‘Iwali ang Kagawasan Ngadto sa mga Binihag’

SA SINUGDANAN sa iyang ministeryo, si Jesus miingon nga ang “pagwali sa kagawasan ngadto sa mga binihag” maoy bahin sa iyang buluhaton. (Lucas 4:18) Nga nagsundog sa panig-ingnan sa ilang Agalon, ang matuod nga mga Kristohanon nagwali sa maayong balita sa Gingharian ngadto sa “tanang matang sa mga tawo,” nga naghatag kanilag kagawasan gikan sa espirituwal nga pagkaulipon ug nagtabang kanila sa pagpauswag sa ilang kinabuhi.—1 Timoteo 2:4.

Karon, kining buluhatona naglakip sa pagsangyaw ngadto sa literal nga mga binihag—sa mga tawong nabilanggo tungod sa nagkalainlaing krimen ug buot mahigawas sa espirituwal nga paagi. Malingaw ka sa pagbasa niining makapadasig nga taho bahin sa mga kalihokan sa pagsangyaw sa mga Saksi ni Jehova diha sa mga bilanggoan sa Ukraine ug sa uban pang mga dapit sa Uropa.

Ang mga Nagiyan sa Droga Kaniadto mga Kristohanon na Karon

Sa 38 ka tuig nga pagkinabuhi ni Serhii, a ang 20 ka tuig niana iyang gigugol sulod sa bilanggoan. Nahuman pa gani niya ang iyang pagtungha diha sa bilanggoan. Matod niya: “Katuigan kanhi, nabilanggo ako tungod sa pagbuno, ug wa pa mahuman ang akong sentensiya. Diha sa bilanggoan ang akong panggawi sama sa usa ka diktador, mao nga ang ubang mga binilanggo nahadlok kanako.” Mihatag ba kadto kaniyag pagbati nga gawasnon? Wala. Sulod sa daghang katuigan, si Serhii naulipon sa droga, alkoholikong ilimnon, ug tabako.

Unya dihay usa ka kaubang binilanggo nga nagpaambit kaniya sa kamatuoran sa Bibliya. Kadto maorag usa ka bidlisiw sa kahayag diha sa kangitngit. Sulod sa pipila ka bulan, gihunong niya ang iyang mga bisyo, siya nahimong magwawali sa maayong balita, ug nabawtismohan. Si Serhii puliki na karon diha sa bilanggoan, nga nag-alagad ingong bug-os-panahong ministro ni Jehova. Nakatabang siyag pito ka kriminal sa pagbag-o sa ilang mga kinabuhi ug sila nahimong iyang espirituwal nga mga igsoon. Ang unom kanila gipagawas na, apan si Serhii nagpabilin pa sa bilanggoan. Siya wala maglagot niini tungod kay siya malipayon nga makatabang sa uban nga makagawas gikan sa espirituwal nga pagkabinihag.—Buhat 20:35.

Usa sa mga ginatun-an ni Serhii diha sa bilanggoan mao si Victor, usa ka tigpayuhot ug droga kanhi ug adik. Human makagawas sa bilanggoan, si Victor  nagpadayon sa pag-uswag sa espirituwal ug sa ngadtongadto migraduwar sa Tunghaan sa Pagbansay sa Ministeryo sa Ukraine. Karon siya nag-alagad ingong espesyal payunir nga ministro sa Moldova. Si Victor miingon: “Nanabako na ko sa edad nga 8 anyos, nag-abuso sa alkoholikong ilimnon sa edad nga 12 anyos, ug naggamit ug droga sa edad nga 14 anyos. Gusto nakong bag-ohon ang akong kinabuhi, apan napakyas ang tanan kong paningkamot. Dayon niadtong 1995, sa dihang kaming magtiayon nagplano na nga mobiya sa among daotang mga kauban, ang akong asawa gidunggab sa usa ka tawo nga buangon ug mamumuno ug siya namatay. Hilabihan gyod nakong guola. ‘Hain na ang akong asawa karon? Unsay mahitabo kon ang usa ka tawo mamatay?’ Daghan kog pangutana apan wala nako makaplagi ang mga tubag. Migamit kog daghang droga aron matagbaw ang maong kahaw-ang. Nadakpan kong nagpayuhot ug droga ug nasentensiyahan nga mabilanggo ug lima ka tuig. Didto sa bilanggoan, gitabangan ko ni Serhii sa pagkakaplag sa mga tubag. Gipaningkamotan ko sa makadaghan nga makalingkawas gikan sa mga droga, apan niadtong tungora lang ko nagmalamposon tungod sa tabang sa Bibliya. Gamhanan kaayo ang Pulong sa Diyos!”—Hebreohanon 4:12.

