masanag didto sa Watchtower Farms sa Wallkill, New York. Ang maayong pagkaareglar nga lagwerta ug kabulakan naggilakgilak gumikan sa pagbisibis sa ulan ayha pa mibanagbanag. Usa ka itik uban sa iyang walo ka piso ang hilom nga naglangoylangoy sa linaw nga tubig duol sa daplin sa lim-aw. Ang mga bisita nahingangha sa katahom. Hinay silang nagsultihanay nga daw dili gustong matugaw ang kahilom sa buntag.

Ang mga bisita maoy mga Saksi ni Jehova nga naggikan sa 48 ka nasod sa tibuok kalibotan. Apan wala sila moanhi aron makita ang talan-awon. Sila interesado kon unsay nagakahitabo sulod sa haluag nga tinukod nga gama sa pulang tisa, ang kinabag-ohang gidugang nga pasilidad sa Bethel sa Tinipong Bansa didto sa Wallkill. Sa sulod nianang maong tinukod, sila nahingangha na usab, bisan pag ang palibot dili hilom ni malinawon.

Gikan sa balkonahe, ang mga bisita nagsud-ong sa komplikadong laray sa makinarya. Lima ka dagko kaayong makina sa pag-imprenta ang nag-okupar sa gipasinaw nga sementadong salog nga mas dako pa kay sa siyam ka dulaanag potbol. Diha giimprenta ang mga Bibliya, mga libro, ug mga magasin. Ang dagko kaayong mga rolyo sa papel, nga motimbang ug 1,700 kilos ang matag usa, nagtuyok sama sa mga ligid sa usa ka tulin-ug-dagan nga trak. Ang matag 23-kilometros nga rolyo sa papel mobukhad ug moagi diha sa makina sa pag-imprenta sulod lamang sa 25 minutos. Nianang gidugayona, ang makina mag-imprenta ug magpauga sa tinta ug magpabugnaw sa papel aron kini mapilo ug mahimong mga magasin nga paspas kaayo nga nag-irog diha sa lapaw-sa-tawo nga mga kombeyor aron isulod sa karton ug ihatod ngadto sa mga kongregasyon. Ang ubang mga makina puliki sa pag-imprenta ug mga panid sa libro, nga ibalhin dayon ngadto sa abot-sa-kisame nga pondohanan sa dili pa kini dalhon ngadto sa bindery. Ang eksakto kaayo nga pag-obra sa makina kontrolado sa kompiyuter.

 Gikan sa imprentahanan, ang mga bisita misuroy sa bindery. Ang mga makina dinhi naggamag gahig-hapin nga mga libro ug mga Bibliya nga deluxe sa gidaghanon nga mga 50,000 ka kopya kada adlaw. Ang mga panid sa libro tiponon sumala sa pagkahan-ay niini, papilitan, ug putlan ang mga kilid niini. Dayon ang mga hapin itaod. Ang mga tumpi sa nahuman na nga mga libro isulod sa mga karton. Ang mga karton awtomatikong sirad-an, markahan, ug ikamada diha sa paleta. Dugang pa, ang makina nga mag-asembol ug mag-empake sa humok-ug-hapin nga libro makahuman ug mga 100,000 ka libro kada adlaw. Gilangkoban usab kini ug daghan kaayong makinarya—hilabihan ka daghang motor, kombeyor, engranahe, ruyda ug koriya—ang tanan paspas kaayong naglihok aron makagamag literatura sa Bibliya.

Kay nagaobra nga ingon ka tukma sa maayong pagkagama nga relo, ang paspas kaayo ug kinabag-ohang makinarya sa imprentahanan maoy usa ka kahibulongan sa modernong teknolohiya. Atong makita unya nga kini usab maoy pamatuod sa gugma, pagtuo, ug pagkamasinugtanon sa katawhan sa Diyos. Apan, nganong ang pag-imprenta gibalhin man gikan sa Brooklyn, New York, ngadto sa Wallkill?

