Ang Panahon sa Pangilin—Matuman ba ang Imong mga Gidahom?

“Gimando ni Peter [the Great] nga himoon ang espesyal nga mga serbisyo sa Bag-ong Tuig diha sa tanang simbahan sa Enero 1. Dugang pa, iyang gimando nga ang nindot nga mga sanga sa evergreen gamiton sa pagdayandayan sa mga haligi sa sulod sa mga balay, ug iyang gimando nga ang tanang lungsoranon sa Moscow ‘magpasundayag sa ilang kalipay pinaagi sa pagpahalipayay sa kusog nga tingog’ sa usag usa sa Bag-ong Tuig.”—Peter the Great—His Life and World.

UNSAY imong gidahom sa gitawag sa kadaghanan nga panahon sa pangilin? Moingon ang katawhan sa tibuok kalibotan nga ang dugokan sa maong panahon mao ang Pasko, ang tradisyonal nga adlaw sa pagkatawo ni Kristo, apan naglakip usab kini sa pagsaulog sa Bag-ong Tuig. Busa kini maoy taas nga panahon sa bakasyon. Ang mga ginikanan ug mga anak mobakasyon tingali niining panahona, mao nga daw kini maayong kahigayonan nga magkauban ang mga pamilya. Apan, kining panahona tawgon sa uban nga “panahon sa Pasko,” sanglit buot nilang pasidunggan si Kristo niining panahona sa tuig. Basin mibati ka usab nga kini mao ang labing hinungdanong bahin sa maong panahon.

Kon kini maoy alang sa pagpasidungog kang Kristo, sa paglipaylipay uban sa imong pamilya, o alang nianang duha ka katuyoan, ang milyonmilyong bana, asawa, ug anak sa tibuok kalibotan nagpaabot gayod nga mahinamon sa maong panahon. Komosta man karong tuiga? Mosangpot kaha kini ingong espesyal nga panahon alang sa pamilya, ug espesyal nga panahon ba kini alang sa Diyos? Kon adunay panagtapok sa pamilya, matuman ba unya ang imong mga gidahom, o ikaw ba mahiubos?

Ang daghan nga nagpaabot nga mahinamon sa relihiyosong kinaiyahan makamatikod nga ang Pasko ug Bag-ong Tuig kasagarang saulogon nga walay espiritu ni Kristo. Sa kaatbang, ang panahon sa pangilin mahimong usa lang ka panahon sa pagdawat ug mga pinaskohan, usa ka katarongan aron magparti nga basin maglakip sa panggawi nga makapakaulaw kang Kristo, o usa lang ka katarongan aron magkatapok ang pamilya. Sa daghang higayon, ang maong panagtapok madaot tungod kay ang usa o mga sakop sa pamilya magpahutak ug kaon ug magpasobra sa pag-inom ug isog nga ilimnon nga makapabikil sa mga panaglalis nga kasagarang mopukaw sa kapintasan sulod sa pamilya. Tingali nakamatikod ka niana, o nakasinati ka pa niana.

Kon kana ang kahimtang, basin maghunahuna ka nga gamay ra kaayo ang kausaban sukad sa panahon sa Rusong Emperador nga si Peter the Great, nga gihubit sa sinugdan niining artikuloha. Kay natugaw sa kiling karon, daghan ang nanghinaot nga ang panahon sa pangilin mahimong panahon alang sa seryoso nga relihiyosong pagpamalandong ug sa makapalig-ong panag-uban sa pamilya. Ang pipila nag-awhag pa ganig kausaban, nga nagagamit ug mga panultihon sama sa, Si Jesus ang pasidunggan panahon sa Pasko. Apan ikapatuman ba ang kausaban? Ug kini magpasidungog ba gayod kang Kristo? Aduna bay mga katarongan nga magbaton kitag laing panghunahuna bahin sa panahon sa pangilin?

Aron makaplagan ang makapatagbawng mga tubag, atong tan-awon ang kahimtang pinaagi sa mga mata sa katawhan sa usa ka nasod nga angayng adunay espesyal nga katarongan sa pagpasalamat niining panahona sa tuig.