Ang Mangtas nga mga Kriminal Nagbag-o

Si Vasyl wala gayod makagamit ug droga, apan siya binihag gihapon. “Nagiyan ako sa kickboxing o pagpatid ug pagboksing,” matod niya. “Ako nagbansay aron akong makulata ang mga tawo nga walay makitang mga labhag.” Gigamit ni Vasyl ang kapintasan aron kawatan ang mga tawo. “Katulo akong nabilanggo, mao nga gidiborsiyohan ko sa akong asawa. Sulod sa kataposang lima-ka-tuig nga sentensiya, nakabasa ako sa mga basahon sa mga Saksi ni Jehova. Kadto mitukmod kanako sa pagbasa sa Bibliya, apan nalangkit gihapon ko sa akong gikaikagan pag-ayo—ang kickboxing.

“Apan, human sa unom ka bulan nga pagbasa sa Bibliya, may kausabang nahitabo kanako. Ang pagdaog sa usa ka away wala na makapatagbaw kanako sama kaniadto. Busa akong gitimbangtimbang ang akong kinabuhi pinasukad sa Isaias 2:4 ug akong naamgohan nga gawas kon akong usbon ang akong panghunahuna, magtingkagol gyod ko sa bilanggoan sa tibuok nakong kinabuhi. Busa akong gilabay ang tanan nakong kagamitan sa kickboxing ug gisugdan ang pagbag-o sa akong personalidad. Dili kadto sayon, apan ang pagpamalandong ug pag-ampo sa ngadtongadto nakatabang kanako sa pagpukgo sa akong daotang mga batasan. Usahay, maghilak kong mangaliyupo kang Jehova nga hatagan unta akog kusog nga makalingkawas gikan sa akong pagkagiyan. Sa kataposan, ako milampos.

 “Human makagawas sa bilanggoan, ako nahiusa pag-usab sa akong pamilya. Karon ako nagtrabaho sa minahan sa karbon. Kini naghatag kanakog igong panahon sa pagpakigbahin sa buluhatong pagsangyaw uban sa akong asawa ug sa pagtuman sa akong mga kaakohan sa kongregasyon.”

Si Mykola ug ang iyang mga higala nanulis ug daghang bangko sa Ukraine. Tungod niana siya nasentensiyahag napulo-ka-tuig nga pagkabilanggo. Sa wala pa siya mabilanggo, kausa lang siya nakasimba—aron makapangandam sa pagpanulis niadtong simbahana. Napakyas ang maong plano, apan ang maong pagsimba nakapatuo kang Mykola nga ang Bibliya naundan lang ug makalaay nga mga sugilanon bahin sa mga paring Ortodokso, kandila, ug relihiyosong mga kasaulogan. Matod niya: “Wa ko masayod kon nganong nagsugod na man kog basa sa Bibliya. Nahibulong ko sa akong nadiskobrehan nga kadto lahi kaayo sa akong gihunahuna!” Mihangyo siyag usa ka pagtuon sa Bibliya ug nabawtismohan niadtong 1999. Kon tan-awon siya karon, dili ka makatuo nga kining mapaubsanong ministeryal nga alagad usa diay ka mangtas nga tulisan ug bangko kaniadto!

Si Vladimir gisentensiyahag kamatayon. Samtang nagpaabot nga ipatuman ang maong sentensiya, siya miampo sa Diyos ug misaad nga siya moalagad Kaniya kon dili madayon ang pagpatay kaniya. Kasamtangan, nausab ang balaod, ug ang iyang sentensiya nga kamatayon nahimo na lang nga tibuok-kinabuhing pagkabilanggo. Aron matuman ang iyang gisaad, gipangita ni Vladimir ang tinuod nga relihiyon. Nagpaenrol siya sa usa ka eskuylahan pinaagig sulat ug nakadawat ug diploma gikan sa Adventista nga simbahan, apan wala siya matagbaw.