Ang pangunang hinungdan mao ang pagpayano sa mga gimbuhaton sa imprentahanan ug shipping pinaagi sa paghimo sa tanang trabaho diha sa usa lang ka dapit. Sulod sa daghang katuigan, ang mga libro giimprenta ug gipadala gikan sa Brooklyn, ug ang mga magasin giimprenta ug gipadala gikan sa Wallkill. Ang paghimo niana diha sa usa lang ka dapit magkunhod sa gidaghanon sa mga trabahante ug mas magamit pa ug maayo ang mga amot nga gigahin alang sa pag-alagad sa Diyos. Dugang pa, sanglit ang mga makina sa pag-imprenta sa Brooklyn karaan na, duha ka bag-ong MAN Roland Lithoman nga mga makina sa pag-imprenta ang giorder gikan sa Alemanya. Kining mga makinaha dili moarang sa imprentahanan sa Brooklyn.

Gipaluyohan ni Jehova ang Buluhaton

Ang katuyoan sa pag-imprenta mao gayod ang pagmantala sa maayong balita sa Gingharian sa Diyos. Dayag nga si Jehova nagpanalangin sa buluhatong pag-imprenta sukad pa gayod sa sinugdan. Gikan sa 1879 hangtod sa 1922, ang mga libro giimprenta pinaagi sa komersiyal nga mga imprentahanan. Sa 1922, usa ka sayis-andanas nga tinukod diha sa 18 Concord Street sa Brooklyn ang giabangan ug mipalit ug mga makina alang sa pag-imprenta ug mga libro. Nianang panahona, nagduhaduha ang pipila kon mahimo ba sa mga igsoon ang buluhaton.

Ang usa sa mga nagduhaduha mao ang presidente sa kompaniya nga nag-imprenta sa kadaghanan sa atong mga libro. Sa dihang miduaw sa Concord Street, siya miingon: “Duna kamoy primera-klase nga imprentahanan, apan walay usa kaninyo ang makamaong mooperit niana. Pag-abot ug unom ka bulan ang tanang makina mangaguba; ug inyong maamgohan nga ang mga tawo nga angayang mag-imprenta alang kaninyo mao kadtong kanunay nang nagbuhat niini ug hanas na niining trabahoa.”

Ang magtatan-aw sa imprentahanan nianang panahona, nga si Robert J. Martin, miingon: “Daw makataronganon kadto, apan nakalimtan niini ang Ginoo; ug siya kanunayng nagauban kanamo. . . . Wala madugay human niana kami naggama nag mga libro.” Sulod sa misunod nga 80 ka tuig, ang mga Saksi ni Jehova nagpatik ug bilyonbilyong mga literatura diha sa ilang kaugalingong mga imprentahanan.

Dayon sa Oktubre 5, 2002, panahon sa tinuig nga miting sa Watch Tower Bible and Tract Society of Pennsylvania, gianunsiyo nga ang Nagamandong Lawas nag-aprobar sa pagbalhin sa imprentahanan sa sanga sa Tinipong Bansa ngadto sa Wallkill. Duha ka bag-ong makina sa pag-imprenta ang giorder, nga ang petsa sa paghatod niana maoy Pebrero 2004. Kinahanglang himoag plano ug padak-an sa mga igsoon ang imprentahanan ug taposon kini sulod sa 15 ka bulan aron ikapahimutang ang bag-ong mga makina sa pag-imprenta inig-abot niini. Dayon, ang pag-instalar sa bag-ong bindery ug shipping kinahanglang makompleto sulod sa mosunod nga siyam  ka bulan. Ang uban tingali nagduhaduha sa dihang ilang nahibaloan ang eskedyul—daw imposibleng mahimo ang trabaho. Apan, ang mga igsoon nahibalo nga uban sa panalangin ni Jehova, kana mahimo.