Apan, human makabasa sa mga magasing Ang Bantayanang Torre ug Pagmata! diha sa librarya sa bilanggoan, si Vladimir misulat ngadto sa sangang buhatan sa mga Saksi ni Jehova sa Ukraine, ug mihangyo nga duawon siya. Sa dihang giduaw siya sa mga igsoon sa maong dapit, giisip na niya ang iyang kaugalingon nga usa ka Saksi ug nagsangyaw na siya diha sa bilanggoan. Gitabangan siya nga mokuwalipikar ingong magmamantala sa Gingharian. Sa pagsulat niining artikuloha, si Vladimir ug ang pito pang uban sa maong bilanggoan mga bawtismohanan na. Apan duna silay problema. Sanglit ang mga binilanggo nga may tibuok-kinabuhing sentensiya giusa man sa usa ka selda sumala sa ilang relihiyon, si Vladimir ug ang iyang mga kauban sa selda parehog relihiyon. Busa kinsa may ilang sangyawan? Sila nagsangyaw sa maayong balita ngadto sa mga guwardiya sa bilanggoan ug pinaagig mga sulat.

Si Nazar mibalhin gikan sa Ukraine ngadto sa Czech Republic, diin siya mianib sa usa ka grupo sa mga kawatan. Tungod niana siya nabilanggo ug tulo ka tuig ug tunga. Samtang didto sa bilanggoan, siya misanong sa mga pagduaw sa mga Saksi ni Jehova gikan sa siyudad sa Karlovy Vary, nakakat-on sa kamatuoran, ug bug-os nga nabag-o. Sa pagkakita niini, usa sa mga sekyuriti gard miingon ngadto sa mga kauban ni Nazar sa selda: “Kon kamong tanan mahisama niana nga Ukrainiano, mangita kog laing trabaho.” Ang lain pa miingon: “Eksperto gayod ang mga Saksi ni Jehova. Ang usa ka tawo mabalhog sa bilanggoan ingong usa ka kriminal; apan mogawas ingong desenteng tawo.” Karon si Nazar nahiuli na sa ilaha. Nakakat-on siya sa pagpamanday ug naminyo, ug siya ug ang iyang asawa anaa sa bug-os-panahong ministeryo. Pagkadako sa iyang pagpasalamat nga ang mga Saksi miduaw kaniya didto sa bilanggoan!

Opisyal nga Pag-ila

Ang mga binilanggo dili kay mao ra ang mapasalamaton sa pag-alagad nga ginahimo sa mga Saksi ni Jehova. Si Miroslaw Kowalski, usa ka tigpamaba sa usa sa mga bilanggoan sa Polandia, miingon: “Gipasalamatan gayod namo ang ilang mga pagduaw. Ang pipila ka binilanggo adunay makapasubong mga kaagi. Tingali wala sila trataha ingong mga tawo. . . . Bililhon kaayo ang tabang [sa mga Saksi] tungod kay kulang mig mga kawani nga makatabang sa pag-edukar sa mga binilanggo.”

Ang warden sa laing bilanggoan sa Polandia misulat ngadto sa sangang buhatan, nga mihangyo sa mga Saksi sa pagpauswag sa ilang kalihokan diha sa iyang bilanggoan. Ngano? Siya mipatin-aw: “Ang mas subsob nga pagduaw sa mga hawas sa Watchtower makatabang sa mga binilanggo sa pag-ugmad ug maayong mga hiyas nga gikinahanglan diha sa katilingban, nga makapukgo sa ilang pagkaagresibo.”

Usa ka mantalaan sa Ukraine nagtaho bahin sa usa ka magul-anong binilanggo nga gustong maghikog apan natabangan sa mga Saksi ni Jehova. “Sa pagkakaron, kining tawhana hapit nang maulian sa emosyonal nga paagi,” matod sa taho. “Siya nagsunod na sa mga lagda sa bilanggoan ug maoy usa ka panig-ingnan sa ubang mga binilanggo.”

 Mga Kaayohan nga Gikahatag sa Pagkinabuhi sa Gawas sa Bilanggoan

Ang mga kaayohan sa nahimo sa mga Saksi ni Jehova dili lamang limitado sa sulod sa bilanggoan. Kini magpadayon sa pagkagawas sa mga binilanggo. Duha ka Kristohanon, si Brigitte ug Renate, nagtabang nag mga binilanggo niining paagiha sulod sa daghang katuigan. Ang usa ka Alemang mantalaan, Main-Echo Aschaffenburg, nagtaho bahin kanila: “Ilang giatiman ang mga binilanggo sulod sa tulo ngadto sa lima ka bulan human sila makagawas, nga nagdasig kanila sa pagkaplag sa katuyoan sa kinabuhi. . . . Sila usab opisyal nga giila ingong mga boluntaryong kawani nga magtaho ug magmatikod sa panggawi sa mga priso kabalyero. . . . Sila usab adunay maayo ug makapalig-ong pagpakiglabot sa mga kawani sa bilanggoan.” Ubay-ubayng mga tawo ang nakapahinungod sa ilang kinabuhi kang Jehova tungod niining matanga sa tabang.