Usa ka “Malipayong Espiritu sa Pagtinabangay”

Kay nahibalo nga ang katawhan ni Jehova motanyag sa ilang kaugalingon nga kinabubut-on, gisugdan sa mga igsoon ang proyekto. (Salmo 110:3) Ang gidak-on sa trabaho nagkinahanglan ug dugang mga trabahante gawas pa sa trabahante nga magamit gikan sa mga departamento sa pagpanukod sulod sa Bethel. Gikan sa Tinipong Bansa ug Canada, kapin sa 1,000 ka igsoong lalaki ug babaye nga may mga kahanas sa pagpanukod ang miboluntaryo sa pagtrabaho gikan sa usa ka semana ngadto sa tulo ka bulan ingong bahin sa programa sa temporaryong mga boluntaryo. Gidapit usab nga makigbahin sa proyekto ang uban nga gikan sa mga programa sa internasyonal nga mga alagad ug boluntaryo. Dako usab ang natabang sa mga Komite sa Rehiyonal nga Pagpanukod.

Alang sa daghan, ang pagboluntaryo sa proyekto sa Wallkill nagpasabot ug dakodakong galastohan sa pagbiyahe ug sa panahon nga mawala gikan sa sekular nga trabaho. Bisan pa niana, malipayon nilang gihimo kini nga mga sakripisyo. Agig pagsuportar sa proyekto, gipasundayag sa pamilyang Bethel ang ilang kakugi pinaagi sa pagtaganag kapuy-an ug pagkaon niining daghang dugang nga mga boluntaryo. Kapin sa 535 ka membro sa pamilyang Bethel gikan sa Brooklyn, Patterson, ug Wallkill miboluntaryo sa pagtrabaho diha sa proyekto panahon sa mga Sabado, dugang pa sa ilang mga asaynment sa ordinaryong mga adlaw sa semana. Ang talagsaong tabang nga gihatag sa katawhan sa Diyos niining makasaysayanhong panlimbasog naposible lamang tungod kay si Jehova nagpaluyo sa proyekto.

Ang uban nangamot ug kuwarta. Pananglitan, nadawat sa mga igsoon ang usa ka sulat gikan sa nuybe-anyos nga si Abby. Siya misulat: “Mapasalamaton kaayo ako sa tanan ninyong ginabuhat—nga naghimo sa tanang maanindot nga mga basahon. Basin makaduaw ra ako sa dili-madugay. Ang akong Papa miingon nga moduaw kami sa sunod tuig! Magtaod ako ug badge aron mailhan ninyo ako. Aniay 20 dolyares alang sa bag-ong imprentahanan! Ako kining alawans, apan buot kong ihatag kini kaninyo.”

Usa ka sister ang misulat: “Palihog dawata ang akong gasa nga ginansilyong mga kalo nga ako mismo ang naggansilyo. Buot kong ihatag kini nga mga kalo ngadto sa mga nagtrabaho sa proyekto sa Wallkill. Ang usa ka almanake nag-ingon nga taliabot na ang bagyohong tingtugnaw. Kon kaha sila husto o dili, wala ako mahibalo. Apan nahibalo ako nga daghang trabaho sa Wallkill ang himoon sa gawas, ug gusto kong maseguro nga kanunayng mainitan ang ulo sa akong mga igsoong lalaki ug babaye. Wala akoy bisan unsang kahanas nga gipangita sa mga igsoon, apan ako makagansilyo, busa mihukom ako nga gamiton kini nga kahanas sa pagtabang kon unsay akong mahimo.” Siya nagpadala ug 106 ka ginansilyong mga kalo!

Ang imprentahanan nakompleto sumala sa eskedyul. Si John Larson, nga magtatan-aw sa imprentahanan, miingon: “Diha gayoy malipayong espiritu sa pagtinabangay. Kinsa pay magduhaduha nga  gipanalanginan ni Jehova ang buluhaton? Paspas kaayo ang dagan sa proyekto. Nahinumdom pa ako nga nagbarog diha sa lapok sa Mayo 2003 nga nagtan-aw sa mga igsoon nga naghimo sa pundasyon sa bilding. Wala pay usa ka tuig human niana, ako nagtindog sa samang luna nga nag-obserbar sa mga makina sa pag-imprenta nga nagaobra.”