Bisan ang mga opisyales sa bilanggoan nakabatog kaayohan sa edukasyonal nga buluhaton sa mga Saksi ni Jehova bahin sa Bibliya. Pananglitan, si Roman maoy usa ka komandante sa kasundalohan ug usa ka sikologo sa usa ka bilanggoan sa Ukraine. Sa dihang miduaw ang mga Saksi kaniya sa iyang balay, miuyon siyang magtuon sa Bibliya. Dayon iyang nahibaloan nga ang mga Saksi wala tugoti sa pagpakigkita sa mga binilanggo diin siya nagtrabaho. Busa iyang gihangyo ang warden nga tugotan siyang mogamit ug Bibliya diha sa iyang trabaho uban sa mga binilanggo. Gitugotan ang iyang hangyo, ug mga napulo ka binilanggo ang nagpakitag interes. Si Roman regular nga nagpaambit sa iyang nagdakong kahibalo bahin sa Bibliya uban sa maong mga binilanggo, ug ang iyang mga paningkamot may maayo kaayong mga resulta. Human makagawas, ang pipila nagpadayon sa pag-uswag ug nabawtismohan ingong mga Kristohanon. Kay nakakita sa gahom sa Pulong sa Diyos, si Roman nahimong mas seryoso sa iyang pagtuon. Mibiya siya sa pagkasundalo ug gipadayon ang iyang pagtuon sa Bibliya. Karon siya nakigbahin diha sa buluhatong pagsangyaw uban sa usa ka binilanggo kanhi.

“Dinhi gipalig-on kami sa Bibliya, mga publikasyon sa Bibliya, ug pagtuon sa Bibliya,” misulat ang usa ka binilanggo. Kining mga pulonga haom nga nagpakita nga adunay panginahanglan sa mga literatura sa Bibliya diha sa pipila ka bilanggoan. Ang usa ka kongregasyon sa Ukraine nagtaho sa ilang edukasyonal nga buluhaton bahin sa Bibliya diha lokal nga bilanggoan: “Mapasalamaton ang administrasyon sa mga literatura nga among gisuplay. Gisuplayan namo silag 60 ka kopya sa matag gula sa Ang Bantayanang Torre ug Pagmata!” Ang lain pang kongregasyon misulat: “Giatiman namo ang usa ka koreksiyonal nga bilanggoan nga dunay 20 ka gagmayng mga librarya. Gihatagan namo ang matag librarya sa atong pangunang mga publikasyon. Mikabat kinig 20 ka kahon sa mga literatura.” Diha sa usa ka bilanggoan, gipayl sa mga guwardiya ang atong mga magasin diha sa librarya aron makakuhag kaayohan ang mga binilanggo gikan sa matag gula.

Niadtong 2002, ang sangang buhatan sa Ukraine nagtukod ug Prison Desk. Sa pagkakaron, ang maong departamento nakakontak ug mga 120 ka koreksiyonal nga mga bilanggoan ug nag-asayn ug mga kongregasyon nga maoy moatiman kanila. Matag bulan, mga 50 ka sulat ang madawat, kadaghanan niana naghangyog literatura o pagtuon sa Bibliya. Ang sangang buhatan magpadalag mga libro, magasin, ug mga brosyur ngadto kanila hangtod makontak sila sa lokal nga mga igsoon.

“Hinumdomi silang mga binilanggo nga may mga talikala,” misulat si apostol Pablo ngadto sa iyang mga isigka-Kristohanon. (Hebreohanon 13:3) Ang iyang gitumong mao kadtong mga nabilanggo tungod sa ilang pagtuo. Karon, ang mga Saksi ni Jehova naghinumdom niadtong mga nabilanggo, nagduaw sa mga bilanggoan, ug ‘nagwali ug kagawasan ngadto sa mga binihag.’—Lucas 4:18.

[Footnote]

[Hulagway sa panid 9]

Paril sa bilanggoan, sa L’viv, Ukraine

[Hulagway sa panid 10]

Si Mykola

[Hulagway sa panid 10]

Si Vasyl uban sa iyang asawa, si Iryna

[Hulagway sa panid 10]

Si Victor