Programa sa Pagpahinungod

Ang programa sa pagpahinungod sa bag-ong imprentahanan, lakip ang tulo ka puy-anan nga mga tinukod gipahigayon sa Wallkill sa Lunes, Mayo 16, 2005. Ang mga Bethel sa Patterson ug Brooklyn, maingon man usab ang Bethel sa Canada, gikonektar pinaagig video. Tanantanan, 6,049 ang mitambong sa programa. Si Theodore Jaracz, membro sa Nagamandong Lawas sa mga Saksi ni Jehova, nagsilbing tsirman ug naghatag ug mubong sumaryo sa kasaysayan sa buluhatong pag-imprenta. Pinaagi sa mga interbiyo ug mga presentasyon sa video, ang mga membro sa Komite sa Sanga nga sila si John Larson ug John Kikot nagrepaso sa kasaysayan sa proyekto sa pagpanukod ug mga kalihokan sa pag-imprenta didto sa Tinipong Bansa. Si John Barr sa Nagamandong Lawas mihatag sa paniklop nga pakigpulong, nga gipahinungod kang Jehova nga Diyos ang bag-ong imprentahanan ug ang tulo ka puy-anang tinukod.

Pagkasunod semana, ang mga Bethelite gikan sa Patterson ug Brooklyn gihatagan ug kahigayonan nga makasuroy sa bag-ong mga pasilidad. Tanantanan, 5,920 ang miduaw nianang panahona.

Unsaon Nato Paglantaw ang Imprentahanan?

Sa pakigpulong sa pagpahinungod, gipahinumdoman ni Brother Barr ang iyang mga mamiminaw nga bisan pag makapahingangha tingali ang imprentahanan, dili ang makinarya ang labing bililhon. Ang mga tawo mao ang labing bililhon. Ang literatura nga atong giimprenta adunay dakong epekto sa kinabuhi sa mga tawo.

Ang matag usa sa bag-ong mga makina makaimprenta ug usa ka milyong tract sulod lamang sa kapig usa ka oras! Bisan pa niana, ang usa  lamang ka tract mahimong adunay layog-abot nga epekto sa kinabuhi sa usa ka tawo. Pananglitan, sa 1921 usa ka tem sa mga tigmentinar ug riles sa tren sa Habagatang Aprika nagkamulo pagtrabaho subay sa riles. Usa kanila, usa ka lalaki nga ginganlag Christiaan, nakakitag usa ka pirasong papel nga nasuksok sa ilalom sa riles. Kadto maoy usa sa atong mga tract. Gibasa kadto ni Christiaan uban ang dakong kaikag. Siya midagan sa pagpakigkita sa iyang umagad nga lalaki ug malipayong nagpahibalo: “Karon ako nang nakaplagan ang kamatuoran!” Wala madugay human niana, silang duha misulat aron sa pagpangayog dugang impormasyon. Ang sanga sa Habagatang Aprika nagpadala ug dugang literatura sa Bibliya. Ang duha ka lalaki nagtuon, nabawtismohan, ug nagpaambit sa kamatuoran sa Bibliya ngadto sa uban. Ingong resulta, daghan ang midawat sa kamatuoran. Ngani, sa sayong bahin sa 1990, kapin sa usa ka gatos sa ilang mga kaliwat maoy mga Saksi ni Jehova—ang tanan maoy resulta sa pagkakaplag sa usa ka tawo ug usa ka tract diha sa riles!

Si Brother Barr miingon nga ang literatura nga atong ginaimprenta nag-agak sa mga tawo ngadto sa kamatuoran, nagtabang kanila nga makapabilin diha sa kamatuoran, nagpalihok kanila nga mahimong mas masiboton, ug naghiusa sa kaigsoonan. Ug labaw sa tanan, ang literatura, nga niana kitang tanan adunay bahin sa pagpang-apod-apod, naghimaya sa atong Diyos, si Jehova!

Giunsa Paglantaw ni Jehova ang Imprentahanan?

Gihangyo usab ni Brother Barr ang mga mamiminaw nga tagdon kon giunsa paglantaw ni Jehova ang imprentahanan. Siya wala gayod magdepende niana. Mahimo niyang pasangyawon sa maayong balita ang mga bato! (Lucas 19:40) Dugang pa, dili gayod siya mahingangha sa kakomplikado, kadako, kapaspas, o sa kapasidad sa mga makina. Aw, siya ang naglalang sa uniberso! (Salmo 147:10, 11) Nahibalo si Jehova sa mas modernong mga paagi sa pagpatik ug literatura, mga paagi nga wala pa maimbento ni mosantop sa hunahuna sa mga tawo. Busa, unsa may makita ni Jehova nga iya gayong pabilhan? Walay duhaduha iyang makita niini nga imprentahanan ang bililhong mga hiyas sa iyang katawhan—ang ilang gugma, pagtuo, ug pagkamasinugtanon.

Giilustrar ni Brother Barr kon sa unsang paagi nalangkit ang gugma. Usa ka batang babaye ang naglutog keyk alang sa iyang mga ginikanan. Lagmit gayong malipay ang mga ginikanan. Oo, bisag maayong pagkapreparar ang keyk, ang makapalipay sa mga ginikanan mao ang gugma sa ilang anak, nga gipakita sa iyang pagkamanggihatagon. Sa susama, sa dihang motan-aw si Jehova niining bag-ong imprentahanan, dili lang tinukod ug makinarya ang iyang makita. Sa panguna, iyang gilantaw kana ingong paagi sa pagpahayag ug gugma alang sa iyang ngalan.—Hebreohanon 6:10.

Dugang pa, maingon nga gilantaw ni Jehova ang arka ingong pagpahayag sa pagtuo ni Noe, iyang gilantaw usab kining maong imprentahanan ingong makitang pamatuod sa atong pagtuo. Pagtuo sa unsa? Si Noe nagtuo nga kon unsay gitagna ni Jehova kini matuman gayod. Kita nagtuo nga kita nagkinabuhi sa kataposang mga adlaw, nga ang maayong balita mao ang labing hinungdanong mensahe nga gimantala sa yuta, ug hinungdanong madunggan kini sa mga tawo. Nahibalo kita nga ang mensahe sa Bibliya makaluwas ug kinabuhi.—Roma 10:13, 14.

Dayag nga si Jehova naglantaw usab niining maong imprentahanan ingong paagi sa pagpahayag sa atong pagkamasinugtanon. Sa ato nang nahibaloan, iyang kabubut-on nga ang maayong balita isangyaw sa tibuok yuta sa dili pa moabot ang kataposan. (Mateo 24:14) Kining maong imprentahanan, lakip niadtong atua sa ubang mga dapit sa yuta, adunay bahin sa pagtuman nianang sugoa.

Oo, ang gugma, pagtuo, ug pagkamasinugtanon nga gipasundayag diha sa pag-amot ug salapi, pagtukod, ug pagpadagan niini nga mga pasilidad gipasundayag usab diha sa masibotong kalihokan sa katawhan ni Jehova bisan asa samtang padayon nilang gimantala ang kamatuoran ngadto sa tanang buot magpatalinghog niana.

[Kahon/Mga hulagway sa panid 11]

PAG-USWAG SA PAG-IMPRENTA SA TINIPONG BANSA

1920: Ang mga magasin giimprenta ginamit ang unang rotary press, sa 35 Myrtle Avenue, Brooklyn.

1922: Gibalhin ang imprentahanan ngadto sa unom-ka-andana nga tinukod diha sa 18 Concord Street. Gisugdan pag-imprenta ang mga libro.

1927: Gibalhin ang imprentahanan ngadto sa usa ka bag-ong tinukod diha sa 117 Adams Street.

1949: Midoble ang gidak-on sa imprentahanan tungod sa nadugang nga siyam-ka-andana nga tinukod.

1956: Nadoble na usab ang gidak-on sa imprentahanan sa Adams Street sa dihang natukod ang bag-ong bilding diha sa 77 Sands Street.

1967: Gitukod ang napulo-ka-andana nga bilding. Tungod niana, ang mga imprentahanan nga konektado sa usag-usa maoy napulo ka pilo nga mas dako kay sa orihinal nga tinukod.

1973: Ang kaabag nga imprentahanan sa Wallkill gitukod, sa panguna alang sa pag-imprenta ug magasin.

2004: Ang imprentahanan, bindery, ug shipping sa Tinipong Bansa giusa na didto sa Wallkill.